سلسلة ياسمينة الروح-الموسم الرابع( مذكرات عاطفية ٢ )-الحلقات ١٤-١٥

الحلقة الرابعة عشرة :

ج١

تدوم الصداقة بالوفاء

وتدوم المحبة بالاهتمام ..

_______________

____________

منى : والله اهلا وسهلا بالصبايا

ريم / ديمة / سيرين : اهلين فيكي خالتو

سهى : خيانة لآيات ههههه

منى : لو احكيلها بتترك الشغل وبتيجي

ديمة : متهورة هههههه

ريم : كيف صحتك خالتو ؟

منى ( مبتسمة ) : الحمدلله، هيني ماشية على قوانين اولادي هههه ومنبهات آيات عالموبايل عشان كل دوا اله موعده

ديمة : اه ضروري تلتزمي، الله يشفيكي ويخفف عنك يارب

سهى : امين

سيرين : بس نحفانة شوي انتي

منى : اه والله بخفف قد ما بقدر، عشان ما ازيد على حالي امراض انا بغنى عنها

سهى : من غير شر ( عيونها عالبنات ) حبينا نيجي نباركلك بحمل ياسمين، عقبال ما تقوم بالسلامة

منى ( تنهدت بحسرة ) : الله يبارك فيكي، وعقبال سلامة ديمة ( عيونها على سيرين ) حكالك حمزة انه شافني صح ؟

سيرين ( متلبكة ) : اه ؟ ما فهمت عليه صراحة انتي كنتي وين ؟

منى : ههههه شو مالك ؟ خايفة تحكي

سيرين : ...

سهى : معقول بتوصلي بيتها وما بتدقي ؟ شو ما بدها تعمل تعمل المهم انتي تريحي ضميرك

منى : اي ضمير ؟ انا لو عندي ضمير ما بحكي مع بنت اختي هالحكي بس الشيطان اشطر مني كان وقدر عليي

انس ( اجا فجاة ) : تفضلو

ديمة : يسلمو ايديك، ولك شو عامل بحالك ؟ نسينا شكلك ها

سيرين : ههههه جد كتير متغير، احكيلنا كيف كانت الامتحانات؟

انس : الحمدلله اشي صعب واشي سهل، وان شاءالله خير

ريم : يارب، الله يفرحنا بنجاحك انت ورنين

منى : يا حبيبي كل المشاكل اجت بوقت دراسته، ما بسامح حالي ازا نزل معدله

انس ( بنبرة حادة ) : يمة ؟! مو حكتلك ما تحكي هالاشي مرة ثانية

سيرين : ما بصير هيك خالتو، انتي ما الك ذنب صدقيني سواء انتي او ياسمين وحتى كلنا؛ عبارة عن ضحايا للعبة وسخة من اشخاص اوسخ

سهى : اه والله

سيرين : لا تفكروا ماما قادرة تستوعب انه محاولة مع بابا

ديمة : لسا قولي ابوكي على طول تكتم وعرف الحقيقة بس خالتو مها اللي كانت رح تخرب بيتها

منى : يومها ياسمين اتصلت فيي تحكيلي

انس : وصار امجد يعلق لو كل وحدة مثل خالتي مها بتحرد كان بتسود ظاهرة الزواج الثاني

الجميع : هههههههه

////

علاء : تعالوا نقعد شوي مع خالتي

امجد : ديروا بالكم تجيبوا سيرة حتى لامهاتكم عن حالة احمد، ما بدي يوصل حكي لامي

قصي : ولا يهمك، وانت كمان خليك معه وحاول معه

امجد : بحاول قد ما اقدر، بالنهاية احمد وانت عارف عقله صعب يتجاوب

_______________________________

لون الحياة تحول بعيوني لاسود، وتسكرت ابواب السعادة بوجهي، وما عرفت اي طريق لازم امشي؛ حتى اقدر اكمل مشواري اللي ابتدأ ..

احمد ( بدور عليي ) : ياسمين ؟ وينك

كان الي ساعات بهالوضع، ولانه تاخر عليي وبدون اي تواصل بيناتنا، منظري كان اصعب من كل تخيلاته ..

احمد ( قعد عالارض وايده على وجهي ) : ياسمين ؟ شو مالك ؟

ياسمين ( معلقة عيوني باتجاه وجهه ) : ...

احمد ( بضرب فيي ضربات خفيفة ) : ياسمين ! انتي منيحة حبيبتي ( بنبرة خوف ) جاوبيني احكي اي اشي

ياسمين ( غمضت عيوني ) : ...

احمد ( بخوف شديد ) : عم ترجفي كثير، ليه هيك حالتك ؟ شو صاير معك

ما بعرف ازا فهم عليي او لا، بس غير وضعيته وركز ظهره على التخت مكان ما كان قاعد وانكمش على حاله وغمر وجهه برجليه ..

////

يارب تريح بالي وقلبي اللي مشتهي يذوق طعم الراحة، يارب هالبنت ما الها ذنب ساعدني لاقدر اسعدها وما اظلمها اكثر ..

انا واياها بغربة وحالتنا ما بعلم فيها الا انت، اعطيني القوة يارب لاقدر اتجاوز كل المحن اللي بنعيشها، ونكمل حياتنا بالسعادة اللي حلمنا فيها من سنين ..

احمد ( ببكي ) : يااارب

ياسمين ( نهضت حالها على صوتي ) : احمد ؟ ارفع راسك

قعدت جنبي وشدتني لعندها، كانت حنونة كثير عليي وخايفة بشكل لا يوصف ..

ياسمين ( حاضنتني ) : يا قلبي، بترجاك لا تعمل هيك خلص انا منيحة

احمد ( رميت حالي عند رجليها ) : انا بترجاكي تسامحيني، وتسامحي اهلي، ياسمين انا رح اموت نهايتي قربت

ياسمين ( رفعتني بقوة ) : قووووم، انت مكانك هون بقلبي وبين ايدي، وما في اشي بستاهل تعمل هيك مشانه

احمد ( ثبتت راسها بايدي ) : طيب ليه هيك حالتك ؟ بسببي صح ؟ انا قسيت قلبي عليكي وما كملت فرحتك

ياسمين ( بترجف ومو قادرة تحكي ) : ...

احمد : ليه بترجفي هيك ؟ احكيلي بوجعك اشي ؟

كانت كل النهار بدون اكل، ونفسيتها سيئة، وكانها بتحاول تموت حالها ..

احمد ( بعتب ) : انه عادي ؟

ياسمين ( خجلانة ) : ما بعرف

احمد : لا بتعرفي، وست العارفات كمان

ياسمين : ...

احمد ( مسكت ايديها ) : لا ياسمين اوعي توصلي لهيك مرحلة، مرقتي بظروف اصعب ما رح يهزك زلمة تغير عليكي، حتى لو كنت انا، وبتعرفي شو يعني انا

ياسمين ( نزلوا دموعها ) : مو قادرة اتحمل اكتر من هيك، احمد انت املي الوحيد القشة اللي تعلقت فيها بعز غرقي، واخر اشي هيك تعمل فيي ؟

كلامها كله صحيح، وانا مقتنع فيه وعارف خطأي اللي عملته فيها ..

ما قدرت اجاوبها، تركت عيوني تعبرلها عن ندمي، وايدي اللي بطعموها ..

دليل عن خوفي وحبي الكبير تجاهها، وهالحب هو اللي موصلنا لهيك حالة ..

////

حبك هو ..

قوتي، وضعفي ..

رغبتي بالموت، وتمسكي بالحياة ..

انسحابي، ورجوعي للمواجهة ..

ياسمين : شو قالوا لما خبرتهم عن الحمل ؟

احمد : انبسطوا كثير، وكانوا بدهم يباركولك، بس قلتلهم اني برا البيت

ياسمين : ... باركولي اخوانك

احمد : فيهم الخير

ياسمين : اصلا ما انقطع تواصلي معهم، بالعكس من اول يوم امجد حكتلك شو عمل

احمد : ياسمين، ما في داعي لهالحكي، اتفقنا ننسى ونعيش كانه ما صار اللي صار

ياسمين ( هزيت راسي ) : تمام

_______________________________

مها ( بألم ) : واصلة بيتي ؟

هيثم : ...

سهى : عاتبناها وقلنالها لو دقيتي

مها ( ببكي ) : يا الله، طيب انا شو كنت رح اعمل وقتها ؟ كيف بدنا نتطلع بعيون بعض ؟

هيثم : بتطلعوا، نسيتي انكم خوات

مها : خوات ؟ واللي عملته في اخت بتعمله في بنت اختها ؟

سهى : ...

هيثم : والنهاية ؟

مها : ما بعرف، صعب اتخيلها، بس حتى لو سامحنا مستحيل ننسى

صدموني بالكلام اللي حكولي اياه عن اختي منى، كل اشي ممكن اتحمله الا اني ارجع التقي فيها ..

ما بعرف شو بدنا نحكي ؟، لو طلبت مني المسامحة شو ارد عليها ؟، معقول اتجرا واحكيلها ما بنسالك اللي عملتيه في بنتي ؟ ..

مرقت عليي ليالي ما دقت طعم الراحة فيهم، وبنفس الوقت ما غابت عن بالي ..

اغمض عيوني واتذكر ملامحها الطيبة، بعدين ارجع اتزكر قسوتها وكلامها الجارح لبنتي واتهاماتها ..

////

نهى : يعني لسا عند موقفها، الله يهديها ويهدينا

سهى : طيب انتي ليه ما بتروحي عندها ؟

نهى : شو احكي اكتر من اللي انتوا حكيتوه ؟

سهى : مو ضروري تحكي بهالموضوع، زيارة عادية سهرة عائلية انتي وابو علاء، يعني عاملة حزب مع منى ليه ؟ هاي اختك وهديك اختك كمان

نهى : والله معك حق بس انا ما بعرف اضل ساكتة، وخايفة ازيد عليها وتطلع عتبانة عليي كمان

سهى : هاي آخرتنا، كل وحدة تحمل بقلبها عالتانية ؟ توكلي على الله وروحي وما حدا عتبان اتطمني

نهى : طيب بشوف

سهى : بنروح احنا معكم كمان

نهى : فكرة حلوة، يلا رتبيها وخبريني

سهى : امري لله، تحولت لوسيطة ههههه

نهى : الله يسعدك هههه انتي وانا الوسط دايما هيك

////

ريم : هاي امي محتارة بخواتها ومو عارفة شو تعمل

علاء : شو رايك ندحش حالنا احنا كمان، عشان صرنا من جماعة العائلات ههههع

ريم : فكرة جميلة واشجعها بقوة

علاء : وبحكي لحمزة كمان عشان بلكي بوجوده تخف المشاحنات

ريم : هههههه

علاء : الله يجيب العواقب سليمة

////

حمزة : اه والله من زمان ما قعدنا معهم، خلص خبريهم انه جايين احنا كمان

سيرين : حبيت ههههه

حمزة : مسكين عمي ابو امير، ابو احمد غالي عليه كثير ودايما احسهم مثل الاخوة فجاة هيك يصير فيهم

سيرين : شو بدنا نعمل هيك نصيبهم، ان شاءالله فترة وبتعدي

////

زياد : اهلا وسهلا فيهم

مها : اهلين فيك، ما بعرف شو قصتهم فجاة لموا حالهم

حنين : كانوا استنوكي لما تولدي ههههه

رنين : او للنتائج مثلا

زياد : اه والله النتائج، هالصيفية حافلة بالاحداث كانت

مها : ... على خير

////

علاء : ليه ما اجا قصي ؟

سهى : قال للعائلات فقط، استحى يجي

ريم : ههههههه نهفة اخوي

ابو قصي : بالعكس صاير كثير عاقل، ويا دوب يحكي

سهى : من يوم يومه عاقل، بس بنهبل على خواته ومع اصحابه

علاء : ما في منه، يلا هي وصلنا

ريم : خليني احكي مع سيرين حكتلي احكولي بس توصلوا

نهى : قلبي بدق، حاسة حالي رايحة على حرب

ابو علاء : هسة بس تشوفي خواتك بروح التوتر

نهى : انبسطت انه سيرين وعلاء اجوا معنا

ابو علاء : خير ما عملوا، طول عمركم ايد وحدة وقلوبكم على بعض

نهى : وان شاءالله بنرجع متل اول واحسن

ابو امير : مية اهلا وسهلا، نورتوا يا جماعة

الجميع : اهلين فيك

حمزة : والله يا عمي حقك علينا، كل يوم بقول بدي امرق بس مواعيد دوامي هالفترة ملخبطة

مها : الله يعطيك العافية

نهى : بكفي انها سيرين بامان ودار خالتها حواليها، بضل قلبي متطمن عليها

ابو امير : بعيونا سيرين، راحت ياسمين بس وجودها هون علينا كثير

علاء : يا عيني يا عيني

ابو قصي : الله يجمعكم فيها على خير وتفرحوا بحفيدكم

حمزة : بس الله يسامحها خالتي ام امير مغلبة حالها دايما، بقول لو نتشارك بالمصروف معكم هههههه

ابو امير : له ؟ شو هالغلبة الله يسامحك

مها : سيرين بتحب اكلي عشان هيك بحسب حسابها

ريم : كلنا بنحب اكلك خالتو

سهى : ههههه بنتي طمعت

علاء : ما يحرمنا منكم جميعا، بالنسبة الي كل وحدة من خالاتي الها نفس خاص عالاكل، بس ستي غير يا جماعة

حنين : خصوصا بالاكلات التقليدية، لسا ما حدا قادر يوصللها

رنين : انا عالنتائج بدي اطالبها تعمل حلبة بدل النقوط

نهى : الله يفرحنا فيكم خالتو، ونشوفكم بالجامعات وبتخصصات بترفع الراس

////

امجد : عشان هيك تذكرتني سيد قصي

قصي : الله يسامحك يا ابو شريك، ما حبيتها منك

امجد : طيب اقعد اقعد خليني اوصيلك على كاسة عصير تبل ريقك فيها

قصي : استنى بس يوصل عمر

امجد ( متفاجا ) : عمر جاي ؟

قصي ( عقد حواجبه ) : ما حبيت اجي بدون ما احكيله قلت فرصة نجتمع، في مانع ؟

امجد : لا ابدا بس ما حكالي

قصي : هي حكيتلك انا

آيات : لشو هالكلام ؟

امجد : مثل ما وصيتك وبس

آيات ( بقهر ) : طيب هي انقبرت اتطمن

عمر : قلت ما حدا بشوفك، خلينا نكون احسن منك

امجد : الله يسامحكم، بس عارف بحاول اتجنب الروحة عندكم تفاديا للاصطدامات

قصي : طيب عندي مع مين بدك تتصادم ؟

امجد : خلص شباب غيروا هالسيرة

عمر : وين عمتي ما شفتها ؟

امجد : نايمة

قصي : كانت تعبانة بس وصلت

عمر ( بقلق ) : خير ؟

امجد : من صراحة ابن خالتي

قصي : والله ما كنت بدي احكي، بس حكيت مو حلوة تعرف من حدا ثاني وانا اجيت وخبيت عنها

عمر : حدا يفهمني

امجد : خالاتي كلهم وازواجهم ودار علاء وحمزة مجتمعين عند خالتي مها

عمر : ... لا حول ولا قوة الا بالله، مسكينة

قصي : مهي خالتي نهى ما بتروح عند خالتي مها وامي اقنعتها تكسر هالحزب اللي عملته تضامنا مع خالتي منى

امجد : ... الله يفرجها

////

آيات : بالغرفة

عمر : طيب اطلعي خليني اشوفك

آيات : قبل شوي روحت من الصيدلية، وتعبانة شوي

عمر : سلامتك، لا تنسيني بفنجان قهوة من تحت ايديكي

آيات : ازا قدرت اكيد رح اعمل ولو

عمر : حاولي

قصي ( بين اسنانه ) : اترك هالزفت شوي

عمر : شو دخلك ؟

قصي ( بأشر بعيونه ) : براقب فيك

عمر : عادي، يبلط البحر

امجد ( مكتف ايديه وبقلب عيونه بيني وبين قصي ) : مطولين وانتوا تتهامسوا ؟

قصي : ههههه

عمر : سوسة، غشيم عنه بتدخل بكل اشي

امجد : طيب خليني اروح اعمل كاسة شاي وارجع، بتكونوا خلصتوا اسرار

قصي : الله يسامحك، بنيجي معك عالمطبخ احسن عشان تصدق

عمر : يا عيني عليك، بحب روح الجماعة اللي ساكنة فيك

امجد : هههههه اما جوز هبايل، امشوا قدامي امري لله

تمنيت المحها لو من بعيد، بس الظاهر انه امجد مانعها تبين ..

شو هالتغيرات اللي صارت بعيلتنا فجاة، وليه هيك وقفت عليي لما اجا دوري وجربت الحب ..

بس للاسف بدات بالطعم المر اول، لعل وعسى اوصل لحلاوته بيوم من الايام ..

////

انس : مالك قاعدة بالغرفة ؟

آيات : ...

انس ( قعد جنبي ) : امجد ؟

آيات ( بهز راسي ) : ...

انس ( تنهد ) : الله يبعتلك ابن حلال يريح قلبك ويسعدك

آيات : ما بدي اتزوج، شايفني ميتة يعني والزواج رح يحييني ؟

انس : لا مو هيد قصدي، بس عشان ترتاحي من اللي انتي فيه، انا عارف انه ابوي وامجد مو مقصرين فيكي مشان هيك بدعيلك

آيات : الله يخليلي اياك حبيبي ( نزلوا دموعي ) بس انا ما بدي اخطب بس مشان اهرب من واقعي لواقع اسوا، ما بدي الماضي يتكرر ويرجع قلبي ينكسر

انس : اكيد اكيد هالمرة انا ما رح اسكت وبدي اوقف جنبك بكل خطوة، خلص كبرت وما حدا اله حجة يسكتني

آيات ( ضميته بقوة ) : يا عمري انت، ان شاءالله بفرح فيك وبشوفك احسن دكتور بالدنيا

_______________________________

بعد اسبوع <<

مرقت علينا فترة واحنا نستنى اقامتي تطلع، ومعها تأميني الطبي حتى اقدر اروح على دكتورة اتابع حملي ..

تخلل هالفترة ايام حلوة كتير، وحياة جديدة وتعودت شوي شوي على اجواء البلد وتعرفت على اهم معالمها ..

والاهم من كل هاد، عملت عمرة ..

يا الله شو كنت بحاجة الها، كانت اول مرة بحياتي بشوف الكعبة ..

احمد ( بقلق ) : تعبانة يا روحي ؟

ياسمين ( بلهث ) : ابدا، كتير مبسوطة

احمد : يا ريتك خليتيني اجرك بعرباية بالسعي

ياسمين : مستحيل احمودتي اول مرة اعمل عمرة وما اعمل مناسك كاملة على رجليي، بعدين قلتلك انا منيحة

احمد : يارب، يلا بكرا بنروح عالدكتورة وبنتطمن اكثر

ياسمين : دعيت كتير لرنين وانس، النتائج الجمعة ان شاءالله

احمد : الله يوفقهم ونفرح في الباقي

////

يوم النتائج <<

منى : لللللللييييييش

ابو احمد / امجد / آيات : مباااارك

انس ( نزلوا دموعه ) : الله يبارك فيكم، الحمدلله الف الحمدلله

منى ( ضمته بقوة ) : فرحت قلبي بعد كل هالحزن

انس : شفتي انه ما في اشي على ربنا بعيد، كنتي خايفة عليي ينزل بس الحمدلله ارتفع

ابو احمد : رفعت راسنا يابا الله يرضى عليك، ان شاءالله ما بدرسك الا طب ورح احققلك هالحلم اللي تعبت وشقيت مشانه

امجد : اه والله تعب كثير، الحمدلله تعبه ما راح عالفاضي

////

رنين ( منهارة ) : ...

مها : يا حبيبتي لا تعملي هيك بحالك، الحمدلله، اكيد ربنا اختارلك الافضل

رنين ( بتبكي ) : اي افضل ماما ؟ اني راسبة وبمادتين مو مادة كمان

حنين : ... طيب بتدرسيهم وبتتمكني منهم وبتعيدي وبترفعي معدلك احسن ما تجيبيهم عالحفة وينزل معدلك بسببهم

مها : شفتي كيف الواحد لازم يفكر بايجابية

رنين : ...

ابو امير ( فتح الباب فجاة ) : لسا بتعيطي بابا ؟

رنين ( انهارت اكتر ) : ... بابا سامحني انا الوحيدة اللي ببناتك ما فرحتك

ابو امير ( قعد جنبها وحضنها ) : لا تحكي هيك، هاد نصيبك ولازم نرضى فيه، مو نهاية الدنيا كلها امتحانات بتنعاد، واكيد انتي عملتي جهدك

مها : بعز دراستها صارت معنا اصعب الظروف الحمدلله اللي عدت علي هيك، شفتي اختك كانت حامل وبفضل ربنا ما صابها اشي بس نفسيتها كانت سيئة، وانتي دراستك تأثرت بهالظروف

////

ياسمين ( بتبكي ) : انا السبب، اختي رسبت بسببي، يا حرام شو ذنبها ؟

احمد : هاد نصيبها، لا تحطي كل اشي عليكي

ياسمين : كنت بدي افرحهم بنتيجة الفحص مبارح وقلت بستنى النتائج وبتكون الفرحة مضاعفة، بس للاسف

احمد : ما حبيت هالكلام، صايرة كتير سلبية ومتشائمة يا بنت، وين ياسمين اللي تفاؤلها بهز الدنيا ؟

ياسمين : تفاؤل شو ؟ من وين بدي اجيبه يا حسرتي ؟

احمد ( عصب ) : بكفي ياسمين، ما بحب هالكلام انا بتعرفي صح ؟ هسة بدك توقفي عياط وممنوع اشوفك بهيك حالة، ابنك مو ذنبه فاهمة ؟

ياسمين ( حطت ايدها على بطنها وحكت بصوت مهزوز ) : ابني ؟ يا حبيبي متى رح يجي واحمله احمد ؟

هالبنت بتتحول لطفلة بين لحظة والثانية، كنت خايف عليها كثير، وانجبرت اعصب حتى اذكرها بالمسؤولية اللي متحملتها ..

الحياة بتكبرنا قبل اوانّا، بس مجبورين نكبر لانه ما حدا بضل صغير ..

