سلسلة ياسمينة الروح/ الموسم الثالث ( مذكرات عاطفية ١) الحلقات ١٨-٢٢

سلسلة_ياسمينة_الروح

#نهفات_عيلتنا_٣

#مذكرات_عاطفية

#بقلم_وعد_السعيد

الحلقة الثامنة عشر :

قراراتنا الصارمة ، بتفرض قوة شخصيتنا عالناس اللي عايشين معهم ..

و بشوفوا قديه انت حدا شاطر برسم الحدود ، و ما بتسمح تحت اي ظرف من الظروف ، انك تنحط تحت الامر الواقع ..

_________________

_________________

احمد : كيف بتسمحولها تتعدى حدودها مع ياسمين ؟ و بعدين معكم حلوا عن هالبنت

منى : حقك علينا

آيات : ماما ؟!

احمد : انتي ما بدي اسمع صوتك ، لانك مو آيات اختي اللي بعرفها ، انتي وحدة ثانية اكيد ( رفع اصبعه بوجهها بهدد ) بدك تعتذري منها على كل الكلام اللي حكتيلها اياه زمان و اليوم

آيات : وصلتلها مع ريم انه كل القصة بس عشان خاطر خالو و انك مو مفكر بالخطبة

ابو عدي : مال اصواتكم طالعة ؟ خير يا منى شو في ؟

احمد : ...

منى : امشوا نروح بلا فضايح

احمد : انا و امجد و انس مو مروحين ، بدنا نروح عالكالوتي نصلي قيام

ابوعدي : لا حول و لا قوة الا بالله ، طولوا بالكم كل مشكلة و الها حل

احمد : الا كلام النسوان اللي ما بخلص ، هاد حله صعب و الله يا خالي ، عن اذنكم

منى : حقك علينا قلبنا هالعزومة مشاكل

ابو عدي : بسيطة يختي ، بس انتي ما تزعلي حالك الا ما تفرج

منى : اااخ هالولد جنن حاله و جننا معه ، يا خوي احكي مع مها و ياسمين بلكي تسمع منك و تقبل ترجعله ، و الله خايفة يصير فيه اشي

هيثم : مرحبا ، مال احمد معصب ؟

منى : من عمايل مرتك

هيثم : يا بي عليها زينة رح تجلطني ، شو عملت ؟

ابو عدي : و الله شكلك مش عارف تربيها مزبوط ، الحق عليك قلتلك زمان اقطع لسانها و ارتاح

منى : حكت قدام الكل و من ضمنهم ياسمين و مها انه احمد شاف جمانة مبارح

هيثم ( ضرب جبينه ) : استغفر الله ، كان ناقصني مها تعرف ، هسة بتضرب اخماس باسداس عليي

منى : و احمد طار عقله بس عرف انه وصل الحكي لياسمين

ابو عدي : ههههههه و الله اشي بضحك ، و تعرف شو بدها تعمل ؟

منى : عاد هو عقله غير ، بخاف عليها تتحسس و تفكر انها مش فارقة عنده

ابو بيان : مالكم قاعدين لحالكم ، بتحكوا اسرار

هيثم : اسرار مافيا

منى : ههههه اسرار العشاق

ابو بيان : فتحوا نفسي عالحب هالشباب ، صاير اشي جديد ؟

هيثم : خذلك ههههه

_________________________________

بهالليلة امي اصرّت كثير عليي انها ترجع تشوفلي البنت اللي اسمها ياسمين ، و انها احلى بكثير من المواصفات اللي انا وصفت فيها سيرين ..

ما قدرت اني اسكت على الغلط ، و طلبت منها تطلع من الموضوع ، و انا بدبر حالي ..

حسين : شو في ببالك ؟

حمزة : لحد هسة و لا اشي ، المهم اني اخلص من نق امي

حسين : الله يعينك انا وجعني راسي كيف انت

حمزة : اااخ همة هيك النسوان ما بحلوا عنك الا لما يجعوا راسك او يصير اللي بدهم اياه

حسين : يا ريت بقدر اساعدك باشي

حمزة : اشغل امي عني ههههه

حسين هو اخي الاصغر ، رفيقي بالغرفة و بالحياة ..

اصغر مني بخمس سنوات ، بس كثير متفقين و كل اشي مشترك بيناتنا ..

بشتغل محاسب ، و اموره ماشية ، و بحب بنت جيرانا من لما كانوا صغار ..

انا و اختي رانيا ، الوحيدين اللي بنعرف عن علاقتهم ..

ما عمري جربت شعوره ، و كنت دايما الومه عاللي بعمله ..

بس لما اشوفه مبسوط ، بتمنى ينتهي حبهم بالزواج ..

__________________________________

في وقت الفجر <<

ديمة : شو مروحة ؟

ريم : اه علاء رن عليي هي قرب يجي

سهى : يلا تصبحي على خير

ريم : و انتي بخير

ديمة : ازا اجت سيرين تفطر عندي اليوم احكيلك ؟

ريم : لا بلاها ، جاي عبالي افطر ببيتي اليوم ، يلا سلام

طلعت من دار اهلي ، و شايفة القرود السود بتنط بوجهي ..

و مو طايقة اسمع اي كلمة من حضرته ، اللي مفكر حاله عايش لحاله ..

علاء : كيفك ؟

ريم ( ضاربة بوز ) : ... احسن من هيك ما فيه ، انت كيفك ان شاءالله انبسطت ؟

علاء ( بنبرة حادة بقصد المسخرة ) : كنت مفكر حالي مبسوط ، بس لما شفتك انبسطت اكثر حبيبتي

ريم ( بمسخرة ) : يييي تؤبر البي ، الله يبسطك كمان و كمان يا روووحي

قلبناها مسخرة ، و وصلنا البيت بعد كم دقيقة ..

كل واحد حط راسه و نام ، و صحينا الظهر ، لانه اليوم سبت و علاء معطل بكون ، بما انه لسا الصيفي بجامعته ما خلص ..

ريم : شو اطبخ اليوم ؟

علاء : مش ضروري طبيخ ، اعملي اي اشي جنب الشوربة و خلص ، معجنات مثلا

ريم : لا تعبانة مو خرج معجنات

علاء : من شو تعبانة ، الك يومين ما عملتي اشي ، اول مبارح عند اهلي و مبارح عزومة

ريم : اوك مو تعبانة و مو جاي عبالي اعمل ، عندك مانع

علاء : علي صوتك كمان بلكي استوعبت اكثر ، بتعرفي صايم و تركيزي على قده

ريم : معلش تبطل مسخرتك عالطالعة و النازلة ، بكفي مشيتلك سهرتك مبارح

علاء : سهرتي ؟ و لك خافي الله كنا بالمسجد ، و خلصنا تسحرنا وصلينا الفجر ، و ضليت جاي

ريم : ما اختلفنا ، بس انا ما كنت معك ، معناها شو ؟

علاء : معناها بدك اتطلعيها على جلدي ، و تخليني اندم عالساعة اللي فكرت فيها اتجوز

ريم : جد ؟ هاد اللي طلع معك ؟

علاء : مثل ما سمعتي

لف وجهه و راح على غرفة لحاله ، و قعد يشتغل عاللابتوب ..

و انا ندمت على كلامي اللي حكيته ، لانه فعلا ما اله داعي ..

يعني المفروض اكون مبسوطة انه زوجي هيك ، احسن من غيره اللي بسهروا بكوفي شوبات و اراجيل حتى برمضان ..

فتت عالمطبخ ، و جهزت للمعجنات اللي بدي اعملها ..

حسيت انه نفسه فيهم ، و عملت شغلات جانبية كمان و سلطات ..

قضينا طول النهار ما حكينا مع بعض ، و عند الفطور كنت مجهزة السفرة ، و رح اوقع من التعب ..

ريم : وين رايح

علاء : بصلي المغرب و برجع

ريم : اوك

استغليت الوضع : و صليت انا كمان ، عشان نفطر براحتنا بس يجي ..

__________________________________

قصي : سيرين الحوامة ، اقعديلك يوم عند اهلك

ديمة و سيرين : هههههه

ديمة : اهلها معزومين اليوم كمان

سهى : وين ؟

سيرين : صاحب بابا

قصي : ليه ما رحتي ؟

ديمة : انا اكلي ازكى

سهى : اهلا و سهلا فيكي

قصي : كان حكيتوا لياسمين تيجي

ديمة : مين قلك ما حكتلها ، كمان شوي جاية

قصي : ولعت

سهى : و آيات ؟

سيرين : اكيد لا ههههه

قصي : يمة الثلاث شريرات مجتمعات اليوم ، الله يستر

مع انه ما كنت ناوية اروح ، بس غيرت رايي عند آخر لحظة ..

ياسمين : سلااام

قصي : كممممملت

البنات : ههههههه

ياسمين : خلص هيني مروحة

سهى : اهلا و سهلا خالتو تفضلي

قصي : بشوفك غيرتي الستايل اليوم

سيرين : قصي نفسي تعمل اشي مفيد بحياتك غير الزناخة ، يا اخي اعتقها خليها تلقط نفس عالاقل

قصي : به

ديمة : عشان تحسوا بمعاناتي

قصي : به به

سيرين : جد الله يعينها كنتك خالتو

قصي : جد !

ياسمين : المهم شو طبختولي اليوم ؟

قصي : الهيكل العظمي اليوم بده يتربرب على ايدينا

البنات : ههههههه

كان ضايل علينا عمر و امجد ، و بنموت من التعليقات ..

قصي ما خلى علينا ، كل ما امسك شوكة اكل فيها اشي ، يلطشني كلمة ..

قصي : سيرين عبد النور اعطي السكينة لياسمين عبد العزيز خليها تقطع الكوردون بلو منيح

ديمة : ههههههه

ياسمين : على سيرة سيرين عبد النور ، شفتوا مسلسل ٢٤ قيراط مبارح ؟

سيرين : لا تذكريني ، ينعن شكلها و لا نادين نجيم

ديمة : بتزهق من يوسف الخال بتروح لتيم حسن

قصي : هديك ملكة جمال لبنان ، و فوقها موهوبة بتعزف تشيللو ، انتي طنجرة العدس بتطلع محروقة معك كثير عليكي ابو عبده بياع القهوة

سيرين و ياسمين : ههههههههه

ابو قصي : لا اله الا الله ، يا زلمة اسكت بكفي تعليقات

سهى : هههه اي خليه و الله معه حق

ديمة : شكرا ماما

ياسمين : اخت مها عادي متوقع منهم كل اشي

سيرين : خالات علاء عادي متوقع منكم كل اشي

ابو قصي : هههههههه

سهى : ضحكتوا عمكم

قصي : عنا مواهب مدفونة احنا ، لازم نعمل سيرك متنقل او اشي زي هيك

ديمة : انا مستعدة اشتغل متل ريمي و انام بالشوارع ، بس جيبولي واحد متل ماتيو يحبني

ابو قصي : الله يثبت علينا العقل و الدين ، يعني هاد الاكل مين عمله ياسمين ؟

ديمة : ياسمين مين ؟ بابا حرام عليك انهديت بالمطبخ و انا ابتكر و اصمم

ابو قصي : ابوها قال انها شاطرة بالاكل الغربي

ياسمين : يسعده زياد ، احم قصدي بابا

سيرين : و انا عمو شو بحكي عني بابا ؟

ابو قصي : انتي ما في كلام بوصف رقتك و نعومتك ، الله يحميكم جميعا

قصي : رقة شو ؟ انت لو تشوفها و هية صاحية من النوم

ديمة : عاساس انت شفتها يعني ؟

قصي : لا طبعا بس انه اكيد مش رح تكون انعم منك و انتي فاتحة تمك و بتتثاوبي

ياسمين : ههههههه قصي الصيام ماثر عليك بشكل ملحوظ

قصي : ولك يسعدك انتي ، دخيل الحاسة المشمشية اللي مسيطرة على حواسك

سهى : حاسة شو ؟

ديمة : انسي ماما هاد ابنك مسطل ، يلا قايمة اعمل قهوة النا كلنا

ضلينا مبسوطين ، و مزاجي منيح ، لحد ما زكرني فيه ..

عيون ديمة و سيرين كانت رح تاكله لقصي ، حتى هو اكل حاله ندم ..

ديمة : قصي ؟ ليه منزل عالفيس بوك صور ؟

قصي : وين المشكلة ؟

ياسمين : اوعى تكون منشنتني

قصي : شو فيها ؟

سيرين : جد من مين خايفة ؟

ياسمين : ولا من اشي سلامتك

_________________________________

علاء : اوووه عمرانة ببيت اهلك ؟ ليه ما رحتي

ريم : عشان اعملك معجنات

علاء : الله يسامحك اخر اشي طلعت ظالم ، و حابسك و ابو كرش

ريم : على سلامتك حبيبي بس حبيت افطر معك لحالنا ، و سلامة فهمك

علاء : انتي صايرة مش طبيعية ، فيكي اشي متغير

ريم : شي متل شو ؟

علاء : ما بعرف بس مزاجك صعب ، و روحك بمناخيرك دايما

ريم ( مو عاجبها ) : ما بعرف ، يمكن هرمونات عشان قرب موعدها

علاء : اااه هرمونات ، يلا بسيطة بنتحمل اذا هيك

_________________________________

آيات : هدول عالآخر حاربوني يعني ؟

منى : مين ؟

آيات : بنات خواتك

احمد : هه كل واحد بحصد اللي زرعه

منى : ...

آيات : الله يسامحك ، بس بتعرف الزراعة بالارض البور كمان هيك نتيجتها

احمد : شو قصدك ولي ؟

آيات ( بعصبية ) : قصدي انه كل اشي عملته كان مشانك ، بس حتى انت ما اثمر معك ، للاسف

احمد : نعم ؟ انا طلبت منك اتطولي لسانك و ترمي حكي بلا طعمة ؟

امجد : ايوا دقوا ببعض هسة ، قومي البسي باخدك لعندهم تتفاهموا و احكوا كل اشي بقلبكم

آيات : مستحيل ، انا ما بفرض حالي على حدا

منى : كلام اخوكي صح ، خيركم من يبدأ بالسلام

احمد : المهم بدك تعرفي تفصلي بحياتك ، انا ما دخلني اعتبريني مو موجود ، عيشي بشكل طبيعي و اعملي ما يمليه عليه قلبك

كان لازم اتصرف بحكمة ، حتى ما اشوف اختي بهيك حالة صعبة ..

بعرف انها بتحبهم ، و متعلقة فيهم ، و فعلا مو ذنبها ، كل اشي عملته او حكته كان بسبب احمد و محبتها اله ..

بعتت مسج لقصي ، و خبرته عن فكرتي ، حتى يساعدني بتنفيذها ..

__________________________________

بعد ما كنت مستمتع بزناختي على البنات ، و مزهقهم تعليقات ..

بوصلني مسج من امجد اني آخذ البنات و اطلع فيهم على مول ، عاساس انه انا حنون و بدي اطلعهم مشوار ، و استناه هناك ، و رح يوصل بسرعة قبل صلاة العشاء ..

قصي ( بحنية مصطنعة ) : صبايا

ديمة : نعم ؟

قصي : اكيد زهقانات و حابين تغيروا جو صح ؟

سيرين : عندك موهبة قراءة الطالع كمان ؟

ياسمين : صح هههه

قصي : طيب يلا زي الطير الطاير البسوا عشان نوصل للمكان الحلو اللي بدي اخدكم عليه

ديمة : البس شو بالزبط ؟

سيرين : مش رايحين على ديزني لاند ، مكان حلو بعمان قصده

قصي : معكم بس خمس دقايق و خمس و ثلاثين ثانية

ابو قصي : شو مباراة فيفا ؟ وين ماخذهم ؟

سهى : اطلبوا ازن اهاليكم

ياسمين : انا مؤمنة جدا بانه عندك مواهب صحفية متل اختك مها ، قومي بالواجب عنا خالتو

قصي : ههههه

__________________________________

ما كنت اعرف شو مخطط امجد ، و فكرته رايح على بيت خالتي ، بس لما حكالي تعال معنا ، عرفت انه في اشي ثاني في باله ..

احمد : لا بلاها

امجد : براحتك ، بس رح تروح عليك ها

احمد : اذا كان الجو مناسب احكي معي وباجي

امجد : تيجي ما تجيش انا كدا كدا راضي حبيبي مستني و هافضل اناااادي

احمد ( رمى عليه قرنة الكنباية ) : سد نيعك و ريحني من تجعيرتك

انس : هههههه بحاول يقلد عمر بس مو طالع بايده

امجد ( زت نفس القرنة على انس ) : انت ما تتدخل ، قوم اجلي اليوم دورك بما انه آيات طالعة

انس : نعم ؟ انا ما دخلني بالجلي عملت سلطة قبل الفطور

احمد : هههه خلص انا بساعدك ، بس قوم اعمل قهوة

__________________________________

رانيا : حمزة بما انك معطل خدنا مشوار

زينة : اه يا يا ، خليني اروح اجيب كم غرض ناقصيني للعيد

حمزة : مو جاي عبالي خدوا حسين

حسين : انا و اياك بنروح نصلي و همة بلفوا براحتهم

رانيا : ايوااا يا سلام عليك و على افكارك الحلوة

حمزة : لا جد انا نعسان و بدي ارتاح شوي ، روحوا انتوا

__________________________________

آيات : لوين رايحين ؟ مو هيك الطريق

امجد : بدي اشممك هوا ، مفكرتيني عاطل لهالدرجة ؟

آيات : لا ولو عمري ما حكيت عنك عاطل ، بس قصدي انه ..

امجد : خلص انتي تابعي بصمت

وصلنا على مول ، و شغل الواحد يتسوق منه كمان ..

كتير انبسطت لانه لسا ناقصني كتير اشياء ، بدي اجهزهم للعيد ..

بس امجد كان ماسك التلفون ، و يمشي بسرعة ، و انا اركض وراه ، لانه ماشاءالله مو ملحقة عليه ..

امجد : و هي وصلنا عند محل .. وينهم ؟

آيات : مين ؟

امجد : شو مين يا هبلة انتي ليه طالعة اصلا ؟

آيات : البنات ؟

امجد : طبعا ، هيك الموضوع كانه صدفة ، لا انتي رحتي ولا همة راحوا ، و فرجيني شطارتك

آيات : فعلا هيك احسن اشي ، كنت هاكلة هم كيف اروح ، الله يخليلي اياك امجوودتي

__________________________________

ديمة : قصي انت بتستنى بحدا ؟

قصي : انا مين بدي استنى ، يا حسرة عليي

سيرين : وليه واقف متل عمود الكهربا و موقفنا جنبك

ياسمين : يييي شوفو مين هناك ؟

قصي : اجو ؟ وين ؟

ديمة : اسم الله عليك مين اللي اجا ؟

امجد : مرحبااا يا حلوييين

سيرين : عاساس ما بتستنى حدا

آيات ( بابتسامة ) : كيفكم ؟

مديت ايدي اسلم عليها ، و ما ترددت بانها تبادلني السلام ..

ياسمين : منيح اجيتي ، بنتسلى كلنا

آيات : انا بعتزر من كل اشي طلع مني

امجد و قصي : يلا احنا رايحين نصلي ، خدوا راحتكم

ديمة و سيرين ( من بين اسنانهم ) : ماشي يا قصي

آيات : شو بدكم تشتروا ؟

سيرين : قبل ما نشتري بدنا نصفي حساباتنا اول

آيات : تعالي ابوسكم اول لاني كتير اشتقتكم

احنا شو ما صار فينا ، بنضل لسا بنحب بعضنا ، و قلوبنا صافية ، و ما في مكان للحقد جواها ..

ياسمين : بس انتي و امجد اجيتوا ؟

ديمة : لو سمحتوا اي اشي بتعلق بالماضي بتسكروا عليه ، احنا هون لانه نحن بدنا بعض مو مشان حدا

آيات : قبل ما اجي اشوفك ، تفاهمت معه على هالنقطة ، و حكالي اني اعيش حياتي بعيد عنه ، و ما اخلط الامور ببعضها

لسا الفضول قاتلني ، لاعرف عن هالبنت اللي راح يشوفها ، و اتأكد انها مو احلى مني ..

ياسمين : صحيح شو وضعها هديك اللي من طرف زينة ؟

آيات : يييي لا تزكريني ؟ ما قالتلك ريم طيب ؟

ياسمين : امبلا قالت ، بس بدي اعرف بالزبط كيف مواصفاتها ، احلى من زينة ؟

ديمة : استغفر الله العظيم ، امشي سيرين نروح لحالنا نمشي

ياسمين : ولك استني مالك انجنيتي

آيات : لا زينة احلى منها بكتير ، اصلا احمد ما اتطلع فيها و لا رضي يشرب و لا ياكل اشي من الضيافة ، عاد جايبين ضيافة كانه جاييهم ابن وزير يخطب هههههه

سيرين : هههههه يا حرام

ياسمين : امشوا طيب يلا

ديمة : هدي سرها هلا

__________________________________

قصي : كيف خطرتلك هالفكرة ؟

امجد : يعني اضل اشوف اختي بتنحرق عشان ذنب هية ما عملته ؟ اساسا كل البلاوي من تحت راس اخوي المحترم

قصي : كل اشي بتحطوه بظهر احمد ؟ ما عندها عقل يعني آيات ؟ خلصونا عاد على مين بتضحكوا

امجد : بتقعد عاقل و لا اروح ؟

قصي : هيهيهيهي امشي امشي

__________________________________

حسين : حاولوا تخلصوا قبل ما اخلص صلاة

رزان : ليه ما بدك تيجي معنا ؟

رانيا : لا خلص انت روح صلي و بترن علينا بس تخلص و بنقلك وين احنا

حسين : تمام

__________________________________

ياسمين : شو صبايا هيك بدنا نمشيلهم اياها لامجد و قصي يتفقوا من ورانا و نحن متل الهبايل ؟

سيرين : ما بكون اسمها ياسمين ازا بتضل عاقلة

آيات : شو بدنا نعمل ؟

ياسمين : هلا رح احكي اللي عندي بس ما بدي تزعلوا

ديمة : تفضلي اتحفينا

ياسمين : انا لازم اشوف احمد ضروري ، بدي اقعد معه بس شوي

سيرين و ديمة و آيات ( بتطلعوا ببعض ) : ما فهمنا

ياسمين : هلا بس يخلصوا صلاة احنا بنعمل حالنا متفرقين بالغلط و ضعنا عن بعض

ديمة : ااااااه ؟؟

سيرين : و بنسكر تلفوناتنا

ياسمين : لا ما حزرتي ، انا بس بسكره ، و انتو بلتقوا فيهم و بتقولوا انه لازم يجي احمد يدور عليي ، قبل ما اهلي يعرفوا اني ضايعة ، او احكيلكم لا

ديمة : ههههههه

ياسمين : انا عاساس خلص شحني ، و مو حافظة الا رقم احمد ، فبرن عليه من تلفون اي محل بلاقيه ، و بحكيله يجي ياخدني

سيرين : ملعوبة ، لانه ليه ما ترني على رقم اهلك

ياسمين : يا هبلة عشان ما يقلقوا عليي ، ف هيك عالهسي بضيع و احمد بلاقيني و برجعني على بيت اهلي

آيات : هههههه يمة يا حبيبتي احمد اليوم رح يتورط بقضية لاخر يوم بحياته

ياسمين : الحق عليي بدي اعمله my hero

و ما ترددنا بتنفيذ هالخطة ، اللي ما بنعرف شو رح تكون نتيجتها بعدين ..

قصي : وينكم خلصنا صلاة يلا

ديمة ( بتبكي ) : ما بعرف قصي

قصي : شو ما بتعرفي ؟ مالك بتعيطي طيب ؟

ديمة ( بتبكي ) : احنا ضايعين عن بعض ، ما عم الاقي البنات

قصي : شووو يعدمني اياكم

امجد : شو في ؟

قصي : ضايعين عن بعض

امجد : استني ارن على آيات اشوفها وين ؟ الو .. وين انتي ولي ليه بتعيطي ؟ صغرة استني هيني جاي

قصي : لقيتها ؟

امجد : اه هيني رايح اشوفها ، شوف سيرين و خلي التلفونات بينا

آيات : امجد ياسمين ضايعة و موبايلها خالص شحنه

امجد ( ببكي ) : انا غبي ، حمااار ، ما بفهم

سيرين : ههههههه

امجد : اه اضحكي انتي لقيتيلك نكتة تضحكي عليها

سيرين : ديمة و قصي وين ؟

امجد : شو بعرفني هههه

كنا ميتين ضحك ، و كل الناس بتطلع علينا ، و حاسين انه في اشي عم يصير معنا ..

__________________________________

ياسمين ( بتبكي ) : احمد انا ضايعة

احمد ( كنت متمدد و نهضت حالي بسرعة ) : شوو ؟ وين ضايعة ؟

منى : مين ؟

ياسمين : ب ... مول ، تعال بسرعة احمد انا تلفوني مغلق و واقفة عند محل ... بالطابق الارضي بستناك هناك ، ما تحكي مع اهلي حتى ما يقلقوا

احمد : طيب انا جاي فورا ، بس بتكسي يمكن اتأخر عليكي

ماشي : تمام

امجد : اه احمد ؟

احمد : وين مفتاح سيارتك السبير ؟ ياسمين ضايعة اترك سيارتك عند المول بدي اجي اخدها و ارجعها عند اهلها

امجد ( مصدوم ) : اه و لا يهمك ، هي تركتها و بروح مع قصي

__________________________________

قصي : ولك وين رحت

امجد : هيني شايفك من فوق ، خليك مكانك جايين

ديمة : يلا ننزل من هناك

سيرين ( بهمس ) : ابصر شو صار مع ياسمين

آيات : الله اعلم

امجد : ها و اخيرا

قصي : يلا كلنا ندور على ياسمين

امجد : احمد برن ، اه احمد

احمد : وين مفتاح سيارتك السبير ؟ ياسمين ضايعة اترك سيارتك عند المول بدي اجي اخدها و ارجعها عند اهلها

امجد ( مصدوم و عينه عالبنات ) : اه و لا يهمك ، هي تركتها و بروح مع قصي

بس حكى معي احمد ، فهمت اللعبة كلها ..

