تعلم البرمجة من المنزل 2025 مجانا
قم بتسجيل الدخول للقيام بالتعليق
تسجيل الدخولفي الوقت الراهن أصبحنا في عالم رقمي بيتطور بسرعة، و تعلم البرمجة بقى مهارة أساسية من ضمن مهارات واقعنا الحالي وكمان المستقبل، وتعلمها مش بس للمبرمجين، لكن بقى لأي حد عايز يواكب سوق العمل في 2025، وزيادة على كده كمان هو زيادة الطلب المرتفع على المبرمجين وكمان رواتب المبرمجين المرتفعة بتخليها فرصة قدامك إنك تفتح لنفسك سوق عمل جديد.
تعلم البرمجةالنهاردة تقدر إنك، تتعلم البرمجة من المنزل بكل سهولة، لأن المصادر المتاحة أونلاين بقيت كتيرة جدا منها المجاني واللي تقدر تتعلم منه بكل سهوله من غير متحتاج أي كورسات مدفوعة، دورات مجانية و مشاريع عملية تقدر تنفذها بنفسك وتطبق على كل اللي إتعلمته بكل سهولة.
في المقال ده، هنتكلم عن أهم الخطوات اللي محتاج تبدء بيها، وايه هي التخصصات ولغات البرمجة بتاعتها اللي محتاج تتعلمها، وأهم الأدوات اللي هتساعدك، وإزاي تحول مهارتك لوظيفة حقيقية، جهّز قهوتك، وخلينا نبدأ الرحلة مع بعض! 🚀💻
لماذا يعتبر تعلم البرمجة من المنزل في 2025 خيارًا مثاليًا؟
في 2025، تعلم البرمجة من المنزل بقى أسهل وأيسر بكتير أوي بفضل التطور الكبير اللي حصل وبسبب انتشار وتوفر المصادر التعليمية المجانية، وفرت بشكل كبير جدًا فرصة لأي حد عايز إنه يبدأ في أي وقت قرر فيه إنه يبدء وبدون قيود الوقت أو المكان.
- مرونة التعلم: تقدر إنك تتعلم في أي وقت وأي مكان يناسبك.
- توفير التكاليف: مش محتاج تدفع مبالغ كبيرة، لأن فيه مصادر مجانية ومدفوعة بأسعار معقولة.
- سهولة الوصول لمصادر قوية: كورسات، كتب، فيديوهات.
- فرص العمل عن بعد: كتير جدا من الشركات اللي موجوده بقيت بتدور على مبرمجين يشتغلوا من غير ما يتقيد وجودهم في الشركة.
⚠️ تعلم البرمجة محتاج إنك تكون محددها كهدف ومحتاج منك التزام علشان تحقق هدفك وتنجح نجاح حقيقي.
كيف أبدأ في تعلم البرمجة من الصفر؟
أول خطوة في مراحل تعلم البرمجة من الصفر هي تحديدك لهدفك، هل عايز تبقى مبرمج ويب، ولا عاوز مبرمج تطبيقات موبايل، ولا مهتم إنك تتعلم برمجة الذكاء الاصطناعي؟ تحديد المسار اللي عايز تبدأ بيه من البداية بيساعدك في إنك تختار اللغة والأدوات المناسبة.
بعد تحديد المسار، ابدأ بإنك تتعلم أساسيات البرمجة، في كورس سهل جدا ومناسب جدا للمبتدئين وموجود على يوتيوب لمستر إبراهيم عادل صاحب قناة ذا أميركان إنجليش الكورس إسمه تعلم أساسيات البرمجة للمبتدئين ، من خلال ذلك ستفهم بشكل منطقي مبادئ اللغات البرمجية.
طيب لو معنديش أي خبرة في الكمبيوتر خالص أو خبرتي قليلة، ممكن تبدأ تتفرج على كورس يعلمك مبادئ الكمبيوتر من الصفر من أول إزاي تفتح الكمبيوتر لحد ما تحترف الكمبيوتر، في كورس مشهور جدا مجانا موجود على يوتيوب إسمه تعلم اساسيات الكمبيوتر للمبتدئين Computer for beginners وبكده نكون حطينا إيدينا على أول الطريق وذكرنا مواقع تعلم البرمجة للمبتدئين بالعربية.
ما هي أسهل لغة برمجة للمبتدئين؟
السؤال ده الحقيقة ليه أكتر من إجابة، ولكن بيرجع على حسب هدفك إنت، هل عاوز تخصص معين زي إنك تتعلم برمجة تطبيقات الموبايل أو إنك تتعلم برمجة الويب، أو برمجة الذكاء الإصطناعي والآلة الماشين ليرنينج، ولا حابب إنك تدخل مجال برمجة الألعاب، أو مجال الأمن السيبراني، أو قواعد البيانات وغيرها من المجالات الأخرى.
كل مجال من المجالات دي ليه الأدوات والإستخدامات الخاصه بيه، طيب لو أنا حددت هدفي وقولت خلاص عاوز أتعلم برمجة الويب إزاي أقدر أتعلمها.