////

هيثم : يا حبيبتي، شو ذنبها ؟ حزنت عليها

ابو عدي : لازم نروح عند مها اول بعدين منى

عمر : مسكينة يا رنين، عاد معدلها منيح كان الفصل الاول

غنى : بس هيك احسن ما ينزل

بيان : كان قلبها حاسسها، ضلت تحكي خبصت وخبصت

ام بيان : همة هدول الامتحانين اجت تعيط بعدهم، قالتلنا مها

ابو ماهر : صرنا نشتهي تكمل فرحتنا، كله من ورا هديك اللي ما بتتسمى

ام ماهر : يكصف عمرها وينتكم منها

رانيا : ... طيب يلا هيثم نروح عشان نلحق نقعد عند كل ناس فترة

هيثم ( فهم عليها ) : اه يلا يا جماعة يا دوب

ام عدي : برايي منى رح تعمل مباركة لابنها ما في داعي نروح عندها، خلينا بس عند مها

ام بيان ( عيونها عليها ) : وانا هيك بحكي، بنكون شرينا هدايا واستعدينا اكتر

عمر : بس احنا الرجال بنروح عشان انس، ما بصير ما نفرحله

ام ماهر : وانا بروح يا ستي، ما احلاني ما اروح

////

سيرين : بالله عليكي رنين ما تعملي هيك، عادي صدقيني انه عادي مو نهاية الدنيا

حنين : حكنالها، ولا قادرة تقتنع

رنين : قال انس جايب ٩٨ ونص وانا راسبة، رااااسبة بتعرفوا شو يعني ؟ اكيد ما رح تعرفوا لانكم ما جربتوا

سيرين : طيب شو يعني ؟ مهو الفصل الاول جاب ٩٧ كلها علامة ونص اللي رفعهم

حنين : ماشاءالله عليه، مفلل معظم المواد اكيد

سيرين ( زورتني ) : انتي التانية هالاشي المهم يعني ؟ لا تنسي انه الظروف كانت صعبة عندكم اكتر والبنات حساسات مو متل الاولاد

رنين : ... بس امه كمان مرضت وكانوا متاثرين عليها

سيرين : افففففت، نفختيلي قلبي، قومي خلصيني غسلي وجهك خلينا نطلع نشرب كوكتيل وناكل شاورما احتفالا

حنين : هههههه مهسسة انتي اقسم بالله

مها ( فتحت الباب ) : اخوالك ونسوانهم ودار سيدك كلهم جايين عنا، البسي واطلعي

رنين :نيالي، بمكياج ولا بدون ؟

سيرين / حنين : هههههه

مها : ناقصني كانه

سيرين : خلص خالتو توكلي هلا بنجرها متل العنزة وبنيجي

عمر : اهلين بالجارة الطيبة الحنونة، الله يرزقها لكل مشتهي

الجميع : ههههه

رانيا ( بمزح ) : كل ما ارن على اخوي بساله وين مرتك بقلي عند خالتها، انه انضبي ببيتك شوي احسن ما اوز اخوي عليكي

هيثم : ههههههه احلى سيسو بالدنيا، نيال مها فيها اصلا

سيرين : شايف بالله خالو، ربي يجبر بخاطرك ويطعمك اخ لآدم

ابو بيان : رنونة الحلوة، هوني عليكي يا خالي صدقيني كل اشي بتعوض خصوصا الامتحانات والدراسة

ابو ماهر : كلنا عارفين انك شاطرة يا سيدي ودايما معدلك عالي، بس حظك هيك احمدي ربك وان شاءالله بتعوضيها بنص السنة

رنين ( نزلوا دموعها ) : ان شاءالله

ام عدي : خلص حبيبتي امسحي دموعك، ما حدا حاكي اشي عنك وكلنا معك، الله يكون بعونكم اللي صار مو قليل

ابو عدي ( معصب ) : استغفر الله العظيم

ابو امير : الحمدلله على كل حال، مبارك نجاح انس والله فرحتله هالولد بستاهل كل خير

ابو ماهر : الله يبارك فيك، شو اخبار ياسمينتنا سافرت ونسيتنا

مها : يا حبيبتي والله ما نسيت حدا وبتسال عن الجميع، بس انشغلت ببيتها وزوجها، وبلد جديدة وقاعدة معظم الوقت لحالها بالبيت

هيثم : كيف حملها ؟ ما بين شو فيها ؟

ابو امير : الحمدلله، لسا ما خبرونا اشي

رانيا : شو اشتقتلها

سيرين : اااخ لا تزكروني مشان الله، بالعافية تعودت

عمر : اهئ اهئ اهئ

الجميع : هههههه

اجواء باردة، والشفقة بعيون الكل علينا ..

بس ما رح اسمحلهم يضلوا هيك معنا، ولازم رنين توقف على رجليها من جديد وتفرجي الكل انها قد تجيب معدل عالي وتدرس احسن منهم كلهم ..

اااخ ياسمين وينك عنا ؟ مين كان يقوينا غيرك ويساندنا ويوقف بوجه الكل متل الاعصار ..

انتي وبس اللي بتقدري تعملي هيك، يا ريت اصير متلك ..

////

منى : اهلا وسهلا بالجميع، وين نسوانكم ؟

ابو عدي : ...

ابو بيان : بستنوا بالمباركة قال بشتروا هدايا وبيجوا اوجب

ابو احمد : يا عيب الشوم، والله ما بدنا الا شوفتكم

انس : كيف رنين ؟

عمر : كثير كثير سيئة، مسكينة عيونها منفخات

امجد : زعلت عليها والله، انصدمت

عمر : انا عارف، نصيب

آيات : احقر منهم ما في

منى ( بلهجة تهديد ) : بفرجها الله فيهم، انا بعرف كيف احاسبهم، قال بستنوا بالمباركة

آيات : جكر فيهم ما رح نعزمهم

رانيا : طولي بالك، يعني يمكن عشان بيان كانت معنا فتهربت امها

منى ( بمسخرة ) : ياااي، عاساس فارقة معنا اجت ولا لأ سُمُوها، امجد مو طايقها ولا معبرها اصلا

رانيا : ما بعرف عنهم، بتعرفي علاقتي رسمية وما بحب اتدخل

آيات : احسنلك، همة اصلا انقلبوا كتير بعد المشكلة اللي صارت، حتى ديمة بتحكيلي حماتها متغيرة بعد قصة الحمل برضو

رانيا : افففت، زواج الاقارب معظمه مشاكل للاسف

آيات ( بنفسها : لازم ترمي كلمة في الصميم انتي التانية، مندوبة ياسمين )

_______________________________

ابو عدي ( بلهجة قاسية ) : عملتك ما رح تمرق ببساطة عندي، فهمتي ؟

ام عدي : لا ما فهمت، بهالاسلوب ما رح افهم يا ماهر، ومو بنت صغيرة عندك تحكي معي هيك

ابو عدي ( بهدد ) : قسما بالله اذا ما بترجعي مثل ما كنتي واحسن، الا تشوفي اشي عمرك ما شفتيه مني، فهمتيييي ؟

ام عدي ( بتباكي ) : شوف كيف بتعاملني بسببها ؟ وهية شو بالاخر طلعت ؟ ازا انت نفسك زعلت منها على كلامها اللي حكته فما بالك انا اللي ابني ما بعرف شو عاملة فيه بنتها، وبس بدها اتدبر عريس وابني الضحية

ابو عدي : زعلت منها انا حر احنا اخوة، زعلت بس ما تغيرت ولا قاطعتها، بالنهاية لو انتي مكانها كان عملتي مثلها واكثر وهي شوفي كيف بتدافعي عن ابنك باظافرك واسنانك وخايفة عليه، مع اني مو عارف على شو خايفة بالضبط ؟؟!

ام عدي : خايفة يحطنا تحت الامر الواقع، ويصير بده يتجوز واحنا لسا ما نهضنا حالنا بعد عرس عدي

ابو عدي : ... صدقتك

ام عدي ( سكتت شوي وغيرت الموضوع بخبث ) : والله هالرنين اسم الله عليها متل القمر، حتى وهية زعلانة

ابو عدي ( هديت اعصابه ) : كل بنات اختي مها حلوات ماشاءالله عليهم

ام عدي ( برواق ) : شو رايك نقنعه فيها بدل آيات ؟

ابو عدي ( اتطلع فيها ) : بس عمر ما جاب سيرة آيات لحد هسة، وكل اللي بتعمليه بناءا على توقعاتك، ولو بدي اخطبله وحدة ما بخطر ببالي الا بيان بنت اخوي

ام عدي : اه اه انا موافقة عليها، ياااا ريت، بس .. كمان نفس المبدا خاطبة وتاركة وانا ما بدي اولادي الاثنين يكونوا نفس الحظ

ابو عدي ( رفع حواجبه ) : يعني هاد السبب طلع ؟

ام عدي ( بتفرك بايديها ) : والله نفسي ببنت ما باس تمها الا امها، كلهم هالولدين اللي طلعت فيهم بهالدنيا، عالاقل واحد فيهم اجوزه البنت اللي بدي اياها

ابو عدي : بس اللي صار قسمة ونصيب، وهيك حظهم هالبنات، كل وحدة فيهم مسخمة اكثر من الثانية الله يعين اهاليهم

ام عدي : ما اختلفنا، بس كمان الشباب معبيين البلد، والا ما يجيهم نصيبهم ( برجاء ) الله يوفقك وقف معي بهالموضوع وعمر ما بكسر كلمتك انا متاكدة

ابو عدي ( تنهد ) : بصير خير .. بصير خير، بس بدي اياكي ترجعي مثل اول مع منى ومع كل خواتي

ام عدي ( بدلال ) : بتؤمر، اللي بدك اياه بصير

وهيك امي قدرت تقنع بابا بكيدها، والضحايا عمر وآيات ..

بس اللي ما قدرت افهمه لحد هلا، هل فعلا همة بدهم بعض او في بينهم اي مشاعر؟ ..

انا بشو بقدر اساعد اخوي ؟، المحله عن اهلي وتخطيطاتهم، ولا اعرف منه ازا فعلا اللي حكته امي صحيح وفعلا في علاقة بينهم ؟ ..

_______________________________

مها : شوفوا مين عالباب يا بنات

حنين : اسيل اتطلعي من العين اول

عملت متل ما قالتلي اختي، ويا ريتني ما رحت عالباب ولا طلعت من غرفتي ..

كان واقف وبانتظار نفتحله، وانا تلبكت وما عرفت شو اعمل ..

مها : مين ؟

اسيل ( برجفة ) : أ أ أنس

مها ( متفاجاة ) : وينه ؟ افتحي يلا .. اهلا اهلا لللللليييييش

انس ( عيونه عليي ) : اهلين فيكي، ما يحرمني منك ( ضمها بقوة ) اشتقتلك كثيييير

مها ( عيونها مدمعة ) : يا حبيبي الف مبارك، واجبك عليي والله

انس : بالعكس انتي اللي واجبك فوق راسي، تفضلي هي حلوان نجاحي، واسف مشان رنين ربنا اعلم قديه زعلنا عليها

مها : الله يرضى عليك ويهنيك، الحمدلله عكل حال نصيبها ورضيت فيه، ولعله خير

اسيل ( برجفة واضحة ) : الف م م مبارك، فرحنالك كتير

انس ( بتاملني ) : يبارك فيكي و عقبالك

مها ( لاحظت عليي ) : نادي خواتك ماما يباركوا لابن خالتهم، وحطوا الحلو واعملوا قهوة

اسيل : حاضر

انس : الله يقومك بالسلامة يا خالتي، التعب مبين عليكي كثير

مها : الله يسلمك، يلا هانت وعقبال ما تفرحوا بحفيدكم كمان

انس : اه والله مشتاقينله، الحمدلله ربنا جبر بخاطر اخوي احمد وياسمين بستاهلوا كل خير

البنات : اهلا وسهلا انس مباارك نجاحك

انس ( مبتسم ) : الله يبارك فيكم

رنين : يا الله ما احسنك، ولك جايبلنا الحلوان كمان

حنين : مو غريبة عاولاد خالتو منى، من يوم يومهم موجبين

انس : تسلموا، مقصرين وشو ما عملنا قليل على خالتي مها وعليكم

مها : يسعد قلبك ما اطيبك

حنين : ومين اجانا كمان؟

فرح : ديمة وسيرين ههههه

انس : يلا منيح زمان ما شفت حدا

سيرين : سلام، عندكم ضيوف ؟

مها : يا لطيف حمواتكم شو بتحبكم، فوتوا هاد انس جابلنا حلوان نجاحه

ديمة : يييي والله حقك علينا انوس بس ما صحلنا نيجي مبارح واليوم انا وعدي كنا ناويين، ريته الف مبارك يارب وعقبال شهادة الطب

انس : الله يسمع منك

كل الحكي اللي كان يحكيه معهم، ولسا عيونه بتلاحقني، وابتسامته ما فارقت وجهه الحلو ..

اما امي كانت ملاحظة وكل شوي تأشر بعيونها لخواتي عاساس يشغلوني واطلع من مكان القعدة ..

انس : امير كبران، شو رح يجيه خالتو اخ ولا اخت ؟

سيرين : مفاجاة الله وكيلك، مو راضية تعترف

انس : المهم الخلقة التامة، بس امير محبته غير شكل الله يحميه

ديمة : وسلمى لو تشوفها كمان كتير كبرانة ومتغيرة وصايرة تشبه عمتها

سيرين / حنين / رنين : خدلك ههههه

سيرين : طالعة جكرة، عشان ابوها ما بده بنت متل عمتها عم بتجاكر فيه

الجميع : هههههه

انس : رح تحكي لبناني يعني ؟

ديمة : اي لبناني ؟ حمزة اكل لسانها ويا دوب تعرف تجمع كلمتين بالاردني

مها : بس يا بنات مالكم ؟

حنين : الله يجبر عليه وعلى عدي واحمد

انس : هههههه

واكيد ما بكونوا بنات خالتي؛ ازا ما سمعوني كم كلمة على انفراد ..

ديمة : شو يا ما حدا قدك ها

حنين : ههههه شفتي

سيرين : يمة عيونه، تقولي احمد وهو بتطلع بياسمين

رنين : وهي من غير اشي، شبه ياسمين يعني انسي الماضي بعيد نفسه

اسيل ( متدايقة ) : ماضي شو؟ عن شو بتحكوا اصلا ؟ انا ما بهمني حدا وانتوا عارفين بابا، ومو ناقصني يصير فيي متل اختي

حنين ( بتغمز فيهم ) : بنشووووف

سيرين : لحقي حالك انتي، شو وضعك بالجامعة

حنين : يا حسرة عليي اشكالي ما الهم حظ

رنين : واشكالي معك

ديمة : شو هالحكي، كله نصيب وما حد باخد الا نصيبه

مها : كيف امك ؟ كيف صحتها

انس ( بحسرة ) : امي مشتاقيتلك كثير يا خالتي والله ندمانة والله شاهد على كلامي

مها ( نزلوا دموعها ) : ... وانا اشتقتلها كمان، الله يسامحها بس الله يسامحها

انس : ... بكفي انحرمنا منك، لحد هسة عقلي مو مستوعب اللي صار، انتي بالذات كيف كنتي مع امي ووين صرتي، والله حرام اللي بصير

مها ( تنهدت بحسرة ) : بتفرج ان شاءالله، عرفت انك جاي عندي ؟

انس ( بذكاء ) : سبحان الله انا صحيت وجهزت حالي بدي اطلع واجي عندك وما حكيت لحدا، الا هية بتوصيني امرق عليكي واخدلك حلوان

مها ( مبسوطة ) : لو حكتلها تعالي معي طيب ؟ يا ريت اجت

انس ( فتح عيونه ) : جد ؟ والله هسة بروح بجيبلك اياها وباجي

مها ( استدركت حالها ) : لا لا بلا ما تحرجها، خليها براحتها احسن

انتهت زيارته اللي كانت متل الغيمة المليانة بالمطر، طلت علينا وروتنا وما بنعرف متى رح ترجع من جديد ..

ودعته هالمرة وما اهتميت لاي حدا، ودعته لانه رح يمرق علينا وقت طويل وما نلتقى، او الله اعلم متى تجمعنا الصدفة من جديد ..

مها : الحقيني

ديمة : وين خالتو قاعدين

مها : يلا خمس دقايق وبرجع، بيتكم هاد خالتو

اسيل ( بخجل ) : ولا اشي

مها ( بنبرة حادة ) : كيف ولا اشي ؟ على مين بتتخوتي انتي واياه ؟ انتي معك موبايل بالسر ولي ؟

اسيل ( بهز راسي بضعف ) : والله ما معي اشي، بشو احلفلك ما في تواصل بينا ولا اي كلام

مها ( بتهديد ) : اياكي يا اسيل، اياكي اعرف انه عندك حركات قلة ادب متل هالمراهقات وبنات المدارس، متلك متل خواتك ما بدي اي مخالفات والا بتعرفي مها شو بتعمل فيكي، فهمتي ؟

اسيل ( برجف ) : والله فاهمة، اقسم بالله انتي ظالمتيني

تركتني وراحت، هي اول مرة بتعرض لبهدلة من هالنوع ..

انكمشت على حالي بغرفتي، وفقعت من البكى، ما قدرت ادافع عن حالي ..

بس انا شو ؟ مجرد مراهقة وهالمشاعر يمكن تكون كلها كزب وما الها اي وجود بعد كم سنة ..

بس هو يا ترى كمان مشاعره مزيفة ؟

////

ياسمين : اسيل !

مها : اسمعيني ياسمين، بطلع بروحها ازا بتعمل اشي من وراي، انا مو ناقصني وجع قلب، ما صدقت واجوزك

ياسمين ( بالم ) : معك حق، بكفي اللي عملته فيكم

مها ( استخطيت حالي ) : لا مو هيك قصدي ماما، بس اللي فيي بكفيني يا امي ارحموني

ياسمين ( بتبكي ) : ...

مها : خلص حلفتك بالله لا تعيطي هيك، لا تخوفيني عليكي مو ناقصني

ياسمين ( سكرت الخط ) : ...

داقت فيي الدنيا، وتراكمت الهموم فوق راسي ..

من وين ولا من وين القى ؟، حياتي مقلوبة وزياد نفسيته عم تسوء يوم عن يوم ..

كل محبته لابو احمد وعيلته، انقلبت وما تحمل اللي عملوه ببنته الغالية ..

وسفرها زاد من همه، وطاقته صارت تحت الصفر، والمنفس الوحيد اله هو انا، متحملة كل عصبيته وجموده وحتى جفاه ببعض الاحيان، وكله بس في سبيل احافظ على اخر خيط بربطنا ببعض ..

بناتي كل همي، ولازم احافظ عليهم وعلى سمعتهم لآخر نفس فيي ..

////

كلام امي صحيح، حياتنا تغيرت والحب صار اكبر حلم نعيشه بعد اللي شفناه من اقرب الناس النا ..

بس شو ذنبها اسيل، وانس المسكين اللي كمان ضحية متلها ومتلي انا واحمد ..

انا متاكدة انه بفكر فيها بصدق، وهالاشي مو جديد عليه ..

احمد ( اجا فجاة ) : مالك اليوم كمان ؟

ياسمين ( بمسح دموعي ) : سلامتك، بس حكيت مع ماما وتعبانة شوي من الحمل

احمد : الله يقومها بالسلامة، يلا هانت مسكينة تعذبت كثير بهالحمل

ياسمين ( بهز براسي ) : اه والله، يلا خليني احط اكل

احمد ( سحبني من ايدي وشدني لعنده ) : وين رايحة ؟ مفكرة بتمرق عليي هيك

ياسمين ( بهرب بعيوني منه ) : شو اللي بدها تمرق ؟

احمد ( ثبتني من دقني ) : صاير اشي جديد ؟ احكي ياسمين ولا تخبي عليي

ياسمين : صدقني ما في، معقول اخبي عليك حبيبي، عارفني بحكي كل شي بدون ما تحقق كمان

احمد : ... ماشي

عدت على خير وقدرت اقنعه، مو ناقصني يروح يتهور ويحكي مع اخوه ويكسر خاطره متل ما عملت امي باسيل ..

////

غلاوة خالتي ما الها حدود عندي، ويمكن مشان هيك انا حبيت اسيل وبتمنى دايما تكون الي بيوم من الايام ..

لساتني صغير على هالكلام، بس شو اعمل بحالي، كبرت على عشق اخوي لياسمين، ومن كثر ما انا متعلق فيه وبعتبره مثلي الاعلى، عشقت اختها كمان ..

منى : وين كنت ماما ؟

صحيت من غيبوبتي على سؤال امي، اللي كذبت على خالتي بجوابه ..

كان لازم استغل سؤالها بلكي اقدر اصفي القلوب، واهدي النفوس مثل ما بقولوا ..

امجد ( نظرة خبيثة ) : وله ! رد على امك مالك صفنت بالحيط

انس ( بلعت ريقي ) : رحت اشوف اصحابي، واعزمهم عالمباركة

منى : اهلا وسهلا فيهم

بس ليه ما قدرت اكذب على امي مثل ما كذبت على خالتي ؟، لهالدرجة الخوف متمكن مني ..

امجد ( سكر باب الغرفة وركز ظهره عليه ) : كنت عندها ؟

انس ( بهز راسي ) : معقول ما احليها يعني ؟ بتضل خالتنا بالنهاية ولا شو رايك

امجد ( مبتسم ) : حلال عليك، مع اني كنت حابب اروح معك بس سبقتني

انس : عادي بنرجع مرة ثانية

امجد : هههههههاي عجبتك الشغلة، شكله مبلول ريقك اليوم عالاخر

انس ( احمروا خدودي ) : هههههه وبدون جكر كمان

امجد : يلا بشفعلك معدلك، ما بطلع لحدا يسمعك حكي هسة، طلعت قد المسؤولية الحمدلله وما خيبتنا

انس : الحمدلله

////

عدي : يلا علاء احنا بالطريق قربنا نوصل

علاء : لا اسمحلي انا عندي بنت، وبتعرف البنات كم ساعة بدهم لما يلبسوا

عدي : هههههههه لا اله الا الله، بدمك الشغلة لازم تسمع حكي

علاء : هههههه وياريت جايب نتيجة، المهم نطلع كيوت وما ننفضح قدام العالم، بتعرف يعني

عدي : هههههههههه طيب يلا خدوا راحتكم

ديمة : هههههه يمة علاء

عدي : حاسه رح يفقع كمان شوي

ديمة : عندي احساس انهم بالطريق او واصلين

عدي : ابصر، كان الجو هدوء ومو جو سيارة

ديمة : هلا بنشوف

////

منى : اهلا وسهلا، كان استنيتوا المباركة متل غيركم

سهى : مين غيرنا ؟

علاء : نروح يعني ؟

ابو احمد : ههههههه لا يا زلمة بتمزح خالتك، بس مغبونة من عمايل نسوان اخوتها

سهى : اااه، عادي حبيبتي واقل من عادي

قصي : طولي بالك خالتي، وحقك علينا بس احترنا شو نعمل عشان رنين، قلنا بنختصر على حالنا وبنيجي نبارك ثاني يوم احسن

امجد : انت بالذات نقطني سكوتك

ريم : هههههه انا بدي اشوف وجه عدي هلا بس يشوفنا

آيات : مسكين مو مقلب تعملوه فيهم

سهى : لا عادي ما بزعلوا، بيتهم ابعد اكيد بدهم وقت اطول ليوصلوا

ريم : المهم ابن خالتك يعطي كم كلمة بالصميم، بتخص البنات

آيات ( حاملة سلمى وبتلعبها ) : يختي بطلعله اللي عنده هيك قمر، ست البنات يمة ما احلاني يا ناس

علاء : شفتي كيف ؟ بالله عليكي مهي كيوت وبتجنن مثل ابوها

امجد / قصي : هههههه قصدك مثل عمتها

علاء ( بين اسنانه ) : الله يستر

آيات : عفكرة اون لاين عمتها، دير بالك تسجيل صوتي مني بتيجيك بصاروخ ارض جو

علاء : لا يستر عليكي بلاها، امسحيها بهاللحية

منى : هههههه بتضلكم تعلقوا عالبنات واخر اشي طلعتوا بتخافوا منهم

عدي : تفضلي هي سيارتهم هون

ديمة : هههههه والله كنت عارفة

عدي : يقطع شرك يا علاء

ج ٢ :

عدي / ديمة : السلام عليكم

الجميع : وعليكم السلام

عدي ( بمسخرة ) : بس معك حق تتاخر عديل، انا لو مكانك وعندي هيك بنت يمكن ما اجي كمان، معقول اطلعها من البيت

ديمة : بنخاف عليها من الحسد هههههه

امجد : اشتغلت ديمة، شدولها البراغي خلي هالقعدة تمرق على خير

آيات / ريم : ههههههه

علاء : والله يا عديل حقك على راسي بس بتعرف جيران انا ونسايبي وعيب ما اطلع معهم

قصي : كفو ابو نسب، ما يحرمنا منك

امجد : استغفر الله العظيم

انس : ههههههه بلشنا

ديمة : يييي صحيح مبارك انوس مرة تانية

منى : ليه مرة تانية ؟

انس ( بعض على شفايفه ) : قصدها عشان بعثتلي عالواتس تباركلي

ديمة ( مصدومة ) : اه صح، خالتو صايرة اتدققي كتير، مرقيلنا اياها

امجد : هههههه

عدي ( فهم عليهم ) : كيف صحتك عمتي ؟ وشو اخباركم جميعا وين عمتي نهى كمان ؟

منى : الحمدلله احسن ما يكون، الله يرضى عليه انس

سهى : امين يارب، ويرضى عليهم جميعا، عمتك نهى مبارح اجت

علاء : راحت عالجهتين امي من اول يوم

آيات : كمان يومين المباركة، للنسوان والرجال حفلات

عدي : بطلعله البطل، رفعت راسنا ما ضل حدا بالشركة غير باركلي فيك والله

انس : حبيبي ابو ماهر

قصي : كيف شعور احمد اخوه ناجح وبنت حماه عليها مادتين ؟!