امجد ( بضحك ) : هي المُخَلّص عالطريق يلا امشوا نروح

قصي : فهموني طيب ؟

امجد : بس افهم اكيد اكيد رح افهمك ، المهم انا تبت خلص لا بدي اصالح حدا و لا حدا يصالحني

سيرين : يعني ياسمين وين حكالك احمد ؟

امجد : مين ياسمين ؟ انتي شو عرفك انه بحكي عنها ؟

سيرين : اه ؟ قصدي شو حكالك احمد ؟

قصي : ايوااا ، انصرفي قدامي انتي و اياها بتخلوا الواحد يندم انه طلعكم ، و ياسمين حسابها بعدين

ديمة : لا لازم نضل هون لحد ما نلاقيها ، شو بدنا نحكي لاهلها ؟

قصي ( عينه على امجد ) : تعالوا نروح عند علاء عشان يساعدنا ، عالاقل قدام اهلها

امجد : اليوم جوز خالتك زياد بده يتسحر كناااافة

البنات : ههههههه

قصي : اقسم بالله لو محله انا زمان انجلطت

امجد : رن على صهرك خليه يوصيلنا على سحور ملوكي بمناسبة المغامرة اللي قمنا فيها اليوم

البنات : هههههههه خلص موتونا

امجد : لااا الموت المزبوط كمان شوي بتشوفوه ، انتوا شو ؟ انتوا مين فهموووني ؟

قصي : هدول الشيطان اذا ما قدر يقنعك حتى تجتمع معهم ، بتكون انت من الملائكة

سيرين : خليك قد كلمتك

امجد : انا قلبي حاسسني انها خطتك

ديمة : حرام عليك ، ياسمين نفسها تشوف احمد

قصي : خلص اسكتوا وصلنا ، بنكمل عندهم

علاء : مييين ؟ ( فتح عيونه ) انتوا ؟

امجد و قصي : تقريبا

ديمة : شو بدنا نضل واقفين عالباب

علاء : لا فوتوا

ريم : مين اجا حبيبي

سيرين : ياااي اخوي مدلل ، يا سلام ريحة الشموع شو حلوة

علاء : فوتي بلا برادة

قصي : رمضان عندهم احلى هدول

آيات : هههههه

__________________________________

احمد : ياسمين

ياسمين ( بسبل عيوني ) : احمد تأخرت عليي ، خايفة

احمد : لا تخافي حبيبتي خلص ، انا معك

ياسمين : جد احمد ؟ يعني انه انا لسا حبيبتك

احمد : ااخ ياسمين ولك لهالدرجة مفكرة حالك قليلة عندي ، لو تعرفي شو اللي جواتي ما بتضلي بعيدة عني دقيقة

ياسمين : زعلان مني صح ؟

احمد ( تنهد بعمق و عيني بعينه ) : انا ما بزعل منك بالعكس معك حق بكل اشي بتعمليه ، انا غلطت غلطة عمري لما تخليت عنك ، بس الله وحده بشهد عليي اني ما كنت بوعيي وقتها

ياسمين : حبيبي بعشقك بجنون انا ، اوعدني ما تكون لحدا غيري

احمد : انتي اللي اوعديني ، لانه انا ما بقدر اكون غير الك

ياسمين ( بتبكي ) : بحبك و بوعدك لاخر نفس ضل استنى النصيب ليجمعنا

احمد ( بحسرة ) : يلا امشي اكيد اهلك قلقانين عليكي ، ليه مو شاحنة موبايلك قبل ما تطلعي ؟

ياسمين : حتى تيجيني و تنقذني من الضياع و الهلاك ، لانه انت بس اللي بتقدر على هالاشي

احمد ( بهز براسه ) : ههههه ، صايرة شاعرة كمان

ياسمين : بصير كل اشي مشانك انت و بس

_________________________________

مها : ماشي ماااشي خالتو الله يرضى عليكم لا اتطولوا ابوها معصب كتير لانه

قصي : لا لا هينا بالطريق بس ازمة بتعرفي ، طمني عمو زياد

مها : ولا يهمك ، سوق عمهلك خالتو حبيبي ، يلا سلام

علاء : سوق عمهلك يا حبيبي

امجد : ههههههههه

علاء : ولك والله القتل قليل عليكم ، شو هالخبايص اللي بتعملوها ؟

سيرين : ما عملنا اشي تنين بحبوا بعض ليه نفرقهم يعني

علاء : حبك برص انتي اخر وحدة تحكي ، قضيتي رمضان من بيت لبيت

امجد : قومي جيبي كاسة عصير خلني ابل ريقي نشفتووولي اياه الله ينشف دمهم اليهود

ديمة و آيات : هههههههه

ريم : ايوا اضحكوا

امجد : ريم العاااقلة الله يرضى عليها ، ليش ما رحتي معهم بدي افهم ؟

علاء : ما خبرونا ، و ماكلين اكل غير شكل

ديمة : مرتك ما قبلت تيجي ، عملت كوردون بلو و ستيك و باستا اشي من الاخر

امجد : كركدن اللي ينطحك انتي ، اكيد الجبنة معفنة عشان هيك مخكم ضارب اليوم ، ها و هي عصفور حبنا برن .. الو السلام عليكم

احمد : انا اخدت ياسمين و رايحين على بيتها

امجد ( كان بشرب بالعصير و تشردق ) : اووعى ، تعال عند علاء في عملية تبديل بضاعة لانه ، العملية ما خلصت بعدها

الجميع : ههههههههههههه

__________________________________

رانيا : ييييي شوفي مين هاي ؟

رزان و حسين : مييين ؟

رانيا : ولك رزان هاي ياسمين اللي رحنا شفناها مو هيك

رزان : اه و الله ييييي مين هاد الشب اللي معها ؟ و بهالوقت

رانيا : شوفي كيف بيتطلعوا ببعض ، شكله حبيبها

رزان : و بهالوقت كمان ، يا حبيبي منيح ما رجعنا نخطبها ، قال ولابسة جلباب كمان

حسين : صلي عالنبي انتي و اياها مالكم ؟ ما بتعرفوا يمكن خطيبها او حدا من قرايبها

رانيا : امها قالت انها مو خاطبة ، خلص امشوا امشوا قبل ما تشوفنا

__________________________________

امجد : عمر برن ، اسكتوا خليني اسحب عليه فيلم .. الو معك المحقق امجد من غرفة العمليات الخاصة مين معي ؟

عمر ( مصدوم ) : عفوا شكلي مخربط بالرقم

امجد : يا اخي انتبه عالارقام ثاني مرة لما ترن .. سكر

الجميع : هههههههه

امجد : رجع رن .. الوووو

عمر : ما اسقع وجهك ، شو بتخبص ؟

امجد : عليي ما عليي لو تعرف شو عم بصير حاليا الا تيجيني ركض عشان ما يروح عليك مشهد

عمر : رايق شكلك ، انا كنت بدي اتطمن على احمد اليوم ، شفت ياسمين عند عمتي سهى هية و سيرين

امجد : اهئ اهئ مشان الله يا عمر الحقني يا عمر

عمر : ولك شو في ؟

امجد : احمد .. احمد يا عمر الحقني صادتوا الساحرة الشريرة و حاليا بالقفص

عمر : يا ويلي عليه و على شبابه ، لا حول ولا قوة الا بالله

الجميع : هههههههههه

علاء : كان ناقصني جوز المهابيل امجد و عمر عشان تكمل ، انتو ليه اجيتوا عندي صحيح ؟

قصي : هههههههه مو قادر امسك حالي اكثر من هيك

عمر : انتو عند علاء ؟

امجد : لا هو عنا ، قصدي احنا عند بعض

عمر : خلص روح من وجهي يا ريتني ما رنيت ، سلام

الجميع : ههههههههههه

ريم : مصيبة ازا حدا عرف باللي عملته ياسمين

قصي : ما مرق عليي حب مثل حبها لاحمد ، جد جد الله يجمعهم مرة ثانية و ما يفرقهم

امجد : جد جد امين و يرحيني منك باقرب هبلة تقبل تنبلي فيك

الجميع : ههههه

__________________________________

ياسمين : شوفي ؟ وين رايح

احمد : عند علاء ، ما بعرف شو عم بصير ؟

ياسمين : يمكن عشان قصي يوصلني على بيتي ، المهم شو اخبارك ؟

احمد : سلامتك ، كله تمام ، انتي زعلتيني عالصيفي اللي اسقطتيه

ياسمين : انا عارفة ، و الله يا احمد ما كنت مجمعة منيح قبل الفاينال ، و خفت اقدم و اخبص المعدل

احمد : ما اقتنعت ، ياسمين اللي بعرفها ما بتعمل هيك ، و لبستك مبارح كمان مو مناسبة كانت ، شفتي كيف الشباب كانوا يتطلعوا و لا ماشفتي ؟

ياسمين : احمد لا تخليني اندم اني حكيت معك ؟ كان نفسي اشوفك لانه مبارح ما تهنيت عليك ، مو وقت محاضراتك

احمد : ما فهمت ؟

ياسمين ( بتبكي ) : مو ضروري تفهم ، يلا هيني هون بستنى احكي لقصي ينزل

احمد ( معصب و بخبط بالمقود ) : هلا بدك تفهميني كل اشي بتخبصيه ؟ خلصييينيي

حكيت لاحمد كل الخطة ، و عصب بزيادة ..

احمد ( بصوت عالي ) : نفسي افهم كيف بتفكري انتي ؟ حسبتي حساب لاهلك ؟ للناس ؟ لقصي و امجد اللي فكروا حالهم بدهم يجمعوكوا و يطلعوكوا مشوار ؟

ياسمين : ...

احمد : اكيد لا ، لانه انتي بتفكري بحالك و بس للاسف

ياسمين : عالاقل مو متلك ما بفكر حتى بحالي ؟

احمد ( معصب ) : لا تجننيني ، مو رجعت خطبتك يا بنت الناس ؟ و رفضتيني ، و حكتيلي كل واحد يشوف حياته ، شو لسا بدك كمان ؟

ياسمين : ...

احمد : عكل حال منيح اللي عملتي هيك حتى احكيلك انه انا ما بقدر ارجع اخطبك مرة ثانية ، خصوصا بهالفترة

ياسمين : ليه ؟

احمد : ما معي فلوس ، يلا خلصيني انزلي ما بخليكي بالشارع لحالك

__________________________________

ابو امير ( بعصبية ) : بنتك وين يا مدام ؟ ممكن اعرف للساعة ١٢ بالليل شو بتعمل برا البيت بنت لحالهااا ؟

مها ( بقلق ) : و الله حكالي بالطريق و ازمة

ابو امير : اي طريييق ؟ كل اللي بين بيتنا و بيتهم اقل من عشر دقايق ، و بطريق فرعي ما بكون ازمة ، ارجعي احكي معهم ، لو رحت جبتها انا كان احسن ، بس اللي بسمع كلام النسوان هيك بصير فيه

مها ( بتهز براسها بخوف ) : يلا يلا هي برن

__________________________________

علاء : هلا هلا تفضلوا

احمد : ما في مجال يلا يا قصي خدها وصلها تاخرتوا كثير

ريم : تفضل احمد ، كيفك ؟

احمد : منيح كثير ، تسلمي

قصي : يلا ديمة امشي ، سيرين انتي شو وضعك ؟

علاء : اتركلي اياها هاي ، انت توكل عالله وصل البضاعة

امجد : هههههه دير بالك تكون في سيارة شرطة مخفية

احمد : هاهاها مكيفين على حالكم ، شو هالمسخرة هاي ؟

علاء : عن مين قصدك ؟

احمد : و لا عن حدا انت الثاني مو ناقصك

ريم : ههههه طول بالك احمد عادي ، عيلتنا بطلع منها كل اشي غير متوقع

احمد : الله يستر شو يعمل جوز خالتك هسة ، انا اكثر واحد بعرفه

امجد : شو بده يعمل بعصبله شوي و بعدين بتروح عليه مهموهة بتعطيه كم بوسة على شُسمه ، و هيك يعني

ريم و سيرين : ههههههه

احمد : اقسم بالله اذا ما بتسكت الا تنام بالمستشفى الليلة

امجد : بالله علاء شوفلي اذا خالو هيثم مداوم او لا اليوم ، بس عشان اتطمن يعني هههههه

احمد : سكتوه قبل ما اجرم فيه

علاء : شو دخله تجرم فيه ، الحق عليه بخفف دم عليك

امجد : شايف بالله ! المهم شو عملتلك الساحرة قصدي ياسمين ؟

احمد : شو بدها تعمل يعني ؟ حكتلها ما معي فلوس ارجع اخطبك سكري عالسيرة

امجد : له له له عاد حكينا بنتسحر كنافة اليوم ، يلا لرمضان الجاي ان شاءالله

احمد : سيرين و ريم لو سمحتوا ممكن نضل لحالنا شوي انا و الشباب

بعد ما حكينا انا و ياسمين ، توترت ، و حسيت انه لازم احكيلها شو مخطط للمستقبل ..

بس كان لازم امهد الموضوع لامجد و علاء ، حتى اخفف الحمل عن حالي شوي ..

__________________________________

ريم : ما عم اسمع اشي

سيرين : خلص انسي شو رح يحكوا يعني ، كمان شوي ياسمين بتحكيلنا شو صار ، المهم شو هالحلاوة هاي ست ريم

ريم : تسلمي ، عقبالك يارب

سيرين : امين ، امانة يا ريم انك تدعيلي يتحقق اللي ببالي ، و الك مني هدية غير شكل

ريم : من غير هدية بدعيلك حبيبتي سوسو ، بس شو هية الشغلة ؟

سيرين : بس ما تحكي لعلاء ؟

حكيت لريم كل اشي صار معي ، ما بعرف ليه عم انقل بهالسيرة من وحدة لوحدة ، مع انه ما في اشي مهم فيها ..

ريم : بس انتي غريبة ، يعني متأملة من شب ما اعطاكي اي علامة حتى انه يبين شو فكر فيكي مثلا ؟

سيرين : ما بعرف بس انا ارتحتله كتير ، و قلبي حاسسني رح نجتمع شي يوم

ريم : ستي ان شاءالله يكون ابن حلال و يجمعكم النصيب

__________________________________

قصي : هالعملة ما بنسالكم اياها ، خليتوني اندم عاليوم اللي وثقت فيكم فيه

ياسمين : قصي حقك علينا والله اني كنت مشتاقة لاحمد و حابة احكي معه

قصي : طيب احكيلي مش انا اخوكي الصغير ، و بساعدك ، و الصديق عند الضيق ، كان جبتلك اياه لعند رجليكي يا هبلة

ياسمين : لا سلامة قيمته ، انا بروح لعند رجليه مو هوة

ديمة : خلص قصي لا توجع راسك ، هاي مبلية فيه و كلام الدنيا كله ما بقنعها

قصي : اااخ صدق اللي قال الحب بلاء

ياسمين : ...

قصي : و هي وصلنا ، تفضلي اسلمك لاهلك

ديمة : يلا انزلوا

__________________________________

مها : ها وصلوا وصلوا

ابو امير : ارجعي مكانك انا بفتح

قصي : السلام عليكم

ابو امير : اهلييين والله ، طلعتي بتعرفي طريق البيت يابا ؟ الحمدلله عالسلامة ، مع انها سندريلا رجعت قبلك على بيتها

ياسمين : ... اسفة بابا

ابو امير ( بعصبية ) : انصرفي على غرفتك

قصي : عمي ابو امير ..

ابو امير : تفضلوا عمي اسفين عالمشهد الدرامي بس بتعرفوا بنتي و هيكا

ديمة : ههههه ( زورها قصي بعيونه ) يزيد فضلك عمو

قصي : ان شاءالله بنيجي سهرة من اولها ، باي خالتو

مها : الله معك حبيبي سلم

ابو امير : سلملنا عالوالد و الوالدة

سمعت صوت تسكيرة الباب ، و هدوء فظيع بعده ..

لكن لابد من عاصفة قوية تتبع هاد الهدوء ..

الحلقة التاسعة عشر :

باغلب الاوقات بكون صعب علينا انه نبقى ساكتين ، و نطنش كل اشي ..

لانه في اشخاص بتمادوا ، و بستغلوا صمتنا لصالحهم ..

_________________

________________

ابو امير ( فتح باب غرفة ياسمين بعصبية ) : هاد آخر يوم الك بسمحلك فيه تطلعي من البيت

ياسمين ( بهدوء اعصاب ) : ليه ؟

ابو امير ( متنرفز من هدوئها ) : لانك ما بتستحقي ادنى درجة من الحرية ، للاسف

مها : خلص اتركها هلا بس تروق بتتفاهموا

ابو امير ( ببعد بايد مها ) : انتي خليكي برا الغرفة لانه حسابك لسا ما بدا

ياسمين : لو سمحت بابا لا اتدخلها باشي ، حاسبني انا و بس

ابو امير ( مسك ايد ياسمين بقوة و شد عليها ) : ما حدا بلقي اوامر هون غيري ، خليكي عاقلة احسن ما تزيدي الطين بلّة

ياسمين ( بتهز راسها بالايجاب و متوجعة من ايدها ) : خلص متل ما بدك ، بس اتركني كتير وجعتني بابا

ابو امير : موادك و اسقطتيها ، ضيعتي عليكي فصل كامل و قلنا فداكي هالفلوس اللي راحت ، المهم تكوني مرتاحة

ياسمين : ...

ابو امير : خطيبك تركك من ورا فصولك الناقصة و مؤامراتك ضده ، حتى انا دخلتيني بينك و بينه و احرجتيه قدامي ، قلنا نصيب و قدر الله و ماشاءالله فعل

ياسمين : ...

ابو امير : بس تزوديها بحريتك و طلعات ما انزل الله بها من سلطان ، و رجعة عالبيت بنصاص الليالي ، لهون و بس ، في عقاب بتستحقيه و رح تنالي جزاتك على هالتصرفات

ياسمين : جاهزة

ابو امير : نت و موبايل ما في الك من هون للعيد ، طلعة من البيت كمان ما في ، اي مكالمة ضرورية بتستخدمي موبايلي انا فقط ، و اي وحدة من خواتك او امك بتغطي عليكي في حال خالفتي هاي العقوبة رح تنفرض عليهم نفس العقوية

مها ( بنبرة حادة ) : نعم ؟ شو تفضلك سيد زياد

ابو امير ( مغمض عيونه و معصب من صوتها ) : مها حكتلك لا تتدخلي ، و اطلعي برا

مها ( بتباكي ) : ماشي يا زياد انا طالعة و مو راجعة لهالبيت لحد ما تخلص عقوبتك ، اشوف كيف بدك تعيش بدوني

________________________________

ام حمزة : اهلا و سهلا مالكم تاخرتوا يمة ؟

رانيا : ازمة

حسين : ازمة و لا ما خليتوا محل من شركم ، و الله حمزة بفهم

حمزة : ههههه

رزان : رح تضحك اكتر لو تعرف آخر الاخبار

ام حمزة : كمان راجعين باخبار

حسين : يبي النسوان بموتوا عالحكي ، قوموا صلوا افيدلكم من الحكي

رزان : بس احكي الخبر اول ، هاد ياستي شفنا ياسمين قاعدة مع واحد بالمول

حمزة ( بعدم اهتمام ) : مين ياسمين ؟

رانيا : ما غيرها اللي فكرناها سيرين ، جيرانك الجداد

ام حمزة ( بذهول ) : معقووول ؟ ما عرفتن مين هالشب ؟

رانيا ( بايدها كاسة عصير و بتشرب فيها ) : لا ما عرفنا ، بس مبين في قصة بينهم

رزان : لو تشوفي عيونهم كانت بتحكي هالقصة

حمزة : هههه مش طبيعين ، بعدين احنا من كل هالكلام هاد شو بنستفيد غير كسبنا آثام و استغبنا و يمكن قذفنا محصنات

حسين : حكتلهم ، بس عبث البنات ما في اشي بوقفهم عن الحكي

ام حمزة : الله يستر علينا و على ولايانا ، قوموا يا بتناموا يلا بتصلوا ركعتين قبل ما نحط السحور

________________________________

بهالوقت ما كان زياد نفسه اللي بعرفه ، يمكن لاول مرة بشوفه بهالحالة من العصبية ..

و كانه وصل حده من الاشباع ، و كل اشي انقلب على راس ياسمين ..

انا انقهرت عليها ، و قلبي ما تحمل هيك عقوبة ، خصوصاً انه جمعني من ضمن بناته ، و فرض عليي حساب قدامهم ..

مها ( بتبكي ) : اتركني انا طالعة

ابو امير : وين طالعة انتي الثانية ، بدكم تجننوني ، ارحميني شوي حسي فيي

مها : انا رايحة من وجهك عشان ارحمك خلص ، بدي احل عنك ، يمكن وجودي ضاغط على حياتك

ابو امير : مها صلي عالنبي ، الناس قاعدة بتقيم ليل و بتصلي بهالليالي المباركة و انتي بتحكي حكي بلا طعمة و فوقها تاركة وراكي عيلة و بدك تحردي

مها : هلا بيجي محمود و بتحكيله هالحكي ، انا ما بفهم لاني ، مو خرج اربي و اتشارك معك بالترباية

ابو امير : ... بس طلعتي شاطرة بالاستنتاجات ماشاءالله عليكي

باسرع ما توقعت ، كان اخوي محمود واصل لعنا ..

ابو بيان : خير يا جماعة شو صاير ؟ و الله وقف قلبي من الخوف

مها ( بتباكي ) : سلامة قلبك

ابو امير : لا تواخذنا ازعجناك ، لو بعرف انها بدها تحكي معك كان ما خليتها

ابو بيان : مش مشكلة ، فهموني شو مالكم ؟ مبارح كنتوا ما احلاكم شو صار اليوم ؟

حكيت لاخوي كل اشي ، و ما كان عليه الا انه يوقف بصف زياد ..

ابو بيان : من كل عقلك بتدافعي عنها ؟ اب و بده يحاسب بنته اللي سمعتها من سمعتكم انتوا كمان ، وينها ياسمين نادوها اشوف

مها : ...

زياد ( بنبرة انتصار ) : بابا حنين ، نادي على اختك خليها تيجي

و اجت ياسمين ، اللي كانت عيونها بتلمع ، و ما في اي لمحة حزن على وجهها ..

قلبي حسني انه في اشي صاير معها ، و معطيها القوة ..

ياسمين : مسا الخير خالو ، شو هالزيارة الحلوة ؟

ابو بيان ( مصدوم منها ) : هيها ماشاءالله عليها ، شو قصتك ليه مغلبة ابوكي ؟

ياسمين ( عيونها على ابوها و بتحكي بدلع ) : و الله يا خالو لا في قصة و لا اشي ، بس ابو الزوز مغلب حاله من حاله

ابو بيان و مها : هههههههه

ابو امير : ابو الزوز ؟ ينعن ابوكي يابا

ياسمين : هههه تفضل خالو هي عم يغلط على حاله انا شو دخلني ؟ انعزمت على الفطور و بعد هيك انعزمت على مشوار و شميت هوا و غيرت جو ، شو ذنبي ازا رمضان بالصيف و الوقت متاخر هيك هيك و بروح كله بالطريق من ورا الازمة ، فوق ما انا حظي بهالدنيا انه ما عندي اخوة يطلعوني ، و خطيبي الندمان ما معه فلوس يرجع يخطبني مرة تانية

ابو امير : لحظة لحظة ، شو دخل خطيبك ؟ هو انتي موافقة ترجعيله اصلا ؟

ياسمين ( انحرجت ) : يعني .. قصدي .. انه

ابو بيان : ليه ما توافق يعني ، في بنت صحلها احمد و بترفضه

مها : مهو خطبها ليلة رمضان و رفضت

ابو بيان : بالله ؟ ليش هيك يا خالي بتتصرفي بدون ما تفكري

ابو امير : ايواا ، انا لهون بدي اوصل ، ما بتفكر و على كيفها بتتصرف ، اسقطت ثلاث مواد بالصيفي من راسها و بدون ما تستشيرنا حتى ، قال ما بدها ينزل معدلها

ابو بيان : بقول مالك عطلتي بكير

ابو امير : طبعا مين بده يحب و يعشق قدها ، ليه هي فاضية تدرس ؟ ، يا دوب تعيط على حبيب القلب

مها : زياااد ، بكفي ارحمها لبنتك

ابو بيان : ...

ضليت حردانة ، و ضربت بوز ، و ما قبلت اخد و اعطي مع زياد قدام اخوي ..

وركبت راسي الا اروح معه عند اهلي ، و زياد زعل كتير و عيونه كانت حزينة لاني طلعت من البيت و ما سالت فيه ..

ابو بيان : يعني لمين بدها تطلع بنتك ، اركبي خلصيني الله يكبر عقلك

مها : معلش ، خليه يعرف قيمتي ، امير صحي يا عليي

اخدت امير معي ، و ضلت فرح تعيط عليي بدها تيجي و ابوها ما خلاها ..

تقطع قلبي عليها قد ما عيطت ، و حتى اسيل كانت عيونها مدمعات ..

_________________________________

ياسمين : خلص يا عمري لا تبكي ، اكيد رح ترجع بكرا

فرح ( بتبكي ) : بدي اروح عندها ، بدي ماما

حنين : رنين شوفي بابا نام ؟

رنين : مسكين مين بده يعمله سحور و يدير باله عليه

حنين : الست ياسمين اللي كانت السبب ، هية تقوم

ياسمين : ... انا اسفة ما كنت متخيلة هيك يصير

رنين : نفسي افهم شو استفدتي بس من هالعمايل كلها ؟ و امك التانية عقلها مو صغير الا شوي

_________________________________

منى : يعني ابوها عصب عليها قدامكم

آيات : حكالها انصرفي عالغرفة ، الله يستر شو رح يعمل فيها

ابو احمد : لا حول و لا قوة الا بالله ، ليش هيك تاخرتوا يابا ؟

امجد ( عيونه على احمد ) : ...

احمد ( ساكت و بدخن ) : ...

منى : تلفوني برن كانه ، هاتلي اياه يا انس

انس : خالي محمود

منى : يا ستير ، يارب اهلي يكونوا بخير ، السلام عليكم .. نشفت دمي بهالوقت خير ؟ .. شووو ؟ .. الله يهديها و يهدي بنتها بس شو الواحد بده يحكي .. طيب بس اصحى باجي اشوفها .. الله معك

ابو احمد : مها ؟

منى : ههه حردانة بسبب ابني

احمد و امجد : ههههههه كمممملت

ابو احمد : شو دخل ابنك ؟ كل ما دق الكوز بالجرة بقولوا احمد

منى : انا عارفة عنهم ، ابصر شو صاير هالمرة

_________________________________

ابو ماهر : مها ؟ مالك يابا شو جايبك بهالوقت

محمود : حردانة بنتك ، تفضل

ام ماهر : يا كشيلتك يا ام ماهر ، بعد الكبرة جبة حمرة

مها : ...