ازاي ابدا في مجال الويب؟
برمجة الويب من المجالات المشهورة جدا في مجالات البرمجة ومن المجالات المطلوبة في سوق العمل وسهل إنك تتعلمها، همشي معاك الموضوع خطوة خطوة من أول ما تحط رجلك على الطريق لحد ما تكون مبرمج ويب محترف بس بشرط شوية إلتزام وعزيمة وصبر منك، وإنك تتعلم من غير ما تشتت تفكيرك في كذا حاجه تانية وإن الذكاء الإصطناعي هياخد مكاني وكل ده يبقي مش هتتعلم.
هنبدأ الأول إننا نشرح كل لغة بتعمل إيه ببساطة وبعد كده هسيب مصدر واحد تتعلم منه مرتبط ببعضه منعًا للتشتيت.
علشان تتعلم برمجة الويب محتاج إنك تتعلم لغة برمجة إسمها لغة HTML، هي مش لغة برمجة، لكنها بتحددلي عناصر الصفحة زي العناوين، النصوص، الصور، والروابط، وهي سهله جدا إنك تتعلمها، ليها كورسات مجانية كتير جدا على يوتيوب فيه كورس للزيرو مهم جدا إنك تبدء بيه هيحط رجلك على أول الطريق.
دي أول لغة محتاج إنك تتعلمها في برمجة الويب، تاني لغة محتاج إنك تتعلمها هي لغة CSS، وهي اللي بتخليك تقدر إنك تحوّل صفحات الويب من مجرد إنها نصوص وصور عادية لتصميمات شكلها جذاب ومنسق، من بين كل الكورسات المجانية الموجودة أنصحك إنك تتعلم من كورس الزيرو موجود مجاني على يوتيوب.
في كل خطوة من الخطوات هتكون بتطبق تطبيقات بسيطة، بعد ما تتعلم اللغة هتحتاج إنك تطبق على كل اللي إتعلمته في شكل مشاريع هتنقل مستواك في حته تانية خالص، جايبلك 4 مشاريع تطبق عليهم ومشروحين بكل بساطة على يوتيوب.
بعد كده محتاج إنك تتعلم مكتبة توفر عليك كتابة الأكواد وتخلي الموقع بتاعك متجاوب على كل الشاشات الكمبيوتر والموبايل والتاب، يعني بإختصار، Bootstrap هو الحل السريع اللي هيسهل عليك إنك تعمل تصميم مواقع إحترافية بدون مجهود كبير.
بعد كده محتاج تتعلم SASS بيسهّل عليك جدا كتابة أكواد CSS بشكل منظم وبيوفر عليك وقت ومجهود في التصميم.
بعد كده محتاج إنك تتعلم لغة برمجة JavaScript بتستخدم إنها بتخلي الويب يكون بشكل تفاعلي، هي اللي بتضيف الحياة والتفاعل لمواقع الويب، بتشتغل مع HTML وCSS.
بعد كده محتاج إنك تتعلم حاجه تسهل عليك الشغل زي مكتبة VUEJS بتخليك تبني مواقع احترافية بتحديثات سريعة، سهل التعديل.
مصادر تعلم برمجة الويب مترتبة خطوة بخطوة حسب ما ذكرتها.
- HTML للزيرو
- تعلم لغة CSS للزيرو
- المشروع الأول
- المشروع الثاني
- المشروع الثالث
- المشروع الرابع
- بوتستراب
- SASS
- تعلم لغة برمجة JavaScript
- تعلم VUEJS
ذكرنا طريق وخطة مراحل تعلم برمجة الويب خطوة بخطوة، المطلوب منك دلوقتي إنك تتوكل على الله وتجتهد وتصبر، وتأكد إنك إن شاء الله هتوصل.
تعلم برمجة تطبيقات المحمول
اللي عامل ثورة حاليًا في عالم برمجة تطبيقات الهاتف المحمول، هو إطار عمل FLUTTER طورته شركة جوجل.
وفلاتر بإختصار بيسهل عليك إنك تبرمج تطبيقات الأندرويد وآيفون مع بعض من غير متحتاج إنك تكتب كود لكل نظام تشغيل لوحده.
علشان تتعلم إطار عمل FLUTTER لازم إنك تتعلم الأول لغة برمجة DART، واللغة دي مبني عليها إطار عمل FLUTTER، يعني لو إتعلمتها فخلاص يعتبر إنك إتعلمت فلاتر لأنها هي اللي بتشغل فلاتر.
ذكرنا أهم مجالين في البرمجة وإزاي إنك تقدر تبدء من الصفر، وخطوات تعلم كل مجال.
تعلم البرمجة من المنزل في 2025 بقى أسهل من أي وقت فات، خصوصًا مع المصادر المجانية، والأدوات الكتير اللي بقيت متاحه، الأهم في التعلم هو الإستمرارية، والتطبيق العملي، ابدأ من دلوقتي ومتضيعش الفرصة.
محمد الحناوي
كاتب تقني ومحررهدفي تبسيط المعرفة وتقديمها بأسلوب سهل ومباشر، بحيث تكون متاحة لأي شخص يبحث عنها، في أي وقت. ✍️🚀
تصفح صفحة الكاتب