امجد : كل علاماتها عالية بس بقولوا شاطبة دفتر الفيزياء والرياضيات علامته غير متوقعة

ديمة : كيف شعوره يعني ؟ شو دخله الناجح ناجح لحاله والراسب على حاله

قصي : انتي خليكي ساكتة

آيات / ريم : هههههه

انس : صدمتني انها شاطبة الدفتر، يعني عالاقل كان انحسبلها نجاح بدون ما ينحسب بالمعدل

ابو قصي : عقدة التوجيهي الاردني هالمادتين

ريم : هو معروف الفيزياء بالدورة الصيفية اصعب من الشتوية

سهى : نصيبها، ان شاءالله بالدورة الشتوية بتقدمهم وبترفع معدلها وبتفوت التخصص اللي نفسها فيه

انس : المشكلة انها مو عارفة شو بدها تدرس

منى : متلها متل هالبنات، يعني اكيد لو شو ما ترفع ما بتجيب معدلها بالتسعينات، الا اذا ابوها بده يدرسها بجامعة خاصة مثلا او عالموازي

عدي : والله غنى مو حاسسها كثير رغبانة الصيدلة

ديمة : مهو لانه كان نفسها هندسة، بس حكم القوي عالضعيف

آيات : غلطانة، ما في مقارنة بينهم اكيد الصيدلة للبنت كتير احلى وانا حكتلها كتير هالكلام

قصي : اه والله ياسمين كانت طايرة بالتخصص ومو مصدقة متى تتخرج وتشتغل

امجد : واشتغلت هيها بس شغلانة ثانية هههههع

ابو احمد : المهم انها معها شهادتها والهدف من دراسة البنت سلاح الها، وتكون انثى مثقفة ووين ما راحت الها مكانتها الاجتماعية بغض النظر مارست او لا

ابو قصي : صحيح، هي ريم وبوظيفة معلمة وما قدرت اتداوم وكملت اجازتها حتى تقدر تترك بنتها على بداية السنة تكون كبرت شوي

ريم : وهاد عندي حضانة بنفس المدرسة، الله يهديها بس

علاء : والله يا عمي كثير حاولت معها تترك الشغل، الحمدلله مكتفيين ومو حابب تهلك حالها اكثر من هيك

منى : لا خالتو هيك انظم لوقتها وبتتسلى احسن من القعدة بالبيت، حتى بنتك رح تكون غير بس تكبر مو متل الاطفال اللي بضلهم بالبيت ( تنهدت ) والله هاكلة هم ابن احمد بهالغربة بين اربع حيطان هو وامه مساكين

علاء : انا عملت اللي عليي

سهى : ما قصرت، دوام المدارس الخاصة مهلك وهية كانت تعبانة اصلا، بس عشان تاخد خبرة

ريم : انا مشان هيك، مو دابحة حالي عالشغل لمجرد اني اشتغل بس

////

مها : قولتك بتعزمني خالتك منى على مباركة انس ؟

حنين : وانا شو بعرفني، بس اتوقع رح تختصر على حالها وما تعزم

رنين : طيب لو عزمتك رح نروح ؟

مها ( محتارة ) : الله اعلم، لسا مو متخيلة حالي كيف رح اشوفها بعد هالشهور

حنين : لا تعطي الموضوع اكبر من حجمه، خليكي متل ما انتي وازا صار وعزمتنا اكيد بابا رح يعطي قرار بالموضوع

مها : هو ابوكي اللي مخوفني، حاسسته قنبلة موقوتة ورح ينفجر باي لحظة

رنين : ما في اب بتحمل يسمع عن بنته كلام متل اللي قالته اختك، كوني واقعية ماما اديه كنا صحاب وحبايب وبالاخر كشرت عن انيابها ويا ريت على حق

حنين : خلص انتي التانية، كل ما ننسى بترجعوا تزكروا فينا

مها : قال نسوان اخوالك ما راحوا مبارح يباركولهم، بدهم يروحوا مرة وحدة عالحفلة

حنين : مين حكالك ؟

مها : سيرين حكتلي اليوم واصلتها اخبار من امها

رنين : همة ضلوا موقفين معنا، وما حبوا اللي عملته خالتو منى بياسمين، كتير بحبوها وانتي الك مكانة خاصة برضو عندهم

مها ( مو عاجبها ) : ولو، مدام ازواجهم راحوا لازم معهم، بس الله اعلم على شو ناويات

حنين : ماما مشان اللي خلقك، بكفي قصة بيان وامجد لسا بدك اتضل العلاقات متل زمان يعني ؟

رنين : غبية هالبنت، اغبى ما قابلت بحياتي

مها : الله اعلم شو السبب، كمان امجد مو قليل، يعني مو شرط كل البنات يتحملوا متل ما ياسمين تحملت احمد وبالاخر طلقها

حنين : اي بالله تسكتي، قصدك هو اللي متحملها كان، ويوم ما طلقها معه حق حبيبتي حطته تحت الامر الواقع شئت ام ابيت بدي اتدرب سواقة

مها : ...

////

منى : خف وحامك يا ديمة ؟

ديمة : اه الحمدلله تقريبا راح

علاء : انتي شوفي وين قاعد ابن اخوكي لحالك حللي هههههه

عدي : هيهيهيهي

ابو احمد : والله يا عدي انك زوج مثالي، دايما كنت اشوفك شخصية مميزة ماشاءالله عليك

عدي : تسلم، من بعدك عمي

امجد : بس الحب ما بخلي زلمة على حاله، انه افهم انا كيف حبيت هالبنت ؟

ديمة : افهم انا انت شو مدايقك ؟

عدي : ما في منها، عسل مصفى دمدومتي

الجميع : يا عيني

قصي : حط عينه على معلمة اخته، وضل يراقبها لحد ما تاكد منها بعدين بعث اهله، وتوتة توتة

عدي : اه والله معلمة ما في منها، انا من الرجال المحظوظين بالزواج الحمدلله

ديمة ( خجلانة ) : وانا محظوظة فيك اكتر حبيبي

منى : هههههه يسعدها الخجلانة

سهى : قال يعني

الجميع : ههههههه

امجد : حليلكم الغزل هسة يعني، شكله مع الوحام صاير عندكم قحط عاطفي

انس : قصدك احنا اللي زمان ما سمعنا هيك كلام،التصحر عم بزحف شيئا فشيئا

ديمة ( بنبرة تلميحية ) : سلامتك من التصحر، انت بالزات اخر واحد تحكي ههههه

انس ( بدهشة ) : شو قصدك ؟

امجد : هههههه يا حبيبي لسا بدك تفهم شو قصدها، خلص اسمع وطنش هزلها براسك واكبس اعجبني

آيات : ولا تخرج قبل ان تكتب سبحان الله

ريم : هههههه

علاء : شلة حشاشين انعم واكرم

منى / سهى : ههههههه متاثرين بالتكنولوجيا

ديمة : يصحلكم اصلا، نياله اللي بعلق عليه اي والله ما في اخف من دمي ئي

قصي : ولك اختصري

عدي : فعلا، فرصة تختصري

ديمة : ما بدي

ريم : شو صار معك رحتي فحصتي ؟

ديمة ( عيونها على عدي ) : لا ما صحلنا لسا، هينا بنروح ملحقين

عدي ( كاتم ضحكته ) : ...

سهى : الله يطعمك وتعمليلنا افلام ومفاجات هالمرة، كل حملها قصص هالبنت

ديمة : انتي حكيتي حملي مو حمل العيلة كلها، شه

منى : صراحة معها حق البنت، الخصوصية حلوة

ابو احمد : والله احمد بالعافية بنسحب منه الكلام، قال اه رحنا عالدكتورة وقعد يحكي كلام ما اله دخل بالموضوع، اخر اشي اعترف

ابو قصي : الله يقومها بالسلامة، احنا شو بدنا غير نفرح فيهم جميعا بس لساتهم ما صاروا اباء وامهات حتى يحسوا باهاليهم

علاء : يا عيني عليك، هو هاد المغزى

ريم : بتخيل سلمى بس تتجوز قال اكون اسالها حامل او لا تروح مخبية عليي، عينيها لاطلعهم

علاء : طيب حاولي اجلي هالتخيلات حبيبتي من هون لعشرين او خمس وعشرين سنة

آيات : يا لطيف، فاول عالبنت تعنس من هلا

ديمة : على كيفه، امير بستناها حبيبتي على سيارة اخر موديل لون ابيض

الشباب : هههههههه الله يشفيكي

علاء : الحمدلله بكفي خالتها موافقة

ريم ( بتسبل عيونها ) : وانا موافقة كمان، ازا ضل حلو هيك على كبر، اكيد سوسو رح تعشقه بدون ما تحس

علاء ( عينه على خالتي ) : سمعتي بنتك ؟

منى : هههههه والله انتوا بتعشقوا الدراما يا خالتو، الله يحيينا لهداك اليوم وبعدين اعملوا المناسب

علاء : بصير خير

كانت سهرة حلوة ومميزة، من زمان كثير ما ضحكنا هالضحك ..

رجعونا لايام مرقت مثل لمح البصر بحياتنا، وما تركت الا الذكرى الحلوة، وبعض الاوجاع بسبب الحاضر اللي بنعيشه ..

أيام وبنعيشها هنعمل ايه يا قلبي في ناس

مهماش ناس مفيش احساس

ومش بيحسو بجروحنا

دي دموعنا هنحوشها عشان مش صح نبئا ضعاف

نبان ساعة الفراق بنخاف

ياريت نغصب علي روحنا

وعلي ايه دي حكايه خلصت من بدري

والله خلصت من بدري

والغدر حسيت بيه

وعلي ايه

علي ايه هنبكي على الماضي

ايام وعدت ع الفاضي

في ايه هنبكي عليه

مش فارقه نتكلم

نعيد نزيد في ايه علي ايه

معدش يفيد بكانا عليه

خلاص الجرح اهو معلم

وياريت لا نتألم

ولا نأسي وداع بوداع

محد ساب حبيبه وضاع

ادينا خلاص بنتعلم

انس : الله ستر ديمة ما زلق لسانها

طلعت من جو الاغنية على صوت انس، كان متوتر وخايف امي تعرف انه راح عند خالتي ..

امجد : معقول ما نعزمها على الحفلة ؟

انس : ما بعرف، احكي لامي انت

امجد ( شعلت سيجارة ) : بعد اللي عملته فيي ما بدي اتدخل باشي، تصطفل منها لاختها

انس : احسن اشي آيات نعمل حالنا ما النا دخل ونسألها اذا امي عزمت او لا

امجد : بصير برضو، يلا بكرا بنروح عالسوق انا واياك وبنكمل تجهيزات، يلا نام هسة لا تنسى تبوس الخاتم بلكي طلع المارد منه ووفر علينا مصاريف هههههه

انس ( بخبث ) : الله يعينك، بس عادي بطلعلك تغار

امجد : ماشي يا انس، اخرتك تترجاني ادبرلك لقاء

انس : عادي بترجاك، مو انت اخوي حبيبي، بترضاها اترجى الغريب بدالك مثلا ؟

امجد : يمة يا حبيبتي، احمد مو مخلي اشي فيه الا مورثك اياه، ناااام احسن ما افقعك قتلة وما حدا بخلصك مني الليلة

انس : هههههه نايتي

وما كذب خبر اخوي، طلع الخاتم وتامله لما شبع، واخر اشي اعطاه بوسة ورجعه لمكانه السري تحت الفرشة ..

_______________________________

بعد يومين <<

زياد ( بلهجة قاسية ) : اختك انتي حرة، انا بناتي ممنوع يروحوا

مها : انا مو حابة اروح بس عشان ما اترك مجال لحدا يسالها عني ويحرجها، بضل حماة ابنها

زياد : قلتلك انتي حرة

حنين : بدك تروحي ؟

مها ( بياس ) : ما بعرف، ابوكي نبرته مو مريحة، خايفة اروح يطلعها على جلدي

رنين : ماما بلالك اياها، خلص مدام وصلت لباب بيتنا وما فاتت ولا قدرت تكسر حالها وتعتزر، روحتك ما الها اي معنى الا انك مو قادرة تعيشي بلاها

مها ( هزت راسها ) : ...

////

نهى : يا رب مها تيجي

ام ماهر : الله يهديها، ابوكي حكى معها كثير والله يمة وما سمع غير صوت عياطها يا حسرتي

سهى : ااااخ من حظها هالمسكينة، وحظ بنتها

نهى : ... الحمدلله على كل حال، بس كمان منى انظلمت، حرام عليكم

سهى : عارفين، بس كمان ردة فعلها بتعطي انطباع انها مو خرج تكون سند، ومحبتها مزيفة

ام ماهر : خلص اسكتن اسكتن كل ما اسمع هالسيرة برتفع ضغطي، يكصف عمرها زينة اللي ما شفنا يوم ابيض من بعدها

نهى / سهى : ...

ام ماهر : واخرتها فركت بين بناتي، ريت ركبتها تفارك جسمها

الجارة : منورة يا ام احمد، كيف حالك ؟

منى : بخير والله، نورتونا بوجودكم

الجارة : تسلمي، كيف حال دار احمد راحت مرته عنده ؟

منى : اه الحمدلله الها قريب الشهر، وماشاءالله عليهم

الجارة : وين اختك، حماته ؟

منى ( عيونها بتدور ) : مها .. ( ابتسمت ) هيها عالباب هلا اجت

الجارة : هديك الحامل ؟

منى ( قامت من مكانها ) : اه يا حبيبتي قربت تولد، عن ازنك اشوفها

منى ( بترجف ) : اهلا وسهلا ( مدت ايدها تسلم )

مها ( بلعت ريقها ) : اهلين فيكي ( سلمت مجاملة بدون ما تطلع فيها )

آيات ( بفرح ) : خالتو حبيبتي اهلا وسهلا، يييي يا عليي ارتاحي هون، تعبانة كتير ؟

مها : ... لا عادي

سهى : منى ؟

منى ( بتبكي ) : شفتوها ؟

نهى : مين ؟

منى : مها، اجت .. لحالها

مها ( اجت فجاة ) : كيفك ماما ؟ كيف حالكم جميعا

ام ماهر ( بفرحة ) : الله يرضى عليكي الله يكومك بالسلامة يا حبيبتي انا بخير طول ما انتي بخير

سهى ( حاسة بوجعي ) : اقعدي حبيبتي

نهى ( دمعوا عيونها ) : ماشاءالله تبارك الله، زمان ما شفتك هيك

مها : تسلمي، وين نسوان اخواني ؟

سهى : رانيا لسا ما وصلت، وهدلاك قاعدين هناك هيهم شافوكي

مها : اه رانيا جاي تاخد سيرين عشان حمزة مداوم وحكتلها حطي آدم عند بناتي بتسلى مع امير

نهى : الله يجزيه الخير هيثم كان ابوها رايح يجيبها حكاله انا بجيبها ولا يهمك، بس ليه ما اجوا بناتك مو حلوة بلاهم

مها : ... ابوهم ما رضي، انا اجيت عشان ارضي بابا وانتهى ما حدا ينق عليي لو سمحتوا

سهى : ولا يهمك

ام عدي : قومي نسلم عليها هالمسكينة مبين جاية غصب

ام بيان : اه والله يا حبيبتي، كسروها وجبروا بخاطر منى عاساس

مها ( بسلم عليهم ) : كيف حالكم ؟ وين الصبايا

ام بيان : بيان ما اجت للاسف مع اني حاولت معها

نهى ( مو مصدقة ) : حاولتي ؟

سهى : شو يا ليلى ؟ انتي بدك تقطعي البنت عن عمتها عشان نصيب انقطع، وهية اللي تركت عمتها ما عملتلها اشي

ام بيان ( كاتمة عصبيتها ) : ...

رانيا : السلام عليكم، طولت ؟

ام ماهر : وعليكم السلام، لا بعدها ما بدات

سهى : كيف حالك ؟

رانيا : مشتاقة، كيفكم انتوا ؟ وين الصبايا

نهى : هيهم بساعدوا بخالتهم يمكن، وين سيرين ؟

رانيا : فاتت تغير، وتزبط حالها

مها : سكت آدم ؟

رانيا : ههههه قال سكت، بس شافهم نسيني بحكيله باي ماما ولا اتطلع، خصوصا انه الالعاب مفرودة قدامه

ام ماهر : بعد الحفلة بتجيبوه وبتمركوا عنا عشان نشوفه، اشتكناله

رانيا ( مبتسمة ) : ولا يهمك

ام عدي ( بهمس ) : لو محلك ما اجيت، صدقيني ما كان في داعي تيجي ابدا هية اللي لازم تيجيكي اول

مها ( حبست دمعتي ) : ان شاءالله ما بتكوني مكاني بيوم

ام عدي ( مسكت ايدي وربتت عليها ) : الله اعلم يا مها غلاوتك عندي، ويشهد الله غلاوة بناتك الخمسة من غلاوة غنى، ما هان عليي عشان هيك حكتلك هيك

مها ( بهز راسي ) : ...

لفيت وجهي، لقيت رانيا مخطوف لونها وكأنه كلام سلفتها ما عجبها ..

////

آيات : يا الله شو انبسطت بجيتها، غسلت قلبي ورجعتني للحياة من جديد

سيرين : منيح، ضل انتوا تغسلوا قلبها

آيات ( بحرج ) : معك حق، بس امجد اخدها وما قدرت تدخل

ديمة : منيح منه عمو زياد اللي سمحلها

آيات ( بغرور ) : خلص انسوا المهم انه ماما رجعتلها الضحكة من جديد وحاسستها رح اتطير كمان شوي

ريم : ... الله يبسطكم

ديمة : وليه الست بيان ما اجت ؟

غنى : ما بعرف، انصدمت متلي متلكم، مع انها مبارح سالتني شو تلبس ومن هالحكي

سيرين : تصطفل التانية، افت شو هالحفلة اللي كلها وجع راس

ديمة : شفتي بالله ؟ ( بمسخرة ) قال المهم ماما رجعتلها الضحكة

ريم : عيب، كمان خالتو صحتها عقدها صارت وبنتها رح تنبسط باقل اشي مشانها

سيرين : يا ربي دخيلك

////

حنين ( متفاجاة ) : بيان ؟!

بيان ( بحزن ) : ممكن ادخل ؟

حنين : طبعا تفضلي، فكرتك بالحفلة

بيان : ما قدرت اروح ( بغصة ) ما بدي ارجع اشوفه من جديد ويطنشني متل دايما

حنين : غلطانة انتي، ليه ما تروحي وتتجاهليه ؟ بعدين الحفلة مو عند بيتهم بالضبط، وين رح تشوفيه ؟

بيان : ... انسي مو حابة اتزكره

حنين : يا بيان يا حبيبتي اللي بتعمليه غلط، روحي وما تفكري فيه، انتي ادي الواجب واعملي اللي عليكي

بيان : شو يعني ؟

اقنعتها ولبستها من عندي، واتصلت مع عمر واجا اخدها ..

كان لازم تطلع من الحالة النفسية اللي دخلتها بعد ما تركته ..

عمر : يعطيكي العافية، شوفير عندك انا ؟

بيان : ماشي نزلني، هلا بركب تكسي

عمر ( معصب ) : بتحلمي، بهالمنظر انا يا دوب مستحمل

بيان ( نظرة غضب ) : شو قصدك ؟ عمر بلا ما نخسر بعض

عمر : ولي من متى بتطلعي هيك انتي ؟ لا وعارفة اني انا اللي جاي اخدك

بيان : يعني وحدة رايحة على حفلة كيف بدك اياها تطلع مثلا ؟

عمر : طيب خلص اسكتي، بس غريب ليه غيرتي رايك ؟

بيان ( مخنوقة ) : الحياة ما بتتوقف عند حدا، الماضي صعب ينتسى بس بنقدر نتجاوزه مع الايام

عمر : يا سيدي عالحكيم، على كل حال خير ما عملتي

////

ياسمين : ماما بالحفلة ؟

ابو امير : اه راحت لحالها

ياسمين : يلا منيح، بالنهاية بضلوا خوات قدام الناس وما في داعي نفضح حالنا

ابو امير : نفضح حالنا ؟ مين اللي ينفضح بالضبط

ياسمين : يا بابا يمكن الناس قدامك بتبين انهم متعاطفين معنا بس صدقني تلات ارباعهم ازا مو كلهم لو كانوا مكان خالتو كان حكوا وعملوا نفس الاشي، غشيم عن مجتمعنا انت ؟

ابو امير ( بنبرة حادة ) : مستحيل، اللي عملتوا ما كان من عشمنا فيها حتى لو كنتي انتي غلطانة كمان

ياسمين : ... وهاد اللي حازز في نفسي اكتر اشي

ابو امير : وعمك المحترم، مو على اساس كان معارض مرته حتى ما كلف خاطره يجبر خاطري بكلمتين ولا يستسمح مني، وطول عمري بعتبره اخ كبير

ياسمين : خلص بابا، انا تعلمت درس من اللي صار وبكل الاحوال ما في اشي برجع متل ما كان حتى لو استسمح منك متل ما بتقول، فانسى وخلي هالحياة تمشي لانه ماشية فينا وبلانا

ابو امير ( بهز راسه ) : كيف احمد ؟ كيف شغله ؟

ياسمين : كتير منيح، بس طول نهاره مشغول وما بتهنى عليه ساعتين على بعضهم

ابو امير : الله يعطيه العافية، ديروا بالكم على بعض الغربة احلى نعمة بهيك اجواء

ياسمين : الله يعافيك، الحمدلله عكل حال

////

ام بيان : مين جابك ؟

بيان : عمر، وين عمتي اسلم عليها

ام بيان : مو حكالك ابوكي لا تطلعي معه ؟ لا وبهالشكل والله ليفرجيكي اشي عمرك ما شفتيه، روحي دوري عليها وحسابك بعدين

بيان : ...

////

قصي : وين كنت ؟

عمر : اجيب بيان خانوم، متمكيجة وحالتها حالة وتعال خدني عالحفلة

قصي : هي ما اجت مع اهلها ؟

عمر : لا، كانت عند بنات عمتي مها متضامنة معهم، بس شكلهم اقنعوها تروح

قصي : يلا كويس، لا تحكي لامجد

عمر : قلقان فيه يعني اروح احكيله، حل عني زمن اول حول

قصي : مو لصالحك، اخرتك تحتاجه

عمر : ... بصير خير

ابو احمد : والله نفسي اشوفه، ما قدرت يا جماعة اذا انا ما وقفت مع مرتي مين يوقف معها ؟ حاولت قد ما اقدر اقنعها قبل ما تطلع الحقيقة انه اخذها ونحل المشكلة بس ما قبلت

ابو ماهر : كل هالحكي ما بجيب نتيجة، انا لحد هسة ساكت معها وما بدي اضغط عليها عشان خايفين على صحتها بس اذا ما راحت عندها رح يصير بينا كلام ثاني وانت اللي رح تتحاسب

ابو عدي : مها اجت اليوم ؟

هيثم : اه اجت لحالها

ابو ماهر : الله يرضى عليها، ما كسرت كلمتي

ابو بيان : بس انكسر قلبها اكيد، ويمكن ما تكون بخير هسة

هيثم : ... الله يسترها

ابو عدي : انا خايف عليها من زياد، لانه اكيد مو موافق

ابو ماهر : لا زياد مرضي وبعزنا، وما بهون عليه مرته تعصى اهلها

هيثم : ...