محمود : السلام عليكم بدي الحق اتسحر

عدي : عمتي ؟ خير خير ، و انا بقول سامع صوت ولد بعيط بقول بشبه صوت امير ، فكرت حالي بتخيل

مها : لا ما بتتخيل

عدي : هاتي عنك ، ارتاحي ، تسحرتي ؟ اجيبلك اشي قبل ما ياذن

مها : ما اكلت اشي ، ما الي نفس

ام ماهر : هاتلها يا ستي اشي من عند امك بسرعة

عدي ( بنادي من الباب ) : غنى ، غنى

غنى : نعم عدي

عدي : هاتي سحور لعمتي مها بسرعة

عمر : مين ؟ وينها ؟ عمتي شو بتسوي هون ؟

غنى و بيان : مرحبا عمتو

مها : هههههه جاية اتسحر معكم اشتقتلكم

عمر : احلى اشي ، تفضلي هي ازكى سحور

_________________________________

ياسمين : بابا قوم اشرب مي ، رح ياذن

ابو امير ( متسطح على ظهره و ايده فوق راسه ) : شكرا ، بس ياذن صحيني

ما كنت مسترجية افتح تمي بكلمة ، بعرف انه صعب كتير عليه ماما تفارقه ، و بسببي ..

كل فرحتي بشوفة احمد اليوم ، ضيعولي اياها ، و طلعوها على جلدي كمان ..

حنين : البنات بسالوا عليكي ، احكيلهم عن عقابك

ياسمين : احكي اللي بدك اياه

حنين : نفسي افهم شو صاير بهاليوم بالذات ، كل اشي منقلب

ياسمين : امجد جاب ايات عالمول ، باتفاق مسبق مع قصي حتى نتصالح

حنين : ايوااا ، و صالحتوها ؟

ياسمين : اكيد لانها اعتزرت منا ، و متفقة مع احمد انه تخلي كل اشي لحال و ما تخلط الامور ببعض

حنين : طيب بعدين ؟ ليه تاخرتوا ؟

ياسمين ( تنهدت ) : لانه احمد اجا و رجعت معه من المول لدار علاء لانهم كانوا سابقينا هناك

حنين : احمد شو جابه ؟

حكيتلها كل الخطة ، و قامت متل المجنونة دقت فيي ..

حنين ( بعصبية ) : ولك انتي ما بتتغيري ، ما عندك كرامة

ياسمين : وطي صوتك لا تخليني اندم اني حكتلك

حنين : يعدمني اياكي ، روحي انقلعي لعنده ، بوسي رجليه كمان خليه يرجعلك متل الخوتة ، تسطفلي الله لا يردك مو تخربي بيت اهلك

ياسمين : معك حق ، بستاهل كل هالحكي و اكتر ، بس ما كنت حاسبة حساب بابا هيك يعمل

حنين : كانه قلبه حاسه ، و الله انه حاسس انا متاكدة

_________________________________

ديمة ( بتمشي بتوتر رايحة جاي ) : يا ربي عمو زياد ما يضربها

سهى : لا اله الا الله ، حولتيني اقعدي اشوف شو مالك ؟

ديمة : مصيبة مصيبة ازا عرفوا عن اللي صار اليوم و الله بتروح فيها ياسمين

سهى : وينه قصي يجي يفهمني ، يا بتحكي متل العالم يا بتقعدي قبل ما انحول منك

قصي : انا نايم ما حدا يصحيني ، لا بعرفكم و لا بتعرفوني

ديمة : نوم الظالمين عبادة ، ماما امانة احكي مع خالتو بس اتطمني

سهى : اول اشي فهميني شو عاملين ؟ قلبي حاسسني انه عاملين خبصة اليوم

ديمة : بس اوعديني ما تحكي لحدا

سهى : لنشوف ازا اشي بتخبى او لا

_________________________________

من زمان كتير ما مرقت عليي هيك ليلة ، ما بعرف كيف قويت قلبي و طلعت من بيتي ..

تركتهم باوقات صعبة ، همة بحاجة الي اكتر من اي وقت تاني ..

يا ترى بناتي شو عاملين ؟ ، ياسمين اللي زعلت مشانها ، كيف قدرت اتركها بهيك وضع ..

و زياد اللي ما بتخيل كيف حالته من بعدي ، و كمان طلعت بدون ما اجهز ملابسه ، اللي قلتله رح اكويلك اياهم قبل ما انام ..

غفيت عيني و انا بتأمل بابني ، و اتسائل شو ذنبه يبعد عن ابوه ، اللي متعلق فيه كتير ، حتى لو كم يوم ..

ام ماهر : اهلا و سهلا

منى : اهلين فيكي

نهى : وينها مها ؟

ام ماهر : نايمة هي و ابنها بالغرفة الكبيرة

نهى : فايتة اشوفها ، بدك تيجي

منى : بدي استنى سهى

نهى : صباح الخير ، كيف حالك ؟

مها ( نزلت دمعتي بس شفت اختي ) : الحمدلله ، شو جابك بهالوقت

نهى : انا و منى اجينا نشوفك

مها : قصدك جايين تبهدلوني

سهى : عارفة حالك يعني ، شو هالعمايل يختي ؟ ناوية تقضي على اهلك و عيلتك

مها : طيب افهموا اول بعدين احكوا

فاتت اختي منى ، اللي بعتبرها بمثابة امي ..

ضمتني ، و بكيت انا و اياها ..

منى : حقك عليي ، كل المشاكل من تحت راس ابني

مها : لا لا ما دخله ، بس زياد كتير معصب كان و طلع كل قهره

نهى : الله يعينه

سهى : عرف انه اجا عالمول يشوف ياسمين ؟

منى و نهى و مها ( بصدمة ) : مييين ؟

سهى ( بتوتر ) : لا قصدي زياد عرف انهم كانوا طالعين على مول ؟

مها : اه لما حكيتي معي تخبريني كان لسا بالبيت و حكتله بعد الصلاة يرجعوا

سهى : اه اه حكالي قصي كانت ازمة كتير الشوارع

منى : سهى هاتي احكيلنا شو بتعرفي و اياكي تخبي

_________________________________

نمت مبارح و انا اتخيل شو اللي صار بعيلة عمتي مها ، و كلام امجد مبارح عالتلفون ما ريحني ..

و تأكدت انه فعلا في اشي غلط عم يصير ، و ما حدا بعرفه الا اشخاص معينين ..

اول ما فتحت عيوني ، ركضت لعند امجد حتى افهم منه ..

بس لما نزلت من بيتنا ، سمعت صوت عماتي عند دار سيدي ..

ترددت اذا افوت اشوفهم ، او لا ، آخر اشي قررت اني اكمل طريقي ..

آيات : يا الله مين عم يرن الجرس ؟ حدا يفتح مامااا

الظاهر ما حدا صاحي الا آيات ، و اكيد مو متوقعة جيتي لعندهم ..

آيات ( فتحت الباب بسرعة ) : مين ؟ عمر !

فتحتلي الباب بدون ما تسال مين ، و لا حتى ماخدة احتياطاتها و لابسة اشي يغطي شعرها و جسمها ..

يا جمالك ، هو انا كان ناقصني اشوفك بلا حجاب عشان تكمل معي ..

مو بكفي ضيعتك من ايدي ، و سمحت لمحمد ياخدك مني ..

استغفر الله العظيم يارب تسامحني ..

سكرت الباب بوجهي بسرعة ، و حكت معي من ورا الباب ..

عمر ( لفيت وجهي ) : اسف

آيات : رح اخلي الباب مفتوح و انت ادخل بس احكيلك

عمر ( بخجل ) : تمام

تخبت بمكان و نادلتي ، و فتت و سكرت الباب ..

عمر : نايمين الشباب

آيات : اكيد ، فوت صحي امجد ، و احمد بشغله

عمر : يلا

_________________________________

كنت نايم بأمان الله ، و بحلم بكاسة عصير كلها ثلج تنزل على معدتي ..

قبل ما يحن عليي ، بصوته الحنون ، و يصحيني بكفين على وجهي ، بحجة انه نومي ثقيل ..

امجد ( صاحي مرعوب ) : بسم الله بسم الله ، كاسة العصير وينها ، هاي الي مين اخدها ؟

عمر : هههههههههههه ههههههههههه الله يشفيك

امجد : ولك انت شو جابك ؟ يا صباح يا فتاح

عمر : عراسي المحقق امجد ، شو بشوفك نايم ؟ خلصت العملية مبارح ؟

امجد : عملية شو يا زلمة ، الله لا يفرجيك المصايب متل زخ المطر بتنزل علينا ، خليها بالقلب تجرح

عمر : خالتك حردانة بتعرف ؟

امجد ( بهز براسه ) : اه بعرف ، الله يجبر علينا لا الام و لا بنتها فيهم عقل ، اكيد بكون جوز عمتك عرف بخبايص بنته

عمر : خبايص بنته ؟ مين ؟ اوعى تحكيلي ياسمين عاملة اشي

امجد : مع انه السولافة بدها دلة قهوة و كروز دخان ، بس بعين الله صايمين و بدنا نتحمل

عمر : انطق خلصني

و حكيت لعمر كل القصة ، بدون زيادة او نقصان ..

عمر ( واقع من الضحك ) : هههههههههههههه عيلة مشاطيب

امجد : اه اضحك شو وراك

عمر : انت و قصي الحق عليكم ، حدا بطلع مع ديمة و سيرين و آيات و كمان ياسمين

امجد : ااخ و الله كل الطلعة عشان آيات تتصالح معهم

عمر ( عيونه بتلمع ) : طول عمري بحكي عنها بتجنن

امجد ( مصدوم ) : ما فهمت

عمر ( استدرك حاله ) : قصدي آدمية و عاقلة

امجد : طيب هلا شو رح يصير ؟ انت شو فهمت من خالتي ؟ في حدا عارف عن اللي صار ؟ لانه احنا ما حكينا لاهلي

عمر : امممم اتوقع ما في ، لانه كان محور الحديث العقوبة اللي انفرضت على ياسمين من ابوها بسبب تاخرها

امجد : يارب ما يكونوا عرفوا ، احمد مو ناقصه وجعة راس بكفيه اللي فيه

عمر : الله يعينه مسكين تحمل اللي ما حدا بقدر يتحمله

_________________________________

مها ( بتضرب براسها ) : و انا بقول مالها مبسوطة و مو فارقة معها ، يا مصيبتك يا مها ، لو يعرف زياد و الله ليدبحها

سهى : اكيد مو لازم يعرف ، ديري بالك

نهى : و كل الشباب عارفين و ما حدا بوقفها عند حدها ، كيف سمحولها تعمل هيك ؟

سهى : البنات خبوا عليهم

منى : احمد كان قاعد بامان الله ، ما شفناه الا قام متل اللي حدا غزه بابرة ، و بسال فيه مين اللي ضايع ، و لا رد عليي حمل حاله و طلع من البيت

سهى : هالمرة انا مع احمد ، و الله ما عليه حق ابدا ، فكرها ضايعة و راح يساعدها عاساس مو حافظة غير رقمه ، و حكت معه

نهى : لو ضلوا على هالاساس اهون بلا ، ابو امير ما بزعل

مها : معك حق ، يا ريت هيك الموضوع ، بس هية كانت بدها تشوفه

منى : الله يسامحها ، لو وافقت على خطبته و خلصنا من هالشغلة ، و الله حرام اللي بتعمله بحالها و فيه

نهى : بتكابر عالمحسوس

سهى : فكرت حالها بتقدر تتغلب على مشاعرها ، بس حبهم قوي يا عليي

مها : ... الله يسترنا من الجاي

_________________________________

امجد : امي وين طيب ؟

عمر : سمعت اصوات عند دار سيدي و انا جاي عليك ، احتمال تكون هناك

انس : اسال آيات طيب شو دخله عمر ؟

امجد : انا بسال حالي كنت بس عمر جاوب لحاله ، طول عمره نخوجي و يعشق مساعدة الاخرين

كنت واقفة ورا الباب بتسمع عليهم ، حتى احصل على ادنى معلومة ..

بما انه مو قادرة احط عيني بعين عمر ، بعد ما انكشفت عليه ..

آيات ( من ورا باب الغرفة ) : امجد ازا رح تطلع مكان خدني معك

امجد ( فتح عيونه ) : انا مبارح بست التوبة و حلفت يمين ما اقوم من تختي الا عالحمام او على طاولة السفرة

عمر : تروحي معي إيات ؟

آيات : عند ماما اه بروح ، مع انه نفسي اشوف ياسمين لانه ما في اي وسيلة اتصال معها

امجد : الك عين كمان ، انا غلطة عمري مبارح ما علقت مشنقتك انتي واياهم و خلصت منكم

عمر : يلا آيات جهزي حالك انا بدي اطلع

امجد : لا ما في روحة ، اقعد بنفطر سوا اليوم ، آيات توجهي عالمطبخ و طلعي مواهبك

آيات : خفة دمك ما الها حدود ، روح جيب جاهز لصاحبك مدام بتعزم من راسك

عمر ( بتباكي ) : له له ، خلص انا زعلت الله يسامحكم اصلا انا ما باكل كتير شوفي كيف نحيف متل عود المعكرونة

امجد ( بتباكي ) : يا حبيبي يا عمر لا ترووح مشان الله خليك عندي اهئ اهئ

عمر ( بخبث ) : لا خلص عاد كنت انا رح اعزمك عالفطور يا آيات ، بس خلص انكشفتي على حقيقتك

آيات : كان ناقصني انتو التنين ، بكفيني اللي فيي حلوا عني

رجعت على غرفتي ، و انا بضرب في حالي ..

يا فرحتي ازا اخواني عرفوا اني فتحت الباب ، بدون ما اتأكد مين اللي جاي ..

و فوق هيك لابسة بيجامة نص كم و برمودا ، و فاردة شعري ، و صاحية من النوم ..

ناقصني انا ، بكفيني محمد اللي كل يوم طوشة انا و اياه ، ما عم تخلص مشاكلنا ..

و قلبي ما عاد قادر يتحمل ، فوق البعد و المسافات ، كمان مشاكل و دايما تنازل مني ، تحت اسم الحب ..

طيب مو المفروض يكون هو بحبني ؟ ، و يحاول يتمسك فيي قد ما بقدر ..

_________________________________

ديمة : حنين امانة اعطيني اسمع صوت ياسمين و الله ما بطول

حنين : اسفة بس بابا منعنا

سيرين : ول يا حنين انتي اختها

حنين : حتى ولو بس مو مجبورة اتعاقب بسببها

ديمة : طيب بصير نيجي نشوفها

حنين : ما بتحكي مع حدا ، قاعدة و ماسكة القران و ما بتقوم

سيرين : الله يهديها و يهدينا ، طيب سلمي عليها كتير و بوسيها عنا

ديمة : ديري بالك عليها امانة ، ازا صار فيها اشي ما بسامحكم

حنين : توكلي عالله ما بصير فيها اشي ، انتوا اللي ديروا بالكم عحالكم

شو اللي عملته في حالها و فينا اختي ، الله يسامحها ..

قربت منها ابوسها ، و بعدتني عنها ..

حنين : بسلموا عليكي ديمة و سيرين و ببوسوكي

ياسمين : ... شكرا

حنين : شو اعمل عالفطور ؟ و الله ما بعرف

ياسمين : ...

حنين : احسن اشي احكي مع بابا

رنين : احكي لماما تيجي

حنين : بابا وصانا ما نزعجها ، قال خليها ترتاح منا

رنين ( بتبكي ) : شو هالحكي ، احنا شو دخلنا ؟ حرام عليه التاني ، و الله اشتقتلها لماما البيت مو حلو بلاها الله لا يحرمنا منها

فرح ( بتبكي ) : متى رح تيجي ماما ؟ مو قلتوا بكرا بتيجي هي اجا بكرا

كل هالحكي و ياسمين كانت ساكتة ، بس لما اجت فرح ، ركنت المصحف ، و مدتلها ايديها ، و قعدتها بحضنها ..

ياسمين ( بتمسح دموع فرح ) : لا تبكي فروحتي ، ان شاءالله بترجع عن قريب

ما كنت قادرة لا انا و لا رنين نحكي مع ياسمين ، او نكون ايد وحدة معها ..

ما عمرنا تخيلنا انه توصل فينا الامور لهالمرحلة ، و امي تتركنا و تترك بابا ..

_________________________________

انا ما عندي كلام احكيه ، لانه وضعي ما بينوصف ..

حبي لاحمد ، دمرني و دمر عيلتي ..

الحب بدون عقل ، بدمر كل اشي قدامه ، متل العاصفة القوية ..

الله وحده عالم متى رح تنتهي هالعاصفة ، و ترجع الامور طبيعية ، و اجتمع انا و احمد من جديد ..

وقتها ما رح اسمح حتى لحالي ، اني ابعد عنه ، او ازعله ..

اكتر اشي عازز عليي بابا و ماما ، اللي عم بعيشوا بعاد عن بعضهم بسببي ..

و انا اكتر وحدة بعرف عن علاقتهم القوية ، و حبهم الكبير لبعض ..

ما رح اعمل اشي هالمرة ، الا اني اضل ادعي لربنا يحل هالعقدة ، و يسامحني ..

_________________________________

نهى : هي الطبخة جهزت

مها : يسلم ايديكم ، ما يحرمني منكم

منى : ولك امشي روحي على بيتك انا بوديكي

مها : بكون لساته معصب مني ، خليه كم يوم لما يروق انا بروح

سهى : غلطانة و الله لو تروحي اليوم الا يشوفها قد الدنيا ، احكيلك روحي و نامي بغرفة بناتك ، بس ما تطلعي برا البيت

نهى : شو بدك تروحي ولا لا ؟ انا لازم اروح لاني سيرين تركتها بالدار لحالها اكيد ما عملت اشي بعرفها

مها : لا خلص روحي انتي ، سلمي على بناتي ، احكيلهم يردوا عليي لما اتصل فيهم

سهى : ما حكوا معك ؟

مها : لا ما بعرف مالهم برن عليهم ما بردوا ، قلبي متل النار عليهم

نهى : الله يريح بالك ، يلا سلام عليكم

ام ماهر : الله معك ، سلمي يمة

_________________________________

حنين : اهلين خالتو ، ليه غلبتي حالك عم بعمل اكل

نهى : من امك هاد ، ليه ما بتردوا عليها ، انشغل بالها عليكم ؟!

حنين ( بحزن ) : بابا منعنا ، بس لا تقوليلها

نهى : لا حول و لا قوة الا بالله ، وين ياسمين ؟

حنين : بالغرفة ، ما بنحكي معها

نهى : بدي اشوفها

رنين : خالتو نهى بدها تشوفك

ياسمين : ...

نهى : كيفك حبيبتي ؟

ياسمين ( بتبكي و بتهز براسها ) : ... الحمدلله

نهى ( ضمتها و بتبكي معها ) : بكفي ارحمي حالك يا خالتو ، حرام عليكي تعملي بحالك هيك

ياسمين ( بتبكي ) : ...

نهى : ياسمين انتي لازم تطلعي من هالحالة ، بدك احمد اليوم بخليه يجي يطلبك ، و كل اشي بصير متل ما بدك ، بس لا تتولدني و تعملي مشاكل

ياسمين : ... ما معه فلوس

نهى : ... شو هالحكي ؟ يعني انتي شو بدك اصلا ، خلص نفس القديم مهو ما اعطاكي اشي

ياسمين ( بتبكي ) : ما بدي اشي صدقوني ، بدي بس ارتاح بحياتي ، نفسي اعيش مبسوطة

نهى : ان شاءالله عن قريب ، الله يفرجها عليكم و على امة محمد اجمعين

ياسمين : امين يا خالتو ، شفتي ماما ؟

نهى : شفتها و قلبها بغلي عليكم ، الله يسامحها هي و ابوكي بدل ما يتفقوا بختلفوا بهيك وضع

ياسمين : انا السبب ، الله يعينهم عليي ، صدق اللي قال هم البنات للممات

نهى : هههه هبلة ، و الله ما في منك انتي ، لو خليتيني اخطبك بدل ريم لعلاء

ياسمين : شو عم تحكي خالتو ؟ انا مستحيل اوافق على حدا الا احمد

نهى : ان شاءالله بنفرح فيكم

_________________________________

يا الله هاليوم كيف كان طويل و صعب ، حياتي و افكاري كلها مخربطة ، و الدنيا بدون الوان بعيوني ..

كيف بدي ارجع عالبيت ، و وردتي مو فيه ..

مها كل حياتي ، و بعتبر الدنيا بلاها ما بتسوى ، من بعد امي الله يرحمها ..

اما بناتي ، و بالاخص ياسمين ، فهدول حكاية تانية ..

همة الامل و السعادة اللي بعتبرها اكتملت بالنسبة الي ، لما زينوا حياتنا ..

و امير ابني الغالي ، اللي انتظرته سنين و سنين ، و ربنا عوض صبري خير ، و رزقني اياه ، و صارت ضحكته بلسم لكل اوجاعي ، و بنسى كل همومي بس ارجع عالبيت و اشوف بعيونه شوق ، و محبة بريئة الي ..

حنين : يعطيك العافية بابا

هاي البنت مصدر قوة للبيت كله ، و بشوف في عيونها تحدي كبير ..

بس اليوم كانت مختلفة ، و واضح انه الوجع زاد عن حده عندها ..

ابو امير : الله يعافيكي ، كيف حالكم ؟

حنين : مناح

عيوني بتدور على اشي مفقود اليوم ..

اذني بتنصت لصوت مشتاق اسمعه ..

و قلبي بدق بده قلبها اللي بلهف عليه ، بكل لحظة بنتقابل فيها ..

خانتني افكاري ، و ما قدرت اخبي هالمشاعر كلها ..

ابو امير : ما حكت امك ؟

حنين : امبلا رنت كتير و ما ردينا متل ما قلت ، و بعتتلنا اكل مع خالتو نهى

ابو امير ( بهز براسي و ببعد بعيوني عنها ) : منيح منيح ، يسلم ايديها

لهالدرجة سامعين كلامي بحذافيره ، و قسيتوا قلبكم عليها متلي ..

كيف حالتك هسة يا حبيبة عمري ، قلبك بكون علينا و هاكلة همنا ، حتى الاكل بعتيلنا اياه ..

فتحت الباب ادور على ياسمين ، لقيتها نايمة كانها ملاك ، و بحضنها فرح ..

اسيل : بابا

ابو امير : عسولتي ، وين انتي بابا ما سلمتي عليي

اسيل : كنت بصلي العصر

ابو امير : الله يرضى عليكي ، وين اختك رنين ؟

اسيل : زعلانة ، بابا الله يخليك روح جيب ماما ، اشتقنالها ، انت بهون عليك هية تمنعنا نحكي معك ، لو كنت انت مكانها ما كنا ردينا عليها و رح نحكي معك

ابو امير ( مصدوم ) : صحيح ، لا انا كنت معصب بس حكيت هيك ، اكيد احكوا معها

اسيل ( بسعادة ) : حبيبي بابا ، بحبك كتير

كلامها خلاني اعيد حساباتي بتصرفاتي ، كيف بمنع البنات يردوا على امهم ، او يسمعوها صوتهم عالاقل ..

وصلت لعند الباب اروح اجيبها ، بس ما بعرف ليه رجليي كانوا ثقال ، و ما قدرت اكمل طريقي ..

_________________________________

قاعدة و عيني عالساعة ، و كل اللي حواليي حاسين فيي ..

اكيد بكون هلا فات عالبيت ، يا ترى كيف بكون شعوره و انا مو فيه ؟ ، اكيد مشتاقلي ..

لا لو مشتاقلي ؛ ما بفوت البيت الا لما يجيبني ..

ابو عدي : مها ، بدك اتضلي هيك يختي ، خلص امسحيها بهاللحية و قومي معي خليني اوصلك على بيتك ، و الك عليي احكي مع زياد و اخليه يستسمح منك

مها : ...

ابو بيان : بدون ما تحكي معه ، انا متاكد انه بستنى فيها تيجي و ما بقصر معها ، قليل ما بحبها يعني

مها : ...

عدي : عمتي انتي منيحة ؟

مها ( بتبكي ) : ...

بيان : ليه هيك امير بعيط ؟ مو راضي يسكت

ام ماهر ( بتبكي ) : يا حسرتي عليه هالولد الكبار بتاكل الحصرم و الصغار بتضرس

صعب كتير انه الواحد يعترف بغلطه ، والاصعب انه نتراجع عن عنادنا اللي بكون سبب هلاكنا و هلاك اللي بحبونا ..

ابو عدي : وين عمر اليوم ما شفته ؟

غنى : راح من الضهر عند امجد ، و ضل يفطر عندهم

ابو عدي : ماشاءالله ، شوفيرية فرشة هو و صاحبه

ابو ماهر : خليهم متخرجين و مبسوطين ، كافيين خيرهم شرهم ، احكي مع هيثم يابا يجي يشوف اخته

انا كنت بحاول قد ما اقدر ما اتواصل مع هيثم ، اللي يمكن تكون مرته سبب اللي عملته ياسمين مبارح ..

ابو عدي : هيثم مداوم ، خلص هي حرة احنا حكينا اللي عنا ، يلا خليني اطلع انام ساعة زمن

_________________________________

متأكد انه في حلقة ناقصة ، و ما حدا مقتنع انه ابو امير عمل كل هالعمايل بس عشان ياسمين تاخرت ..

يعني ماشي تاخرت زيادة ، بس مو لدرجة يخليه يقيم القيامة و يعاقب الكل ، و يتصرف هيك مع عمتي مها ..

احمد و علاء ، و حتى امجد و قصي ، ما حدا فيهم حكى اي اشي ..

و بعد ما راح عمر لعند امجد ، تأكدت انه عم يخبوا شغلة كبيرة ..

تركت القعدة ببيت سيدي ، و طلعت على بيتنا بعد ما طلع ابوي ، و بعتت رسالة ..

عدي : مرحبا ، ممكن نحكي شوي

وصلني رد بعد ربع ساعة ..

ديمة : اهلا عدي ، اه تفضل احكي

عدي : شو القصة ديمة ؟ مبارح صاير اشي مع ياسمين ؟ احكيلي ما تخبي

ديمة : و الله يا عدي اني مو عارفة شو احكي لاحكي ، بس الاهم من الحكي هو الفعل ، احمد و ياسمين لازم يرجعوا لبعض

عدي : اوف هيك فجاة لازم يرجعوا لبعض ، مو عاساس حكتله كل واحد من طريق

ديمة : كله حكي فاضي ، و ردة اعتبار الها ، بس هالمخلوقة صعب تعيش بلاه ، صارت متل السمكة ازا طلعت من المي

عدي : نياله ، يلا الله يجمعهم على خير

ديمة : ...