_____________

__________

بعد الحفلة <<

امجد ( ببوس ايدها وراسها ) : ما يحرمنا من هالطلة، حبيبتي يا خالتي الله اعلم قديه انبسطت لما عرفت انك عنا

انس : جيتك غالية، وما بنسالك اياها طول عمري

مها ( نزلوا دموعها ) : الله يرضى عليكم، انتوا اولادي اللي ما جبتهم

امجد : حلفتك بالله ما تعيطي، بكفيكي اللي دقتيه بهالكم شهر، تعالي يلا نوصلك ونشممك هوا

انس : اه والله فرصة ما بتتعوض، ويسلمو عالهدية الحلوة اعطتني اياها امي

مها : ما في اشي بقيمتك، يلا خلونا نطلع عشان تاخرت عالبيت

امجد : بس مشتاق لامير، ليه ما جبتيه ؟

انس : اه والله كان دبك معنا ورقص هههه

مها : صعب اجيبه واركض وراه بهيك حالة

////

هيثم : الله اعلم على شو ناويات نسوان اخوتي

رانيا : ضليت على فتحة تمي، مو معقول عم بتصيد بالمي العكرة عينك عيني

هيثم : انداري عنها، مها ما بترمي اذنها لمين ما كان انسي

رانيا : بس كانت متجاوبة معها، يعني صحيح انا متاثرة بياسمين وما هانت عليي، بس مو نحط عالنار زيت خلص صارت جاية هدي النفوس

هيثم : مسكين انس رايح عندها وماخدلها حلوان ثاني يوم النتائج، ومو جايب سيرة لاهله

رانيا : كيف عرفت ؟

هيثم : عدي حكالي، كانت ديمة وسيرين عندها جايين يشوفوا رنين واجا هناك بالصدفة

رانيا : فيه الخير هالشب، مسالم كتير وما بحب يزعل حدا

هيثم : بس اوعي تجيبي سيرة عن كلام ام عدي قدام حدا

رانيا : لا مستحيل ما دخلني، بس حكتلك لاني رح انفجر كنت

هيثم : سلامتك حبيبتي، يلا هي وصلنا تفضلي

////

منى ( بحرقة قلب ) : احسن مني والله بعترف اني ضعيفة قدامها، انا ما بستاهل هيك اخت وحتى بنتها كتيرة عليي

ابو احمد : اهدي شوي، والله بخاف يصيرلك اشي

منى ( بتبكي ) : ياريتني متت قبل ما احكي اللي حكيته، ياااا ريتني

ابو احمد ( عصب ) : اسكتي، اوعي اسمع هالكلام منك فاهمة ؟ هاد اللي ناقص

منى ( منهارة ) : ...

ابو احمد : شو بدها اياكي تعملي وانتي شايفة كنتك بهيك صور ؟ صحيح احنا ما صدقنا مثلك بس انتوا النسوان سهل تمرق عليكم هيك شغلات وهاد اللي كانت حاسبة حسابه زينة

منى ( بحقد ) : الله يكسرها، الهي ينتقم منها ويدوقها اضعاف اللي دوقتنا اياه

ابو احمد : ...

////

رجعت على البيت بعد مشوار غيرلي نفسيتي وكنت محتاجيته من زمان، وكان الكل نايم تقريبا، وخصوصا امير اللي لقيته نايم مكاني جنب ابوه ..

مها ( بهمس ) : زياد ؟ انا اجيت

زياد ( بطرف عينه ونبرة حادة ) : بكير

مها : ما انا حكتلك كل اشي، وما عارضت ليه قلبت وجهك هلا ؟

زياد : خلصيني نامي بلا وجعة راس بهالليل، الك عين كمان !

مها ( هزيت راسي ) : ... حاضر

كان حاقد عليي كتير، ومن كتر حقده عاملني بقسوة ما شفتها منه بكل حياتي ..

نسي اني حامل ووضعي صعب، ومع ذلك عاش ليلته بكل سعادة وكاني بنت ليل مو مرته اللي بخاف عليها ..

وطبعا انا ما قدرت افتح تمي بحرف، وسايرته وعملت متل ما بده واكتر ..

_______________________________

بعد اسبوع <<

قصي / عمر ( بغنوا ) : وعنا .. عنا .. الحمدلله عنا توأم

قصي : وهيييييي

عمر : التوم التوم التوم

قصي : تررم

عمر : يسعد عينيهم

قصي : تررم

عمر : حلاوة عاشقاوة اسم الله عليهم

قصي : قولوا واحد اثنين اغلى منهم يا عين

نهى / سهى / هيثم / مها / رانيا / علاء / ريم / ديمة / سيرين : ههههههههههه

ديمة : هاد اللي كان ناقصني انا

عمر ( قعد جنب ستي وبايده ورقة وقلم ) : ستي سمي بالله وحاولي تذكري افراد عيلتكم واحد واحد مين فيهم اجاه توام

ابو ماهر : ههههههه لا اله الا الله

ام ماهر ( بحيرة ) : والله يا ستي منا كادرة اتذكر حدا، اسأل ستك ام امك اكيد من جهتكم الشغلة

عمر ( بحط القلم على طرف لسانه وبكتب فيه ) : استني اشوف اعطيني اسم امك وامها وكل خواتكم

مها / هيثم : هههههه

سيرين : حاسس حالي قاعدة مع مختار ليالي الصالحية، قال ببل القلم بلسانه

قصي : هيهيهي بنحب نعيشكم اشياء من الارشيف، بتعرفي يعني

علاء : المهم سلمى رح يصير عندها اولاد خالة

مها : انه مفاجاة هالتوام، الله يقومك بالسلامة خالتو ويقدرك على تربايتهم

ديمة : امين يارب، الله يسلمك وانتي كمان

عمر ( بتباكي ) : اهئ اهئ اهئ يا حبيبي يا اخوي، من وين بتيجيك الخوازيق ما حدا بعرف

علاء : نعتبر باب التبرعات انفتح من النهارده

قصي : اه يا قلبي عليه، من وين ولا من وين بده يلحق ؟

غنى ( اجت فجاة ) : مسا الخير

الجميع : مسا النور

////

ام عدي : الله يرضى عليك يا امي ما النا غيرك يقنعه

عدي ( مصدوم ) : بس انا مو مقتنع بهالكلام، يعني البنت ما عليها غبار وشو ناقصها ما يخطبها عمر ؟ ترا منيح اذا وافقوا اهلها عليه

ابو عدي : احنا عشان نطلع من هاي الدوامة، ما بدنا اياه يتقدملها من اصله، امك حاطة عينها على وحدة من بنات عمتك مها وانا اقترحت عليها بيان

عدي ( فتحت عيوني ) : بيان !! لا لا اعوذ بالله انا متاكد عمر ما رح يقبل، مو زابطة انسى

ام عدي : وانا حكيت هيك، وبكل الاحول الخطبة بهالوقت مو مناسبة لساته يا دوب اشتد عوده وبدا يحوشله شوي

عدي : ما انا هاد اللي بفكر فيه، من وين جبتوا هالقصص ؟ عمر عاقل وما بخطي اي خطوة بدون تفكير مسبق، مستحيل يرمي حاله بالنار

ابو عدي : عاقل ! هههههه ضحكتني يابا، من وينله العقل ؟ الله يهديه بس

ام عدي : امين، ويبعتله بنت حلال اتطيب خاطره بس بالوقت المناسب

عدي : ... ماشي بصير خير

////

قصي : بس اهم اشي انهم ولدين، يعني السنة الحوامل كلها اولاد ماشاءالله

عمر ( بتخوث ) : دائرة الاحصاءات العامة طلعت النتائج على بكير السنة

الجميع : هههههههههه

مها : هههههههه انا لسا ما عرفت

علاء : اي يلا خالتي من هون لهون ؟ طيب شو بدك تسميه ؟

مها ( بدهاء ) : بما انه زياد سمى امير سمحلي هالمرة انا اسمي وانا حابة سواء ولد او بنت اسمي ريّان

عمر : ريّان ! الهي يدخلك ويدخلنا من باب الريّان يا عمتي، بس برضو ما اقتنعت حاسه للاولاد لابق اكثر

مها : لا بعرف بنات هيك اسمهم برضو

هيثم : يلا بكرا بتولدي وبنشوف

ابو ماهر : اذا صمدت من هون لبكرا كويس بعد هالضحك

رانيا : ههههه اه والله ديري بالك

علاء : يلا بالسلامة، عقبال سارة ويارا وكل بنات الحارة

ديمة : لو واحد منهم كان بنت، كنت حابة اسميها سارة على وزن سهى

الجميع : ههههههههههه

عمر : طيب سميها آمال على وزن يارا ازبط

مها : ههههههههه يمة فرطت

قصي ( بصوت عادل امام ) : لا حول ولا قوة الا بالله

مها : هههههههه

علاء : ولك اسكت انت واياه لتفرط المرة هسة وهات لحق المستشفى

نهى : يخزي شيطانكم يا اولاد

سهى : قال سارة على وزن سهى، بدل ما تسمي سهى بنتي المصونة

عمر : شفتي شفتي، هاي اخرة تربايتك، واللي اكل الخازوق اخوي

قصي ( بتباكي ) : اخويااا

عمر : يا حبة عيني، هات نرن على امجد يجي يشحد معنا قصدي يعيط

مها : ههههههههههه اه اه ناديه

هيثم : يا حبيبي، رن رن على زياد خليه يجي يلم مرته مو ناقصنا

عمر : صحيح عمتي على سيرة الوزن، زمان ما حردتي خلينا نتسحر مع بعض اليوم

مها : ههههههههههههههه

علاء : يخرب بيت اليهود، فاول عليها

مها : هداك اليوم بنتي كانت بدها تحرد من عمايل زوجها

الجميع : خيييير ؟

مها : ماخدها عالدكتورة تفحص، ومجننها قال يا دكتورة متاكدة انه ابني وضعه منيح يعني اله وسع ولا شو ؟ عشان مرتي نحيفة

الجميع : ههههههههه احمد

مها : انا خايف على ابني ينخنق، طمنيني بتولد طبيعي ولا عمليات

الجميع : ههههههههه

مها : وهاي ياسمين كاينة بدها تطلع من المستشفى وتجاكره بنص الشارع، بس الحمدلله اقتنع انه وضعها طبيعي

علاء : بدك الصراحة معه حق

هيثم : ههههه مسكينة ياسمين، طيب كيف حاسستيها نصحت شوي ؟

مها : هي هاي بتنصح ؟ يا دوب شوية بطن مبين

سهى : متل امها

مها : لا انا غير ياسمين مو عارفة لمين طالعة

قصي ( عينه على عمر ) : تعال اقعد جنبها وطلع شجرة العائلة

عمر : قولتك

سيرين ( ماسكة الموبايل ) : ( احمد : الله يعطيكم العافية يا شباب شكلها حماتي وبنتها رح تولد اليوم من ورا مسرحيتكم )

هيثم : ههههههه يا حبيبي هي البث المباشر شغال

سيرين : معقول نضيع هيك مشاهد بدون تصوير

ديمة : ههههه ياسمين ميتة ضحك، اتطلعي

ياسمين : هههههههه ماما مشان الله امسكي حالك، مو ناقصنا يمسكوا عليكي ممسك يضلهم يضحكوا لاخر يوم بعمرهم

عمر : ولك انتي اخر وحدة تحكي يا ام المماسك، يمة ما اقواهم سارة ويارا وبنات الحارة

ريم : بشتغلوا من تحت لتحت

قصي : بس منيح اللي سمعنا صوتكم والله، مبروك يحيى

احمد : الله يبارك فيكم، وين عدي عنكم ؟

عمر : منادينه عالمنفردة اهلي، اكيد بخططوا شو يسموا اولاده

احمد : ماشاءالله، بالسلامة يا ديمة الله يكون بعونك

ديمة : الله يسلمك، بالعكس كتير مبسوطة

قصي ( بتمسخر ) : يااااااي جد مبسوطة ؟ نيالهم

ياسمين : ديري بالك يا ديمة مو نلاقي واحد مخول وواحد لعمه، يستر عليكي مو ناقصنا نسخ جديدة

عمر ( بمسخرة ) : هاهاهاي، لنشوف النسخة اللي بدك تجيبيها عصاية طقي، انتي بس حاولي يطلع مخول

احمد : يا ريت والله، من حسن حظي بكون

مها : يا حبيبي الله يجبر بخاطرك

هيثم : بلكي يطلع لخال امه كمان

ياسمين : بكون انا اللي نيالي ههههههه

احمد : ماشي انتي واياه، بتنشكحي قدام خالك انتي، نصير المراة والمحامي الاول لحقوق البنات في العيلة

رانيا : ههههه اه والله، بحياتي ما شفت زلمة متله حبيبي هيثومتي

علاء : هههههههه احمد تتذكر ؟

احمد : ههههه انا اللي بتذكر

هيثم : مالك وله انت واياه ؟ بفرجيكم

ياسمين : الله وكيلك خالو كل الواتس بينهم حكي عليك، بس انا بدافع عنك دايما

عمر : مرضية، الهي يرضى عليكي

قصي : كيد ما مرق عليي اطلاقا

احمد : شفتوا المعاناة اللي عايشها، النا الجنة يا شباب الحمدلله

سهى : يا ويلي عليكم

نهى : ياما بالحبس مظاليم

سيرين : الا حبسي مع حموزتي، يا ريت كل السجانين متله

الشباب : يا سييييدي

رانيا : كلنا هيك سيسو بس ردة عين ههههه

سيرين : يعني انتي اوك خالو هيثم برضو مو بطال

مها ( بتغمز النسوان ) : من عنا بنسمع صوت البوسة لما يجي من الدوام

نهى : ههههههه هيك كتير

سيرين : خالتو ؟!

مها : انا صريحة بتعرفي

ياسمين : احنا اللي عارفين

احمد : بس انتي وين بتكوني قاعدة خالتي ؟

مها : ما اقواك انت

امجد / آيات / انس ( اجوا فجاة ) : سلااام عليكم

الجميع : اهلا وسهلا

عمر ( بغني ) :

اي حاجة تيجي من ريحة الحبايب

بتطمن قلبي اللى مشغول ع اللي غايب

كلمتين يتقالوا منه ولا عنه

يطمن قلبي اللي مشغول ع اللي غايب

لسه سامع كل كلمة قالها ليا

لسه شايفه زي ما يكون بين ايديا

اه يا شوق خليك بقى حنيّن عليا

وريح لي قلبي اللي مشغول ع اللي غايب

قصي : والله اهليييين

عمر : تاخرت يا زلمة، راح عليك كثير بس يلا بنعيد مشانك

علاء : ادفعوا تذاكر اول، عالشخص عشرين دينار

انس : بروح احضر فيلم ب(جراند سينما) ارخص وعالاقل ممثلين محرزين

هيثم : هسة سيرين بتفرجيك الفيديوهات، وبتقرر اذا محرزين او لا

عمر : بعدين المسرحية ريعها رايح تبرعات لاخوي عدي، بمناسبة التوأم اللي جاييه عالطريق

امجد ( فتح عيونه ) : الله اكبر، بسم الله ماشاءالله من وين اجا التوام بعيلتنا ؟ يعني بعرف انه وراثة

ديمة : لجارتنا

مها : ههههههههههههه

سهى : اه والله جيرانا عندهم توام

ديمة : منا بقله لجارتنا

آيات : برضو عملتي مفاجاة يعني ؟

عمر : مفاجاة شو انتي الثانية، هاي صدمة نفسية من يومها اخوي بطل ياكل بوفر بحق الاكل عشان يجيب عربايات وحفوضات وما شابه

غنى ( بنبرة عصبية ) : خلص عمر زودتها، لو يسمعك بابا بزعل

ديمة : مالك ؟ مبين انه بمزح ما احلاه وحاكي جد اصلا

غنى : بس مو لهالدرجة كمان، مو قدام اي حدا بنحكى هيك كلام

نهى : اي حدا ؟ مين قصدك

عمر ( رفع حواجبه ) : اه فعلا عن مين قصدك ؟

عدي : مالكم ؟ مرة بتضحكوا ومرة بتتهاوشوا

غنى : تعال شوف اخوك عملك شحاد، الواحد بحمد ربنا عالنعمة والحمدلله رح يجيكم توام وهو عامل عمايله

عدي : طيب بمزح غشيمة عنه يعني ؟

غنى : بس زودها كتير

سيرين ( بجكر ) : ملاحظة انك من اول ما اجيتي ساكتة وماسكة موبايلك ولا كانه في حدا حواليكي، وبس فاتوا اولاد خالتو منى انقلبتي فجاة ؟

عدي ( بلع ريقه ) : غنى، اطلعي امي بعتتني اناديكي اصلا

غنى : طالعة، اريحلي من هيك قعدة كلها احزاب

آيات : اوف، هاد قلبك مليان وما معنا خبر

عمر : آيات، انسي لا تهتمي

امجد ( مو عاجبه ) : لا يا ؟ شو دخلك بينهم ؟ كان قمت تفاهمت معها بدل ما انت قاعد بتغني

قصي : شباب ؟!

علاء : يا حبيبي، انطرقنا عين ولا شو ؟

الحلقة الخامسة عشرة :

ج١

حاول أن تعطي كل شيء حجمه ..

لا أكثر ولا أقل ..

سواء كانت مشكلة ..

أو موقف .. أو انسان ..

_______________

____________

عيون كتيرة كانت بتراقبنا، وكأنهم قاعدين بس مشان يتاكدوا من اشي بعرفوه عنّا ومو مصدقينه الا لما يشوفوا بعيونهم ..

ما بنكر انه معهم حق، نظراته الي كانت واضحة، وبدون اي اهتمام باللي حوالينا ..

الاغنية اللي طلعت منه عفويا كانه كان يغنيها بقلبه قبل ما يشوفني، ولسانه نطق فيها بدون وعي ..

امجد ( بزورني بعيونه ) : صبايا شو رايكم تقعدوا بالصالون او بغرفة ثانية، خدوا راحتكم يعني

واكيد امجد ما رح يمرق هالقعدة على خير، بس عمر ما بحسب حساب لاي حدا، المهم يتاملني ويشبع عيونه مني ..

عمر : غيران من الجمهور الغفير اللي جاي يتابعني ؟ شو مدايقين عليك نفسي افهم

قصي ( بخبث ) : ههههه

عدي : لا صح كلامه، دمدوم فوتي ارتاحي حبيبتي لا تنسي الدكتورة شو حكتلك

عمر : في حدا غيرها حامل بتوام هون لو سمحتوا ؟

مها : ههههههههه

آيات : يلا فايتين، تعالوا بنات هيك اريحلنا اصلا

امجد : وانا بدي راحتكم

////

كانت كلمة امجد مثل الرصاص على مسامع الكل، وسكتوا حتى يشوفوا ردة فعل العشاق الجداد عالساحة ..

كنت مو مصدق كلام قصي لما حكالي، وحسيت انه الموضوع مبالغ فيه نوعا ما ..

بس فعلا عمر وآيات بحالة صعبة، وواضح انه اهلها مو بصفهم، بالاضافة لاهله ..

علاء ( بهمس ) : ما اغباه

قصي ( بهمس ) : بدل ما يضل ساكت، بزيد الحكي عليه

علاء ( بهمس ) : وواضح انه عدي عنده علم بالقصة، من لما فات وهو براقب فيهم

قصي ( بهمس ) : الله يستر

////

وجعني قلبي على اخوي والبنت اللي ما بعرف كيف عشقها، ومتى ؟ بس كل اللي بعرفه انه طريقهم مليان صعوبات، وما حدا راحمهم ..

انصدمت من كلام اهلي عليها، حتى ابوي اللي طول عمره بحلف بخواته وبناتهم تغير، وكانه الموضوع طلع من ايده ..

هيثم ( بهمس ) : مو على بعضك، صاير اشي ؟

عدي ( بياس ) : ... ما بعرف، بس ادعيلنا يهدي البال

هيثم ( باهتمام ) : طيب احكيلي، يمكن اقدر اساعدك بباسطة بدل ما الهم راكبك ومبين عليك

عدي ( بهز راسي ) : رح احكيلك كل اشي، بس هسة

صعب

هيثم : ماشي، بانتظارك

////

ديمة : وجه عدي ما بتفسر، لاحظتوا ؟

البنات : اه والله كتير

سيرين : وغنى النورية والله بدها شرشحة، لسا ما شفيت غليلي منها

ريم : انا برايي انه ما كانت منيحة، واكيد كلامها مو مقصود، اعطيها فرصة

آيات : ... وامجد ما رح يتركني بحالي

سيرين : انتي التانية مو هيك كمان، خفي شوي قدام اخوانك

ديمة : هي اللي تخف ولا المتيم الولهان

آيات : ...

ريم ( مسكت ايدي ) : آيات، يا عمري الله يهديكي مو معقول اللي بتعمليه بحالك، حتى هو عم يظلم حاله كمان

آيات ( مخنوقة ) : ما دخلني، والله ما عملت اشي انا، هو اللي لاحقني وضل وراي لحتى ...

سيرين / ديمة : لحتى شو ؟

آيات : حتى احبه، ما تركني بحالي صدقوني، انا بعترف اني اعجبت فيه بالاول بس هو كتير كان يلمحلي، لحد ما ياسمين حكتلي انه بحبني

ريم : وازا حكتلك ؟ يعني هي حكتلك عشان ازا انتي كنتي حاببتيه اعرفي انه من طرفين بس ازا لا وقتها القرار برجع الك

سيرين : حتى لو حبيتوا بعض، لسا بكييير كتير انه ترتبطوا، اتطلعي على حالة العيلة

ديمة : اتطلعي على امه كيف تغيرت معكم، شوفي كيف حتى انها ما بتنزل تقعد مع حدا لا هي ولا سلفتها ولا حتى ازواجهم

ريم : انه جد كنا زمان غير، ودايما نقعد سوا

سيرين : لا تستعجلي، هي صوتها طلع شكلها سمعت ندائك هههه

////

ام عدي : السلام عليكم

نهى / سهى / مها / رانيا : وعليكم السلام

ام ماهر : بدك عزومة انتي وجوزك ؟ ووينها سلفتك الثانية مالكن مبطلات تسالن ؟

ام عدي : الله يسامحك، بس قلت يمكن يطلعوا دار ابني عندي، انا كمان حماية يا مرت عمي ولا نسيتي ؟

البنات : مرحبا

ديمة ( بتسلم ) : كيفك خالتو ؟

ام عدي ( قالبة وجهها ) : منيح اللي نزلت عشان اشوفك يا كنتي، بدل ما تطلعي تسلمي على اهل زوجك

ديمة ( مصدومة ) : حقكم عليي بس عشان ناديتوا..

عدي ( قاطعها ) : يمة ما انا طلعت عشان ناديتوني ونزلت وعاساس تلحقوني انتي وابوي

ام عدي ( مو عاجبها ) : حتى ولو، المفروض من ساعة ما وصلتي تطلعي عنا

ديمة ( بخجل ) : المرة الجاي ولا يهمك

سهى ( بهمس ) : يمة اكلتها

نهى ( بهمس ) : الله يهديها كتير متغيرة

////

غنى ( ماسكة بيان ) : ولك وين رايحة ؟

بيان ( بلهفة ) : بدي اشوفه، اتركيني

غنى : لا تخليني اندم اني حكتلك، بكفي بيان انسيه

بيان : ...