عدي : ماشي ديمة يلا انا بدي انام شوي

ديمة : زعلت ؟

عدي : انسي ، زعلت او رضيت ما اظن بهمك مثلا

ديمة : امبلا عدي و الله بهمني

عدي ( بعصبية ) : مدام بهمك ، شو رايك تفكري بمين ضروري يخطب ؟

ديمة : بس انت حكتلي رح تستناني لحتى اقدر اخد قرار اكيد

عدي : و بعدني عند كلامي ، بس انتي ما بتفكري فيي ، للاسف شايفك ما بتتذكريني حتى

ديمة : الله يسامحك ، خلص روح ارتاح شكلك معصب

عدي : هاد اللي طلع معك ؟! ، شكرا ، عن ازنك و اسف اذا ازعجتك

_________________________________

يا ربي ، شو قصته هاد انجن اليوم ..

ليه هيك بصير معي انا ؟ ، شو اعمل ازا مو حاسة نفس الاشي اللي كنت احس فيه زمان ..

ما كنت اقدر ما اتحركشه و ابعتله اي اشي ، بس حتى اسمع صوته ، او احكي معه عالواتس حتى ..

انا في اشي غريب عم بصير معي ، لهفتي اللي كانت بقلبي زمان ، بطلت احس فيها ..

بس هو شو ذنبه ، عدي بحبني كتير ، و متاكدة انه مشاعره صادقة تجاهي ، و انا كان نفسي بهالاشي من زمان ..

قصي : مالك مصفرنة ؟

ديمة : تعبانة يا قصي ، قلبي بوجعني كتييير

قصي : سلامة قلبك ، ما حدا فينا مرتاح

ديمة : شو اخبار احمد ؟ حكيت معه ؟

قصي : انا ؟ شو دخلني شو بدي احكي يعني ؟

ديمة : ماما حكت لخالاتي كل اشي ، و كلهم حطوا الحق على ياسمين ، حتى هية موقفة مع احمد

قصي : لا الحق عليي انا اللي تركتها و رحت ، ما كان لازم اطلع من المول الا اجري على اجركم انتو الثلاث

ديمة : يا ريتني خبرتك بكل اشي من الاول ، ما كان صار اللي صار

قصي : اااخ ، فات الاوان ، خلينا نفكر باللي جاي

_________________________________

ابو احمد : لا اله الا الله ، هاي البنت اكيد في اشي بعقلها

منى : ... بتحبه

ابو احمد : الله يقطع هالحب اللي بده يخرب بيوت ، مدام بتحبه ليه ما وافقت بس رجع خطبها ؟ هاي مجنونة و بدها تجننا كلنا

منى : هيك ياسمين صرت تحكي عنها ؟

ابو احمد : يا بي قد ما بحبها و الله مو هاينة عليي ، بس كمان احمد بتحمل فوق طاقته بسببها ، بتوقعه بمصايب هو بغنى عنها ، ناديلي اياه اشوفه

منى : بعده ما رجع ، بده يفطر مع صحابه

ابو احمد : بفرجها الله معه ، خليه يهرب اخرته يرجع لعندي و بعرف احاسبه

منى : شو دخله ؟ هية اللي حكت معه

ابو احمد : هية بلا عقل ، و هو وين عقله ؟ متى صار ولك روح ولك تعال ؟ و امجد وينه ؟

منى : عنده عمر ، و آيات بهالغرفة حابسة حالها ، راسها بوجعها

ابو احمد : استغفر الله العظيم ، حالتها مو عاجبتني هالبنت ، الله يستر

منى : لا من غير شر ، محمد ما في منه

ابو احمد : ان شاءالله

_________________________________

عمر : عدي زهقني قد ما بعث مسجات

امجد : طيب رد عليه ؟ شو بده ؟

عمر : بده يعرف شو اللي صاير مبارح ؟ بقلي مو مقتنع بحجة ابو امير لعقوبة ياسمين

امجد : طول عمره ذكي هالولد ، احكيله احسنت التفكير يا ولدي ههههه

عمر : ههههه مسكين اللي فيه مكفيه اصلا

امجد : يبي عليها ديمة ، مالها انقلبت ؟ الله يرحم لما كانت لازقة فيه و ميتة بدباديبه

عمر : سبحان مغير الاحول

سكتنا شوي ، بس بعدها ما قدرت اخبي اللي بفكر فيه ..

عمر : صحيح امجد ، شو اخبار محمد خطيب آيات ؟

امجد ( مستغرب ) : عادي ، ما بحكي معه شخصيا التهينا برمضان و اوقاتهم مختلفة عنا

عمر : قصدي كيفه معها مبسوطين ؟

امجد : اممم هية كتومة شوي ، بس اكيد مبسوطة ، يعني لو في مشاكل كان حكت ، بس ليه بتسال ؟

عمر ( بخبث ) : صراحة ، انا شايفها مو مرتاحة ، يعني بتذكرني بديمة لما كانت خاطبة هداك الثور

امجد : هههه استغفر الله ، لا لا مختلف وضعها ، بعدين بحبوا بعض آيات و محمد و لو كان في مشاكل عادي كل الناس هيك ، بس بالنهاية بكونوا بدهم بعض

عمر : بحبوا بعض ! ، سيدي ، عقبال عنا

امجد : انا كرهوني اشي اسمه حب ، بيان من جهة و اهلي من جهة

عمر : مال اهلك ؟

امجد : بطلوا بدهم ياخدوا ويعطوا قرايب من ورا احمد و ياسمين

عمر ( مصدوم ) : شو هالحكي ؟ لا اكيد بس تنحل قضيتهم بتخطب بيان و بنفرح فيكم

امجد : يااارب يا عمر ، و الله قلبي بس يشوفها بروح لعندها بدون استاذان ، انت لو تحب بتفهم عليي

عمر ( بحسرة ) : ... لا فاهم فاهم ، الله يعين كل واحد عاللي عنده ، بتعرف انا من زمان ضد زواج الاقارب بس اكتشفت انه فعلا قلبنا مو بايدنا

امجد ( بذهول ) : ليه انت شو دخلك ؟ ولك عمر شو مخبي عليي يا ...

عمر : ههههههه لا مو مخبي ، خلص اسكت غير الموضوع

مستحيل تمرق على امجد ، الله يعيني عليه ، وقعت بلسانه و ما رح اخلص ..

امجد : بعد الفطور عازمك على اشي زاكي

عمر : هههههه لا انا اشتقت لاهلي ، خلص كاني افطرت و زيادة بدي اروح بكفي

امجد : يا حنوون يا ابو قلب رهيف ، اشتقت لاهك ؟ و الله ما بتقوم حلفت

عمر : خلص منشي يمينك ، صوم ثلاث ايام

امجد : عشان يفكروني شسمو ، بهون عليك يا صاحبي ؟

عمر : هههههه قليل حيا مش بايدك

امجد : عشان انت فاهمني انا بموت فيك ، تعال تعال هههههه

_________________________________

نهى : خرج الواحد يعتمد عليكي ، كيف بدك تفتحي بيت انتي اه ؟

سيرين : خلص ماما قلتلك مو جاي عبالي اعمل اشي ، ليه معصبة هيك ؟

نهى : يعني انا اللي الي نفس ، و الله لو شفتيها لتموتي عياط على حالتها بتبكي الحجر يا ويلي عليها

سيرين ( بتبكي ) : يا عمري يا ياسمين

نهى : و لا خالتك المسكينة ، حاطة امير بحضنها و متل اللي خارج التغطية ، لا من تمها و لا من كمها

سيرين : الله يعينها ، بس ليه هيك تترك البيت و الله حرام بناتها

نهى : الله يهديها ، ابصر شو اخبار دار علاء ما حكيتي مع ريم اليوم ؟

سيرين : امبلا بعتت تتطمن على ياسمين ، و قالت انها معجوقة عندها عزومة لصاحب علاء

نهى : مين صاحبه ؟

سيرين : ما بعرف ما قالت ، بس عزابي يعني

نهى : ايوا ، ليكون احمد ؟

سيرين : لا لو احمد كان حكتلنا

_________________________________

علاء : يلا فوتي البسي

ريم : اقعد عالاكل معكم ؟

علاء : شوفيها ؟ عادي احمد مو غريب

ريم : فكرت حابب تقعد لحالك معه

علاء : ما في اشي مخبى عليكي ، حبيبتي انتي مخبأ اسراري كلها

ريم : يا روحي انت ، قولتك شو رح يصير بخالتو منى بس تعرف ؟ قلبي تقطع عليها من هلا

علاء : الله يصبرها ، نصيبه بالحياة هيك شو يعمل مسكين ، الدنيا دار ابتلاء

ريم : ولا ياسمين يا حبيبتي ، رح تفقد عقلها عالخالص

علاء : لو وافقت ترجعله ما كان اخد قراره ، صدقيني ما بعيش بلاها اصبري كم شهر و برجعوا بإذن واحد احد

ريم : يااا رب تفرجها عليهم و على كل المسلمين

علاء : امين و يفرحني بولد منك عن قريب

ريم ( بخجل ) : بدي اروح البس

علاء : ايوا اهربي ، هاد الشاطرة فيه ، احمدي الله اني صايم كان لحقتك

ريم : ههههه الحمدلله

علاء : ماشي يا ريم ، ساعتين زمن و بنفطر

_________________________________

بوسط هالغيمة السودا ، اللي عتمت دنيتي ..

ما كان حدا حاسس فيي الا صديقي الغالي ، و اعز ..

علاء : فطورك عندي اليوم ، بدي اقعد معك خلااوي

احمد : لا بدون فطور ، باجي بعد الفطور

علاء : طيب انا بدي اكسب اجر انت ليه بتحرمني ؟

احمد : يا سيدي الله يجزيك الخير

علاء : و اياكم ، يلا خلص شغلك و تعال ، ناطرك انا ههههه

احمد: ههههه انعديت من اختك

علاء : مهي مرتي كمان معدية ، بدنا نعيش

احمد : ههههه يا حبيبي حالتك صعبة صايرة

رنيت على امي اخبرها ..

احمد : رايح افطر عند صاحبي اليوم

منى : اعمل اللي بريحك

احمد : مالك بتحكي هيك ؟ صوتك مو عاجبني ؟

منى : لا عادي

احمد : طيب سلمي عالجميع

حتى امي متغيرة ، الله يستر ما تكون عرفت عن اللي صار مبارح ..

الحلقة العشرون :

الألم لما يوصل حده ، ما بنقدر نلاقي علاجه ، الا بألم مشابه و يمكن بفوقه في الشدة ..

تحديات كتيرة بتواجهنا ، و وحده الصبر اللي بساعدنا على مواجهتهم ..

_______________

____________

احمد : يسلم ايديكم ، ماشاءالله عليكي يا بنت خالتي اكلك بشهي

ريم : صحة وعافية

علاء : نورت ابو حميد ، اهلا وسهلا فيك

كانت حالتي صعبة ، و مو قادر اعبر عن اي اشي بشعر فيه ، باختصار كنت مبلّد ..

و علاء كان في بتمه حكي كثير ، و عيونه بتتأمل فيي ، و كأنه بده يشبعهم بشوفتي ..

علاء : حكيت لاهلك اشي ؟

احمد : لسا ، ما قدرت ، حتى امجد بعده مصدوم

علاء : و انا شو طيب ؟

احمد : ... ياسمين امانتكم ، ديروا بالكم عليها كاني موجود

علاء : ما بدك ترجع تخطبها قبل ما تروح ؟

احمد : ... يا ريت بس صعب ، ما معي اشي اقدملها اياه

علاء : يا زلمة احنا بنساعدك ، طيب بس طلبة بدون كتب كتاب ، احجزها عالاقل

احمد : لنشوف شو رح يصير ، يمكن اهلها ما يوافقوا

ريم : تفضلوا هي قهوة ، احط حلو هلا و لا بعدين ؟

علاء : يسلمو ايديكي حبيبتي ، حطي كل اشي بلاش يغدرنا و يروح هههه

احمد : لا و الله بالنسبة الي ما في مجال احط اشي ، خليها لبعدين ، المهم

علاء : ايوا

احمد : بدي منكم تساعدوني بنشر خبر السفر ، لاني جد هاكل هم الجميع

ريم : ... صعبة كتيرعلينا كيف عليك ؟ الله يعينك

علاء : و لا يهمك هههه بس مو تفكر اني مبسوط

احمد ( تنهد بحزن ) : الله يعيني على ايام رح اعيشها بعيد عنكم

_________________________________

عمر : دايمة يا عمتي ، يسلم ايديكي و الله الاكل من تحت ايدك طعمه غيرمنى : صحتين

ابو احمد : عشان هيك اكلت كتير ، مالك ما بتاكل ؟

عمر : لا انا هيك اكلي ، بحب اضل خفيف لطيف هههه

امجد : ههههه بتوفر

آيات : ماما تعي شوي

كنت مستغرب من آيات ، من لما اجا عمر عالبيت اليوم ما شفتها ، حتى فطور امي اخدتلها عالغرفة لحالها تاكل ..

ما بتعمل هيك اشي ، الا اذا مخبية اشي علينا و خايفة نكشفها ، اختي و حافظها عن غيب ..

امجد : يمة احكي لآيات تركب عالشاي

انس : ما بدها تطلع من الغرفة

عمر : ... لا قهوة انا بحب بعد الفطور

امجد ( بمسخرة ) : ضيف و بايده سيف

عمر : هههههههه

امجد ( بكمل المسخرة ) : اقعد ساكت عالكنباية هناك و احضر رمضان معنا احلى عالتلفزيون الاردني ، اوعى اسمع صوتك

عمر : بدي احضر ام بي سي بلييز

امجد : لا ، احنا عنا انتماء ، بنحب نشوف المذيعة شو لابسة كل يوم

انس : ههههههه المهم شو بدكم شاي و لا قهوة عشان انا اللي بدي اعمل

منى : خلص انا بعمل الاتنين هلا ، لارضاء جميع الاذواق

ابو احمد : الله يخليلنا اياكي ، و الله الحياة بلاكي ما بتسوى

عمر : يا سيييدي ، خلص اليوم بروح اطمن ابوي على اخته بقله بتحب في قصة حب

امجد ( بضرب بعمر ) : قليل حيا لا تجيب سيرة امي علسانك ، الثأر ولا العار

منى : ههههههه يقطع شركم ، بس تجتمعوا انتوا الله يعينا عليكم

ابو احمد : الله يرضى عليك يا احمد وين ما لفيت وجهك ، انا عارف ليه ما جبتي كل اولادك متل الاول

منى : ههههه كلهم على سلامتهم ، بس احمد طالع الك

امجد ( بتباكي ) : انا طالع للشارع ، خلص اصلا رح اسافر انا

عمر ( بغني ) : وين مساااافر ، اوعى تساااافر آخر مرة بقلك هييييك

منى : من غير شر ، ما بتحمل حدا فيكم يطلع من هالبيت الا لما يتزوج

كنت امزح و اضحك انا و عمر ، و بس حكت امي كلمتها بلعت ريقي بحسرة ..

شو رح يصير فيها بس تعرف عن احمد ، و شو مخبيلها ..

حتى ابوي اليوم ما كان مبسوط ، لانه احمد مو موجود على يساره بقعدة الاكل ، و كل شوي يتطلع على مكانه و يلاقي انس قاعد ، تروح الضحكة عن وجهه ..

اجت ببالي فكرة اني امهد لاهلي عن الفكرة ، خصوصا انه لساني زلق و خبرت عمر ، و اكيد رح يساعدني ..

امجد : الواحد مو عارف شو يعمل بهالبلد ، اضل حواليكي احب ما على قلبي ، بس شايفة كيف الوضع كل ماله للاسوأ

عمر ( فهم عليي ) : انهلكت و انا ادور على شغل جديد ، هيني كل يوم بفتح النت و ببعث C.V و ما خليت مكان يعتب عليي

ابو احمد : الله يفتحها عليكم ، ما لقيتوا بعمان دوروا برا ، شوف اذا في فرص بالخليج ، مع انه لسا ما عندك خبرة ، بس حاول

منى : خليج شو ؟ لا لا و همة عزابية حرام يطلعوا ، تجوزوا و روحوا

عمر : ههههه عمتي بتمزحي اكيد ، اتجوز من وين ؟ في اهل بقبلوا على بنتهم واحد راتبه يادوب مكفيه بنزين سيارة و حق دخان ؟

امجد : هسة بتقلك بطل دخان ههههه

منى ( بتتمسخر ) : اه بطل دخان ، بتفرق معكم

عمر : انا بالنسبة الي صعب

منى : الله يرضى عليه محمد خطيب آيات بقلي يا خالتي و لا بطيقه انا

عمر ( بغصة ) : منيح

امجد : خلصينا عاد صار حبيب قلبك محمد ، نسيتي امجودتك و التعزيل اللي بعزلّك اياه ، عكل حال العيد قرب اوعي تحكيلي تعال يمة نزل البرادي

عمر : هههههه خليك نايم ، انا باجي عمتي اي اشي جاهز خدامك انا

منى : الله يرضى حبيب عمتك ، و هداك ما ترد عليه قلبه حنون بقوم بدون ما اطلب منه

يا حبيبي شكلها امي مسكرة معها ، الله يعينك يا احمد عاللي بستناك ..

_________________________________

حنين : اسيل كملي صحنك كله

اسيل : شبعت خلص

رنين : ياسمين ما اكلت اشي صح ؟

اسيل : تمر و مي

حنين : حتى بابا ما اكل منيح ، يا دوب صحن الشوربة و كم لقمة رز

رنين : و عينه على مكان ماما ، و امير يا عمري شو اشتقتله بكون مغلب ماما اكيد

اسيل : نفسي احمله ، حاسة اله سنة غايب

حنين : خلي فرح تشوف ياسمين ، احسن ما اتضل بلا اكل و تمرض

ما قدرت احط اشي بتمي اليوم ، و كل تفكيري بالوقت اللي عم يمضى ، و وضع اهلي متل ما هو ..

انا مو كتير متدايقة من العقاب ، و كنت متقبلة كلام بابا و مقدرته ..

فرح : ياسمين خدي كلي صحنك

ياسمين : مو قادرة اكل اشي يسلمو حبيبتي

فرح : بس ما بصير انتي صايمة ، يلا مشاني

ياسمين : حاضر هي اكلت ، خلص شبعت بتعرفيني اكلي خفيف

اكلت لقمة غصب ، حتى فرح ما اتضل تنق عليي ..

بس حتى هاللقمة كانت فيها الف غصة و غصة ..

_________________________________

احمد : امجد انا بدي اروح احكي لاهلي خلص ، بكفي تاجيل ، اول على آخر رح يعرفوا

امجد : جاي معك

انس : شو القصة احمد ؟

امجد : جيب آيات و الحقنا

ابو احمد : اهلين بالشباب ، وين كنت يابا و الله القعدة مو حلوة بلاك

احمد : ... عزمني علاء عنده

منى : يا عيني ، شو عملتلك ريم ؟

احمد : كل اشي و الله ما قصرت ، نفسها عالاكل مثل خالتي سهى ، و الحلو زاكي كمان

ابو احمد : صحتين على قلبك ، انا كنت بستنى فيك بدي اناقشك باللي عملته ياسمين مبارح و خربت حياة اهلها

امجد / احمد / آيات : عرفتواا ؟

امجد ( بهمس ) : يا دي الفضيحة

احمد : ... انداري يابا هالبنت رح تجيب آخرتها و آخرتي معها

آيات : مين قلكم ؟

منى : الكل عرف ما عدا خوالك

امجد : يا فرحتي

احمد : لازم احكي مع عمي زياد صح ؟

منى : لا اوعى ما بعرف ، انا كان قصدي خالاتك بس اللي عرفوا

امجد ( بمسح جبينه ) : الحمدلله ، اهون مصيبة

احمد : طيب ، انا بدي احكيلكم شغلة ، و بتمنى تسمعوني للآخر

ابو احمد / منى ( اتطلعوا ببعض بقلق ) : خير ؟

احمد ( بلع ريقه ) : انا من لما كنت خاطب ، كنت ادور على شغل ، لانه حسيت حالي انزنقت بالبناء و مصاريف الزواج ، مع انه كان معي وقت للسنة الجاي ، بس مع ذلك الحسابات كانت صعبة و بحاجة لراتب اعلى

ابو احمد : صحيح ، بس انا جنبك و بساعدك شو اللي بدك ياه يابا احكيلي ، السيارة بجيبلك احسن منها

احمد : الله يطول بعمرك بس مو هيك ، كمان انا مو لحالي بهالبيت ، و المفروض اني ادبر حالي من حالي ، و انت عارف طبعي

منى ( قلبها حسها ) : هات من الآخر لقيت شغل ؟

احمد : الصراحة اه لقيت

منى : الحمدلله

امجد : وين ؟

احمد : بالسعودية

منى / آيات / انس : شووو ؟؟

منى ( نزلوا دموعها ) : لا لا مستحيل ما بتطلع من هالبلد انا مو موافقة

ابو احمد : صلي عالنبي ، شو مالك هيها السعودية ، على بركة الله يابا يا حبيبي الله يفتحها بوجهك و يرضى عليك

آيات ( بتبكي ) : كيف رح تروح و تتركنا ؟ مو بكفيني محمد بعيد

احمد ( حضن آيات ) : الله يجمعكم على خير ، لسا ما كملت كلامي

امجد ( عيونه مدمعات ) : كمل

احمد : العقد مدته سنة ، رح اخد اجازة بدون راتب من شغلي هون ، لاني مو حابب اضل متغرب ، الهدف بس تحسين وضعي ، اكمل بيتي و اجيب سيارة و اتزوج ، و اكثر من سنة بالكثير سنتين ما بضل

منى : كلهم بحكوا هيك ، و هيثم حكاها قبلك ، اخر اشي سحبها خمس ست سنين

امجد / احمد : هههههه

امجد : طيب بلكي تسحبني عندك

منى ( ايدها على راسها ) : جيبولي دوا صداع

آيات : ياسمين كيف رح تخبرها ؟

احمد : ممنوع تعرف قبل ما اسافر ، ديروا بالكم

ابو احمد : نتفة هالعقل اللي ضلوا فيها رح يروحوا انا عارفها ، روحها متعلقة فيك

امجد : و روحه كمان متعلقة فيها بس شو يعملوا هيك نصيبهم

انس : مو متخيل البيت بلاك احمد ، زعلتني كثير

احمد ( ضرب على كتاف انس ) : ان شاءالله برجع و بتكون على ابواب الجامعة

امجد : او مرمي زي الكلب على باب البيت اذا ما جاب معدل

آيات : استغفر الله العظيم ، طول اليوم ما سكتت ، ريح لسانك شوي مشان الله ، انس طنش حبيبي ان شاءالله بتجيب معدل اعلى منه

امجد : اه طنش حبيبها اعتبرني كلب و بعوي

احمد : هههههه كيف بدي اترككم انتوا

_________________

________________

بعد ٣ ايام <<

تأخر عليي زياد ، و ما سال عني ، و مو طالع بايدي اعمل اي حركة من كيد النسوان اللي كنت اعملها فيه ..

لانه هالمرة الحق راكبني من ساسي لراسي ، و كمان برا بيتنا ..

بس قلبي ما طاوعني عالبنات ، و مو معقول ابعتلهم اكل ، صرت اروح عندهم من الظهر لقبل المغرب ..

مها : يلا ماما هي خلصت كل الغسيل و الشغل ، ديروا بالكم على بعض

حنين : ما بعرف كيف بهون عليكي تيجي هيك عنا و ترجعي تطلعي ، و الله بكفي بكفي حرام عليكم حسوا فينا

مها ( بتبكي ) : ...

رنين : ماما ياسمين ما بتاكل اشي ، غير المي و التمر

مها : ليه ما بتحكولي ؟

حنين : ما بدنا نحكيلك ، خليكي حردانة

مها : ابوكي بعرف ؟

حنين : لا ، ما بدنا نحكي لحدا ، ما اتوقع انه بهمكم امرنا

رنين : يا ريتها هربت مع احمد و لا ضلت عايشة هالعيشة

مها : شو هالحكي ناقصني انتي التانية ، خلص اليوم بعد الفطور برجع عالبيت

رنين ( بلهفة ) : جد ؟

مها : ان شاءالله ، انا فكرت ابوكي من اول يوم رح يرجعني بس ما سال عني ، و لا كلف خاطره يتطمن على امير

حنين : كل يوم بسالني عنكم ، الله يعينه كتير متغير لو تشوفي حالته كيف

ناطف قلبي على شوفته ، باجي عالبيت اشم ريحته ..

و بدعي كل لحظة ، الله يحنن قلبه عليي ..

_________________________________

نهى : شو اخبار ريم ، افطرت ؟

سيرين : يوم عزومة خالو ماهر قالت ضايل كم يوم لموعدها

نهى : يارب اتضل حامل ، و الله مشتهية افرح بولد صغير

سيرين : الحق عليكي خليتيني وحدانية طول عمري انا و علاء

نهى : نصيب ، اسمعي شو بدي احكيلك

سيرين : ايوا ؟ عيونك بلمعوا في عريس شكله ؟

نهى : ان شاءالله ، بس لا مو هيك ، بدي اياكي تحكي لابوكي يحكي مع زياد بلكي يرجع خالتك مها

سيرين : ييي مو حلوة حرام بنحرج عمو زياد

نهى : لا ابوكي عنده اسلوب بالحكي ، انتي بس حاولي ، بجوز ما يقبل

بعد الفطور :

سيرين : يا حرام بنات خالتو الله اعلم كيف حالتهم

ابو علاء : شو ما كان ، المفروض زياد يروح يجيبها ، شو هالولدنات هاي

نهى : مهو حكالها ما تطلعي و الله يسامحها طلعت

ابو علاء : معلش ، يكبر عقله هو و يرجع مرته ، هي خلص كم يوم الها ؟ هالبنات الله اعلم كيف مدبرات حالهم

نهى : بتروح تطبخلهم و تروح قبل ما يجي زياد

ابو علاء : ههههه شو هالحكي ؟

سيرين : معك حق بابا ، جد اشي بضحك

نهى ( بتأشر لسيرين بعيونها ) : ...

سيرين : طيب بابا احكي مع عمو زياد بلكي سمع نصيحتك

ابو علاء : و الله يا بابا ما بحب اتدخل بخصوصيات غيري ، بس بحكي معه كلمتين ، بنشوف شو رح يحكي

نهى : ما يحرمني منك يا روحي ، و يهدي بالك

ابو علاء ( ماسك ايد نهى ) : و لا منك ، المهم اشوفك مبسوطة ، و غلاوتهم من غلاوتك

سيرين ( بتبكي ) : ... اشتقتلهااا

ابو علاء : اهدي يابا ان شاءالله بتشوفيها عن قريب ، صحيح وين علاء مو مبين

نهى : اه و الله من يوم عزومة ابو عدي ما شفناهم

ابو علاء : بنلحق نروح عندهم قبل العشا

نهى : اه يلا امشوا بنلبس بسرعة

__________________

_______________

ابو امير : الله يجزيك كل خير يا غالي و الله كلامك ما بتقدر بثمن

ابو علاء : ما بدنا الا نشوفكم مبسوطين و باحسن حال ، بناتك بناتنا ، و كلنا بنحب مصلحتهم و بنتمنالهم الخير ، اخزي الشيطان و روح على ام عيالك و طيب خاطرها بكلمتين خلي السلام يبدا منك

ابو امير : و هو كذلك ، ان شاءالله من كل بد الا ترجع

لهون وصل فينا الحال ، و الناس صارت تصلح بيناتنا ..

بس معهم حق ، وين كنا و وين صرنا ..

اللي بعرفني انا و مها ، بحس انه في اشي غلط صار ..

خليني اروح عليها بعد التروايح ، بتكون راقت ، و امير حبيبي شو اشتقتله ، بكون صاحي ..

_________________________________

ديمة : ماما خديني اشوف ياسمين و الله ميتة عشوفتها

سهى : لا تنشفيلي دمي ، اللي فيي مكفيني ، و الله حاسة ايدي مربطين كل ما اتزكر خالتك و حالتها

ديمة ( بتبكي ) : ... و الحل طيب ؟

سهى : ما بعرف ، ما بعرف ، خليني افكر

بعد الفطور :

ابو قصي : لحد اليوم ؟ شو هالسولافة اللي بتهز البدن و بعدين معهم ؟

سهى : سلامتك ، و الله من قهري حكيت ، يمكن يطلع بايدك اشي ابو امير بعزك و مها كمان

ابو قصي : الحق على اخوانك كيف بخلوها ، ما في مشكلة من الاساس حتى تحرد عليها ، مو شايف عامل معها اشي عظيم يستحق الطلعة من البيت

قصي : ... الحق عليي

سهى : شو دخلك ؟

ابو قصي : لا دخله و نص ، و انا لحد هسة قلبي مش راضي يصفى عليك ، لانه خطية هالبنت و اهلها برقبتك صارت

ديمة : لا حرام عليك مو لهالدرجة ، هي كمان غلطت و لازم تتحاسب ، بس قصي غلطه احنا سببه لانه خبينا عليه

ابو قصي : حسبنا الله و نعم الوكيل ، كلامكم لا بقدم و لا باخر ، خلونا نعمل اشي يفيد هالعيلة ، امشي خلينا نروح نحكي مع اختك بلكي نقنعها ترجع ، خلص بكفيها كم يوم حردانة ، قضت خاطرها

سهى : هههه قولتك يلا يا اولاد

ابو قصي : و الله اشتقت لريم مالها بطلت تيجي

سهى : بس نخلص من مها بنميل عليهم شوي

_________________

________________

ابو قصي : الله يرضى عليكي يا ام امير ، فكري بهالولد شو ذنبه ، بناتك الثانيات ، ياسمين بحد ذاتها لساتها طفلة و بحاجتك

مها : و الله بعرف و ندمانة على تسرعي ، و اليوم كنت ناوية ارجع ، هي شوفوا اغراضي كلهم ضبيتهم

سهى : الله يهديكي ، يلا قومي بنوصلك

قصي : خالتي ابوس ايدك سامحيني و الله الحق عليي كله انا عارف

مها ( حضنت قصي ) : يا عمري ، لا تحكي هالحكي هاد مكتوب و ما منه مهرب ، الحمدلله على الضراء قبل السراء ، ما بدي غير ياسمين ترجع لصحتها ( بتبكي ) حكولي اليوم انها ما بتاكل غير مي و تمر من يوم المشكلة

ديمة ( بتبكي منهارة ) : ... اشتقتلهااا

طلعوا دار اختي ، و ما قبلت اروح معهم ، حكيت انا بروح احسن مع محمود ، متل ما جابني برجعني ..

_________________________________

منى : شو هاد اللي انكسر ؟

انس : آيات وقعت منها كاسة و هي تجلي

آيات ( بتبكي منهارة ) : مااامااا

ابو احمد : خلص يابا انكسر الشر ، ديري بالك ايديكي ينجرحوا

آيات ( منهارة ) : ما بعرف كيف وقعت ، قلبي وقع معها

امجد : طولي بالك يختي كلها كاسة ، اقعدي اكيد بتكوني تعبانة

آيات ( بتبكي ) : ... اشتقتلهااا

احمد ( في نفسه : مو قدي )

منى : الله يفرجها ، انا التانية قلبي متل النار ، شو بده يصير فيها بس تعرف عن احمد

احمد ( عيونه على امه ) : ...

_________________________________

ابو حمزة : و الله هالمسكين ابنك قضى رمضان بهالمستشفى

ام حمزة : يا حبيبي كله باجره ، خليه يداوم بدل هالمتزوجين ، حرام فترة الافطار بحكيلي يمة صاحبي بعده عريس مرته بتستوحش و اهلها بعاد عنها

حسين : و بس يتجوز ما بلاقي حدا يداوم عنه

ابو حمزة : اللي بقدم اشي لله تعالى ، لا بد يلاقي جزائه اكثر مما يتوقع

رانيا : الله يفرجها عليه و يتزوج ، يا حبيبي متغير كتير

رزان : شكله حاببها لهديك البنت و لسا عنده امل يلتقي فيها

ام حمزة ( رافعة ايديها ) : ياا رب من عندك تفرجها على ابني ، يا الله فرحني فيه هو واخوته

حسين : امين يارب ، جد قلبنا ناطف نشوفه عريس و نفرح فيه ، و تفتحها عليكي با رنوشتي

رانيا : حبيبي ما يحرمني منكم ، اللي كاتبه ربنا بصير

_________________________________

ابو قصي : خبرتوها انه جايين ؟

ديمة : لا مفاجاة

قصي : احنا بنروح عالمسجد و انتوا اسبقونا

سهى : يلا

ابو علاء : خليني اروح على طول عالمسجد و انتوا اطلعوا عندهم

نهى : اه و الله انا حابة اروح خلص بصلي عندهم

سيرين : شوفوا مين هناك ؟

سهى : شو هالمفاجاة

نهى : السلام عليكم ، شو بموعد ولا بدون ؟

ديمة : بدون هههه

سيرين : و احنا ، كيفك ؟

ديمة : مو منيحة

سيرين : متلي

نهى : طيب تروحي يا سهى عالمسجد نكسب الصلاة و هي البنات بطلعوا

سهى : بروح يلا

علاء : في حدا جاي عنا ؟

ريم : لا غريبة مين رح يجي ؟ ما بدك تنزل عالتراويح

علاء : امبلا ، بس فوتي على غرفة النوم خليني اشوف مين

سيرين / ديمة : مفاجاااة

علاء : اهلاااا ، لحالكم جايين ؟

ديمة : لا طبعا

علاء : طيب هي ريم بغرفة النوم انا نازل عالصلاة

ريم : يمة شو جابكم ؟

سيرين : يمة ؟ شايفة شبح انتي ؟

ديمة : ههههه ضحكتوني بعز اكتئابي

ريم : منيح اللي اجيتوا و الله اشتقتلكم

سيرين : انا حالتي يرثى لها صراحة ، و مو قادرة احكي اشي بس بابا اشتاقلكم و قال خلينا نروح عندهم

ريم : بالعكس اهلا و سهلا ، انا تعبانة نفسيتي برضو

_________________________________

صليت التراويح ، و رجعت عالبيت لبست و تشيكت ، و سحبت حالي قبل ما البنات يحسوا عليي ..

كنت بدي اجيبلها باقة ورد ، بعدين حكيت بس ارجع بجيبلها ، بتكون معي و بعطيها اياها ..

و انا بنص الطريق ، برن تلفوني ..

حنين ( بتبكي ) : باباااا الحقني

ابو امير ( بخوف ) : شو صااار

حنين : ياسمين كانت تصلي و فجأة وقعت عالارض ، مغيبة ، مشان الله بابا جيب الاسعاف و تعال وين انت

ابو امير ( ببكي ) : ديري بالك عليها هيني جاي ، حاولوا تلبسيها

لفيت من اول يو- تيرن ، و رجعت على البيت كيف وصلت ما بعرف ..

ابو امير : وينكم يا بنات

رنين : بابا لبسناها و ما صحيت

حملتها و ركضت عالسيارة ، و توجهت لاقرب مستشفى ..

ابو امير : الحقوني يا ناس ، طوارئ طوارئ

ممرضة : جيبوا سرير و مغذي حالة اغماء

ابو امير : شو مال بنتي طمنوني

الطبيب : نقص تغذية ، اتطمن هي حطينالها مغذي و ان شاءالله بتصير احسن

ابو امير : الله يعطيك العافية

كنت انا كمان بغيبوبة ، و صحيت لما تذكرتها ..

_________________________________

مها : زياد برن

ام ماهر : ردي يا حبيبتي بجوز جاي يشوفك

مها : الو السلام عليكم

زياد : بنتك في المستشفى يا مدام ، حبيت اخبرك اذا حابة تشوفيها يعني .. الو .. الو مها وين رحتي

وقع التلفون من ايدي ، و جسمي كله رجف ..

مع فوتة عدي ، و شافني ..

عدي : عمتي مالك ؟ الو مين ؟

زياد : جيب عمتك عمستشفى ... ياسمين هناك ، بس توصلوا رنوا عليي عشان ادلكم

عدي : سلامتها ان شاءالله ، يلا مسافة الطريق

مها ( بدون وعي ) : بنتي بنتي الحقوني ، بدي اروح خدوني

ما بعرف كيف لبست ، و اجيت بدي اعطي امير لبيان اتدير بالها عليه ، لقيت اخواني و اولادهم قدامي ..

ابو عدي : امشي بسرعة ، يلا عجلي

مها ( بهز براسي ) : ديروا بالكم على امير

ابو بيان : بيان يابا ديري بالك ، اهم اشي اسمعوني كلكم

الجميع : نعم ؟

ابو بيان : اياكم .. ثم اياااكم .. يوصل خبر لاي بني آدم خصوصااا .. احمد

ابو عدي : سمعتوا يا شباب

عدي / عمر : سمعنا

ابو بيان : ايوا بس ، يلا امشي بسرعة لحقي هالبنت

_________________________________

علاء : و الله اهلين ، ايوا هيك دايما اعملوا مفاجآت

سهى : كنا عند دار سيدك ، راح عمك ابو قصي يحكي مع خالتك بلكي ترجع

نهى : بالله ؟ و ابو علاء حكى مع زياد

ابو علاء : يعني قبلت ترجع ؟

ابو قصي : المفروض انها رجعت هسة لانها كانت ضابة اغراضها

قصي : تخيلوا يوصل عمو زياد على دار سيدي من هون و هي تكون وصلت على بيتها من هون

الجميع : هههههه

سهى : مهي ياسمين بلا اكل من لما صارت المشكلة عايشة على شوية تمر و مي ، و اليوم عرفت مها

ريم / سيرين ( ايديهم على تمهم ) : شووو ؟

ديمة ( بتبكي ) : و الله قلبي حاسسني فيها اشي

سيرين ( بتبكي ) : و انا كمان

علاء : لا حول ولا قوة الا بالله ، شو رح يصير فيها بس تعرف

ريم : الله يصبرها

قصي : عن شو بتحكوا ؟

ريم ( عيونها على علاء ) : احمد

ديمة / سيرين : خطب ؟؟

نهى : لا النية ما معه فلوس

علاء : بالزبط ، مشان هيك قدم على شغل و رح يطلع بعد العيد عالسعودية

ديمة / سيرين : ييييييي

ابو علاء : بسيطة ، الله يقدم اللي فيه الخير ، خليه يغير جو و نفسية

ابو قصي : احكي مع اختك شوفي شو صار معها ، لسا بالي مشغول انا

_________________________________

وصلت انا و اخوتي و امي عالمستشفى ، ما قدرت امنعها تيجي ..

ام ماهر : وين ياسمين منيمينها ؟

مها : هيني برن على زياد يدلنا

ابو عدي : امشي هيهم بالطوارئ ، مسا الخير يختي في مريضة اسمها ياسمين زياد ..

الممرضة : فوتوا عاليمين

ابو بيان : يعطيكي العافية

اول ما دخلنا من باب غرفة الطوارئ ، لمحت زياد و حنين كانوا حواليها ..

ركضت كاني طفلة ، و مسكت بايد زياد ..

حنين : ماما

مها : كيف صارت ؟ احكولي شو صارلها كانت منيحة اليوم

ابو امير : ...

حنين : صحيت الحمدلله بس ما فيها حيل من قلة الاكل

ام ماهر ( بتبكي ) : قومي ياستي انا اجيتك يا حبيبتي ، ياسمين يا وردة ، شو اللي عمل فيكي هيك ؟

ابو عدي / ابو بيان : الف سلامة عليها

ابو امير : ... الله يسلمكم

قعدت عند راسها و امسح عليها ، و اقرالها قران ..

دموعي غسلوا وجهها ، بس اللي ما تخيلته ، انه دموعها كمان ينزلوا ..

ياسمين كانت صاحية و واعية على كل اشي ، دموعها خانتها ..

مها ( بتبكي ) : فتحي عيونك يا امي ، سامحيني بوعدك ما اترككم مرة تانية لو بدي اموت

ابو امير ( بغضب ) : اسكتي

سكتت ..

بعدين ماله هيك متشيك و كانه جاي على عرس ، يا مصيبتك يا مها ليكون رايح يخطب وحدة تانية ؟ ..

مها : ايوا سهى .. لا .. رحت عالمستشفى .. مو حكتلك ياسمين حالتها سيئة كانت و اغمي عليها .. الله يسلمك .. ان شاءالله بطمنكم بس دخيلك لا تجيبي سيرة لحدا انتي فاهمة عليي

_________________________________

نهى : مين بالمستشفى ؟

سهى ( بتبكي ) : ياسمين اغمي عليها من قلة الاكل

سمعت كلام خالتي ، و حسيت الدنيا لفت فيي فجأة ..

صرت ابكي بدون وعي ، و ديمة متل حالتي و اسوأ ..

قلوبنا ما خانتنا ، و حاسة الصداقة و الاخوة اللي بيناتنا كانت كفيلة تخبرنا عن وضعها ، بدون اي اتصالات ..

علاء : خلينا نروح نشوفها

سهى : حكت ما اخبر حدا ، دير بالك تحكي لاحمد

ريم ( بتبكي ) : حرام خليه يشوفها

علاء : لا صح كلامهم ، خلص بس تتحسن بشوفها

_________________________________

حمزة : عمي ابو امير ؟

رفعنا راسنا عالصوت ، و لقينا بوجهنا شب متل القمر ماشاءالله ..

كانت ملامحه رجولية كتير ، تزكرت احمد اول ما شفته ما بعرف ليه ..

ابو امير : حمزة ؟ اهلين يا عمي يعطيك العافية

حمزة : اسف عالازعاج بس استغربت وجودك ؟ خير شو صاير ؟

ابو امير ( بلع ريقه ) : بنتي تعبانة شوي ، بس عم تتحسن الحمدلله

حمزة : سلامتها و الله ، طيب ليه واقفة يا حجة ، استني اجيبلك كرسي

راح بسرعة ، و جاب كرسي قعد امي عليه ..

حنين : هاد الممرض حمزة جارنا ؟

ابو امير : اه ، اللي اجو اهله علينا

ابو عدي : ماشاءالله عليه ، طيب ياسمين رح اتضل بالمستشفى ؟

ابو امير : ما بعرف شو رح يقرر الدكتور

_________________________________

ياسمين : م م ما ما ماما

مها ( بتبكي من الفرح و مسكت ايدي ) : هيني يا عمري جنبك ، فتحي عيونك خليني ارتاح

ابو امير ( بلهفة ) : بابا ياسمين انتي منيحة ؟ احكيلي بشو حاسة ؟

ستي : يا حبيبة قلبي يسعد هالصوت ما احلاه ، فتحي يا وردة

ياسمين ( بتبكي ) : اشتقتلكم كتييير ، انا منيحة لا تخافوا

فرحتي بشوفة ماما و بابا مجتمعين ، حتى لو الاجواء مو كتير صافية ، ما بتتقدر بثمن ..

حمدت ربي في سرّي ، و عاهدت نفسي ما اكون سبب في تعاسة حدا ..

حنين ( بتبكي ) : اشتقتلك

مسكت ايد حنين ، و شفت خوالي كانوا موجودين ، يا الله شو فرحت بشوفتهم ، شو عاملة بالناس انا ؟ ..

شو ذنبهم حتى يعيشوا هيك ظروف بسببي ؟ ..

ابو امير : رح انادي الدكتور

ابو بيان : سلامات خالي ، كيف حالك هسة ؟

ياسمين : منيحة بشوفتكم ، انا اسفة اني قلقتكم عليي

ابو عدي : اذا ما قلقنا عليكي على مين بدنا نقلق ، ما حدا بعمل هالعمايل غيرك و الله يا خالي

مها : هههه حبيبتي الله يسعدها و يريح بالها

ياسمين ( بتهمس لامها ) : حرام ستي قاعدة بهيك جو ، بلا ما تنتقللها عدوى لا سمح الله من حدا هون

حنين : بدك اجيبلك اشي تاكليه ولا بس نروح عالبيت ؟

ياسمين : اه يا ريت ، ميتة جوع لاني

ابو امير : الدكتور جاي يشوفك بس بقول خليها كمان شوي

ياسمين ( بهمس لماما ) : استغلي الفرصة و تقربي من بابا ، شوفي كيف مشيك حاله عالاخر ، يمكن كان جاي يرجعك لولا انا تعبت

مها : جد ؟ يلا هلا بحكي معه

ابو عدي : بناتك لحالهم بالبيت ؟ خلينا نروح نشوفهم ، و امير بتجيبه يا محمود عند خواته

بابا لحق ماما لا ارادياً ، و ضليت لحالي ..

ياسمين : لو سمحتي ممكن تناديلي عالممرض حمزة ضروري احكيله بنت ابو امير

الممرضة : يلا بشوفلك ازا كان فاضي

باسرع من خيالي ، كان جاي عندي ..

كان هالحوار بشكل سريع جدا ..

حمزة : انتي ياسمين ؟

ياسمين : اها ، في اشي مهم بدي احكيلك اياه قبل ما يجي حدا

حمزة : شو هو ؟

ياسمين : انت بتدور على سيرين صح ؟ رح اعطيك رقمها لاني مو حافظة رقم امها و ما معي موبايلي ، بس بتوعدني انه امك هي تحكي معها

حمزة ( بابتسامة عريضة ) : ما فهمت ؟ مين سيرين ؟

ياسمين : انا و انت بنعرف منيح عن مين قصدي ، هات موبايلك اسجلك رقمها

حمزة : تفضلي ، ما بعرف كيف رح اردلك معروفك معي ، بس ما قلتيلي مين انتي ؟

ياسمين : بتقدر تحكي اني فاعلة خير

حمزة : معلش عندي سؤال فضولي ، انتي هون بسبب هداك الشب اللي كنتي معه بالمول ؟ قصدي اهلك عرفوا ؟

ياسمين ( مصدومة و حاولت اغير الموضوع ) : بتقدر تردلي معروفك هلا ، ممكن احكي مكالمة مهمة

حمزة : خدي راحتك

كنت اكتب بالرقم ، و عيني على وجه حمزة المليان سعادة ..

احمد : سلام عليكم

ياسمين : احمد انا ياسمين ، ما معي وقت بس بدي قلك اني بمستشفى ... و عم بحكي من تلفون حدا

احمد ( بلهفة ) : مجنونة

ياسمين : فيك

احمد : بحبك بحبك بجنووون انا ، رح اجي فورا

ياسمين : بحبك ، باي

حمزة : هههههه

ياسمين : يسلمو ايديك ، بس ليه عم تضحك ؟

حمزة : اللي شافوكم قالوا اكيد في بينكم قصة ، الله يخليكم لبعض و يجمعكم بالحلال

ياسمين ( بيأس ) : كنا خاطبين و انفصلنا ، قصة طويلة ازا صار نصيب و اجتمعنا مرة تانية رح احكيلك اياها

حمزة : ان شاءالله ، اجو اهلك حاولي تصحصحي شوي و ارجعي عالبيت احسن ما اتضلي بالمستشفى كله حوادث اليوم

ابو امير : خير بابا صاير معك اشي ؟

حمزة : لا الانسة تمام التمام ، بس يخلص المغذي اللي بايدها بتقدروا تخرجوها

مها : الله يجزيك الخير و يرضى عنك ، سلم على الوالدة كتير

حمزة : الله يسلمك

بس سمعت انه الممرض حمزة موجود بالمستشفى ، و قدر يعرفنا ، على طول فتحت عيوني ..

نسيت حالتي و وضعي ، و فكرت بس بالاشي المهم اللي لازم اعمله ، حتى اعبر عن محبتي و اخلاصي لحدا غالي على قلبي ..

فهّمت امي انه لازم تطلع هي و ستي على الحديقة ، و انا ما تقلق عليي صرت منيحة ..

و حنين بتروح تجيبلي اكل ، و اخوالي راحوا ..

كنت خايفة و حاطة ايدي على قلبي ، اني اطلع من المستشفى قبل ما يصير اللي بدي اياه ..

فرصة و اجت على رجليها عندي ، ما لازم اضيعها ..

_________________________________

نار و شعلت في قلبي و جسمي كله ، رميت التلفون و الحمدلله اني كنت جاهز و مو بحاجة اغير ملابس ..

بدون ما ارد على نداءات اهلي ، طلعت بتكسي ، و طلبت منه باقصى سرعة يوصلني عالمستشفى ..

الحمدلله انه كان قريب ، و طريق فرعية ما فيها ازمة ، قدرت اوصل بوقت قياسي ..

احمد : المريضة ياسمين زياد ... وين بلاقيها ؟

الممرضة : عاليمين...

ما خليتها تكمل كلامها ، و صرت اركض متل المجنون ادور بالطوارئ ..

احمد : ياسمين ، ياسميييين ، ياسمييييين

ابو امير : صوت مين هاد ؟

مها ( حاطة ايدها على تمها ) : احمد !

ياسمين : احمد بنادي عليي ، بابا

و قبل ما المحها ، كان ابوها مسكر البرادي اللي حوالين سريرها ..

احمد : افتحوها

ابو امير ( قدام احمد ) : ما تحلم تشوف ظفرها ، انساها للابد ، ياسمين ما بدها اياك ، اطلع من هون بدون فضايح

احمد ( بعصبية ) : بدي اشوفها

بس احنا بمستشفى ، و الامن التم علينا ، و شحطوني ..

الامن : وين مفكر حالك ؟ هاد مستشفى مو حارة

احمد ( قاعد على الارض و ساند راسي على حيط و باخد نفسي بالعافية ) : ياااسميييين بدي اشوفك حبيبتي ، ياااسمين

_________________________________

ابو امير : مين خبره ؟

مها ( بتبكي ) : ما بعرف ، محمود قبل ما نطلع من البيت نبه على الشباب ما يحكوا لحدا

ياسمين ( بتبكي ) : بابا حرام عليك ليه هيك عملت فيه ؟

ابو امير ( معصب ) : رجعنا لعمايلك ؟ اياكي تفكري اني برجعك اله بسهولة ، انسيه من حياتك خلص انقطع نصيبكم

مها : ...

كنت خايفة احكي اشي ، نقوم نتخانق مرة تانية ..

مسكت بايد ياسمين من جهة ، و حنين من جهة ..

حنين : حزنت عليه

مها : خلص ، هيك نصيبهم بدهم يرضو فيه

ياسمين ( بتبكي ) : ... حرام عليكم .. حرااام ، خبري حدا يجي يشوفه ، انا كتير خايفة عليه

مها : بدي ارن على سهى ، الو .. اجا احمد عالمستشفى ما بنعرف مين خبره .. ما بعرف المهم زياد منعه يشوف ياسمين و التموا الناس و الامن على صوته .. دخيلك تواصلوا معه ما تتركوا بهالحالة .. الله معك غلبتكم انا

_________________________________

علاء : قطعتي خلفي من منظرك ، احكيلي شو فيه ؟

ريم : احكي ماما مالك ؟

سهى ( وجهها اصفر و مو قادرة تحكي ) : أ أ أحمد بالمستشفى و زيااد

كانت عيوننا بتتطلع على بعض ، و نفسنا رح يوقف من هالاخبار ..

ابو قصي : احكوا معه لا تتركوه بلا ما يصير فيه اشي لا سمح الله

نهى ( بتبكي ) : ياا رب تتلطف فينا

ابو علاء : ما حدا يحكي مع اهله ديروا بالكم

علاء و قصي طلعوا ، و تركونا ندعي و نترجى الله ما يصير مصيبة جديدة ..

بعد الحادث اللي صار فيه ، بطلت قلوبنا تتحمل ..

_________________________________

كنت بحالة صعبة كثير ، حتى انهم صاروا ينادوا عالممرضين يعطوني ابرة مهدئ ..

لولا شفت ايد انمدتلي ، و نهضني بقوة ..

حمزة : خلص اتركوه انا بشوفه

الامن : يمكن بده مهدئ

حمزة : اتركوه عليي ، انا بهتم فيه

احمد ( بصوت مخنوق ) : اتركني ، بدي اشوف حبيبتي ، ما بروح قبل ما اشوفها

حمزة : طيب طيب كل اشي بصير بالهداوة اللي عم تعمله ما بليق بشب مبين عليه عاقل متلك

احمد ( ببكي و بضرب براسه ) : و لك اااخ ما ضل فيي عقل انا

حمزة : انت احمد صح ؟

احمد ( مستغرب ) : كيف عرفت ؟ مين انت اصلا ؟

حمزة : انا اللي حكت معك ياسمين من تلفوني

سمعت كلامه ، و حطيت كل عصبيتي و جناني فيه ..

احمد ( ماسك حمزة من خوانيقه ) : انت كيف بتتجرا تحكي معها ؟ مين مفكر حالك اه ؟

كانت ردة فعله الضحك ، و استفزني كثير بهدوئه ..

حسيت بشخصيته المشابهة لشخصيتي ، اللي ما عمري شفتها على اي حدا ثاني بعرفه ، غير والدي ..