غنى : والله نسيكي وبطلتي تهميه، مو شايفك خلص طلعتي من قلبه انا متاكدة

بيان ( بتبكي ) : اشتقتله كتييير، انا كيف رح انساه ؟ احكيلي

غنى ( حضنتها ) : خلص اهدي حبيبتي، بكفي تعذبي بحالك، نصيبك هيك شو تعملي

بيان : بس انا اللي قطعت هالنصيب، انا لازم ارجعله

غنى : ...

بيان ( نهضت حالها ) : بدي انزل اشوفه

تركتها بتنادي عليي ونزلت، ما كان قدامي الا اني اطفي هالنار اللي شاعلة فيي من شوقي اله الا بهالطريقة ..

بيان : مسا الخير

الجميع ( ما عدا امجد ) : مسا النور

بيان ( بتلسم ) : كيفكم ؟ ليه ما حكيتوا انكم هون

ام ماهر : وين اهلك يا ستي ؟

بيان ( عيوني عليه ) : طالعين، كمان شوي برجعوا، وين بناتك عمتو ؟

مها : بالبيت والله كانوا طالعين مع ابوهم، انا مرقت ما كان حدا فما بعرفوا انه في لمة هون

بيان : يلا بلكي مرقت بكرا اشوفهم

مها : اهلا وسهلا

رانيا : مبارك الاحفاد، والله حقك علينا كلنا لازم نطلع نباركلكم، بس القعدة اجت هون فجاة عشان اسراركم العائلية

مها : هههههه انا ما فيي حيل اطلع درج والله يا ام عدي، سامحيني هي بباركلك هون، ريته الف مبروك

هيثم : مبارك ان شاءالله، عقبال سلامتها هي واياهم

ام عدي : الله يبارك فيك، وعقبال سلامة مرتك وسلامتك يا مها انتي عارفة ما بعتب عليكي الله يسامحك

مها : تسلمي يارب

بيان : صحيح دمدومة مبارك التوام، وانت كمان عدي

ديمة : يبارك فيكي حبيبتي

انشغل بموبايله، وبالاحاديث الجانبية مع قصي وما رفع عينه ابدا ..

كان بس بدخن بنفس الطريقة اللي كان يدخن فيها لما يكون متوتر ..

ياااه شو اني لسا متعلقة بتفاصيله، كان نفسي احكيله متل ما كنت احكيله زمان ( ما تقلق من اشي طول ما انا جنبك حبيبي ) وكان يرد عليي ( وجودك احلى اشي صار بحياتي ) ..

كانت هالذكريات متل الصدى بترن بجدران دماغي، ما تحملت وطلعت من المكان كله بدون اي كلمة ..

////

عمر : مبروك يمة عقبال ما تشوفي اولادي يارب

الجميع : ههههه

ام عدي ( بجكر ) : امين، اول اشي الاقيلك بنت حلال على كيف كيفي واشوفك متهني معها

عمر : على كيف كيفك ومتهني معها ؟ كيف صارت هاي ؟

ام عدي ( باستنكار ) : مو عاجبك زوقي يعني ؟

عدي ( بنبرة حادة ) : عمررر

عمر : الله يسامحك، بس اذا بدك اياني اكون مبسوط بتزوجيني على كيفي انا، ولا شو رايكم يا جماعة ؟

هيثم : انا ما بعرف سيرة الزواج على لسانك ليه ؟

عمر : شو ليه ؟

هيثم : يا عمي الله يهديك لساتك ما صحصحت من الجامعة، تهنى شوي وحوشلك قرشين وبكون ابوك كمان قدر يساعدك مثل ما سند اخوك، اما هسة مين بده يعطيك بنته ؟ ما انت شايف بنات هالبلد كيف طلباتهم

ام عدي ( بانتصار ) : يسلم تمك يا ابو آدم، كفيت ووفيت

عمر ( رفع حواحبه ) : طيب بلكي البنت اللي بدي اياها مو مثل بنات هالبلد وطلباتها على قدرتي ؟

عدي : لا حول ولا قوة الا بالله

نهى : بكير على هالحكي عمتو، صدقني كلامهم صحيح، تزوج من تعبك ورح اتضل رافع راسك قدام مرتك واهلها لو شو ما كان وضعك، هي حمزة ماشاءالله عنه اكبر مثال قدامك، واحمد متله

علاء : وانا وعدي شو مالنا ؟

سهى / مها : هههههههه تورطتي

عدي : صح كلامك يا عمتي

امجد ( ضرب على كتف عمر ) : بدك نصيحتي يا صاحبي، ابعد عن الزواج وغنيله، هينا اسم الله علينا عايشين وما احلانا ضروري نجيب حدا ينق علينا، بس احنا غاويين وجعة راس

ام عدي : انت الله ريحك يعني ؟ كانك ما صدقت وتتركك بيان

امجد ( بجكر ) : يعني اشي مثل هيك، انتي شو شايفة ؟

هيثم ( بهدي الجو ) : كله عالنصيب يا جماعة كله عالنصيب

ابو ماهر : الله يهدي هالشباب، ويعين اهاليهم عليهم

امجد / عمر / قصي ( رافعين ايديهم ) : اميييييين

مها : هههههههههه

هيثم : كمان مرة بتضحكي بحملك وبوديكي على بيتك، بكفيكي اليوم

الجميع : هههههههههه

////

ديمة ( بهمس ) : مسكينة بيان شفتي كيف كانت ؟

سيرين : استغفر الله العظيم من وين ولا من وين الواحد يتحمل

ديمة : لسا بتحبه يا ويلي عليها

سيرين : اي خلصيني انتي التانية، يا ويلي علينا احنا اللي متلها ما بنحزن عليهم

ديمة : جرحتني بكلامها قدام الكل، ما توقعت لهالدرجة توصل معها

سيرين : لو تسمعي كلام حماتي شو بتعملي ؟ خليها على الله

ديمة : حسبنا الله، كان انا ولا انتي ولا ياسمين وحتى آيات حظنا واحد

سيرين : الحمدلله على كل حال، المهم ازواجنا مناح معنا، والله يشفق على آيات من اللي بستناها

////

ابو عدي ( اجا فجاة ) : مالك على مها ؟

هيثم : يا زلمة بدها تورطنا مع ابو الزوز قولة ياسمين

مها : ههههههه اه والله ياسمين كانت تقهره بس تحكيله هيك

ابو عدي : الله يقومك بالسلامة انتي وبنتك وباقي هالبنات، شو اخبارك يا ديمة ؟

ديمة ( بتسلم ) : الحمدلله خالو، كيفك انت ؟

ابو عدي ( حضنها من الجنب ) : يسعدها الغالية هيك كبرتيني فجاة اثنين بدل واحد كمان ههههه

سهى : ان شاءالله بتعيش وبتشوف اولادهم

ابو عدي : امين، والقايلة يارب

آيات : كيفك خالو ؟

ابو عدي : اهلا اهلا هي توتو هون كمان، وين متخبية ؟

آيات : لا هيني قاعدة هون، بس ما حدا شايفني

امجد : عشان امي مو هون، مو متوقعين يشوفوا اولادها

الجميع : ...

ابو ماهر : كان اجت طيب ؟

انس : ما حكنالها انه جايين، اصلا امجد كان طالع لحاله عشان عمر حكى معه

مها : مين البطل اللي رح يوصلني اليوم، لانه ابو الزوز بدا ينق عليي

سهى : خلصت الزيارة حسب التوقيت المحلي عنده

ابو ماهر : احكيله يجي يسهر ماله مبطل يبين الا بالمناسبات

مها : مشغول كتير الله يعينه، حتى اليوم لولا البنات نقوا عليه ولا ما كان قادر يطلعهم

ام ماهر : الله يديمه تاج على روسهم ويفرح فيهن كلهن

امجد : قومي خالتي يلا احنا كمان بدنا نروح

هيثم : انا بوصلها مع سيرين، خليكي شوي

امجد ( عيونه على مها ) : شو قررتي ؟

سيرين : خالو ليه تغلب حالك طريقي غير عنك، انا بروح مع علاء عادي

مها : اه خدي راحتك بالقعدة، يلا امجد انا جاهزة

سيرين : طيب انتوا كمان ما لحقتوا توصلوا خليكم شوي

ديمة : اه والله ما شبعنا من آيات

امجد : سوري منكم، للمرة القادمة باذن الله

سيرين ( بمسخرة ) : don't worry

امجد : يا حوينتك يا هالواحد

عمر : ويا خسارة المكالمة فيك، جايينا عشان تحملنا جميلة يعني ؟

امجد : لغير مرة بس نعست فجاة ابصر مالني

قصي : ابصر ههههه

_______________________________

ابو احمد : وين اولادك ؟

منى : طلعوا، يمكن عند اهلي

ابو احمد : كان رحتي معهم

منى : تعبانة

ابو احمد : سلامتك، تعالي اقعدي طيب مالك بتحوسي ؟

منى ( بحسرة ) : احمد حكالي ياسمين تعبانة واوعي تحكي لحدا، الله يسترها

ابو احمد ( متفاجا ) : كيف يعني تعبانة ؟

منى : دمها قليل وبحاجة حديد وما بعرف شو، وصايرة اتدوخ كتير

ابو احمد : الله يهديها اكلها قليل هالبنت ناسية حالها انه حامل ؟

منى : نفسي احكي معها يا حبيبتي الله يقومها بالسلامة وما بدي اشي

ابو احمد ( بحب ) : رح تحكي باذن الله، ياسمين اللي بعرفها قلبها ما بطاوعها على خالتها واهل حبيبها احمد، الله يجمعنا فيها بهداة بال

منى : ياااا رب

////

مها : دايما مغلبتكم انا

امجد : بالله عليكي ؟ صراحة معك حق بس شو بدنا نعمل لازم نتحمل بتضلي خالتنا وهيكا

انس / آيات : ههههههه

مها : الله يرضى عليكم، معناها ما بتروحوا بدون عشا، بتعرفوا اولاد اختي وهيكا

انس ( بحماس ) : يا سلام عليكي يا خالتي، لسا بدي احكيلك شو رايك نطششك مثل هداك اليوم ههههه ونتعشى سوا

امجد ( عيونه عالمراية بتطلع على انس ) : لا بلاها خالتي، عشان عمي ابو امير

مها : ما بحكي اشي اتطمن، يلا هي خبرت البنات يبداوا يجهزوا

آيات : خالتو انا بعتزر، بس صعب انزل

مها ( لفت وجهها عليها ) : لا ممنوع الاعتزار ست آيات

بعتت لبناتي عن اللي خططته مع اولاد خالتهم، ووصيتها باللي بفكر فيه ..

مها : تفضلوا خالتو، اهلا وسهلا

امجد / انس : السلام عليكم

ابو امير : اهلا وسهلا وعليكم السلام

آيات : ك ك كيفك عمو ؟

ابو امير ( بهز راسه ) : اهلين عمو، الحمدلله بخير انا

مها ( بغير جو ) : ارتاحوا خليني اشوف شو عملوا البنات

حنين ( بهمس ) : شو المناسبة يعني ؟

مها ( بهمس ) : هيك اجا على بالي، المهم عملتي اللي وصيتك عليه

حنين : عملت يختي، ما شفتيه كيف استقبلكم

رنين : بشوف آيات جاية عادي ؟

مها : يا حرام قال ما بدها تنزل، خليتها غصب تيجي

حنين : يعطيكي العافية

مها : اسيل نامت ؟

حنين : نيمتها غصب

مها : منيح كتير، خلي هالعشا يمرق على خير

////

كنت سامعة صوته ومو قادرة اطلع من الغرفة، بس لانه مو لازم اعمل اي مشكلة خصوصا انه بابا موجود وامي خايفة عليي منه ..

كل هالكلام مو مقتنعة فيه، لانه المهم اني رح اتحاسب على ذنوب انا ما عملت اشي منها ..

فرح : اوعي تطلعي فاهمة

اسيل : نعم ؟ انقلعي من وجهي

فرح : انا شو دخلني، هيك خواتي حكولي

اسيل : تضربوا كلكم

////

فرحتي بهالزيارة اللي اجت فجاة ما تمت، وحبيبتي ما بينت ولا قدرت المحها حتى ..

وخالتي ما قصرت فينا وحاولت تبسطنا قد ما تقدر، بس الوجع كبير جوا عيونهم وخصوصا زوجها ..

انس ( بهمس ) : وين اسيل ؟

فرح : نايمة

انس ( بهمس ) : بس تصحى احكيلها انس بسلم عليكي

فرح : ان شاءالله

آيات : وين اسيل ؟

حنين : نايمة

آيات : نوم العوافي، ليه ما اجيتوا على حفلة انس مع خالتو ؟

رنين ( بنبرة حادة ) : ما في داعي لهالسؤال، حتى ماما راحت تجاوزا

آيات ( بالم ) : اسفة، معك حق

حنين : كيف شغلك ؟ ليه هيك وجهك باهت وتعبان

آيات : ما بعرف مالني، يمكن من السعادة المفرطة هههه

حنين / رنين : ...

ابو امير : كيف هالماجستير معك ؟

امجد : ممتاز الحمدلله

مها : عقبال الدكتوراه يارب

امجد : امين، عقبال ما تشوفي امير

وانتهت هالزيارة بوداع حار من خالتي مثل ما بتعمل دايما معنا، وكانها بتوصللنا رسالة من خلاله ..

////

زياد : يعطيكي العافية

مها : الله يعافيك حبيبي، خلصت شغلك ؟

زياد ( مو عاجبه ) : بتتخوثي ؟ شو مناسبة هالزيارة المباركة فهميني

مها ( بثقة ) : اولاد اختي ما بدهم مناسبة لزيارة خالتهم، وما في اشي بيني وبينهم

زياد : اااه، يلا الله يخليكم لبعض

مها : امييين

زياد : ضلي ردي جواب، بس حسابك عم يكبر عندي يا مها

مها : ...

كنت مقهور لدرجة ما قدرت اسكتلها، لسا روحتها على الحفلة ما نسيتها وكمان مشاوير معهم واليوم كملت بزيارتهم وفوق كل هاد آيات معهم ..

كل اللي صار ببنتها نسيته، ومتذكرة انهم اولاد اختها وما في اشي بينها وبينهم ..

مها : اطفي الضو ؟

زياد : براحتك

مها : اوك

بكل برود طفته ونامت على جنبها المعاكس الي، وكالعادة بتتوجع وانا بعيد عنها ..

كانت ماسكة موبايلها وبتكتب، وما سالت فيي ولا حاولت تحكي معي اي كلمة ..

////

ياسمين : ماما ليه بتحكي هيك ؟

مها ( بتبكي ) : متل ما وصيتك، ديري بالك على حالك انا ما بعرف ازا رح اقوم بالسلامة او لا، المهم بدي اموت وانا متطمنة عليكي

ياسمين ( منهارة ) : ماما مو ناقصني الله يوفقك احكيلي فيكي اشي ؟ شو قصتك ؟

مها ( بتبكي ) : بحبك ياسمين، الله يرضى عليكي يا امي ويهدي بالك .. سلام

يمكن اللي حكيته كان صعب وماساوي بحق بنتي، بس كان بدي اوصيها على حالها وعلى زوجها واولادها ..

حاسة نهايتي قربت، وهالولادة رح تكون صعبة كتير، والاصعب منها هو بعد زياد عني، حبيبي اللي طول عمره سند الي ..

////

سمعت صوت بكى طالع منها، قمت من مكاني وسحبت الموبايل من ايدها حتى اشوف مع مين بتحكي ..

قلبي كان حاسسني انها بتتواصل مع اختها منى، وما تحملت اضل مكاني ..

مها ( مصدومة ) : ليه اخدته مني ؟

زياد ( بنبرة حادة ) : مع مين بتحكي بهالوقت ؟

مها ( بتبكي ) : انا ؟ زياد شو قصتك

زياد ( بعصبية ) : في غيرك هون ؟ احكيلي مع مين بتحكي من وراي ؟ وليه ما بدك اشوف

مها ( بتمسح دموعها ) : الله يسامحك، بس صدقني كنت احكي مع ياسمين

زياد : كذابة، افتحي التلفون اشوف اذا صحيح او لا ؟

مها ( قامت من مكانها متثاقلة ) : انت مو زياد اللي بعرفه، مستحيل تكون انت مستحيييييل

طلعت من الغرفة منهارة وبحالة صعبة كثير، وانا مصدوم بحالي وباللي حكيته الها ..

ما كانت فاهمة عليي شو قصدت، وانا ما عرفت اشرحلها قصدي بشكل اوضح ..

////

احمد ( مفزوع ) : بسم الله، ياسمين ؟ ياسميييين

قمت من التخت مثل المجنون، وياسمين ما كانت جنبي ..

طلعت من الغرفة ادور عليها، لقيتها منكمشة على حالها ومنهارة عالاخر ..

احمد ( بخوف ) : ياسمين، ياسمين حبيبتي اتطلعي عليي انهضي حالك اشوفك

ياسمين ( بترجف ) : أ أ أحممممد

احمد : شو ؟ احكي شو صاير

ياسمين ( ضمتني ) : ماما يا احمد، ماما رح تموت وتتركني، انا لسا صغيرة وخواتي صغار وامير لسا صغير كمان

احمد ( انقبض قلبي ) : شو هالحكي من وين جبتيه ؟ بسم الله عليكي كنتي تحلمي ؟

ياسمين ( بتهز راسها ) : لا، ماما بعتتلي عالواتس شوف

مسكت الموبايل اقرا الكلام، ما صدقت انه فعلا هيك حاكية خالتي، انقصفوا ركبي من الخوف عليها ..

مستحيل اتخيل يصير فيها اشي كيف عيلتها ؟

احمد ( بلعت ريقي ) : ياسمين، لا تخافي حبيبتي هاي اوهام قبل الولادة، توكلي على الله وادعيلها، مو انتي دعيتيلها بالعمرة ؟

ياسمين ( بين ايدي ) : تعبانة يا احمد، انا بموت ازا امي صارلها اشي

احمد ( حضنتها ) : بعيد الشر عنك وعنها، بعيد الشر

////

منى : فرحتوني، الله يرضى عليكم، يعني كانوا كل خواتي هناك ؟

آيات : سيدي زعل لانك ما اجيتي

منى : انا كنت تعبانة شوي، بس همة ما حكولي

امجد : كل وحدة جاية لحال بدون اتفاق يعني، اول وحدة خالتي مها لحالها مارقة

انس : وديمة حامل بتوام، وعمر وقصي عاملين احتفال وجمع تبرعات هههههه

منى : هههههه الله يقومها بالسلامة

آيات : ومرت اخوكي بهدلتها عشان ما طلعت سلمت عليهم اول ما وصلت

منى : ههههه منيح، بطلعلها

امجد : من اي ناحية ؟

منى : مو عاساس انا اللي بس عاطلة، خليهم يشوفوا غيري كمان

امجد : بالله ! هية شطارة يعني ؟ استغفر الله العظيم بس

آيات : ... الله بعين

////

عمر ( بغضب ) : هيك يعني ؟ متفقين عليي

عدي : وطي صوتك

عمر : لا يا سيدي ما بدي اوطيه، واحكي لاهلك كان لهم ولد، انا لعندهم مو راجع من اليوم، ورايح اخطبها غصب عن الكل

عدي ( كتفت ايدي ) : يا سلام، وبعدين ؟

عمر ( بصوت مخنوق ) : احكيلي هالبنت شو ذنبها، والله ما عملت اشي، بالعكس من اول يوم موقفة ضد امها وحاولت تغير رايها ولما عرفت عن منار انهارت وما عرفت شو تعمل وكيف تواجه ياسمين وتحكيلها انه ما كان قصدها

عدي : ماشاءالله، خطوة بخطوة معها، وبعدين ؟

عمر : بدك تساعدني وتسندني يا اخوي الوحيد ولا انت كمان تخليت عني ؟

كلمته هزت كياني، وزادت وجعي، والهم فوق راسي ..

ما بعرف شو اجاوبه، وكيف احكيله انه نفسي اكون معه بس لازم اوعيه ..

عمر ( بهز راسه ) : الظاهر انك مغلوب على امرك، يلا عن اذنك

مسكت بايده وشديته ..

عدي : وين رايح بهالوقت ؟ خليك نام عندي الليلة

عمر : لا بروح عند واحد من اصحابي، شو ذنبها مرتك تتحملني

عدي : بالله جد ؟ هي مرتي غريبة يعني، واصحابك اقرب

عمر : ...

عدي : خليك هون هسة باجي

////

كنت سامعتهم وبلطم على حظ آيات واللي بستناها، واجا عدي وشافني حزينة ومكتأبة، وفهم عليي ..

عدي : لا تزيدي عليي

ديمة : حلفتك بالله عدي لا تتركه حرام شو ذنبهم ؟، اهلك ما عندهم سبب مقنع لتفريقهم

عدي : هاد اللي قاهرني، وحاولت معهم والله يا ديمة حاولت وربي يشهد بس امي ما بعرف شو مالها، قال بدها رنين

ديمة ( مصدومة ) : نعم ؟ هههه ضحكتني

عدي : انداري، لسا بيان ابوي بده بس حكتلهم اوعوا

ديمة : يا حبيبي كملت، والله لتولع بالعيلة

////

آيات : لو شفتيها كيف بتطلع عليه

منى : خليها تتعزب بتطنيشه، مفكرته بده يضل يركض وراها متل زمان

آيات : بس والله حزنت عليها، شكلها ندمانة

منى : الله عالم شو صاير بينهم وشو اللي وصلهم لهون

آيات : الله يفرجها علينا، ما حدا مرتاح

منى : وهاي ياسمين مسكينة معها فقر دم يا ويلي عليها، قلبي متل النار

آيات : ييييي، زعلتيني لازم احكي معها والله

منى ( بلهفة ) : اه اه احكي ماما ووصيها منيح، خليها تحس انه احنا جنبها

آيات : ولا يهمك ماما

////

بيان : مرحبا

امجد ( متفاجا ) : ؟

بيان : ازعجتك بهالوقت، بس حبيت احكيلك كم شغلة

امجد : ... لا عادي صاحي

بيان ( تسجيل صوتي بصوت مهزوز ) : امجد، انا انا تعبت .. بعدك عني بموتني عالبطيء انا استسلمت، مو قادرة اضل بعيدة عنك اكتر من هيك، بعتزر منك بعتزر كتييير حبيبي انا .. بحبك

امجد ( حبست دمعتي ) : غلبتي حالك، تاخرتي باعترافك انا واياكي انتهينا

بيان ( بتبكي ) : لا تقسي قلبك عليي، والله ما كنت بوعيي وقتها، سامحني وخلينا نفتح صفحة جديدة الله يخليك اعطيني اخر فرصة

امجد : ... تصبحي على خير، وسامحيني رح اعملك بلوك حتى اخلصك من هالعذاب شوي شوي وتتعودي على انفصالنا لانه النا شهور ولساتك ما تعودتي للاسف

بيان ( منهارة ) : ... قبل ما تروح تاكد اني ما رح احب حدا بعدك، قلبي الك وبس

كان نفسي احكيلها نفس الكلمة، انا ما حبيت قبلك وما رح احب بعدك، بس فضلت اخبيها بقلبي لاني ما بدي اتراجع عن قراري، انتي انتهيتي يا بيان بس حبك ما انتهى ..

انتي عذبتيني ورح اتلذذ بتعذيبك، لانه اجا دورك للاسف ..