حمزة : اهدى ، الموضوع مو مثل ما انت مفكر

احمد : هديت ، احكيلي كل اشي يلا

حمزة : ما في اشي مهم ، عرضت عليها المساعدة ، و قبلت ، هاد كل ما في الموضوع

انا من النوع اللي صعب اقتنع بهيك كلام ، بس هزيتله راسي و سكتت ، لانه بالنهاية عمل معروف معنا ..

ممرضة : حمزة بسرعة في مريض حالته ...

حمزة : جاي فورا ، انا لازم اروح احمد

احمد : اكيد يعطيك العافية ، طمني عن ياسمين اذا قدرت

راح حمزة و راح السر معه ، و بقيت اتخبط بحالي ..

لا انا قدرت اشوف ياسمين ، و لا حدا معي يساندني ، و ساعدني حتى المحها حتى من بعيد ..

_________________________________

منى : يا بي وين راح هالولد طلع زي البزرة يركض

امجد : اتفكر فيما افكر يا ميمو ١ ؟

انس : اظن ذلك يا ميمو ٢

آيات : لا الله يستر ، قلبي بوجعني كتير مو ناقصنا افكاركم الجهنمية

منى : منيح اللي ابوك نايم ، يمة رجليي بقصفوا من الخوف

امجد : احكي مع خالتي مها بتعطيكي الصافي

منى : اه و الله جبتها

انس : هههههه قناة الجزيرة

آيات : يا رب يا رب ياسمين ما يكون الها ايد بالموضوع

منى : هي برن تلفونها

امجد : افتحي سبيكر خلينا نتسلى هيهيهيهي

_________________________________

علاء : احمد انا جاي عالمستشفى خليك هناك

احمد : ما حدا يجي بروح لحالي

علاء : هيني وصلت وينك ؟

احمد : افت ، عمدخل الطوارئ

علاء : يا حبيبي عالشرطة ، كيف بدي اصف عند الطوارئ ؟

قصي : اعطيني السيارة و روح جيبه و تعال

علاء : تمام ، امشي لا اتضل واقف ، بنضل عتواصل

_________________________________

مها ( عيونها على ياسمين اللي عم بتأشرللها ما تحكي ) : اهلين منى .. الحمدلله بخير .. رجعت على بيتي .. لا اجا اخدني .. الحمدلله كلنا بخير .. الله يسلمك

ياسمين : اكيد بتسأل عنه

مها : بتسلم عليكم ، اكيد قلب الام حسسها

حنين : ابصر شو اخباره ، الله يسامح اللي خبره

ياسمين : ... ما كان مُتَوقَّع موقف بابا ، عمره ما عامل احمد بهالطريقة

حنين : من وراكي ، خايف عليكي مفكر انه احمد سبب كل اشي

مها : لو يعرف انك شفتيه بالمول شو رح يعمل لسا

ياسمين / حنين ( بصدمة ) : عرفتي ؟؟

مها : خلص ما بدي اسمع اشي ، خلينا نطلع من المستشفى ، منيح اللي ستك روحت قبل ما تشوف احمد بهالحالة

ياسمين : يا ريت ضلت ما كان قدر بابا يعمل هيك

مها : هه ضحكتيني ، ما بتعرفيه منيح لابوكي انتي ، اسكتي اسكتي

_________________________________

علاء : يلا امشي قدامي

احمد : شو جابك بس بدي افهم ؟ اوعى تحكيلي امي بعتتك

علاء : ليه امك بتعرف ؟

احمد : هو انا مجنون احكي ، اصلا ما لحقت احكي مع حدا ، اجيت ركض ، انت كيف عرفت ؟

علاء : يلا هي قصي ، اركب و بنحكي

قصي : ههههه

احمد : ناقصك انا

قصي : كيف ياسمين ؟

احمد : .. ما شفتها ، بس حمزة حكالي منيحة و بخرجوها

علاء : مين حمزة هاد ؟

احمد : و الله ما بعرف ، ممرض بس شو علاقته بياسمين لحد هسة ما عرفت

علاء : حلووو

قصي : وين اروح ؟

علاء : على بيته ، بتحكي اني حكيت معك لانه سيارتي خربت و اجيت تساعدني

احمد / قصي : ههههههههههه

_________________________________

منى : مها راجعة على بيتها و كل اشي تمام بتحكيلي

امجد : الحمدلله ، طب رني على سوسو ، مع انه لسانها ثقيل شوي و ما بزلق بسهولة

انس : ههههههه

منى : كمان شوي احكيلي رني عالشرطة

امجد : ياريت بس للاسف الشرطة لبعد ٢٤ ساعة لما تقبل تقدميلهم بلاغ

آيات ( معصبة من زناخة امجد ) : ماما اما بتسكتيه او بقوم بفجر فيه البيت

منى : خلص اسكتوا هي سهى برن تلفونها

_________________________________

سهى : ييييي منى بترن عليي ، ليكون عرفت

نهى : شو بده يعرفها ، ردي و خليكي طبيعية

سهى : الو .. الحمدلله بخير .. لا و الله سهرانين عند ريم احنا و .. علاء ! لا هيو عنا ماله ؟ .. وين احمد ؟ .. لا لا ما حكى معه هينا كلنا قاعدين و دار ابو علاء كمان معنا .. لا هي قصي وعلاء معنا و قاعدين بناكل حلو

ديمة : هههههههه

سهى ( ضربت ديمة تسكتها ) : لا اكيد بكون حدا من اصحابه احتاجه ضروري .. يلا سلام

ابو قصي : اما كذبة

الجميع : ههههههه

سهى : لو سمعت صوتها كان ما عرفت تحكي كلمتين قد ما هية خايفة ، يا حبيبتي

نهى : ان شاءالله تمرق هالمحنة على خير

_________________________________

منى : في صوت سيارة برا ، شوف مين

امجد : سيارة علاء ، نزل احمد منها

منى ( بدهشة ) : يوووه

احمد : سلام

منى : و عليكم السلام ، وين كنت يمة انشغل بالي عليك ؟

احمد : سلامتك ، بس علاء خربت سيارته فجاة و اتصل عليي اجي اساعده

حكيت هالكلمتين ، و هربت على غرفتي ..

رميت حالي عالتخت ، و غمضت عيوني بحسرة ، و تخيلت صورة ياسمين ..

يا ترى كيف حالتها كانت ؟ ، شو كان صار لوخليتني اشوفها يا جوز خالتي ، اااخ الله يسامحكم ..

منى : هبايل ولا بتهبلوا ؟

انس : فيلم محروق

امجد : امشي نشوف شو القصة ؟ هسة برفعلك اياه فلقة بخليه يقر

قطعوا صفنتي امي و اخواني ..

منى : بدك تحكي وين كنت ولا انادي ابوك يسالك ؟

احمد : منا حكتلك

امجد : بالله جد ؟ اسمع من الآخر امك حكت مع خالاتك كلهم و حكولها انه علاء و قصي كمان كلهم بدار علاء و سهرانين ، فجاة بتيجي انت و اياه بسيارته ، احكي وين كنت ؟

احمد ( بغصة ) : ياسمين بالمستشفى و رحت اشوفها

منى ( حطت ايدها على راسها و قعدت عالتخت بدوخة ) : مالها ؟!

امجد : و الله عرفت انها ورى طلعتك

احمد : لا تسالوا اكثر من هيك لانه ما عندي اشي احكيه

_________________________________

ريم : هي اجوا

قصي : مالكم ؟

سهى : خالتك منى بتدور على احمد ، اتصلت و سالتنا

علاء ( ضرب جبينه بيأس ) : يا الللله كيف نسيت اخبركم انا

نهى : بشو ؟ احكيلنا لقيته

ابو علاء : حرقتوا اعصابنا الواحد مو عارف يقعد مروق من وراكم

قصي : اتفقنا انه سيارة علاء خربت و اجا يساعده

ريم / ديمة / سيرين : هههههع تحشيش

علاء : اسكتي انتي و اياها ، هسة خالتي اكيد رح تعرف

قصي : و العمل ؟

ابو قصي : طيب فهمونا شو اللي صار ؟

علاء : احمد راح عالمستشفى و عمو زياد ما خلاه يشوف ياسمين ، قله ما تحلم تشوف ظفرها

قصي : و اجوا الامن على اصواتهم و طلعوا احمد ، و كانوا رح يعطوه ابرة مهدئ ، و انقذه شب اسمه حمزة ممرض

ابو علاء : لا حول ولا قوة الا بالله ، هاي آخرتهم

نهى : و ماله زياد هيك بعمل مع احمد ؟ صار كخة هلا ؟

_________________________________

طلبت من آيات و انس ياخدوا امي و يهدوها ، و قعدت مع احمد لحالنا حتى اعرف شو لسا مخبي ..

امجد : ما عندك اشي تحكيه لامي ، مو عليي ، يلا هات اشوف

احمد : شو بدك ؟

امجد : القصة بالألم نشرح

احمد : اففففت و الله ما بعرف اشي عقلي مخربط و مو مجمع ، اتركوني بحالي

امجد : لا يا حبيبي

احمد : انا بس اللي مجنني ياسمين و حمزة كيف عرفوا بعض ؟ من وين لوين حتى توثق فيه و تاخد تلفونه تحكي معي ؟ كيف اصلا تجرأت و حكت مع واحد غريب و كشفت اسرارانا ؟

امجد : بقلك اشرحلي بتروح تحكيلي الغاز ، مين هاد حمزة ؟

احمد ( بضرب براسه ) : ما بعرف ما بعرف اشي ، خلصصصصص راسي رح ينفجر

امجد : طيب خلص ارتاح

عتقته شوي لحد ما يرتاح ، و يجمع افكاره حتى اقدر افهم عليه ، لانه انا دخلت بدوامة من ورا كلامه ..

_________________________________

غنى / بيان : اجت ياسمين

بيان : يا الله شو اشتقتلهاا

غنى : و انا كمان ، كتير متغيرة بهالكم يوم

رنين : و هي اشتاقت للكل

مها : نورتي البيت يا روحي

ام عدي : الحمدلله على سلامتك حبيبتي ، ما عليكي شر

ام بيان : سلامة قلبك ، خوفتينا عليكي خالتو

ياسمين : الله يسلمك يارب ، اسفة ازعجتكم معي

مها : الله يسعدكم حبيباتي

ابو امير : جزاكم الله كل خير ، وين امير نام ؟

بيان : لا هيو

امير : بابا بابا

لما شفت امير كيف ركض على بابا ، و كيف حمله بلهفة ، و صار يبوس ويشم فيه ، تقطع قلبي من المشهد ..

ما بعرف ليه قلبي بشفق عالكل ، بس ما حدا عم يشفق عليي ..

حقد كبير جواتي كان ، لانهم منعوا احمد يشوفني ..

و فوق كل هاد قطعوا نصيبنا ، بدون ما يسالونا ..

_________________________________

ابو عدي : مين اللي خبره ؟

عدي : ما حدا

ابو بيان : كيف عرف ؟ فهموني

عمر : حكينا ما بنعرف ، هي شوف تلفوناتنا

ابو عدي : مخي سكّر خلص ، شو بصير معهم هدول الاثنين ما حدا بعرف

عدي : في حدا غيرنا عرف انه ياسمين بالمستشفى ؟

ابو بيان : .... اممممم لحظة ! كانه تلفون مها رن و احنا بالمستشفى ، مع مين كانت تحكي ؟

ابو عدي : ما انتبهت ، معقول وحدة من خواتك ؟

عمر : ايوا هاد الحكي الصح ، روحوا حققوا معهم ، انا رايح عالمسجد خلص بلشوا قيام

عدي : و انا جاي معك ، سلام

_________________________________

حنين : كيف صرتي ؟

ياسمين : منيحة ، يلا نروح عالقيام

حنين : انتي لا خليكي بالبيت صلي بترتاحي على كرسي ، و هي ماما معك

رنين : بابا و ماما تصالحوا ؟

ياسمين : ما بعرف ، يمكن

اسيل : انا بدي اروح معك حنين

حنين : يلا بسرعة ، رنين ديري بالك على ياسمين ، و حضري سحور

رنين : عشان معيدة بتستغلوني ! ياسمين اجيبلك اشي تاكليه

ياسمين : لا كتير شبعانة خلص يسلمو ، بس بدي انام شوي و بقوم اصلي

رنين : اوك

كانوا بناتي بتسائلوا عن وضعي انا و ابوهم ، اللي ما حكى معي كلمتين على بعضهم ..

و كل ما احاول اتقرب منه ، او افتح موضوع بلف وجهه ، او بنشغل بأمير ..

و فوق كل هاد راح عالمسجد ، و تركني بالبيت احكي مع حالي ..

_________________________________

حمزة : مسا الخير

ام حمزة : مسا النور ، يعطيك العافية ، تأخرت يمة اليوم مالك ؟

حمزة : الله يعافيكي ، انا عارف الله يعين الناس عبلاويها ، المهم جاييكي بخبر حلو

رانيا ( بمزح ) : لقيت سيرين ؟

حمزة ( مستغرب ) : كيف عرفتي ؟

رزان : يعني لقيتها ؟

حمزة : لقيت رقمها ، خدي احكي معها

ام حمزة ( بدهشة ) : من وين جبته ؟

حمزة : فاعلة خير اعطتني اياه ههههه ، خلص بدكم العنب ولا تقاتلوا الناطور ، يلا خدي موعد منهم بكرا لاني معطل

ام حمزة : خليها لبعد العيد يمة و الله رمضان وقته ديق ، و بدنا نعمل كعك و معمول

حمزة : لا بخاف تنخطب

رانيا ( منزعجة ) : خلينا نشوفها مقطوعة الاوصاف ، و بنقرر ازا رح تنخطب و لا لا

تركتهم ، و دخلت ارتاح شوي ، كان حسين رايح عالمسجد ، و انا من التعب نمت ، و ما صحيت الا عالسحور ..

و بس خلصنا ، انفرد فيي حسين بالغرفة لحالنا ..

حسين : شو هالاخبار الحلوة ، من وين جبته هات احكيلي

حمزة : ما بتصدق لو احكيلك ، عمري ما تخيلت يصير معي اللي صار الليلة ، تقول فيلم مو هيك

حسين : ههههه شوقتني

حكيت لحسين كل اللي صار ..

حسين : الله اكبر ، فعلا مصائب قوم عند قوم فوائد

حمزة : تقطع قلبي عليه هالشب ، و الله انه وردة و بنحب

حسين : و البنت كيف وضعها ؟

حمزة : مسكينة كان مبين عليها لما خرجوها انه مو مبسوطة ، اكيد بكون قلبها محروق على شوفته

حسين : يا حرام ، انا حاسس فيهم لاني بحب و مجرب

حمزة : معقول انا اعيش هيك حب بيوم من الايام ؟

حسين : لسا بدك تعيش ؟ اللي انت فيه هاد شو اسمه ؟ ما انت غرقت لشوشتك من اول نظرة

حمزة : ما بتروح من بالي ، مشتاق كثير اشوفها ، معقول تعرفني ؟

حسين : بكرا بذوب الثلج و ببين المرج ، يلا نام انا مسطل

حمزة : مو قدي

الحلقة الواحد و العشرون :

وحده التفاؤل قادر انه يرجع يحيينا من جديد ..

و ايماننا بانه اللي بنطلبه من ربنا ، و بنرجوه منه ، يتحقق ، و يرتاح بالنا ..

_________________

_______________

بآخر ايام الشهر الفضيل ، اللي كان السنة بحمل ظروف صعبة لمعظم افراد عيلتنا ..

و مع كل دمعة حزن ، كانت قلوبنا تتأمل السعادة ، و لا بد انّا نحصل عليها بيوم من الأيام ..

و الخبر المييز بالنسبة الي ، انها زينة بغرفة الولادة اليوم ..

و اخيرا رح يجي عالدنيا ابني ، و يزين حياتنا بوجوده ..

منى : تقوم بالسلامة ، امها عندها ؟

هيثم : اه اجت هي و اختها

منى : يلا بس تولد خبرنا بنيجي ، و بجيب امي

هيثم : تمام ، ادعولها

كنت جنبها بكل اللحظات ، و بحاول اخفف عنها ..

مع اني خايف كتير عليها ، لانها حساسة و كمان تغلبت شوي بفترة حملها ..

بس الحمدلله عدت هالتسع شهور على خير ، و لحظات قليلة بنسمع صوت بكاؤه ، ليعلن عن قدومه ..

هيثم : كيف وضعها ؟

الطبيبة : ممتازة ، الحمدلله عسلامتها ، البيبي وزنه منيح

الممرضات : مبارك دكتور

هيثم : الله يبارك فيكم ، يعطيكم العافية

زينة : هيثم بدي ابني وينه

هيثم : هيو حبيبتي ، ارتاحي شوي و بكون بحضنك

الممرضة : يلا رح تنتقلي على غرفة ، و بنعطيكي اياه

__________________________________

ام عدي : الو منى بدكم تروحوا عالمستشفى ؟

منى : بنروح اكيد بس مو كلنا مع بعض ، اهم اشي امي تروح و بنقرر مع مين حسب فضاوة الجميع

ام عدي : بروح انا و اياها و و ليلى ، لانه جهزنالها شوربة و اكل ، و بعد الفطور بتروحي انتي وخواتك

ما كانت امي كتير متلهفة ، و حسيتها انه كانها رايحة على حدا غريب ..

متغيرة مشاعرها كتير ، و كانها بلدت ..

آيات : شو قررتوا ؟

منى : احنا بعد الفطور ، خليني اخبر خالاتك ، و بنتفق

امجد : ضروري الكل يروح يعني ؟ استنوا بس تطلع عالبيت

منى : لا تدخل بحكي النسوان ، يلا روح جيب الاغراض اللي وصيتك عليهم

انس : بدك تعملي كعك و معمول ؟

منى : شوية ابوك نفسه فيه ، بس للضيافة بجيب جاهز و خلص

امجد : كانك متغيرة شوي ، او كثير ، مالك ما بتتحملي كلمتين صايرة ؟

منى : ...

آيات : عادي كلنا بنمر باوقات ما بكون جاي عبالنا نساير حدا ، فترة و بتمر

امجد : الله يهونها ، بس لا خصوصا خالي هيثم متغيرين معه كلكم

منى : ما حدا متغير ، انت بس خليك بحالك

امي اختلفت بعد ما زينة كانت رح تورط احمد بصاحبتها ، لانها كذبت عليها و قالتلها انها عجبت احمد ..

و كل هالعمايل بس عشان تكسر ياسمين ، و تخرب علاقتها فينا و باحمد ..

بس زينة وين ، و ياسمين و عقلها وقلبها الكبير وين ..

كل يوم هالبنت بتكبر بعيون الكل ، رغم كل اشي عملته ..

الا انها اثبتت صدق مشاعرها تجاه احمد ، و اعتبارها النا بانه احنا عيلتها الثانية ..

__________________________________

سهى : للللللليييييش ، الف الف مبرووك يا حبيبة قلبي

ديمة : هههههه هاي لمين بالضبط ؟

سهى : لبنتي طبعا

علاء / ريم : يبارك فيكي يا رب

قصي : الله اكبر هسة صار هيثم عاطل

ريم : ما قدرت ما اخبركم عل طول ، مع انه بكير عالنشر

قصي : استني لما تولدي بعدين بتحكي

علاء : ههههههه و بطنها وين تخبيه يا فهمان ؟ المهم متى رح تروحوا عند زينة ؟

سهى : يلا هلا بشمر و بركض لعندها

ديمة / ريم : هههههههه ماما

سهى : بدي اروح اشوف ياسمين اولى ، كيف صبرت اصلا

علاء : معك حق اه و الله اولى

قصي : شو رأيكم نعمل مفاجاة لياسمين و اشياء حلوة نغيرلها جو

ريم : اممم متل شو يعني ؟

قصي : يعني ورد و زينة و شغلات

ديمة : و لافتة مكتوب عليها It's a boy

علاء : ههههه دخيل نغاشتك انتي

قصي : خلص ما بدي اعمل اشي الحق عليي اصلا

ريم : ضميرك بعزبك يمكن

سهى : اه و الله لو شفتي كيف طلب السماح من خالتك

__________________________________

كنت مشغولة انا و امي بتحضير الكعك والمعمول ، و التجهيز للعيد ..

بعد ما تصبحنا بخبرية ولادة زينة ، و كل العيلة انخضت بالتخطيطات للقيام بالواجب المقدس لحضرة جنابها ..

سيرين : متى رح نروح نشوف ياسمين ؟

نهى : بس اروح عالمستشفى روحي عندها

سيرين : خليني اروح عالمستشفى معك ، كتير حابة اشوف البيبي

نهى : بس تطلع على بيتها بتشوفيها .. هاد تلفونك اللي برن

سيرين : اه ييي رقم غريب

نهى : ما تردي

سيرين : لا عادي بكونوا صحباتي .. الو

ام حمزة : الو السلام عليكم

سيرين : وعليكم السلام

ام حمزة : حضرتك سيرين ؟

سيرين : اه انا مين معي عفوا ؟

ام حمزة : كيف حالك حبيبتي ؟

سيرين : الحمدلله تمام

ام حمزة : في وحدة اعطتني رقمك عشان اشوفك لابني

نهى ( بتهمس ) : مين ؟

سيرين ( بهمس ) : ام عريس .. دقيقة خالتو هي ماما احكي معها

نهى : السلام عليكم

ما حسيت حالي كتير متلهفة ، مع انه الي فترة ما اجوني عرسان ..

و اعطيت امي تكمل حكي عني ، لانه مو جاي عبالي اساير حدا ..

نهى : و الله اليوم صعب ، عندي مشوار بعد الفطور ، خليها لبعد العيد احسن بتعرفي رمضان عجقة

ام حمزة : براحتكم ، ان شاءالله برجع احكي معكم بس يخلص العيد

نهى : لا تآخذينا بتشرفوا بأي وقت ، كل عام و انتو بخير

سيرين : هيك احسن مو رايق استقبل حدا

نهى : ان شاءالله خير ، ابنها ممرض عمره ٣١ سنة بشتغل بمستشفى ...

سيرين : وظيفة حكومية يعني ، يلا منيح بس كانه كبير عليي

نهى : ٩ سنين ، بس بتقول ملتزم و ما بدخن ، و مكون نفسه عنده بيت و سيارة و شغله مستقر ، ان شاءالله خير

سيرين : ان شاءالله ، خليني احكي مع ديمة اشوف ازا رح تروح تشوف ياسمين

نهى : و شوفوا آيات كمان

__________________________________

ام حمزة : مشغولين ، بعد العيد بنرجع نحكي معهم

حمزة : افففت

رانيا و زران : هههههه

حمزة : اسكتوا

رزان ( بمسخرة مع رانيا ) : يا رب ما تخطب من هون لخمس ايام

رانيا : الله يستر و الله

ام حمزة : بس عاد ، مالكم انقلبتوا

حمزة : زنخات ، خليني احكي مع احمد اتطمن عليه احسن منكم

رانيا : مين هاد احمد كمان ؟

حمزة ( بخبث تاركهم و رايح على غرفته ) : سر ههه

رزان : كترانة اسرارك سيد حمزة

حمزة : عندك مانع ست رزان ، خليكي بشغلك .. الو

رانيا : بس يعطل بشتغل فينا ابنك

ام حمزة : غيرتكم زيادة على شو مو فاهمة

رزان : لا غيرة و لا اشي بس هو زودها ، كيف لو بعرفها من زمان ؟

ام حمزة : الارواح جنود مجندة ، ارتاحلها و حس انها نصيبه ، و الله ينوله اللي بباله

__________________________________

عمر : رايحين عالمستشفى

ام عدي : اه قوم وصلنا

عمر : بس بشرط ، افوت اشوف ابن عمي الزغنون

غنى : دخيلك انت و ابن عمك ، لاحق بتشوفه بعدين

ام بيان : يلا شو صار معكم ؟ ما بدنا نطول

عمر : عملتي معمول خالتو ؟

ام بيان : اليوم بدي اعمل

عمر : طيب يلا يلا استعجلوا عشان نلحق نرجع و نعمل معمول

بيان : اه عمر الله يسعدك كل وقفة الفرن عليك

عمر : ابشررري بنت العم انتي بس اشري باصبع اجرك الصغير

غنى : هههههه

ام ماهر : يلا ياستي كوم وصلنا يا حبيبي

عمر : شو يا ستي اجاكي حفيد جديد ، ما احلاكي تنسي عمر هسة و تصيري تحبي هداك الببو شو اسمه صحيح ؟

ام عدي : استغفر الله العظيم يا ربي هالولد رح يجلطني اليوم

ابو ماهر : ههههه و الله انه خفيف دم الله يسعدك قد ما بتضحكني

عمر : يسسسسعده سيدي ، بوصلهم و برجع نتخرف انا و اياك براحتنا ، سي يو بيبي

بيان / غنى : ههههه الله يشفيك

__________________________________

كنت طالع بكمل اللي باقي عليي من اجراءات السفر ، و الاستعداد للشغل الجديد ..

و بنفس الوقت بالي مشغول على ياسمين ، و ملهوف على نظرة من عيونها و كلمة من لسانها الطويل ههه ..

ااخ وين ايامك يا ياسمين ؟ ، يا وردتي اللي ذبلتي بين ايدي و ما قدرت احافظ عليكي ..

احمد : رقم مين هاد ؟ .. الو

حمزة : الو احمد .. مرحبا

احمد : اه احمد مين معي ؟

حمزة : ههه لحقت تناسي لسا مبارح التقينا انا حمزة

احمد : هلا هلا حمزة اسف ناسي اخزن رقمك عندي ، كيف حالك ؟ طمني عنك

حمزة : بخير انا ، المهم طمني شو صار معك انت و ياسمين ؟

احمد : قلبتلّي مواجعي هههه ، على حالنا و الله ، بلكي اليوم امي يصحلها تشوفها هي و اختي

حمزة : بتعرف ، حاسس اني بعرفك من زمان ، خلينا نلتقي و نتعرف على بعض اكثر ، اذا ما عندك مانع

احمد : حبيبي و الله انا كمان ارتحتلك و بدي اشكرك على كل اشي عملته معنا ، ان شاءالله بنلتقي قريبا

حمزة : صراحة انا اليوم معطل و حكيت بسالك اذا في مجال نلتقي

بين ليلة و ضحاها الانسان ممكن يقابل اشخاص كثير ، بس ما بعرف اذا ممكن تكون معرفتهم سطحية ، او يتحولوا لجزء مهم بحياتك ..

لما اقترح عليي حمزة نلتقي ، اول اشي خطر ببالي القصة اللي جمعته مع ياسمين ، شو ممكن تكون ..

بس حتى نضل ضمن نطاق المعرفة العفوية ، لازم ارتب لقاء ودي ، اقدر اعرف من خلاله كل اشي ببالي ..

__________________________________

حلو كتير هالصباح ، و احلى اشي انه ماما عنا بالبيت ، و امير بلعب حوالينا ..

الفرحة نكهتها غير عنا ، و السعادة متطلباتها بسيطة بنظرنا ..

ياسمين : بدك تعملي كعك للعيد ؟

مها : ما بعرف و الله ، حسب ابوكي

حنين : بابا ماله ؟

مها : كيف بدنا نشتري اغراض ؟

رنين : اه خلص اتصلي فيه و احكيله يجيب

مها : بس يرجع عالبيت بنتفاهم شو بدنا ، المهم انتوا اغراض العيد عندكم كاملة ؟ ما حدا يقلي يوم الوقفة اطلع عالسوق

ياسمين : بأي حال عدت يا عيد

حنين : بأحسن حال الحمدلله ، لا فاقدين و لا مفقودين

فرح : و اجا بيبي كمان زيادة ههههه

اسيل : صار عندك صاحب يا امير

ياسمين : بصيروا متل احمد و علاء

مع اني كنت احكي بشكل عفوي ، بس قلبي دق على طول بس ذكرت اسمه ..

يا الله شو مشتاقة اعرف اي اشي عنه ، البنات طول اليوم ببعتولي ، بس ما حدا جاب سيرته ، و ما استرجيت اسال ..

مها : بعد الفطور رايحة عالمستشفى مع خالاتك ، بعدين بدهم يجو عنا يطلوا عليكي

ياسمين : اهلا وسهلا فيهم ، اه حكولي البنات

__________________________________

علاء : شو القصة ديمة ؟ مالك هيك انفردتي فيي

ديمة : بدي اطلب منك طلب ، بس بشرط يضل بيناتنا

علاء : الله يستر ، اؤمري

ديمة : لا تخاف ما بكلفك اشي هههه ، المهم بدي تقول لعدي اني موافقة عليه

علاء : الله اكبر شو هاليوم الحلو هاد مرتي حامل و هيثم اجاه ولد و ديمة وافقت على عدي ، قلبي رح يوقف

ديمة : هههههه مش طبيعي وضعك ، المهم ما بدي حدا يعرف اني وافقت

علاء : ولا يهمك ، بس شو اللي غير رأيك ؟

ديمة : سر هههه

بعد اللي سمعته مبارح عن احمد ، ما قدرت اهدي تفكيري ..

و تخيلت لو عدي رح يسافر متل احمد ، كان عقلي رح يطير عالاخر ..

انا ما كنت متأكدة من مشاعري ؛ لاني متطمنة انه موجود دايما ..

بس فكرة انه يطلع من البلد ، و يغيب عني ، ما ممكن اتحملها ، و حسيت بالحب و الشوق تجاهه بمجرد هالفكرة اللي خطرتلي ..

ما في داعي اضيع وقت اكتر من هيك ، الحياة ما بتستنى مزاجاتنا ..

لازم نستغل الفرص دايما ، و الاشي الموجود حاليا الله اعلم ازا رح يضل موجود لبعدين ..

__________________________________

ام ماهر : يا حبيب ستك الله يجعلك من البارين الصالحين

ام زينة : يتربى بعزهم و دلالهم ، ان شاءالله بنشوفه دكتور مثل ابوه

هيثم : امين ، بس محتارين شو رح نسميه لهالحلو

زينة : انا برايي سميه احمد ، حتى حاسسته بشبه احمد

ام عدي / ام بيان ( بتطلعوا ببعض و بضحكوا ) : ...

ام ماهر : لا بدنا نسميه اسم خاص فيه يلبقله

ام بيان : اعملوا قرعة بالاسماء اللي محتارين فيها

زينة ( بجكر ) : بنشوف شو بصير معنا ، بالنهاية الاهل همة اللي بقرروا

ام عدي : كيف كانت الولادة ان شاءالله ما تغلبتي ؟

ام زينة : لا و الله مسكينة من مبارح و هي بتتوجع ، الحمدلله صبروا عليها ما ولدوها قيصري

ام ماهر : يلا خذي رضعيه ، ديري بالك تستسلمي ، هاد بعده باللفة بتربيه انتي بشطارتك

هيثم : الحمدلله رضع ، و الدكتور شافه و قال كل اشي تمام و بكرا الصبح بطلعوها خليها شوي ترتاح بالمستشفى

ام بيان : يلا الحمدلله عسلامتها ، بنشوفك ان شاءالله بس ترتاحي و تصحصحي

__________________________________

عمر : هههههههه انا حاسس انها ما رح تحل عن احمد الا لما تعمل اشي الله اعلم شو هو

ام بيان : استغفر الله العظيم ، مرات بفكرها حاطة عينها عليه ، لولا هيثم ولا الواحد ما لازم يسكتلها

ام ماهر : اتركوها جاجة حفرت على راسها عفرت ، كل وحدة اتدير بالها على بيتها افيدلها

ام عدي : اه و الله ، بس منا عارفة هالبنات شو صار لعقلهم ، ديمة من جهة و ياسمين من جهة

عمر : و آيات من جهة

ام ماهر : مالها آيات يا ستي ؟

عمر : و الله منا عارف مالها بس حاسسها مو مبسوطة الله يستر

ام عدي : لا من غير شر عنها ، محمد كويس و ابن حلال الكل بشهدله

عمر ( بينه و بين حاله : حتى انتي هيك بتحكي يا امي )

__________________________________

علاء : هات البشارة

عدي : بشارة شو ؟ ابن هيثم

علاء : لا ابني هههه ولك شو بدي بابن هيثم اخد بشارته منك ؟

عدي : مو فاهم عليك ؟ خلصني احكي انا بالشركة و الشغل لفوق راسي

علاء : هههههه طيب ماشي ، جهز حالك العيد هاد رح يكون احلى مع ختشيبتك

عدي : علاء ما فهمت ؟ مين خطيبتي

علاء : ولك ديمة وافقت تخطبها

عدي ( كنت قاعد على كرسي و وقفت بلهفة ) : بتحكي جد ؟ علاء ما بتمزح انت

علاء : بتسأل و بتجاوب لحالك ، وضعك متأزم يا صاحبي

عدي : الله اكبر على هالخبر ، ولك بدي اجي ابوسك

علاء : لا اوعي ، معلش مرتي بتغار ، المهم ناطرك انا اليوم مع احمد طالعين سهرة ، جيب عمر معك

عدي : ناطرني ؟ و الله شكله انت اللي وضعك متأزم ههههههه مالك انهبلت ؟

علاء : جاييك الدور حبيبي رح تنهبل اكثر و تصير تحضر تركي كمان ، و تحكي مع المرايا و تفضفضلها ، يلا بنشوفك عديل

عدي : احلى عديل ، على راسي يا غالي شكرا لبشارتك

كلمة طرت من الفرحة قليلة على الحالة اللي انا فيها ، كنت رح اروح ابوس كل زملائي اللي كانوا معي ..

الحمدلله يا رب ، عوضت صبري ، و هديت قلب ديمة الي ..

__________________________________

علاء : هي خبرت عدي و عمر معه

احمد : ممتاز ، يلا ضل نختار مكان ، بدي استفرد فيه اليوم

علاء : هههههه ولك هدي حالك شوي

احمد : ما برجعه على بيته اليوم قبل ما اعرف شو السر اللي بينه و بين ياسمين

علاء : ماشي ماشي ، كل اشي بدك اياه رح يصير ، بس اسمع هالخبر الحلو مو قادر امسك لساني

احمد : خير ، ريم حامل ؟

علاء : هههه اه

احمد : و الله مباارك بابا علاء ، هيك سبقتني ، مو على اساس اولادنا نجيبهم مع بعض

علاء : لسا قدامك ٩ شهور لحق حالك ههههه

احمد : الله كريم ، يلا بشوفك انا وصلت عالبيت هسة

علاء : تمام ، اوعى تحكي الخبر بس ، بلا ما اوقع بلسانها

احمد : اكيد اكيد يلا سلام

على قد ما فرحت لعلاء ، صابتني غصة قوية ، و شعور جرحني باني كنت احلم بهيك خبر اسمعه من ياسمين ..

خطيبتي اللي عشت معها كم شهر ، بس كانوا مليانين بالاحلام ..

و اليوم احنا وين وصلنا ؟ ، و لمتى رح نضل هيك ..

منى : اهلا و سهلا

احمد : يعطيكم العافية ، شو الاخبار

امجد : سلامتك و تعيش ، مثل ما احنا

انس : بدك تروح تشوف البيبي ؟

احمد : لا و الله اليوم صعب ، بنشوفه بالبيت ، تعال شوي امجد

امجد : خير خير ، صاير اشي

احمد : جهز حالك الليلة سهرة مع الشباب بدي تيجي ، هسة بحكيلك كل اشي عشان تفهم

شرحت التفاصيل لامجد ، و انصدم كثير من الكلام اللي سمعه ، اللي ما كان متوقع بالنسبة اله ..

امجد ( ضرب على راسه ) : ياسمين رح تفوت العصفورية بس تسافر

احمد : خايف عليها كثير ، بدي تمهدلها بطريقتك

امجد : انا امهد ؟ خليني برا الموضوع و الله انا يا دوب امهد لحالي لسا

احمد : ماشي مثل ما بدك

__________________________________

مها : اجت خالتك سهى ، هي ريم كمان معها

ياسمين : اهلا اهلا ريموو

ريم ( فاتحة ايديها بتضم بياسمين ) : ياسمينووو الحمدلله عسلامتك يا روحي

ديمة : بعدي هيك دوري ، ياااسمييين حبيبتي

ياسمين : حبيباتي اشتقتلكم الله يسلمكم

سهى : كيف حالك يا عمري ، سلامتك خوفتينا عليكي

ياسمين : الله يسلمك خالتو حبيبتي ، ما تخافي على غالي يارب

مها : يلا انا جاهزة

سهى : امشي علاء بستنانا

مها : مو قصي ؟

سهى : و قصي معه امشي بس ههههه

البنات : هههههه

سيرين : ليه فاتحين الباب ؟

ياسمين : بنجدد في الهوا قبل التعزيل ههههه

سيرين ( ركضت على ياسمين ) : يا عمررري شو عملتي فينا ؟

ديمة : دا احنا اتخضينا خضة بنت كلب

ريم : ههههه رجعنا بقوة بس

حنين : شكلها آيات وصلت ، افتحوا الباب

ياسمين : خليكم انا بفتح ، هلا هلا بالغلا

آيات ( بتحضنها و بتبكي ) : اشتقتلللللك

ياسمين : و انا اكتر ، خلص انا منيحة لا تبكي حبيبتي ، فوتي يلا

__________________________________

علاء : اهلين مهوووش

مها : اهلين فيك ههههه

قصي : الحمدلله عسلامة ياسمين

سهى : بتقلي امي الولد حلو كتير

علاء : يا حبيبتي يا ستي كتبت قصيدة ولا بعدها ؟

الجميع : هههههه

مها : نهى مين اخدها ؟

علاء : ابوي اكيد

سهى : ريم حامل ، بس خليها مفاجاة هلا لنهى

مها : يييي الف مبرووك يا حبايبي ولكم كبرتونا

علاء : هههه الله يبارك فيكي يارب

مها : كيف صابر ما تخبر اهلك يا حرام

سهى : ريم محضرتلها مفاجأة يا حبيبتي

__________________________________

هيثم : اهلا و سهلا

منى : يا حبيبي مباارك الموهوب الله يحفظه

مها : مبارك هيثم ، الحمدلله عسلامتها

نهى : الله يحميه شو هالحلاوة هاد يا عمتو ، اسم الله عليك

زينة : تسلموا يارب الله يبارك فيكم

سهى : كيف صحتك ارتحتي ؟

زينة : الحمدلله ، احسن شوي

جمانة ( بصوت دلع ) : مسااا الخييير

زينة ( بفرح ) : اهلااا

منى ( مصدومة ) : شو جابها هاي

سهى : مين هاي ؟

منى : صاحبتها جمانة

جمانة : مبروووك يا قلبي شو هالحلاوة هاي

زينة : بشبه احمد صح ؟

هيثم : زيييينة

جمانة : اه كتير بشبهه ، كيفك خالتو شو اخباركم ؟

منى : الحمدلله

سهى : شو رح تسموه ؟

هيثم : لسا محتا...

زينة ( مقاطعة هيثم ) : احمد ، لانه بشبهه طالع

هيثم : ما بدنا تكرار اسماء

مها ( بهمس لسهى ) : يسم بدنك و بدنها على ساعة هالمسا

نهى : يلا اختاروله اسم حلو

هيثم : لو مها ما سمت امير كان سمينا احنا

مها : امير لابقله حبيبي الله يحميه

زينة : اه عليه شبه منه برضو ، بس على احمد معطي اكتر

سهى : سبحان الله هههه

منى : مين رح يروحكم ؟

سهى : ابو علاء ، بدنا نميل عند مها تيجي معنا

منى : اكيد رح اجي ، لانه كل الشباب بعد التراويح طالعين

نهى : خلص تعالي معنا ما تغلبي ابو احمد يجيبك

مها : يلا احكيله يجي ياخدنا ، هي التراويح يمكن خلصت

__________________________________

امجد : لو جبنا المسدسات معنا ، اوجه يعني

عمر : ههههه جد حاسس حالي طالع حرب

قصي : متحمس اعرف شو الرابط العجيب بين حمزة و ياسمين

عمر : خايف يطلع حبل السيروم اللي علقلها اياه

امجد : هو اللي علقلها اياه يعني ؟

عمر / قصي : استغفر الله ، بعده صايم ههههههه

احمد : خلص هي وصلنا

عدي : احمد انت حاول ما تحكي كثير يعني خليك قاعد و احنا بنحكي عنك

علاء : ههههههههه

وصلنا للمكان ، و كان حمزة قاعد بستنى فينا ..

حمزة : اهلين بالشباب

احمد : اهلين فيك هههه لميتلك كل الشلة و جبتها اعرفك عليها

علاء : حيا الله بحمزة ، انا علاء

حمزة : هلا فيك ، ماشاءالله عليكم

عرفته على كل الشباب باقل من ربع ساعة ، و بعدها بلشنا بالمفيد ..

علاء : تشرفنا فيك ، يا ريت تعرفنا عليك بظروف احسن من هيك ، بس الحمدلله عكل شي

حمزة : اكيد الحمدلله دائما و ابدا

عدي : بس ما فهمنا كيف ياسمين اخدت تلفونك و حكت مع احمد منه ؟ انه شو اللي خلاها توثق فيك ؟

احمد : سوري حمزة بس عشان احنا عارفين ترباية بناتنا ، و متأكدين انهم ما بعملوا اشي متل هيك

حمزة ( مبتسم ) : معكم حق ، بس انا جارهم بالعمارة ، اشتريت الشقة اللي فوق دار خالتك من جديد يعني ، و لما شفتهم بالمستشفى عرفوني

امجد : اي اهلين جارهم

علاء : يعني وثقت فيك لانك جارهم ، طيب ما خطر ببالك تحكي لابوها مثلا ؟

حمزة : مستحيل اعمل هيك ، يعني البنت انتختني و بعدين انا كان عندي مقدمة عن وضعها قبل ما اشوفها

امجد : اسمع نطفت قلبي يا بتحكي كل اشي عندك يا اما انا هسة بطلع دخان من اذني

حمزة : ههههههه طول بالك ، ما في اشي كبير بس انه ياسمين قدمتلي خدمة ما بنسالها اياها طول حياتي ، و حبيت اردلها المعروف

احمد : انا بدي اعرف انت كيف عرفتني ؟ و شو بتقول انه عندك مقدمة عن علاقتنا ؟

حمزة : يوم ما كنت انت و اياها بالمول ، خواتي و اخوي شافوكم ، و اجو حكولنا

علاء : من وين عرفوها اصلا ؟

حمزة : الصراحة قصة غريبة

عمر : قُصّها علينا من فضلك

قصي : لاني تحمست كسيرا كسيرا

الشباب : ههههههه

حمزة : هههه الظاهر ما رح تحلوا عني غير لما تعرفوها

احمد : هيك اشي ، الله بلاك بفضوليين الليلة

حمزة : هاد يا سيدي ، يوم ما شريت الشقة ، و نزلت بدي اروح على بيت اهلي ، لقيت على باب العمارة صبية اخدتلي عقلي و قلبي معها من اول نظرة

عدي : طلع في قصة حب بالموضوع

امجد : قلبي الصغير فقع ، كمل يا حبيبي يستر على خواتك

حمزة : هههه ، المهم هاي البنت طلعت الدرج و دقت باب بيت ابو امير و فتحولها ، سمعت بنت قالت : هي اجت سيرين

الشباب ( بصوت واحد و عيونهم على علاء ) : سيرييييين ؟

حمزة : مالكم انصدمتوا ؟

احمد : سيرين و لا ياسمين ؟

حمزة : جاييك بالحكي ، ثاني يوم حكيت لأهلي عنها و راحوا يشوفوها عاساس انها ساكنة بهاد البيت ، حكتلهم اسمها سيرين ، و راحت امي و خواتي و تأكدوا انه البيت في خمس بنات و ولا وحدة اسمها سيرين ، بس يومها شافوا ياسمين ، و هيك قدروا يعرفوها بالمول

علاء : شو مواصفاتها هاي سيرين اللي شفتها ؟

حمزة : بتشبه ياسمين ، بس اقصر و مو بنحافة ياسمين

عمر : عصاية طقي ما حدا مثلها مهي

احمد ( بزور عمر ) : هش .. ( التفت لحمزة ) : طيب شو المعروف اللي عملته معك ياسمين ؟

حمزة : نادتني بالمستشفى بس راحوا اهلها عنها ، و حكتلي انت بتدور على سيرين ، استغربت صراحة ، بس قالتلي خد هي رقمها لاني مو حافظ رقم امها

علاء ( بغضب ) : و حكيت معها ؟؟

حمزة : لا لا اصلا وعدتها لياسمين انه امي هي اللي تحكي ، و فعلا انا هاد هدفي

عدي : حكيت مع امها ؟

حمزة : اه امي حكت اليوم و ردت عليها سيرين اعطتها امها

احمد : اما قصة من الاخر ، طيب حمزة معلش سامحنا على فضولنا خصوصياتك كان المفروض انك تحتفظ فيهم بس احنا جد كنا مستغربين

حمزة ( بعدم اهتمام ) : بسيطة ، طيب معلش سؤال انتوا بتعرفوها لسيرين ؟ قصدي في حدا بعيتلكم يعني ؟

عدي : الله اعلم

عمر / امجد / قصي : ههههههه

علاء ( بغطي على الشباب ) : شو حكت امها ؟

حمزة : اليوم كنا حابين نيجي ، بس قالت لبعد العيد

احمد : الله يكتبلك اللي فيه الخير ، ان شاءالله تكونوا بتستاهلوا بعض

حمزة ( باستغراب ) : ما فهمت !!

علاء : قصده اذا فيكم خير لبعض الله بكتبلكم نصيب

عدي : اكيد الطيبون للطيبات

امجد : طيبون بشكل لا يوصف ههههه

قصي : لو يعرف مين سيرين ليشلخ شعره

عمر : خلينا نلبسه اياها و نخلص ههههه

امجد : حوينته هههع

الحلقة الثانية و العشرون :

هاد اليوم كان يحمل اخبار حلوة ، و غريبة ما بتخطر عالبال ..

اول اشي ، تصبحت بمفاجاة من ريم ، عالسحور خبرتني بانها حامل ..

مع انها لو ما انا تذكرت انها لساتها بتصلي ، يمكن ما كانت رح تخبرني ..

علاء : ريم

ريم : نعم حبيبي ؟ بدك اشي كمان احطه

علاء : عقلك بالاكل بس هههه لا بس كانك لساتك بتصومي ، مو كنتي منكدة عشان ليلة القدر رح تكوني معذورة فيها و عاملتيلي قلق و حالتك حالة

ريم ( خجلت ) : اه ؟ يعني لا الحمدلله ما رح يروح عليي اشي السنة رمضان كله رح اصومه

علاء : ليه ؟ بطلتي بنت ههههه

قامت من محلها ، و قربت مني بدلال ..

رفعت ايدي ، و قعدت بحضني ، و رجعت مسكت ايدي و حطتهم مع ايديها على بطنها ..

مالت براسها عليي ، و غمرته بحب ..

انا كنت اتطلع عالساعة لانه مو ضايل اشي للاذان ، و مو وقت هالحركات ..

علاء : ريم ؟ مالك يا بنت ناوية تفطرينا اليوم ههههه

ريم ( مسكت وجهي بايديها و بتتأمل فيي ) : رمضان الجاي بازن الله رح نكون تلاتة

انا ما فهمت عليها ، غير لما رجعت حطت ايدها على بطنها ، و قالتلي : انا حامل

بنفس الوضعية اللي كنا فيها ، بس حملتها و قمت فيها عن الكرسي ..

علاء ( بفرح ) : حامل ؟ يا الله الحمدلله مو مصدق شو هالمفاجاة هاي متى عرفتي ؟

ريم : ههههه طيب خلينا نقعد ليه وقفت ؟

رجعت قعدت ، كنت متل الاهبل و مو عارف شو عم بساوي ..

علاء : احكيلي كل اشي بالتفصيل

ريم : ما في اشي ، اصلا المفروض استنى كمان كم يوم بعدين افحص ، بس قلت خليني اجرب ما بخسر ، و خليت قصي يجيبلي فحص

علاء : يعني قصي بعرف و انا لا ؟

ريم : هههههه كبر عقلك ، عملت هيك عشان تزبط المفاجاة

علاء : صراحة مو شايف مفاجاة لولاي انا سالتك ما كنت رح تحكي

ريم : لا كنت رح اعمل بس انت خربت عليي بسؤالك الفضولي

_________________________________

كل احلامي و تخطيطاتي ، لهاللحظة اللي بنتستناها من اول ما تزوجنا ، او يمكن و نحن خاطبين كنا نفكر فيها ..

خربلي اياها زوجي المصون ، بسبب فضوله و حساباته اللي ما بعرف ليه شاغل باله فيه ..

يمكن الحق عليي كنت ازودها باهتمامي بمواعيدها قدامه ، و لفتت انتباهه الها ..

المهم انكشف السر ، بس لسا المفاجاة اللي نفسي فيها ما فات اوانها ، و اقترحت على علاء انه نعملها مع دار خالتي ..

لانها كتير مشتهية تشوفني حامل ، رغم انها بتحاول ما تبين اهتمامها من خلال كترة الاسئلة ، بس انا حاسة فيها ..

و اشي طببعي ، لانه كل ام بتحب تشوف احفادها ، و تفرح لاولادها ..

سهى : شو صار معك بالتحليل ؟

ريم : اي تحليل ؟

سهى : الحمل ! مو بعتي قصي يشتريلك من الصيدلية

ريم : ااها لسا ما فحصت ، لازم عالريق

سهى : طيب لا تنسي اتطمنيني

ما قدرت اخبي عن امي ، لانه الفساد قصي نسيت اوصيه يخبي ..

اكيد معه حق ، لانه كمان متلهف يصير خال ، و يفرحلي ..

_________________________________

ياسمين : ولك مبروووك

ريم : وطي صوتك ، بلاش سيرين تسمع

ديمة : بدها تعمللهم مفاجاة

ياسمين : بدي احضر المفاجاة ، حبيبتي خالتو نهى يا الله شو رح تنبسط

ريم : بنصورلك فيديو

ديمة : ههههه تحشيش

ياسمين : شو حكى علاء ؟

ريم : اول اشي زعل لاني كنت مخبية عنه بس بعدين راضيته بس اقترحت المفاجاة عليه لدار اهله

ياسمين : على طول لدار اهاليهم بنبسطوا

ديمة : تعالو نرجع عالقعدة بلا ما يشتلقوا علينا

نسيت كل احزاني بس سمعت خبر ريم ، يا الله شو فرحتلها ، و كأني انا ..

يا رب متى رح يجي دوري انا ، المهم يكون لاحمد و بس هالخبر ..

آيات : وين رحتوا ؟

سيرين : شو حكيتوا علينا

ياسمين : كل خير ، انتي بالزات خليكي ساكتة

ديمة : هههههه يمة

آيات : طيب ياسمين معلش انا بدي اسالك عن شغلة ، شو صار مبارح مع احمد ؟ كيف راح عالمستشفى ؟

ريم / ديمة / سيرين ( بصدمة ) : انتوا عرفتوا ؟

آيات : اكيد رح نعرف

ياسمين : ... كان نفسي اشوفه ، و هو كمان ، بس بابا منعه

سيرين : يا عليي انا

ياسمين : من لما اجيتي كنت بدي اسالك عنه ، بس ما توقعت تكوني بتعرفي

ريم : ياسمين معلش بدنا نسالك سؤال و احكي الجواب بصراحة ، انتي و احمد لسا بدكم بعض ؟ ناويين ترجعوا لبعض ؟ لانه من يوم قصة المول ما عرفنا شو صار بالزبط

ياسمين : هاد اخر كلام كان بيناتنا ، و اتفقنا انه نكون لبعض

آيات : رح تستنيه شو ما صار ؟

ديمة / سيرين ( بتطلعوا بياسمين ) : ...