_______________________________

بعد ٣ أيام <<

مها ( بتتوجع ) : الو علاء

علاء ( بخوف ) : خالتي ؟ شو مالك

مها : دخيلك الحقني عالمستشفى، رح اولد

علاء : شوو ؟ يلا يلا جاي اجهزي بسرعة

ريم : شو مالك ؟

علاء : انا رايح خالتي مها رح تولد، الله اعلم شو صاير معها

ريم ( بخوف ) : يممممة، الله يوفقك طمني

علاء ( مستعجل ) : ماشي ماشي

صوت خالتي قطع قلبي، كانت بحالة صعبة وتذكرت ريم لما ولدت ..

بس ليه اتصلت عليي انا ؟ وين زوجها ؟ شو اللي صاير معها ؟ ..

مها ( بالم ) : استنى اودع بناتي

البنات ( ببكوا ) : لا ماما جايين معك

مها ( بتلقط انفاسها ) : ديروا بالكم على اخوانكم من بعدي، اوعدوني يمكن ما اشوفكم مرة تانية بس انا بحبكم يا ماما

اسيل / فرح ( منهارين ) : مامااااا

علاء ( مصدوم وعيوني كلها دموع ) : يلا خالتي بلا هالكلام هسة

سيرين ( بخوف ) : علاء ؟ خالتو عم تولدي، سمعت صوتك ونزلت بسرعة

علاء ( بسرعة ) : خليكي عند البنات واحكي مع امي او خالتي سهى ما بعرف المهم حدا يلحقنا انا رح اروح على مستشفى عند هيثم

مها ( بتتتوجع ) : ااااااخ، الحقوني

حنين ( ماسكة خالتي ) : يلااا يا علاء خلصنا

رنين : بسرعة دخيلك الحقها

////

نهى : وين ابوكم خالتو ؟

اسيل ( بتبكي ) : ما بعرف، اله تلات ايام ما نام بالبيت

سيرين : شووو ؟

نهى : يا ربي دخيلك، وقته هلا هو وامك ؟ الله يستر

////

ريم ( بتبكي ) : الحقيها ماما دخيلك

سهى : يا ربي دخيلك تقومها بالسلامة، هيني رايحة ركاض بس وين زياد ؟

ريم : ما بعرف ماما ما بعرف، رح اموت من خوفي لو شفتي وجه علاء كيف انخطف لونه

سهى : هيني بالسيارة توكلي على الله، اول ما تولد بطمنكم

////

هيثم : يلا يلا بسرعة

علاء ( ببكي ) : هيثم مشان ربك طمني قلبي تقطع عليها هالمسكينة

هيثم : شو مالك ؟ هاد لو انك مو شايف الولادة من قبل شو كان صار فيك ؟

علاء : انت ما شفتها كيف كانت بتوصي بناتها، وكيف كانت بالسيارة

هيثم : كيف ؟؟

___________

_________

علاء ( ماسك ايدها ) : خالتي شدي حالك، قربنا

مها ( بالم ) : يااا رب

علاء : بس وين عمي ابو امير ؟

حنين : ...

مها ( بتبكي ) : يااا رب

كانت بس دموع بتنزل مثل المطر، ودعاؤها بقلبها ..

حتى انا دموعي ما قدرت امسكهم، وحنين كانت حالتها صعبة ومو قادرة تحكي اشي ..

علاء ( بمسح دموعي ) : هينا وصلنا الحمدلله، خليكي اجيب كرسي

حنين : يلا ماما تعالي

___________

_________

هيثم ( مصدوم ) : لا حول ولا قوة الا بالله، يا رب رحمتك باختي وعيلتها

علاء ( بغضب ) : بتعرف اذا صارلها اشي، رح اطبشه تطبيش لزوج اختك

هيثم : توكل على ربك، ان شاءالله بتقوم بالسلامة وما بدنا اشي

////

ياسمين ( بتبكي ) : مشان الله خلص لا تعيطوا، ماما منيحة انا متاكدة رح ترجع بالسلامة

رنين ( بتبكي ) : انا كتير خايفة ياسمين، يا ريتك موجودة بينا، لو شفتيها كيف حالتها كانت

ياسمين ( متمالكة حالي ) : عادي عادي هي دايما هيك بتعمل، تتزكري وقت امير كمان

رنين : بس هالمرة غير، بابا مو معها ياسمين مو معها

ياسمين ( مصدومة ) : وينه ؟

الاخبار اللي سمعتها زادت حالتي سوء، بس ما طلع بايدي بهالغربة الا اتوضا واصلي حاجة لربنا وادعيله يقوملنا ماما بالسلامة ويطمن بالنا عليها ..

////

رنين : راحت عالمستشفى

زياد ( بخوف ) : يلا يلا هيني طالع فورا

رنين ( بتبكي ) : بابا لا ترجع بدونها الله يخليك

زياد : حبيبتي يا بابا ادعولها وبس وان شاءالله بترجع بالسلامة

يا الله يا مها شو انك جبارة، وصلتي للولادة وانا بعيد عنك ومزعلك مني ..

طلعت من شغلي وانا بدون وعيي، وما عرفت كيف وصلت المستشفى ..

زياد ( بنادي ) : مهاااا، وين مرتي وينها ؟

علاء ( معصب ) : ما سمعت مين بدك ؟

هيثم ( وقف بالنص بيناتنا ) : هيها بالولادة، اقعد

علاء ( هجم عليي وضربني بوكس على وجهي ) : وين يقعد وين ؟ ما بدي اشوفه هون

زياد ( بمسح الدم عن ثمي ) : ... علاء !

هيثم ( مسك علاء ) : هون مستشفى مو حارة، شو هالمسخرة هاي ؟ شو عملك حتى هيك تعمل فيه

علاء ( بهدد ) : اذا صار بخالتي اشي نهايتك على ايدي

زياد : استغفر الله العظيم، هيثم امسك ابن اختك وما تخليني ابتلى فيه اللي فيي مكفيني

ما بعرف شو قصته علاء، بس واضح انه ما كان بوعيه ابدا ..

حتى هيثم كانت نظراته الي غريبة، وانا ما خطر ببالي الا انه مها ما تكون بخير ..

الممرضة : الحمدلله على سلامتها، جابت ولد متل القمر ماشاءالله

زياد ( نزلت عالارض وسجدت ) : الحمدلله يارب الحمدلله على سلامتها، يا رب ما اكرمك

علاء ( نزلوا دموعه ) : خالتي منيحة صح ؟ عايشة

الممرضة ( مستغربة ) : اه عايشة ليه مالها ؟

هيثم ( بفرح ) : الف مبارك يا ابو امير، مبارك ريّان ان شاءالله بتفرح فيه هو واخوه

زياد ( بمسح دموعي ) : الله يبارك فيك، امين وتفرح باولادك

سهى ( اجت فجاة ) : زياد انت هون ؟

زياد : اه اجيت، مها منيحة صح ؟

سهى : الحمدلله ماشاءالله عليها، بس وين كنت عنها ؟ حالتها النفسية صعبة يا زياد

هيثم : طبيعي طبيعي، هسة بشوفها وبتتحسن

////

نهى ( بفرح ) : لللليييييش، الحمدلله الحمدلله

البنات : يعني ماما ما ماتت ؟

سيرين : من غير شر عنها، اسكتوا هي صار عندكم اخو جديد

نهى ( ضمت البنات ) : يا حبيباتي، اتطمنوا ماما بالف خير وهلا بنروح نشوفها كلنا، يلا هي جهزت الشوربة والاواعي

رنين : الحمدلله يا رب، يا الله شو كنت خايفة

سيرين : منظر علاء لحاله قطع خلفي، يا رب تكون دعتلي خالتو

نهى ( نظرة حزينة ) : اكيد دعتلك ما بدها توصاية

رنين : يا عمري يا سيرين، ما يحرمنا منك انتي عنجد اخت حقيقية النا

سيرين : بالله عليكي ؟ شكرا على اعترافك

////

ديمة ( بفرح ) : يا قلبي يا خالتو ولد جبتي يا حبيبتي شو فرحتلها

ريم : ولك ولد ولا بنت شو الفايدة لو صابها اشي لا سمح الله، حالتها صعبة كانت

ديمة : اه والله معك حق، الحمدلله ربنا نجاها لعيلتها

ريم : مهو الله ارحم منا وادرى بالحال، اليوم كاني انا رح اولد كنت

ديمة : يا عليي مو فيلم اللي صاير فيكي، منيح ما نشف حليبك يا مسخمة

ريم : اه والله

////

منى ( بفرح ) : للللليييييش، الحمدلله الحمدلله

ام ماهر : لللليييييش لللليييييش يا جبار الخواطر جبرت خاطر هالبنت

ابو ماهر : يلا روحوا شوفوها بسرعة، والله انا بدي اروح كمان

ام ماهر : يمة يا حبيبة قلبي، مو مصدكة متى اوصل واشوفها

////

احمد ( بفرح ) : ولدت ؟

علاء : الحمدلله، جابت ريّان واخيرا

احمد : يا حبيبتي يا خالتي يا ريتني موجود، شو فرحتلها كانه انا اللي جاييني

علاء ( بغصة ) : اااخ يا احمد هاليوم لو كنت موجود وشفت العذاب اللي داقته هالمسكينة ودوقتنا اياه

احمد ( بقلق ) : يا لطيف شو القصة ؟ صاير اشي يعني

حكالي علاء كل اشي وفعلا من البداية صوته ما كان عاجبني، وانا غصيت من اللي حكالي اياه ..

احمد : يلا الحمدلله عدت على خير ( ضربت على راسي ) ياسميييين

علاء : شو مالها ؟

احمد : اكيد بتكون عرفت باللي صار، خليني اركض عليها اشوفها، يلا برجعلك علاء حبيبي سلم سلم

علاء : تمام بسيطة، خليك جنبها وطمنها

_______________________________

مها : ما بدي اشوفه

هيثم : طيب بس فهميني شو ماله ؟ شو عامل خليني اتفاهم معه

مها ( بغصة ) : بشك فيي يا هيثم ( حكتلي القصة )

هيثم : طولي بالك مو لهالدرجة انتي الثانية، اكيد سوء تفاهم

مها ( عصبت ) : حكتلك ما بدي اياه، انا مو راجعتله خلص

هيثم : هههههه ماشي

زياد : كيف يعني ما بدها تشوفني ؟ هيثم

هيثم : صراحة زياد انصدمت من اللي حكتلي اياه مها، معقول هيك تعمل ؟

زياد ( بقهر ) : انا يا هيثم فكرتها بتحكي مع ام احمد، مشان هيك حكتلها كذابة بس ما كان قصدي اشك فيها مثل ما هية فهمت

هيثم : المسكينة كانت توصي ياسمين على حالها وبتودع فيها بدموع عيونها وانت عقلك مع مين بتحكي ؟

زياد : ...

هيثم : بعدين شو فيها لو حكت مع اختها اه ؟ انت شو علاقتك ؟ غلطت ببنتك فهمناها وبنتك جازتها وعرفت ترد حقها، مها حرة بحالها بتسامح او ما تسامح ؟ وابو احمد بده يحكي معك من زمان بس ما قدر يترك مرته ووقف معها عشان مريضة بس ما وقف بالباطل، انت ليه بتقطع حبل الود ؟

زياد : معقول يا هيثم انت بتحكي هيك ؟ لهالدرجة ياسمين هاينة عليكم ؟ عادي ينحكى بشرفها وتسامحوا ؟ انتوا حرين بس انا ابوها وسندها ليوم الدين

هيثم : يا سيدي الله يطول عمرك واتضل فوق راسها، بس مو توصل معك تاذي مشاعرها بهالاسلوب وتتركها بامس الحاجة الك بسبب كبريائك

زياد : معك حق بكل شي بس بترجاااك خليني اشوفها ( مسك فيي ) بترجاك هيثم

هيثم ( بلعت ريقي ) : ماشي، بس بدون ما تجيب سيرتي

////

كان الكل حواليي وفرحانين فيي، بناتي واهلي وكل اللي بحبوني ..

عبولي الغرفة ورد، ودموع الفرح بعيونهم ..

زياد : السلام عليكم

اجت عيني في عينه بعد هالايام اللي مرقت بدون ما اشوفه ..

زياد ( قعد جنبي ومسك ايدي وباسها ) : الحمدلله على سلامتك حبيبتي

نزلت راسي وحاولت اتجنب احكي معه قدام حدا، بس فهموا عليي وطلعوا من عنا ..

زياد ( نزلوا دموعه ) : سامحيني يا قلبي انتي، سامحيني وبوعدك ما يتكرر هالاشي بيناتنا

مها ( باستغراب ) : مال وجهك ؟ ( حطيت ايدي على خده كان احمر ومبين مضروب )

زياد ( بتوجع ) : انسي، المهم ريّان اجا بعد ما خبيتي عني

مها : كنت حابة اعملك مفاجاة، بس للاسف انت بعيد عني

زياد ( ضمني ) : مستحيل ابعد عنك، بتعرفي انه روحي وقلبي معك بكل لحظة

مها ( مبسوطة ) : ااااه، يعني روحك وقلبك جابوني عالمستشفى بدل علاء ؟

زياد ( اتطلع فيي ) : يعني هو اللي جابك ؟ بقول ماله معصب كان

مها : يا عليي خوفته عليي كتير

زياد : اتطمني اخذ حقك، وهي الضربة منه لما شافني

مها ( كاتمة ضحكتي ) : نعم ؟ ضربة شو

ما توقعت علاء يعمل هيك مع زياد، وسامحته بعد ما حسيت انه الله اخدلي حقي منه مع انه ما هان عليي ..

بس الوحدة بتنبسط لما تحس انه الها سند، وبخاف عليها حتى من زوجها ..

////

امجد : ولدت ؟ ليه احنا اخر من يعلم

منى : لا كنت عند ستك بس اجانا الخبر، الحمدلله يا رب جبر بخاطرها

انس : يعني طلع ولد، مسكينة خالتي لولاها بتستاهل ربنا ما بجبر خاطرها

منى : اه والله بتستاهل ( طلعت علبة فيها سنسال ذهب ) حلو ؟

امجد ( فتح عيونه ) : بجنن ؟ مبارك

منى : هاد لخالتك، وهاد للولد هدية جبتله طقم مرتب

انس : يعني بدك تعطيها اياهم انتي ولا احنا ؟

منى ( لمعوا عيونها ) : انا طبعا، خلص بكفينا زعل

////

احمد ( ضمني بقوة ) : مبارك حبيبتي مبارك، خلص وقفي عياط

ياسمين ( بتبكي ) : يا الله احمد مو مصدقة، صار عندي اخوة انا، يا رب لك الحمد

احمد : الحمدلله، احلى اخوال لاولادنا وعقبال سلامتك يا عمري انتي

ياسمين : بتخيلهم بس يكبروا كيف رح يكونوا

احمد : عصابة حبيبتي، انتي بس راقبي بصمت ههههه

ياسمين : هههههه الله يستر

_______________________________

بعد اسبوع <<

ابو احمد : يلا مستعدة ؟

منى : مستعدة ان شاءالله

ابو احمد : توكلنا على الله

الحلقة الخامسة عشرة :

ج٢ :

ابو امير ( بفرح ) : اهلا وسهلا بالجميع، نوروتونا والله

ابو ماهر : منورة فيك وباولادك، ربي يجعلهم قرة عين الكم ومن البارين الصالحين

الجميع : امين يارب

ابو امير : تسلموا، ويطول عمرك يا حج وتفرح باحفادك وتشوف اولادهم

ابو عدي ( بهمس ) : وين اخوك ؟

عدي ( بهمس ) : ما بعرف، ما تسالني عنه

ابو عدي ( تنهد ) : ...

___________

_________

قبل ثلاثة ايام <<

هيثم : معقول كل هالاشي بصير معكم وانا آخر من يعلم

عدي : لا تزيدها عليي، الدنيا مسكرة بوجهي بدون هالواسطة

هيثم : طيب طيب المهم هسة وينه ؟ وشو ناوي يعمل ؟

عدي : بدور على بيت وشكله نوى وحسم امره بخطبته

هيثم : بدون ابوك ؟ كيف بدهم يستقبلوا شب بدون اهله يعني ؟

عدي : ... واجبنا نوقف معه صح ؟

هيثم ( بهز راسه ) : خليني احكي مع ماهر لآخر مرة بلكي يقتنع، مو حلوة بحق ابو احمد ولا عمتك كمان، حتى البنت شو ذنبها بكل هالكلام

////

ماهر ( بضرب على راسه ) : وين عقلي كان وين ؟؟ كيف تخليت هيك عن ابني حبيبي صدقني مو قادر ادخل البيت وهو مو فيه

هيثم : طيب ما صار اشي لسا معك وقت تقلب الامور

ماهر ( بحسرة ) : امه مو موافقة يا هيثم افهمني، حلفت يمين ما بتضل بالبيت اذا آيات صارت كنة الها

هيثم : ول ؟ لهالدرجة ! طيب تحسبها بنتها بتقبل عليها هيك ؟ بس فهموني شو مالها آيات

ماهر : قال ما بدها خاطبة وفاسخة، لا قبلت آيات ولا بيان حتى، وكمان اللي عمتله منى بياسمين اثر فيها كثير وغير فكرتها عنها

هيثم : ضل حدا بفكر هيك هالايام ؟ الله يلعن الشيطان بس، هي ابنها تخلى عنها بكل بساطة وغضبها ما بمشي لانه ربك ما برضى هالكلام، ومنى اللي عملته كان فوق ارادتها وياسيدي طلعت مرتك مو اقل منها مدام بتفكر بهالاسلوب

ماهر : فهمتها كثير وحاولت معها، ابدا فالج لا تعالج

هيثم : والحل هسة ؟

ماهر ( برجاء ) : ما الي غيركم تسندوا ابني، اعتبروني ميت وقوموا بالواجب عني

هيثم ( مصدوم ) : بعد عمر طويل .. ولا يهمك كلنا رقبتنا سدادة وعمر غالي علينا انت عارف هالاشي منيح

////

محمود ( متفاجأ ) : عمر ! شو هالحكي ؟ معقول يترك اهله عشان بنت

هيثم : هاد اللي اجاك هسة، بدك تمشي معنا نروح نطلبله اياها ؟

محمود : انا معكم اكيد مدام ماهر وصانا، بس خلينا نحاول معه، يعني ناجل موضوع خطبته شوي على شو مستعجل ؟

هيثم : ما كان مستعجل، بس جكر باهله

محمود : ويرمي حاله ويرمي بنت الناس معه بالنار عشان يجاكر ؟ بعدين مع عقله هالولد

هيثم : هو رايح فينا وبلانا، بس احنا عشان قيمة اختنا وبنتها بدنا نوقف معه وكمان ابو احمد ما بهون علينا بنته تنخطب بدون جاهة

محمود : حسبنا الله ونعم الوكيل، حرقت قلبي

هيثم ( تنهد ) : سلامة قلبك، الله يهدي البال وما بدنا اكثر من هيك

////

ابو احمد : اهلا وسهلا، شو هالزيارة المباركة هاي

محمود / هيثم / عدي / عمر : الله يبارك فيك

منى : شو اخباركم ؟ حاسستكم مو مرتاحين خير ؟

عمر ( بلع ريقه ) : عمي ابو احمد، عمتي .. انا جاي وجايب معي اللي شايفينهم قدامكم وبتمنى منكم ما ترفضوا طلبي

ابو احمد ( عيونه على منى واولاده ) : خير يا ابني يا عمر ؟ واقع بمشكلة لاسمح الله

محمود : الصراحة يا ابو احمد احنا جايين نطلب ايد بنتكم وبنتنا آيات لابنا وابنكم عمر، على سنة الله ورسوله

منى ( مصدومة ) : تخطبوا ؟ طيب وين ماهر ؟

هيثم ( عيونه على عدي ) : يختي يا ام احمد انتي كبيرتنا وواجبك فوق راسنا كلنا، بس الشب رايدها ومستعجل عالخطبة واهله ..

عمر ( قاطعه ) : عمتي، انا من اليوم اعتبريني ابنك لاني بلا اهل، اهلي وقفوا ضدي وانا ما قدرت اقنعهم، واجيت بكل ما املك لعندكم ورجائي ما ترفضوا طلبي

امجد : عمر !

عمر : انا عارف انكم مصدومين، بس صدقوني ما في اشي طالع بايدي اعمله اكثر من هيك، وهي اعمامي واخوي الوحيد شاهدين عليي بعد الله

ابو احمد ( بهز راسه ) : لا حول ولا قوة الا بالله، طول عمري بعتبرك ولد من اولادي وهي عمتك شاهدة على كلامي، واولادي ما تعودت اخيب ظنهم فيي

امجد : يابا !

ابو احمد ( بواصل كلامه ) : اذا البنت وافقت احنا ما بنقدر الا نوافق

عمر ( بغصة ) : الله يطول عمرك يا عمي، انا كنت عارف انك ما رح تردني خايب

منى ( نزلوا دموعها ) : ...

محمود : بنستنى جواب العروس وباذن الله ما بتكونوا الا راضيين، احنا كلنا واقفين معه

////

امجد ( معصب ) : ولك شو اللي عملته بحالك وفي اختي اه ؟ ليه ما حكيتلي من الاول

عمر ( معصب ) : شو احكيلك ؟ انت ما خليتلي مجال احكي يا صاحبي ( بصوت مخنوق ) حبيتها وما طلع بايدي اني اطنش هالحب

امجد : حب !

عمر : اه، انا عشقتها كمان مو بس حبيتها، بس يشهد عليي ربي اني ما حكتلها وكل همي كان اخطبها، وانا اليوم قدامك بالحالة اللي انت شايفها

امجد ( بغصة ) : كيف بتخبي عني ؟ معقول احنا صحاب وهيك حالتنا صارت ؟ شو اعمل فيك هسة احكيلي

عمر ( نزلوا دموعه ) : انا كان نفسي اخطبها احسن خطبة واقدملها كل اشي بتتمناه، بس للاسف ما الي ولا الها حظ، وهسة رقبتنا تحت رحمتكم وانتوا اللي رح تحكموا علينا

امجد ( ضميته بقوة ) : انت اخوي وانا اخوك، وطول عمرنا سند لبعض، اكيد ما رح اتخلى عنك وانت بحاجتي لانه عمرك ما تخليت عني والوحيد اللي وقفت معي لما احتجت حدا ينصرني

عمر ( شد عليي ) : احلى اخ بالدنيا

___________

_________

منى : شكله الكل واصل

امجد : الله يستر ما يكون راح علينا المنسف

ابو احمد : ما بدي اوصيكم يا اولاد، كلام طالع نازل ما بدي، وانت امجد بتقعد عاقل قدام خالك محمود مو ناقصنا

امجد : ولا يهمك، احرمني من المصروف اذا شاغبت

انس : ههههه

منى : يلا رنوا الجرس

ابو امير : مين ضل ما وصل ؟

ابو ماهر ( بحنية ) : بس تفتح الباب بتشوف

ابو امير : يلا .. ( بصدمة ) ابو احمد !

ابو احمد ( بصوت مخنوق ) : السلام عليكم، تسمحلنا نفوت يا ابو امير ؟

ابو امير ( عيونه عالرجال وبلع ريقه ) : تفضلوا اهلا وسهلا

منى : لللللللييييييييش

ابو قصي : حيا الله بالعدايل

ابو علاء : نورت بابو احمد وام احمد، عقبال ما تزغردي لكنتك

منى : مبارك يا ابو امير، الله يطول عمرك وتشوف اولادهم يارب

ابو امير ( منزل راسه ) : تسلمي، تفضلي

ابو ماهر : تعال انت واياه اقعدوا جنبي واحد هون وواحد هون، مثل ما بعمل فيكم دايما تعودنا عليكم ترا

الجميع : ههههههه

ابو احمد : اسمحلي يا حج اول اشي ابارك لصاحبي واخوي الصغير وابوس راسه، لانه ما عاش اللي بده ينزل راسه

ابو عدي ( ماسك ابو امير وبقربه من ابو احمد ) : صدقت، طول عمركم اخوة وام امير اختك الصغيرة اللي ما رضيت تعطيها الا للي بترضاه لخواتك

ابو احمد ( باس راس ابو امير ) : حقك عليي بعرف انها اجت متاخرة بس ما رح اتركك الا لما احكيلك كل اشي بقلبي

ابو امير ( غمض عيونه ) : اهلا وسهلا فيكم، فوتوا يا شباب مالكم ؟

امجد / انس : مبارك ريّان، والحمدلله على سلامة خالتي

////

حنين ( متفاجاة ) : خالتو ؟

منى ( مبتسمة ) : كيفك حبيبتي، مبارك والحمدلله على سلامة ماما

حنين ( لفت وجهها ) : ...

نهى : مين اجا ؟ ( فتحت عيونها ) منى

النسوان : منى !

مها ( بترجف ) : اهلا وسهلا فيكي، نورتينا

منى ( حضنتها بقوة وبتبكي ) : يا حبيبتي يا عمري انتي، سامحيني بترجاكي تسامحيني

مها ( بتبكي ) : الله يسامحك، اشتقتلك يا الله شو اشتقت لحضنك

ام ماهر ( بتبكي ) : ما يحرمكن من بعض يمة، الله يرضى عليكن

مها : تعالوا يا بنات سلموا على خالتكم

حنين / رنين ( سلام عادي ) : اهلا وسهلا خالتو

اسيل / فرح ( حضنوها ) : اهلين خالتو، اشتقنالك

منى ( شدت عليهم ) : يا حبيباتي وانا اكتر

ديمة / سيرين / ريم ( بمسحوا دموعهم ) : خالتو وين آيات ؟

منى ( عينها على ام عدي ) : تعبانة شوي والله يا خالتو، بتيجي ان شاءالله اول ما تتحسن

___________

_________

منى : ليه هيك حظ بنتي، ما اجا واحد وخطبها ووافقت عليه الا يكونوا اهله ضده

ابو احمد : بس عمر غير، عمر زلمة وانا اشهد انه سيد الرجال

منى : ما اختلفنا، والله انكسر قلبي عليه يا حبيبي، ما بستاهل هيك يصير فيه

ابو احمد : حسبنا الله ونعم الوكيل

منى ( لمعوا عيونها ) : وهي ابنك صار ابني انا يا آمال، خليكي تفرجي من بعيد ولنشوف ازا رح تقدري تقربي

ابو احمد : الله يعينها على عقلها، مع اني مو عارف شو سبب اللي عملوه حتى ماهر فاجأني بس متاكد انه منها مهو مغلوب على امره

منى : لا بدي اعرف ولا بدي اشوف وجهها، خليها بعيدة عن بنتي

آيات ( بتبكي ) : ...

امجد : بكفي عياط ولك خلص هي انتي وعمر رح تخطبوا شو بدك احسن من هيك

آيات ( منهارة ) : صدقني اني ما طلبت منه اشي ولا في بيناتنا حكي

امجد : استغفر الله العظيم، بعدين معك ؟ مين قال اني حكيت هيك عنك، وحتى لو صار حكي شفتيني قطعت راسك ؟ يلا امسحيلي هالدموع خلينا نحكي لاحمد

آيات : قولتك بوافق ؟

امجد ( عصب ) : لا تجننيني، من متى احنا بنكسر كلمة ابوي ؟ ما سمعتي كيف اعتبره ابنه وما خيبه ؟

آيات : يا حبيبي يا بابا انا متاكدة انه كل اللي عمله بس مشاني

امجد : وشو ناقصك ليعمل هيك مشانك ؟ ( بحنية ) ما بتعرفي انه بس بدنا رضاكي ست آيات

آيات ( مبتسمة ) : ما يحرمني منكم، ويقدرني على رد جمايلكم عليي

امجد : ايواا انتي قلتيها، يلا اعملي عشا بسرعة معناته هههههه

////

محمود : هي وافقت العروس، احكيلنا شو رح تقدر تقدملها عشان نعرف كيف نساعدك ؟

عمر : مين قال انه بدي مساعدة حدا ؟ بكفي وقفتكم معي كفيتوا و فيتوا، اتركوا الباقي عليي

هيثم : ما حزرت عمر بيك، انت بتقعد واحنا بنحكي

عمر : لا معلش عمي خلينا صحبة انا حالف يمين ما اخذ قرش من حدا الا دين، بتحبوا تساعدوني مثل ما انا بدي حياكم الله

عدي : دين ! انت مجنون اشي ؟ يا سيدي اعتبره دين بس اكيد مو بكرا تسده، ترا عارفك منيح انا

عمر : انا هيك عقلي مدام بتعرفني منيح معناها اشرح لاعمامك، السلام عليكم عندي شغل ضروري

عدي ( بضرب بكفوف ايديه ) : اخوي وحافظه عن غيب، بنحت الصخر ولا يضل عليه ملين عند حدا

هيثم : والعمل هسة ؟ انت ما بتعرف كم معه

عدي : من وين بدي اعرف، هاد الجن الازرق ما بقدر يعرف اسراره

محمود : الله يهديك يا ابن اخوي ويحنن قلب اهلك عليك بس، يا رب تيسر اموره

عدي : كان نفسي احكي مع ابو احمد يرفضه بس ما هان عليي اكسر قلبه بكفيه اهلي

هيثم : مين قلك ابو احمد بهمه هيك شكليات ؟ هي وجهي اذا طلب منه اشي واحكي هيثم حكى

___________

_________

منى ( حاضنة امير ) : يا عمري شو اشتقتلك، اسم الله عليك اسم على مسمى وريّان ماشاءالله

مها ( عيونها على خواتها ) : تسلمي

منى ( فتحت شنتتها ) : هاد الك، الحمدلله على قومتك بالسلامة، والله ضليت على اعصابي لحد ما سمعت انك صحيتي

البنات : وااااو

مها ( مبسوطة بالسنسال ) : يسملووو والله كتير هيك خجلتوني

ام ماهر : كانكن متفقات يمة انتي وخواتك

نهى : كم مهموهة عنا

سهى : دلوعتنا، عاد انا كمان صغيرة متلها بس انتوا مسلطين الاضواء عليها دايما

ريم : ههههههه يا ريتك جبتي بيبي بهالكم سنة لحقتي حالك

سهى : هو ابوكي خلاني، اقعدي ساكتة

مها ( نزلوا دموعها ) : صار عندي اولاد متلكم، ان شاءالله بكبروا وبفرحوا قلوبكم متل اولادكم بفرحوني وبوقفوا جنبي دايما انا وبناتي

رانيا : وقت دموعك هلا، المهم احكيلنا شو سر هالجمال هاد خلينا نعمل متلك بس نولد

منى : اه والله قمر الله يحميها، قراتي على حالك ؟

مها ( عيونها على سيرين ) : ما بدها توصاية سيسو طالعة لامها

نهى : الله يرضى عليها من الصبح عندها مكيجتها وزبطتها عالاخر

رانيا : يا سيدي يا سيدي عالابداع، ازا هيك لخالتها كيف الها ؟ بقول مال اخوي مبطلين نشوفه

الجميع : ههههههه

سيرين : يختي اخوكي بالدوام اتطمني

مها : ههههه عاساس اخونا اللي بنشوفه، يا ويلي عليه مو ملحق

رانيا : اه والله مسكين، لسا قولي حمزة بداوم وبرجع هيثم بنادوه باي وقت

سهى : الله يعطيهم العافية

ام بيان ( بهمس ) : ولا كلفت خاطرها تعبرنا

ام عدي ( بهمس ) : بفرجيكي فيها، عيون بنتها وعيونها الا اطلعهم

ام بيان ( بهمس ) : صح وينه عمر ؟

ام عدي ( متلبكة ) : عنده شغل كتير يا حبيبي الله يفتحها عليه

ديمة : شو صار مع آيات ؟

منى : شو بده يصير يا خالتو، ادعولها

سيرين : الله يسامحه عمو يا ريته ما وافق كان حكاله ارجع بعدين بتكون تحسنت ظروفك شوي

منى : ليه ؟ عشان اهله يستغلوا هالرفض لصالحهم، ويحكوا عنا طماعين، لا حبيبتي احنا شاريين زلمة ما بدنا اشي منه شبعانة من بيت ابوها جربنا اللي كان غني وشفتي شو عمل فيها

ديمة : معك حق، عمر ما بتقدر بثمن صراحة زلمة قد حاله

منى : يا سلام عليكي

سيرين : الحمدلله، الله يهنيهم ويباركلهم

منى : امين يارب

مها ( ماسكة الموبايل ) : اهلا اهلا

احمد ( بضحك ) : لا كثير هيك خالتي، شو هالحلاوة هاي انا كيف بدي اتفرج عليكي بدون ما ابوسك هسة ؟

ياسمين ( عيونها عليه ) : نعم ؟

البنات : هههههه

احمد : دخيل جمالك انا، يعني اتفائل بمرتي بس تولد تكون مثل امها ؟

نهى : وله احمد

احمد : ههههههه كلكم حلوات ما اختلفنا بس احنا بنحكي عن وضع خاص

ياسمين : مو شايفها حاطة رطل مكياج، لو انا كان حكيتلي امسحي الدهان اللي عليكي

البنات : ههههههه

مها : طيب اتركولي مجال احكي، اول اشي شكرا حبيبي عيونك الحلوين دايما عشان هيك بتشوف كل الناس حلوة، وتاني اشي متل ما قالتلك مرتك مكياج يا حبيبي يعني اكشط واربح

احمد : ههههههههه

مها : بعدين مالها مرتك ؟

سهى : والله قولتك، عشنا وشفناك احمد افندي بتحكي عن ياسمين

ياسمين : ايوا خالتو اعطي

البنات : ههههههه

احمد : صلوا عالنبي

الجميع : اللهم صل عليه

احمد : هسة ما اختلفنا عالجمال والشكل الخارحي، بس يا جماعة مرتي ما بتعرف تطبخ منسف، انا مشتهي منسف وانتوا هون مجتمعين بدكم تاكلوا مناسف وعقيقة الله يباركلكم بس حرام عليكم

مها : ولي ياسمين كم مرة علمتك تطبخيه ؟

ياسمين : والله بعمل متل ما علمتيني بس مو عاجبه، بعدين في مطاعم اردنية هون بتعمل مناسف بتشهي بحكيله روح مو قابل

مها : شو المشكلة ليه مو عاجبك ؟

احمد : انداري، بشبه كل اشي الا المنسف، عليم الله مرت صاحبي بتعمله بنقوم غصبن عنا عن السدر

ياسمين : والله !

البنات : ههههههههه

مها : اه هاد انت عاجبك اكل مرت صاحبك عشان هيك مو قادر تستطعم اكل مرتك

منى : بلشنا تخبيص ماما ؟

احمد ( صفن ) : مين ؟ امي هون

مها ( مسكت السنسال ): جابتلي هاد كمان

احمد ( مبسوط ) : الله يسعدكم وما يفرقكم عن بعض

ام ماهر : الله يرضى عليك يا حبيبي، متى جاي يا ستي اشمك واشبع منك كبل ما اموت

ياسمين : بلشت ستي، خلص ببعتلك اياه بصندوق هدايا، وبالمرة طعميه منسف وسدر حلبة بالله

البنات : هههههههههه ياسمين واصلة معك شكلها

ياسمين : جنني يا بنات الحلال، شو هاد ؟ انتوا هيك كمان ازواجكم

ريم : لا مستحيل، اعوذ بالله، علاء نهائيا ما بطلب اكل

سهى : هههههه ضحكتوني

رانيا : شكلهم مخولين عالاخر، يا حبيبي هيثم بترجاااه ياكل او اعمله اكلة صعبة

احمد : ههههههه ماشي اتفقتوا علينا يعني

مها : يلا بدنا نحط الاكل هلا وصل، تواصي يا احمد وكنافة تواصي كمان

احمد : صحتين وهنا على قلبكم، الله يهنيكم

ام ماهر : عكبال عكيكة ابنك الغالي، يا هديك الساعة اللي بدي احمله فيها

نهى : نيااالك يا احمد

سهى ( بتحط الاكل للرجال هي والبنات ) : يلا تفضلوا

ابو امير : يزيد فضلك، غلبناكي يا ام قصي عقبال ما تفرحي بقصي يارب

سهى : تسلم بوجودكم جميعا، تزكروا احمد المسكين نفسه بمنسف

امجد / قصي ( بتباكي ) : اهئ اهئ اهئ يا حبيبي يا احمد محروووم

هيثم : معقول ؟

علاء : على ذمته ههههه

قصي ( حاضن سدر منسف ) : صورني معه

امجد : شو اللي صورني يا حبيبي، استنى افتح بث مباشر معه

احمد : اه امجد

قصي ( مع المنسف ) : يمة ما ازكااااه، الريحة لحالها بتشل يا احمد

علاء ( بشرب لبن ) : الله الله شوهالطعم هاد بحيااااتي ما دقت مثله صراحة

هيثم ( باكل ) : وينك يا حمادة يا حبيبي تشاركنا

عدي : هههههه طعميه لقمة

احمد ( مقهور ) : ماشي يا .... بفرجيكم

الرجال : ههههههه

ابو امير : سامحهم يا عمي يا احمد بتعرف جوعانين وهيكا

ابو احمد : هههههه هاد اللي شايفه بطبخ منسف ازكى من منسف امه، بس هو بتدلع

هيثم : لا هيك كثير، شو حمادة ؟

احمد : اشاعات والله، بيضة ما بعرف اقليها انا

امجد / انس : هيهيهيهيهي

حمزة : منور حمادة، عقبال عقيقة يحيى يارب بسلامتها

احمد : حبيب قلبي بوجودكم جميعا يارب، الله يديم هاللمة علينا وما يحرمنا منكم

ابو ماهر : داير بالك على وردتنا ؟ ولا مغلبها يا ولد

احمد : الله يسامحك يا سيدي، بتعرفني ما بغلب انا بس هية اسالها اذا دايرة بالها عليي او لا

علاء : اوصيكي ياسمين انك تحطي بالك بسطل واتديريه علي زوجك ثلاث مرات يوميا

ياسمين : قليل تلات مرات ابن خالتي ولو، لازم ٢٤ ساعة ويادوب

عدي : هههههه كبيرة يا ام يحيى

احمد : شفتوا ؟ هاي حالتي

امجد : ما شفنا ولا سمعنا عقلنا بالراس اللي متربع بسدر المنسف

قصي : هيهيهيهي

علاء : هات هالشاكوش يا ولد خليني اقضي عليه

انس : هههههه بده ينتقم

قصي : بدنا مخ نمخمخ

احمد : بعد المنسف رح يروح عقلكم ما انتوا، هسة بشوف اشكالكم مرميين كل واحد على كنباية

هيثم : لا هو طار مخه بعد ما شاف امير وآدم ملزقين بسلمى وببوسوا فيها

احمد : ههههههه لا كثير هيك اذا انا طار عقلي

علاء : خليني ساكت يا صاحبي، شوفات ما انزل الله بها من سلطان، لا وياريت حدا متحرك ويبعدهم

ابو علاء : اي انا ملزق فيها بدك اياهم همة يبعدوا ئي، يسعدها قمرتنا هاي

حمزة : ماشاءالله عليها، فعلا قمر

قصي : يا حبيبتي يا بنت اختي طالعة مزة وماخذة عقول الشباب من هسة

امجد : يا قلبي انا، نيالك على هيك خال صراحة

احمد : يلا ماشي تتهنوا، خليني ادور على مكان أأوي اليه واكل منسف احسن ما يطلع بعين الولد اليوم

ابو احمد : الله معك يابا، دير بالك على مرتك وغذيها منيح ما بدك توصاية

////

يا الله فرحتي بشوفة خالتي وامي مع بعض من جديد لا توصف، كانه الحياة رجعتلي ..

بس ياسمين ما اعطت اي ردة فعل، وكانت هادية كثير وبتحاول ما تدخل باي نقاش ..

احمد : يلا نروح ناكل منسف حلوان الصلحة

ياسمين ( ببرود ) : اوك

احمد : كانك مو مبسوطة ؟

ياسمين : انا ؟ ليه شو حكيت

احمد : يعني حسيتك ما فتحتي اي موضوع، حتى مع امك يعني باركيلها مثلا

ياسمين : قصدك عالسنسال ؟ عادي كل خالاتي جابوا وسيدي كمان لبسها

احمد : اه اوك، طيب يلا اجهزي بسرعة خلينا نطلع

جوابها بمنتهى الاستفزاز، حاولت اسيطر على حالي احسن ما تحكي عني بنكش مشاكل ..

////

ههههههه اما وجهه كان بالالوان لما رديت عليه، مفكرني بدي اسمحله يسمعني كلام ويلمحلي انه فرصة انا كمان اسمح لامه تحكي معي ..

حنين : برافو عليكي، وانا ورنين طنشناها عالاخر

ياسمين : يلا المهم طلعت من خطية ماما انا وما بدي اضل احس بالذنب

حنين : انسي، تتهنى باختها، وبابا كمان ساكت على مضض لانه حماكي ما عمل اشي واعتزر بحجة مرض مرته

ياسمين : اااه، يلا منيح سلام بدنا نطلع، ابعتيلي تفاصيل ازا اسيل عملت اشي اليوم

حنين : هيها حايمة حوالينه حبيبتي ماخدة راحتها بغياب امك

ياسمين : ومتشيكة طبعا

حنين : كانت بدها تحط كم شغلة على وجهها ما خليتها

ياسمين : طيب بصير خير

////

انس : كيفك ؟ وين المرة الماضية ما شفناكي

اسيل : كنت نايمة، ما بعرف انكم اجيتوا

انس : حكيت لفرح تسلم عليكي، وصلك ؟

اسيل : لا، وما تحكي لحدا مرة تانية عشان ما يفهموك غلط لو سمحت فرح بتوصل حكي لخواتي وامي

انس : اااه، بعتذر يلا عن اذنك بدي اقعد

اسيل : خد راحتك

استغليت لما كان عم بغسل ايديه وعملت حالي بدي انضف المكان، كنت عارفة رح يحكي معي ..

كان بجنن وكتير شيك، واهم اشي عيونه اللي بتتأملني متل دايما ..

////

نهى : كل شوي زياد بيجي نواحي الغرفة بسال عنك

سهى : مو قادر يقاوم هالجمال يا حبيبتي، غشيمة عنه

سيرين : يختي فوق ما احنا كاتمين على نفسه كمان بتعلقوا

رانيا : ههههههه

ام عدي : ما يحرمكم من بعض، يا ريت كل الازواج متلكم

ام بيان : اه والله

ريم : خالتو كيف احساسك بسابع بطن ؟ انا اول بطن وحاسة حالي مو متشجعة احمل كمان

مها : يختي عليكي، لا تشجعي زقفولها خليها تشجع

البنات : هههههه

سهى : يا بي هالكلام شو بكرهه انا، هاي رزقة من الله بتحبي ترفسيها انتي حرة غيرك مشتهي وانتي بتبطري عالنعمة

سيرين : اه والله يا ريم، اخرتهم يكبروا وبروح همهم

رانيا : سيسو حبيبتي الله يفرحنا فيكي عن قريب ونسمع احلى خبر منك

ديمة : امين، بس المشكلة باللي بضل ينق عليها ليل نهار، كانه الها عشرين سنة مو مخلفة

رانيا : ما فهمت، قصدك حمزة ؟

سيرين ( زورت ديمة ) : لا لا، انسي بتحكي بشكل عام

ام عدي : ماشاءالله عليكم متعودات اتضلوا براحتكم، بتتزوجوا وبتنسوا انه ازواجكم الهم اهل كمان

نهى : من وين جبتي هالكلام ؟ الحمدلله بناتنا بالذات غير هيك تماما

ام بيان : ديري بالك تجيبي سيرة بناتهم، مو من هالكوكب جايات

ام ماهر ( بتهز براسها ) : والله يا كنايني ما عرفتكن

منى : لسا ما عرفتيهم مزبوط، استني شوي لسا المخفي اكبر واعظم

ام عدي : قولتك ؟ متل ما طلعتي مخبية انتي كمان

مها ( بنبرة حادة ) : لو سمحتووو معلش، جايين لعندي تباركوا ولا تعملوا مشاكل ؟

حنين ( بصوت عالي ) : لو سمحتوا امي نفسا ومو وقت هيك نقاشات، كل واحد يحتفظ بكلامه لحاله احنا مو مستعدين امنا نفسيتها تتعب بسبب كلام ما اله داعي

امجد : خلينا نفوت نبارك لخالتي يلا

علاء : اه والله لازم نشوفها

عدي : عمي ابو امير بعد اذنك بدنا نفوت نسلم على عمتي

ابو امير : تفضلوا، خليني اخبر البنات بس

رنين : بقلكم بابا رح يجوا الشباب يباركوا لماما

مها : اهلا وسهلا، ناوليني الروب بلا ما اضل هيك حاسسته بخايل

نهى : اه البسي يلا هاتي اساعدك

الشباب : السلااام عليكم

امجد / قصي / انس ( بصفروا ) : يا سيييدي

ام ماهر : صلاة النبي عليها

علاء ( ببوسها ) : يسعدلي هالمسا الهي، شو هاد شو هاد

عدي : جد عمتي الله يحميكي، الحمدلله على سلامتك

مها : يا حبيبي الله يرضى عليكم، خوفتك عليي

علاء ( عيونه عالنسوان ) : لا اله الا الله، حكيت معها ستين الف مرة وكل مرة بتحكيلي هالكلمة، يختي خليني اخاف بعدين معك ؟

مها : هههههه سلامتك

امجد ( بزيح فيهم وببوس راسها وخدودها ) : ابعدولي هيك خليني امتع نظري بالقمر اللي قدامي

مها : هههههههههه يا عليكم

قصي / انس ( كل واحد ماسك ايد وبوسها ) : دخيل جمالك انا، سبحان الذي خلقك

نهى : يا سلام

سهى : كل واحد يكتب قصيدة نشوف مين الاشطر

علاء : لا معلش سامحونا بس صراحة الغزل لحاله بطلع منا

امجد ( ايده على قلبه ) : يمة يا قلبي، بقول مال عمي ابو امير كل دقيقة بقوم

انس : بيجي يتفقد الرعية

قصي : قصدك الملاك، يا احلى ملاك انتي

ام ماهر : يوووه، سكتن اولادكن ليجي جوزها يمة

منى / نهى / سهى : ههههههه صعب

قصي ( بمسح على جبينه ) : جد وضعنا صعب يا شباب انا هسة كيف بدي اروح على البيت ؟

ديمة : حبيبي عدي انت رح تروح كمان ولا شو ؟

عدي ( عيونه على مها ) : اكيد اكيد بنروح حبيبتي

علاء : مالك مستعجل هينا قاعدات، ومتآنسات

انس : بلش يخربط ابن خالتي، حول المذكر لانثى

علاء : طول عمري بكره العربي، لا تجيبلي سيرته

امجد : انا بعشق العربي لانه عرفني على شعراء علموني كيف احزن وانا من قبلك لم احزن وانا محتاج منذ عصور لامراة تجعلني احزن

مها : ههههههههههه سلامة قلبك

امجد ( برومنسية ) : ااخ يا قلبي انتي

منى : نادي ابوكي يا فرح

قصي ( مسكها فجاة ) : يستر على عرضك استني شوي

هيثم ( اجا فجاة ) : مرحبا

امجد ( بهمس ) : استغفر الله

مها : اهلا اهلا نورت بابو آدم

هيثم ( بحك شعره ) : مال الشباب مسخسخة ؟

الجميع : هههههههه

مها : الله يسعدهم

رانيا : يلا تعال انت كمان فرجينا مهارتك بالشعر

هيثم ( غمزها ) : انا شعري كله الك يا عمري

رانيا ( بخجل ) : تسلملي

امجد : طيب طيب خلص استنانا برا هسة بنيجي ( مسك ايدها وببوس فيها )

هيثم ( مسكه من قميصه ورفعه ) : خلصت الزيارة، امشي اطلع برا

قصي / انس : هيهيهيهيهي

عدي : عزابي يا عمي ارحمه شوي

علاء : الرحمة من مبادئك هيك ربيتنا يا خال

امجد ( برتب بحاله عالمراية ) : ضلكم مسحوا جوخ معه انت واياه، حسابكم بعدين يا خونة

حنين : طيب يلا خصلونا، انخنقنا من ريحة الدخان باواعيكم

قصي : ارحمينا انتي الثانية

حنين : ما بدي، مو مسامحتك بصحة اخوي وامي

رنين : مو معقول شو هاد ؟

هيثم : شفتوا ليه انا اجيت، كل اشي بعمله لهدف

انس : معك حق والله يا خالي

حنين : لو بعنس ما باخد واحد بدخن

البنات : ههههه

امجد : عنسي طيب لانه ما رح تلاقي

منى : لا بتلاقي، او بتخليه يبطل دخان

عدي : ما في حدا ببطل يا عمتي

منى : امبلا هي اخوك بتعالج وتقريبا بطل عالاخر

ام عدي ( مصدومة ) : عمر ! شو عرفك ؟

غنى : جد مو معقول عمر يبطل مستحيل

منى ( بجكر ) : ما في اشي مستحيل، الشغلة بدها ارادة

هيثم : طيب كويس، الله يسمعنا الاخبار الطيبة

ابو امير ( عيونه على مها ) : شو صار معكم يا شباب يلا الكنافة جاهزة

مها ( بتسبل عيونها ) : الله يرزقك حبيبي ويكتر خيرك

هيثم : اه والله يا ابو امير ما قصرت

ابو امير : شو هالحكي، واجبكم فوق راسنا وانتوا كمان ما قصرتوا، يلا تعالوا قبل ما تبرد هي النسوان اكلوا وخلصوا قبلنا

امجد : انا مسامحك دنيا واخرة عمي، عامل دايت هالفترة

ابو امير ( فهم عليه ) : يا حبيبي انت لا عنا ما في دايت، حلوان ابن خالتك الصغير

قصي : جد مو مصدق انا، المشكلة بس يكبر كيف بده يتعرف علينا شو رح ينادينا مثلا ؟

عدي : بناديك ختيار الجن مثلا

علاء : ههههههه استغفرك ربي

ام ماهر : اسحبهم معك يا زياد ريحنا من سكاعة وجوهم

امجد : ماشي يا ستي هينا طالعين، بس صدقيني راجعين

قصي ( بغني ) : راجعين يا هوا راجعييين .. يا زهرة البساتيييين

علاء : ريم خلصي صحنك وخدي بنتك عندك هلكوها امير وآدم، كل واحد بنكش من جهة

ريم : ههههه معجبينها كتار

علاء : هاهاهاي قومي يلا

سيرين : انا بجيبها خليكي ريمو

ابو علاء : سيسو اشتقنالك بابا وين ما بتيجي ؟

حمزة : يا دوب انا اشوفها ههههه

علاء : ليه ؟

ابو امير : ههههه شكله بلمح عشان بتيجي عند خالتها ( عيونه على حمزة وبمزح ) ليكون بزعلك ؟

سيرين ( حاملة سلمى ): هههههه لا

رانيا ( اجت فجاة ) : نيالك يا سيرين، حمزة كيفك ؟ مداوم اليوم

حمزة : اه مداوم والله

رانيا : طيب اسمع عشان هيثم كمان مداوم اليوم بدي انام عندها عشان نضل حوالين ام امير نساعدها، شو رايك هيثم ؟

هيثم : رايي ؟ ما انتي قررتي وخلصتي، هاتي القلم اوقع شكلياً

الجميع : هههههه

ابو امير ( بكمل ) : اي اشي بزعلك فيه بس وقفي على راس الدرج ونادي عليي

الجميع : ههههههه

حمزة : بتمون يا عمي، بس تلبس على راسها ولا بدون ؟

ابو امير : اه طبعا ليه بصير تطلع وهي كاشفة

حمزة ( عيونه على سيرين ) : والله عاد مرات بتفتح الباب بدون ما تحط اشي

ابو علاء : سيرين !

سيرين : الله يسامحك، بكون عارفة انه وحدة من بنات خالتو اللي جاية

ابو امير : لا الله يرضى عليكي ما بدنا هيك حركات، انتي مثل بناتي وانا بنبه عليهم كثير ما يعملوا هيك

حمزة : منا بقلها افرضي واحد اجا بهاللحظة

الشباب : له له له بتطلعي بالقرعة يا سيسو ؟

امجد : استغفر الله

قصي : اللهم استرنا فوق الارض وتحت الارض ويوم العرض عليك

الجميع : هههههههه

سيرين : شفتي اخوكي كيف قلب الموضوع لصالحه ؟

رانيا : شفت شفت، جاية تحكيلي عن كيد الرجال، القران حكى عنه حتى بالاذكار اللهم اني اعوذ بك من غلبة الدين وقهر الرجال

حمزة / هيثم : هههههههه شو كمان ؟

رانيا : بس ههههه

حمزة : لسا موافق تنام عنا مرتك اليوم ؟

هيثم : بعدني ما وقعت بستنى بالقلم

علاء : لا انصح بذلك

هيثم : ومها معهم كمان، عشان تكمل عليي وعليك يا حمزة

امجد : نادي صوت على خالتي خليها تيجي تتفاهم مع العينتين هدول

عدي : هيهيهيهي

قصي : انس بعينك الله صفرلك تصفيرة، بس احكيلها من وراء حجاب تتواصل عشان قلبي الصغير لا يتحمل

ابو قصي : بس يا ولد

مها : انبسطت انه علاء اجا، كنت خايفة ما يجي والله

نهى : ههههههه يا حبيبي ابوه سمعه كلمتين، وكان مستحي من ابو امير

سهى : كان معصب ومو بوعيه

مها : يييي زياد اصلا ما زعل منه، ولو ما اجا كان راح جابه غصب

ام ماهر : هيثم بسولف لابوكن وفاكع من الضحك على منظرهم، وابوكي عتب عليه كال كيف بتسمحله يمد ايده على جوز خالته

ريم : يا حبيبي كل ما اتزكر شكله لما حكت معه خالتو بنشف دمي

مها : الحمدلله على كل حال

_______________________________

عايشة بصراع عمري ما توقعت اعيشه، كان صعب عليي اتخيل حالي بدونه وبنفس الوقت الزواج بهيك ظروف اصعب من كل التخيلات ..

عمر : كيفك ؟

آيات : اهلا تمام كيفك انت ؟

عمر : ماشي الحال، رحتي عالمباركة ؟

آيات : لا، شكلك ما رحت انت كمان

عمر : والله كان نفسي، بس ما بدي اشوف اهلي انتي عارفة

آيات : وانا كمان ما حبيت اروح وازيد المشاكل

عمر : بتهون ان شاءالله، المهم طمنيني كيف استعدادك ؟

آيات : الحمدلله كله تمام

عمر : بعد بكرا ان شاءالله، عشان يكون موجود عمي هيثم

////

مها : اهلين عمورة كيفك عمتو ؟

عمر : اهلين عمتي، الحمدلله على سلامتك وسامحيني

مها : الله يسامحك، بس والله كان نفسي تيجي معقول هيك بتعمل فيي ؟

عمر ( تنهدت ) : ظروفي صعبة والله يا عمتي ادعيلي الله يفرجها عليي

مها : انبسطت مشانك انت وآيات، بس بنفس الوقت متدايقة كتير وقلبي واجعني عليكم، ليه هيك تعمل ؟

عمر : اااخ يا عمتي، شفتي كيف اخوكي عمل فيي ؟

مها : يا عليي عليك والله ما بتستاهل، الله يسامحهم ويهديهم، انت المهم ما تقطعهم لازم اتضل تبرهم وتعمل اللي عليك

عمر : الله يقدرني، ربي يحميلك اولادك وتفرحي فيهم ويجعلهم من البارين

مها : تسلملي

عمر : ان شاءالله بنيجي انا وآيات عليكي وبنباركلك

مها : اهلا وسهلا باي وقت

_______________________________

زياد ( محوطها بايدي وبهمس في اذنها ) : واخيرا روحوا

مها ( بخجل ) : واخيرا

زياد : اشتقتلك كثيييير انفلجت فلج فيكي اليوم، كاني اول مرة بشوفك

مها : هههههههه غريبة

زياد : غريبة ؟

مها : قصدي عادي حاسة حالي، مو عارف مال الكل بحكيلي هيك

زياد ( رفع حواجبه ) : الكل ؟ مثلي انا

مها ( علقت ايديها برقبتي ) : اكيد ما حدا متلك حياتي، ما يحرمني منك ومن حبك الي

زياد : اي حب ؟ قولي عشق قولي هيام وغرام، انا متيّم فيكي ومتعلق لحد الجنون

مها ( مبتسمة بخجل ) : وانا كمان، وكل يوم بزيد اكتر واكتر

////

احمد : والله زاكي هالمطعم طلع

ياسمين ( بغرور ) : اكيد زاكي، مو انا اللي دليتك عليه

احمد : وكيف عرفتيه ؟

ياسمين : دورت واللي بسال ما بتوه

احمد : يا عيني، نيالي والله

ياسمين : اكيد نيالك فيي حبيبي

احمد : طبعا طبعا، ولو تصيري تعرفي تطبخي بحبك اكثر

ياسمين : اللي بحب بحب بدون اي شروط سيد احمد، ولا نسيت حبك الي زمان لما كنت ما اعرف اقلي بيضة ؟

احمد : مالك مستشرة اليوم ؟

ياسمين : مو مستشرة ولا عبالي، انت اللي ما بعرف شو قصتك ونازل حكي عليي وماخد راحتك

احمد : عادي، كله مزح على فكرة

ياسمين : ااااه، ازا هيك اوك

احمد : ...

////

ديمة : يعني شو هلا ؟

عدي : بعد بكرا الطلبة وكتب الكتاب

ديمة : مين معزوم ؟

عدي : ما حدا، ما في حفلة يعني

ديمة : شو ؟ ليه

عدي ( عصب ) : ديمة لا تجنيني حفلة شو انتي الثانية من وينله يجيب تكاليف ؟ خلص ما في داعي

ديمة : ...

عدي ( مسك اعصابه ) : اللي فيي مكفيني، والله عقلي مو مستوعب لحد هسة يا بنت الحلال

ديمة : ... بسيطة، الله يهدي بالك وبال الجميع

////

رانيا : تخيلي

سيرين : قلبي بتقطع عليها يا رانيا، والله حرام

رانيا : لو تشوفي خالك كيف حالته، صدقيني ما بنام

سيرين : يا ربي دخيلك، شو هالحظ ؟

رانيا : الله يتمم على خير بس، المهم اهله ما يوصلهم خبر، خايفين من امه تفركشها

سيرين : يا لطيف منها كيف صايرة

رانيا : انا كتير مستغربة، كانوا غير هيك على هوى اللي بسمعه منكم

سيرين : الله يهديهم، هو اللي صار مع بيان وامجد وبعدين خالتو منى وياسمين غير العيلة كلها

رانيا : لحد هلا نفسي افهم بيان ليه تركته ؟ يختي شو بدها احسن من هيك عريس

سيرين : ... ما بعرف

رانيا : ستي، خلينا ما نعرف احسن الواحد يا دوب ملحق على همومه

سيرين : موبايلك برن

رانيا : هاي امي .. الو ماما كيفك ؟ .. اه عندها .. طيب

كانت بتحكي عادي وفجاة قامت من مكانها لغرفة تانية ..

تزكرت كلامي انا وخالتو مها اليوم، واكتشفت انه انا عم بظلم حالي بسكوتي ..

___________

_________

مها : قويات على اشي واشي انتي واياها، حطولهم حد شو يعني حماية تستعبدك ؟

سيرين : والله يا خالتو نشفت دمي، مو عارفة شو احكي وبخاف حمزة يزعل

مها : مهو يا اما بتحكيله بينك وبينه بهداوة وساعة صفو انه انتي متدايقة واحكيله يحط حد لهالمسخرة يا اما احكيله انتي بتتصرفي

سيرين : يا حبيبي قال اتصرف، بقص لساني لو احكيله هيك

مها : يا دي هاللسان اللي بطل يطلع ست سيرين، مالنا بدك تعليم صرتي ؟

سيرين : افت والله تعبت انا، نظرات الحزن من امي كمان تعبتني

مها : امك حطيها على جنب، حماتك بدها حدا يحطلها حد ازا انتي ما حكيتي رح انفجر انا واحكي، والتانية ديمة مالها انهبلت بعد الجيزة ؟

سيرين : شفتي، طلعنا اهبل من بعض

مها : والله عال ست الحسن مرت اخوي، بدها كنة تركع عند رجليها، وتقلها امرك مولاتي

سيرين : مسكينة قال رايحة زيارة عندها بدل هداك اليوم، انه عزمت حالها عالغدا وبتحكيلي خلتها طول اليوم بالمطبخ، ما روحت عالبيت الا رجليها وظهرها مو منها

مها : ماشاءالله، بطلت تعرف تحكي انها تعبانة ولا تتشكون شوي ؟

سيرين : لا والمشكلة بحكيلها عدي مالك تعبانة بتحكيله لا عادي من الحمل، خافت تجيبله سيرة يعاتبها او يفكرها بتحملهم جميلة انها ساعدت امه

مها : لا مستحيل عدي هيك يحكي، بس هية صايرة هبلة

سيرين : الله يفرجها علينا

مها : يعني صحيح منى اختي وعازز عليي انه تقاطعنا، بس اللي عملته ياسمين عجبني وخلاني اعرف انه بنتي ما بنخاف عليها

سيرين : معك حق، ان لم تكن ذئباً اكلتك الذئاب، طيب شو اعمل مع حماتي ؟

مها : لا تردي عليها ابدا، يوم ما بتتصل اعملي حالك ما شفتي وبعديييين رني عليها واحكيلها كنت نايمة تعبانة منها عشان اجتني اليوم

سيرين : عشان تغيّب

مها : احنا بدنا اياها تغيّب، خليها تعرف كيف ترن مرة تانية

___________

_________

رانيا : بتسلم عليكي ماما

سيرين ( هزيت راسي ) : على رسول الله السلام

رانيا : صحيح ما سالت حمزة شو صار بالفحص اللي عملتوه ؟

سيرين ( باستنكار ) : اي فحص ؟

رانيا : حمزة حكالي عاملين فحوصات يعني بخصوص الانجاب

سيرين : ااااه، لا الحمدلله ما فينا اشي لا انا ولا هوة، الشغلة قصة وقت وكمان ما نضل نفكر بس المشكلة بالناس اللي بتزكرنا

رانيا : الحمدلله رب العالمين، انا استغربت اصلا شو الداعي للفحوصات قبل السنة ما بصير نعمل اشي، وسكري ادانك عن الناس اللي بده يحكي يحكي

سيرين : ان شاءالله، من يوم ورايح رح اخد بنصيحتك حبيبتي رنووش

_______________________________

ليلى : اوعى تعطيه قرش، انا فلوسي ما بعطيهم لمين ما كان

محمود : ابن اخوي هاد ومثل ابني، وفلوسي وحر فيهم انتي لا تتدخلي

ليلى : انا ما دخلني، ناقصني اشياء كتيرة وبدي اجيبهم، مرتك وبنتك وبيتك اولى

محمود : مو مقصر معكم، وابن اخوي بدي اساعده وانتي خليكي على جنب لو سمحتي ولا تعملي مشاكل بينا على اشي ما اله داعي

ليلى ( بلعت ريقها ) : لو شفت امجد اليوم، ولا كانه بعرفنا

محمود : لا انا بعرفني عادي، بعدين الك عين تحكي عليه بنتك هي اللي تركته وانتهينا

ليلى : اموت واعرف هالبنت شو صارلها، متاكدة انه حدا عامللها سحر

محمود : توكلي على الله بلا هبل، قال سحر

ليلى : مستبعد ؟ بس اخرتني اعرف، وهي عمر بده يخطب فجاة وغصبن عن اهله بدك تحكيلي مو مسحور ؟

محمود : ههههههه ضحكتيني، بتعرفي معك حق حتى اخوي ماهر شكله مسحور لانه مسكين مو قادر يوقف ضد مرته وبنفس الوقت قلبه عند ابنه، قولتك مسحور ولا شو ؟

ليلى : شو قصدك ؟ معقول آمال بتتعامل بهيك اشياء

محمود : لا حول ولا قوة الا بالله، نامي الله يرضى عليكي بلا قلة عقل

////

غنى : يا بابا حرام عليك، لا ترد على ماما والله آيات منيحة وما دخلها باللي عملته امها، حتى عمتي اليوم لو شفتها كيف صالحت عمتي مها قطعت قلوبنا

ماهر : ... ما بدها، دايرة على خراب بيتها امك تخيلي تتركني بعد هالعمر ؟ طيب انتي شو رح يصير فيكي ؟

غنى ( بتبكي ) : ... حرام عليكم والله حرام

ماهر : لا تعيطي يابا، اخوكي زلمة وقد حاله، ونيال دار عمتك فيه، واحد مثله ما بيجي كل يوم، الله يهنيه ويباركله

غنى : معقول يوافقوا عليه ؟ يارب يجبر بخاطره ويهنيه

ماهر : امين

////

انس : بيان بتحزن يا امجد، حاسسها ندمانة

امجد ( بمسخرة ) : يا حرام جد ؟

انس : معقول انت اللي عملت كل العمايل زمان بس مشانها يتغير كلامك عنها هيك ؟

امجد : مهو هون المصيبة، انه خسارة فيها كل اللي عملته

انس : قلبك انطفى يا مسكين، هيك اخرة الحب بتصير ؟

امجد : آخرتك رماااد، رمااااد

انس : كانت اليوم جريئة معي، استغربت كثير كيف متغيرة ؟ كانه مبطلة تفرق معها

امجد : مراهقة يا حبيبي، عادي المغامرات كلها هسة بتطلع

انس : بس انا خايف عليها، بعد اللي صار بينا وبين دار خالتي ما اتوقع تكون طريقنا سهلة والله يا امجد

امجد : مسكين ابو امير، ما بعرف لو كنت مكانه اليوم شو كنت تصرفت صراحة

انس : اه والله قطع قلبي كيف نزل راسه قدام امي، اكيد تذكر مشاهد قديمة وتذكر بنته وشو اللي صار فيها

امجد : يا ويلي عليها ياسمين، الله يقومها بالسلامة

////

ابو احمد : يا عمي منورة بشوفة اختك

منى : ههههه حبيبي ما يحرمني منك، انت سندي وكل قوتي منك بتيجي

ابو احمد : تعالي اشوف طيب ( رفع راسها بصابعه ) لساتك حزينة كانه ؟

منى ( بحزن ) : ياسمين اليوم ما حكت اي كلمة معي حتى بالغلط، مع انه احمد كتير انبسط وانفعل وهية ولا كانها جنبه

ابو احمد : برضو عند الرجال هيك عملت، بيني وبينك ما عليها عتب، بطلعلها

منى : ... صح

ابو احمد : برضو لساتني عند كلمتي، ياسمين اللي بعرفها لا يمكن تستمر بهالاشي والايام بيناتنا

منى : يااا رب ما بدي اشي ولا رح اتدخل فيها ولا ازعلها بس حنن قلبها عليي وما تحرمني من احفادي

ابو احمد ( حضنها ) : توكلي على ربك، لا تخلطي الامور ببعض

منى : انا ما بتخيل حالي اشوف اولاد ابني وانا غلطت بحق امهم وامهم مو مسامحتني

ابو احمد : ... ليوم الله بعين الله

_______________________________

زياد : وين رايحة ؟

مها : هلا برجع بس اتفقد البنات

زياد : طيب خليكي انا بشوفهم

مها : اشتقتلهم هههه

طلعت من غرفتي ورحت عند اسيل اشوفها، كانت بتختها بس عيونها مفتوحة بهالعتمة ..

مها : اسيل ؟

اسيل ( مفزوعة ) : ماما ! خير فيكي اشي محتاجة اشي

مها : لا حبيبتي انا منيحة بس جاية اتطمن عليكم، ليه صاحية ؟

اسيل : عادي، هلا بنام يمكن مع التعب قلقانة

مها ( بنبرة حادة ) : حكى معك اشي اليوم ؟

اسيل ( بخوف ) : مين ؟

مها : انتي عارفة مين

اسيل ( بترجف ) : ل ل لا م م ما حكى ما شفته

مها : وليه خايفة هيك ؟

اسيل : ماما الله يوفقك لا تحكي معي بهالطريقة، انا ما عملت اشي خطا ما دخلني باشي

مها : تمام، يلا نامي تصبحي على خير

ما تعودت احكي مع بناتي بهالطريقة، خصوصا بفترة مراهقتهم، كنت دايما صديقة الهم وقريبة منهم ..

بس كل اشي عم بصير معنا غيرني، وتعب قلبي، وما بتحمل اي اشي غلط يصير معنا ..

اختي رجعت وصالحتني، بس عيون زياد ما بتحكي انه سامح ونسي ..

لازم اسكر كل الطرق قدام انس وما اعطيه مجال يفكر في بنتي، لانه رح ينكسر قلبه برفض ابوها ..

واللي عم يعمله عمر خطوة جريئة، بس اهلها موافقين عكسنا تماما، واكيد ما ربيت بناتي يعاندوا اهلهم ويعملوا عكس ارادتهم ..

يتبع ..

عن الكاتب

وعد السعيد

كاتبة قصصية

بدات رحلتي منذ عام ٢٠١٧ حيث وجدت نفسي مطالعة جيدة للكتب والقصص، استهليت مسيرتي بقصتين قصيرتين بطابع اجتماعي، ثم رواية رومنسية درامية، بعدها انتقلت للطابع الكوميدي ونشرت اول موسم لقصة ( نهفات عيلتنا ) في نهاية عام ٢٠١٧ وبعد ان لاقت نجاحا واسعا واصرارا على اكمالها تابعت كتابتها حتى اصبحت مسلسلا اجتماعيا عاطفيا محافظا بطابع كوميدي تم انهاءه في ٢٠٢١ .. ***********^^^^^^^************ لكل اللي كان يقول الحلم ما بصير حقيقة والمستحيل صعب إنجازه، بحب اقلكم اسمعوا قصتنا وتاكدوا انه ما ضل اشي بالدنيا الا صار معنا .. هاي العيلة جزء صغير بمدينة صغيرة بهالعالم الكبير، عيلتنا عاشت لحظات من كتر الضحك كان يوقف قلبهم، ومن كتر الحزن كانت تنحرق روحهم .. عيلتنا #سلسلة_ياسمينة_الروح مستحيل تقراوها وتملوا .. بكل حلقة فيها اشي مختلف واشي بشدكم واشي بخليكم تحسوا حالكم شخصية من الشخصيات بتنزل دموعكم بمشاهد الحزن وبتعلى ضحكاتكم بمشاهد الكوميديا مسلسل بعبر عن كل شي جواتي وبحلم فيه .. كل واحد فيهم بمثلني .. كل اللي بقلبي وقناعاتي ومبادئي وصفتها بكلمات خفيفة لطيفة على قلوب اللي بقراوه ... اتمنى لكم قراءة شيقة ومفيدة وان اترك لكم اثرا طيبا

متابعة