ياسمين : لآخر يوم بحياتي ما رح اكون الا اله ، لسا مو مصدقين اني بحبه يا ناس شو عم بصير معكم ؟

سيرين : يا ريتك وافقتي لما رجع خطبك

ديمة : ليه رجعتي رفضتيه ؟

ياسمين ( بغصة ) : ... الجواب صعب احكيه ، ما حدا رح يفهمني

ريم : نحن فاهمينك ، و معك حق ، كان لازم ياخد درس عاللي عمله فيكي

ياسمين : ... سكروا عالموضوع خلونا مبسوطين

حنين : هي قربوا يجوا امهاتنا ، و بابا وينه ؟

رنين : مع مين رح يجوا ؟ بحكي مع بابا اشوفه وين حتى يجي

_________________________________

هيثم : بعدين معك يا بنت الحلال ، شو هالعمايل هاي ؟ ليه مصرة دايما تعملي تصرفات بتزعجني

زينة ( بتباكي ) : شو عملت ؟

هيثم ( بكز على اسنانه ) : شو عملتي ؟ لا تخليني اجمع المستشفى على اصواتنا ، مفكرتيني اهبل ما بعرف انه جية جمانة مو محض صدفة

زينة : الله يسامحك ، معقول بترفع صوتك و بتزعل مرتك اللي جابتلك ابنك بنفس اليوم

هيثم : عمرك ما رح تفهمي عليي

زينة : انت بعمرك ما بتحبني ، شوف زياد كيف بموت على اختك مها هاد و هية جابتله بنات ، انا جبتلك ولد و يا ريت راضي حضرتك

هيثم ( بضرب على راسه ) : انتي كيف بتفكري نفسي افهم ؟ زينة اسمعيني منيح ، ما رح اسكتلك من يوم و طالع ، تصرفاتك رح تصير محاسبة بشكل دقيق و اي خطا ما رح ارحمك

زينة ( بتبكي ) : روح من عندي ما بدي اشوفك

هيثم ( بهز براسي و بهدد باصبعه ) : بنتحاسب .. رح نتحاسب بوعدك

_________________________________

ابو علاء : فرحتنا برجعتكم لبعض اختلطت بشغلات ثانية عكرت عليها

نهى : الحمدلله ازمة و مرت ، المهم هلا اتدير بالها على بناتها و توعيهم بدل ما تتركهم

منى : انتوا ليه ما حكتولي عن ياسمين انها بالمستشفى ؟

سهى : و الله ما حبينا نقلقكم

منى : قصدك ما كان بدكم احمد يعرف ، بس كيف عرف ؟

نهى / سهى / مها / ابو علاء ( مصدومين ) : كيف عرفتوا ؟

منى : اه اتطلعوا ببعض اكيد رح تنصدموا ، مفكرين في اشي بضل مخبى ، ليه ابني هيك حظه بدي افهم ( دمعوا عيونها ) هي رح يسافر و يتركنا كلنا

مها ( متفاجاة ) : يسافر ؟ وين

سهى : كنا رح نحكيلك ، بس ما بدنا ياسمين تعرف

منى : انتوا كيف عرفتوا ؟

نهى : علاء و ريم خبرونا مبارح

ابو علاء : ان شاءالله آية الرزق ، نص شباب البلد متغربين يا ام احمد ، شو بدنا نعمل ، البلد ما فيها شغل

منى : شو هالحكي عاساس انا صدقت انه مسافر عشان الشغل بس

مها : ... الحق على بنتي سامحيني

سهى : خلص يا جماعة هي الحياة هيك ، فيها الحلو و فيها المر ، يلا هي وصلنا بالله انكم تغيروا هالموضوع قدام البنات خلينا ننبسط

مها : اهلا وسهلا ، خليني اتاكد من زياد وينه

_________________________________

حمزة : شو بدكم تروحوا ؟

احمد : مثل ما بدك ، بتروح على القيام ؟

حمزة : ايام ما اكون معطل اه بروح ، و بالمستشفى اذا صحلي بزرق اصلي ركعتين

علاء : الله يقبل و الله شغلك صعب ، الله يعطيك الف عافية

عدي : حمزة انبسطنا كثير بمعرفتك ، جد حسيت كانه بنعرفك من زمان ، ان شاءالله بنلتقي بالايام الجاي

احمد : بعد ما اسافر خليكم على تواصل

حمزة : وين مسافر ؟

احمد : قدمت على شغل بالسعودية و رح اسافر بعد العيد

حمزة : بالسلامة ، ياسمين كيف رح تتركها ؟

احمد : راجع ان شاءالله بس تهدى الامور ، ما رح اتركها

حمزة : يلا منيح احسن من غيرك

علاء : عن مين قصدك

حمزة ( تنهد ) : قصة قديمة خاصة شوي

عدي : الله بعين

قصي : يلا شباب ، امهاتنا صاروا ببيت خالتي مها ، عمي ابو علاء موصلهم و رايح معهم

احمد : معقول لو اروح بخلوني اشوف ياسمين

الشباب : ههههههه

حمزة : و الله حابب انك تشوفها ، مسكينة مبارح كان وضعها صعب شفقت عليها

علاء : انت الثاني ايوا خوفوا بزيادة

حمزة : ههههههه ما بعرف اكذب انا

احمد : لازم اشوفها اليوم

حمزة : يعني طريقنا وحدة امشوا يلا

_________________________________

تركت الشباب بعد لقاء ، مليء بالاحاديث المفصلة ..

قصة احمد و ياسمين اثرت فيي كثير ، و ذكرتني بقصة حب ، انطوت ..

بس لما حكالي انه رح يسافر ، بدني قشعر ، و تذكرت تفاصيلها ..

ما بنسى هداك اليوم ، اللي رجعت فيه اختي عالبيت ، منهارة ..

و كان السبب سفر الشب اللي حبته ، و تخطيطاتهم بالارتباط كلها انهدمت ..

لانه طلب منها تستناه لما يرجع ، و دعست على قلبها يومها ، و قالته ما رح انتظر وَهِم ، و لو كنت بتحبني ما تركتني هيك ..

ما بعرف انا على مين الحق ، بس اللي بعرفه انه قلبها انكسر كثير ، و مرضت مرضة قوية ، و ارتمت شهر بالفرشة ، و خسرت شغلها لانها ما قدرت ترجع على نفس المكان اللي جمعها معه لسنين ..

حسين : شو وين كاين ؟ طولت

حمزة : مع صحابي

حسين : كانه وجهك تعبان ، صاير اشي معك ؟

حمزة : لا ما فيي اشي ، وين خواتي ؟

حسين : ما بعرف ، بدك اشي ؟

_________________________________

ابو امير : يا اهلا و سهلا

ابو علاء : اهلين فيك ، ما شاءالله منور

نهى : الله يهنيهم

سهى : طالعين شهر عسل ههههه

مها ( بهمس ) : اسكتي لسا زعلان ، بعدنا ما تصاحلنا

سهى ( بهمس ) : لا معقول قدر يقاومك هههه

منى : ههههه يقطع شركم بلاش يسمعكم الزلمة

مها : خليه يسمع بلكي بحس

سهى : الك عين

ياسمين : مسا الخير

ابو علاء : يا اهلا يا مرحبا بياسمين الزعرة ام المشاكل

البنات : هههههه

ياسمين : الله يسامحك عمو

سيرين : بابا فاهملك لا تحاولي

مها : متل ماهر بقلها و الله ما حدا غيرك بعمل هالعمايل يا خالي

منى : تعالي حبيبتي ، سلامتك ( ضمتها لصدرها ) خوفتيني عليكي

ياسمين : انا منيحة خالتو ، ما يحرمني منك

ديمة : طمنونا كيف ولي العهد ؟ زينة كم ريشة حطت على راسها اليوم

آيات : شو رح يسموه ؟

نهى : ههههه الله يهديها

منى : لسا ما قرروا

مها : بدها احمد قال بشبهه و بشبه امير ، بس هيثم ما بده تكرار اسماء

ياسمين ( بعفوية ) : يعدمني اياها

امها و خالاتها و البنات : ههههههه

ابو امير : عيب بابا مرت خالك بتضل

ابو علاء : و الله هالزينة ما بعرف كيف طبقت هيثم ، مين دله عليها مو عارف

نهى : صاحبه

سهى : الحمدلله ما اتدخلنا بجيزته ، حاله من حاله خطب و تجوز

منى : من شطارتنا لو جوزناه وحدة بتفهم ما كان انبلينا فيها

ابو امير : النصيب يا جماعة مالكم ، انت تريد و انا اريد و الله يفعل ما يريد

ابو علاء : صدقت ، ريم كيف حالك عمي ؟ ما لحقتي تشتاقيلنا مبارح شفتينا

ريم : ييي الله يسامحك ، اصلا اليوم رح نجيبكم عنا كمان ، لو كل يوم بشوفكم ما بزهق منكم انتو متل اهلي

نهى : الله يرضى عليكي و الله انتي متل سيرين عنا

سيرين / ديمة : لقد تاسرت كسيرا

سهى : هههه ان شاءالله ببعتلكم حماوات متل حماة ريم

منى : ...

_________________________________

عدي : علاء ، لا تبين انك حاكيلي اشي قدام ديمة ماشي

احمد : شو حاكيلك ؟

علاء : هو المفروض سر بس صاحبك خرج ينحكاله اسرار

عدي : يا زلمة شو بعرفني انه سر ، خلص احكيله عادي

علاء : ديمة وافقت على عدي ، بس ما بدها حدا يعرف

احمد ( بغصة ) : يا عيني عليك صبرت و نلت ، التمام على خير يارب

عدي : تسلم ، الحمدلله مع اني كنت فاقد الامل منها

علاء : لوعتك مزبوط

احمد : يلا هي ديمة و سيرين اجا نصيبهم

علاء : معقول تكون نفسها سيرين ؟ و الله مو مستوعب

احمد : اه يا زلمة مهو حكالك ياسمين اعطته الرقم

علاء : معقول تكون سيرين حاكية لياسمين عنه ؟ يعني مثلا مهتمة فيه كمان ؟

احمد : و الله يا صاحبي هدول ما عليهم حزر ، يعني احتمال كبير لانه ياسمين واضح انها استغلت الموقف بعز دين وضعها السيء

عدي : ما كان لازم تخبوا عنه ، صراحة لو كنت مكانه بزعل

علاء : لا عادي ، عشان ياخد راحته بالحكي اكثر هههه

احمد : حمزة طيب كثير والله ما توقعته هيك

عدي : الله يعينه على سيرين ههههه

علاء : نعم ؟ و انت وضعك احسن يعني

احمد : ههههه لا حرام و الله ما في مثلهم هالبنات

علاء : شوفوا مين بحكي ، الله يرحم يوم مقلب الكوفي شوب لما كنت بدك تربي ديمة و ياسمين و لا فقدت الذاكرة مع الحادث ؟

احمد : ...

عدي : هههه خلص علاء مرقله اياها

علاء : يلا عشان الدنيا رمضان و المسامح كريم

احمد : شكرا مولاي ، المهم دبرولي ياسمين هسة بدي اشوفها

علاء : هسة برن على ريم و بخليها تزبطلنا موعد غرامي لعصافير الحب

_________________________________

ريم : علاء برن ، الو حبيبي

علاء : كيفك حبيبتي ؟ اسمعي قربنا نوصل بس احمد معنا و بده يشوف ياسمين ضروري دبريها بمعرفتك

ريم : ما بنعقل احنا هههه يلا هلا بنشوف شو رح يطلع بايدي

يعني انا ما الي على هالتخطيطات ، بس احسن اشي احكي لياسمين انه تقعد عاقلة و هاد اختبار الها ..

ياسمين : يا ريتك ما حكتيلي

ريم : خلص معناها اعملي حالك ما بتعرفي ، انا بقدر احكي لعمو ابو علاء بس عشان ابوكي ما ينحرج منه

ياسمين : خلص هلا بدبرها ، احمد لازم يشوفني

_________________________________

عمر : شو شباب رايحين عند عمتي ؟

قصي : اكيد لازم نشوفهم

امجد : احمد شو رح يصير فيه ؟

قصي : ما بعرف ، المهم امجد روح من هاد الشارع خليني اشتري كم شغلة

عمر : شو رح تشتري ؟

قصي : معقول نفوت بايدينا ، ياسمين كانت بالمستشفى مبارح ، المفروض نقوم بواجبها ولا شو رايك امجد ؟

امجد : على الرحب و السعة يا بني ، احلى واجب لام عيون عسلية

عمر ( بغني ) : و يخرب بيت عيووونك يا ياسمين شو حلوييييين

قصي : ايواااا ، ناقصنا هسة احمد يسمعك انت و اياه ، يولع فيكم السيارة

امجد : شو دخلنا ، البنت حلوة ئي

عمر : شو رايك تخرس انت ، بلاش افسد عنك لبنت عمي اخليها ترميك شلوت بطرف اصبع رجلها

امجد : وينها بنت عمك هي سائلة عني و عن حالتي ، خليها اخرتها تندم على هالعمايل ، كل يوم ببعتلها رسالة بكرا حندم يا جميييل

قصي : خلص وقف عندك ، بدي اشتري ورد شو اجيب لونه ؟

عمر : ولك روح من وجهي احسن ما اتسحر عليك ، قال شو اجيب لونه

امجد : ههههه اصفر عنوان الصداقة

قصي : بنفتحي عنوان الزناخة

عمر : هههههه

_________________________________

لما قالتلي ريم انه احمد جاي مع الشباب ، و حاطط بباله انه يشوفني ..

قلبي طار و راح لعنده ، حسيت حالي كاني اول مرة رح اشوفه ..

الحب كان مسيطر عليي ، بس هالمرة شغلت عقلي منيح ..

ياسمين : بابا ممكن نحكي شوي

ابو امير : مالك بابا مو شايفتيني قاعد مع جوز خالتك

ابو علاء : يا زلمة هو انا غريب قوم شوف مالها ، احسن ما تعمل اشي بحالها

الجميع : هههههه

ياسمين : بابا احمد جاي يشوفني

ابو امير : ...

ياسمين : الله يخليك بابا وافق ، انا بعرف انك بتحبه و ما بهون عليك ، بس بنحكي شوي و بطمنه عليي و خلص

ابو امير ( بتنهد ) : ماشي ، لانك حكتيلي و ما تصرفتي من راسك رح اسمحلك

ياسمين : شكرا بابا

ابو امير : بس بشرط ، قدامنا مو لحالكم

ياسمين : حاضر اللي بدك اياه بصير

_________________________________

ريم : يلا علاء اطلعوا ، عمو زياد وافق يشوفوا بعض عادي خليه يطلع معكم

علاء : تمام ، هي عم نصف بالسيارة

احمد : شو ؟

علاء : اطلع اليوم الحظ محالفك يا كبير ، بس خليك عاقل

عدي : هيني ماسك بايده ههههه

علاء : مال قصي و الشباب تاخروا ؟

احمد : هيهم اجوا

عمر : شو يا شباب بدكم تطلعوا

قصي : انا اكيد طالع

احمد : شو هاي ؟ لمين الورد ؟

عمر / امجد ( بتطلعوا ببعض و بضحكوا ) : للورد

قصي : يعني معقول بعد كل اللي صار ما نفَرّح ياسمين باشي منا ، خصوصا انا كنت سبب بكل اشي

احمد : لا ما دخلك هات الورد انا باخده عنك و بعطيك حقه ، كم ؟

قصي ( مذهول ) : نعم يا حبيبي ؟ ليه انت طالع اصلا ؟

علاء : اه سمحوله بالمشاهدة عن بعد

الشباب : هههههه

امجد : انا اطلع طيب ؟

عمر : يا زلمة مالكم ؟ اكيد اطلع ، الاشياء الزاكية اللي جبناها مين بده ياكلها

عدي : و الله طلعتوا مزوقين اكثر منا

امجد : اه طبعا شو مفكر ، يلا let's go baby

علاء : احمد خد رش عطر ، ايوا خليها تسووخ اكثر ما هي سايخة

عمر : برجلكم اليمين يا رجااالة ، خدوا نفس وسموا بالله

امجد : استعنا عالشقا .. بالله

قصي : بالله عليكم تسكتوا ، قلبي بدق

احمد : نعم ؟

علاء : امشي انت ، خلصونا شباب مالكم

عدي : ههههه مو طبيعين

عمر : انا برن الجرس وقفوا وراي

امجد : قصي ارجع اخر واحد الطابور من الكبير للصغير

احمد : استغفر الله

علاء : الله يعدي هالزيارة على خير

_________________________________

اسيل : الجرس برن

ابو امير : انا بفتح خليكم .. يا اهلا بالشباب

الشباب : السلام عليكم

ابو امير : و عليكم السلام ، يا مرحبا ليش مغلبين حالكم

قصي : سلامة قيمتك عمي

ابو امير : يسلمو هالايدين ، احمد كيف حالك ؟

احمد : بخير يا عمي ، تسمحلي ادخل ؟

لما شفت احمد قدام الباب ، تذكرت حالته كيف كانت مبارح ..

ندمت اشد الندم عاللي عملته فيه ، طول عمري بعتبره ابن الي ، و محبته كبيرة عندي ..

ابو علاء : اهلا

عدي : كيف حالك عمتي ؟ الحمدلله عسلامتها

امجد : خالتي منورة بيتك الله يخليكي يا نوااارة

مها : يا حبايبي الله يخليلي اياكم ، تفضلوا

عمر : مع انه العيد قرب بس يلا قلنا بنيجي نطمن اذا بلشتوا بالكعك ولا لسا

قصي : لا حول ولا قوة الا بالله

امجد : ههههه

ابو امير : ياسمين وينها ؟ هي احمد اجا يشوفها

منى : تسلم يا ابو امير

ابو امير : حقك علينا عاللي صار مبارح ، والله ما كنت بوعيي

احمد : له يا عمي انت بمقام والدي ما بزعل منك لو شو ما صار ، حقك بالنهاية البنت بنتك و..

ياسمين : مرحبا

احمد ( عيونه على ياسمين ) : ...

علاء : يا هلا ياسمين ، سلامتك يا بنت هالمرة زودتي الجرعة و خوفتينا عليكي

ياسمين : ههههه اسفة

الشباب : الحمدلله عسلامتك ياسمين ، كيفك ؟

ياسمين : الحمدلله بدي سلامتكم ، كيفك احمد ؟

احمد ( عيونه مدمعين ) : الحمدلله ، سلامتك يارب

مها : لا الحمدلله كتير احسن صارت و صامت اليوم كمان

ابو امير : هي الصالة ما فيها حدا ، اقعدي انتي و احمد شوي

ديمة : احنا بالصالة عمو ، نضل نحرسهم ؟

علاء : انتي بالذات تعالي هون

سيرين : انا اجي علاء ؟

علاء : يا ريت

البنات : ههههههههه

_________________________________

لما طلت علينا ياسمين ، عبقها غطى على كل الجو ..

سحرها الخاص ، حتى دقات قلبها كانت واضحة الي ..

لما سمحلنا ابوها نقعد لحالنا ، حملت باقة الورد معي ، و اعطيتها اياها على طول ..

احمد : سلامتك حبيبتي

ياسمين ( بخجل ) : الله يسلمك ، شكرا عالورد

احمد : هههه سامحيني مقصر ، المهم طمنيني كيف صرتي ؟ شو صار معك بالضبط ؟

ياسمين : اهم اشي صار اني شفتك حبيبي ، اشتقتلك مووت احمد ، متى رح نرجع لبعض من جديد ؟!

احمد ( بحسرة ) : كم شهر ان شاءالله ، المهم انتي حاولي تتخرجي الفصل الاول

ياسمين : صعب و الله يا احمد المواد اللي اسقطتهم كانوا رح يفتحولي المواد اللي تاجلت للفصل التاني

احمد : خير خير ، شو مشاريعك بعد العيد ؟

ياسمين : امتحان الرخصة ، ادعيلي ههه

احمد ( مبتسم ) : موفقة شوفيرة ياسمين

_________________________________

رزان : قولتك بصير نصيب بين حمزة و سيرين ؟

رانيا : ان شاءالله ازا فيها خير اله بجمعهم

رزان : آمين ، و عقبال عندي انا و اياكي ، يا حسرة علينا ما حدا حبنا و لا حدا دور علينا

رانيا : ... الحمدلله

تركتني اختي و بقيت منكمشة على حالي ، استرجعت ذكرياتي القديمة ..

استرجعت حبي القديم ، و حبيبي اللي راح و ما عاد سأل عني ..

_________________________________

ام ماهر : هيثم ، مالك يا حبيبي ؟ صاير اشي مع الولد لا سمح الله

هيثم : لا يمة الحمدلله كل اموره منيحة ، بعدك صاحية

ام ماهر : بدي اكوم اصلي ، و ابوك بالجامع مع اخوتك

هيثم : الله يقبل ، انا تعبان شوي بدي انام و صحوني كمان كم ساعة

ام ماهر : سلامتك ارتاح يمة ، بصحيك تتسحر

هزيت براسي لامي ، و رحت اتسطح بكل ثقلي اللي على كاهلي ..

انا شو اللي عملته بحالي ، كيف اقتنعت اتزوج هيك بنت ..

ما قدرت احبها ، و لا حتى حببتني بحالها ..

لسا قلبي و كل مشاعري عند غيرها ، انا تعبت ..

اتطلعت بالساعة ، لقيتها ١١ ونص ..

هيثم : الو

نهى : هيثم ؟ خير حبيبي مال صوتك ؟ ابنك في اشي او زينة ؟

هيثم : لا مناح ، بس انا مو منيح ابدا ، تعبان كثير يا نهى و ما حدا بعرف وجعي الا انتي

نهى : احنا هلا طلعنا من دار مها ، و بدنا نروح عند علاء ، تعال

هيثم : لا باجي عندك عالبيت احسن ما بدي حدا يعرف اشي

نهى : ماشي و لا يهمك ، قوم صلي بترتاح

هيثم : ان شاءالله

_________________________________

ابو علاء : خير ؟

نهى : تعبان ، بس لا تجيبوا سيرة ما بده حدا يعرف عنه اشي

سيرين : احنا ليه رايحين عند دار علاء ، مبارح رحنا

ابو علاء : اخوكي اصر نيجي ، بعدين شوفيها لو رحنا

سيرين : نياله علاء ، بابا شو هالمحبة اللي مو جديدة اصلا

ابو علاء : ههههه بكرا بس تتجوزي رح ازورك اكثر

نهى : قلبي نقز من صوت هيثم ، الله يستره خايف يكون علق مع زينة بسبب كلامها حرام نفسا و باثر على حليبها

سيرين : يختي نفسا و بتحكي هالحكي ، اي تخف علينا ما حدا تجوز دكتور غيرها

ابو علاء : خلص فكونا من سيرتها ، لا بطيقها و لا بطيق اسمها حتى

سيرين : هههههه يلا وصلنا

علاء : شوي شوي حبيبتي امشي

ريم : بلشنا

علاء : الحق عليي ، بتحبي احملك

ريم : رح تخرب المفاجاة وطي صوتك ماشيين ورانا

علاء : اه صح ، اسمعي شو رايك اعمل حالي متفاجأ قدامهم و هيكا

ريم : يا ربي تصبرني عليك و هيكا

سيرين : بست ، شو مالكم ؟ كانه مخبيين اشي علينا

علاء : يا لطيف عالحاسة العاشرة بعد المئة ، لا مو مخبيين امشي مع اهلك ليه لزقتي فينا ؟

سيرين : ماشي يا علاء ، بكرا بس اخطب ان شاءالله وجهك ما بدي اشوفه

ريم : ههههههههه

علاء : حاطة العريس بجيبتك اسم الله ، هو في حدا قابل يريحني منك ، عاليوم يجي واحد اهبل ينبلي فيكي

سيرين : هههههه مالك رح تفقع من غيرتك مني

ريم : ههههههه رح انادي خالتو تفك بينكم قبل ما ننفضح بالعمارة

سيرين : كيف متحملة العيشة مع هاد المخلوق ؟

ريم : الحب يصنع المعجزات

علاء : يا روحي انتي و حياتي وعمري ، اوعي تجيبيلي بنات لعمتهم طالعين ، بدي كل خلفتي تطلع الك و بس

ابو علاء : مال اصواتكم طالعة ؟ يلا فوتوا على هالبيت خلينا نرتاح شوي طول اليوم و احنا بنلف

نهى : يلا افتحي الباب يا ريم

ريم : غمضوا عيونكم

نهى : يوووه

علاء : انا اغمض ؟

ريم : اكيد كلكم ، يلا استنوا شوي ، يلا يلا فتحووو

سيرين : وااااو ، شو هاي الزينة ليه

ريم : اقراوا

علاء : It's baby .. comming soon .. loading

ابو علاء : يا مبروك يا مبروك ، ايوا هاي الاخبار الحلوة

نهى ( بدموع فرح ) : للللليييييشش

الفرحة اللي شفتها بعيون اهلي ، كان الها نكهة خاصة ..

تفائلت بالحياة اكثر ، و تمنيت هاللحظات ما تنتهي ..

الحياة بتمشي ، و بطريقها بتاخدنا لتفرجينا كل انواع المشاعر ..

ظروف صعبة ، بتاخدك لعالم اليأس ، بس بتتفاجأ انك بتلاقي اشخاص ..

كانوا بحاجة لهالظروف اللي اجتك ، حتى يطلعوا من الياس اللي كانوا فيه ..

تماما متل ما صار مع ياسمين و احمد ، و لقاء حمزة فيهم ..

علاء : تقومي بالسلامة يا عمري ، احلى غزالة بالعالم

ابو علاء : الله يهنيكم و يتمملها على خير ، اجا بوقته هالخبر

نهى : ديري بالك على حالك ، وجهك اصفر كانه

سيرين : هههههه بلشنا

نهى : لا لازم تاخد فوليك اسيد ، و اتدير بالها عالغذاء ، تبعدي عن الجزر و البقدونس والكبدة فيهم فيتامين أ بعمل تشوهات للجنين ازا اخدناهم بكثرة بالشهور الثلاث الاولى

ريم : ان شاءالله بدير بالي

علاء : المهم ما تتوحمي عاللي حكتلك عنها

سيرين : سامعة ابنك بحكيلها ديري بالك تجيبي بنات متل عمتهم

نهى : ان شاءالله بتتجوزي واحد يحكليك بدي بناتي متلك

علاء : صحيح ما في حدا هيك و لا هيك ؟ زمان ما سمعت عن العرسان

نهى : امبلا اليوم وحدة اتصلت لابنها

ابو علاء : ما حكتولي

سيرين : ما بدي

ريم : شو مواصفاته ؟

حكتلنا امي مواصفات حمزة بالضبط ، و طلبت منهم يعطوه فرصة و يجي ، لانه يمكن يكون في نصيب بينهم ..

معقول سيرين تعرفه لما تشوفه ؟ ..

_________________________________

مها : زياد ؟ نمت

زياد : لا صاحي

مها : شكرا كتير لانك دخلت احمد عالبيت و سمحتله يشو..

زياد : هاد اللي جاية تحكي فيه ؟ احمد اهم صح نسيت و الله

مها ( قربت منه بدلال و شبكت ايديي ببعض تحت دقني ) : زياد شو هالحكي ، انت عارف انه مجرد باب حتى اقدر احكي معك

زياد ( بتأملني بهدوء ) : ليه هيك عملتي فيي ؟

مها ( قربت منه اكثر ) : اشتقتلك ، بوعدك ما اعيدها

زياد ( بقلد فيي ) : لو بدي اموت

مها ( خجلت ) : ...

زياد : اوعي اسمع هالحكي منك مرة ثانية

مها ( شبكت ايديي برقبته ) : امرك يا روح قلبي انت ، دخيل هالوش انا شو مشتاقله

زياد ( تبسم و ضمني ) : ااخ ، شو احكي انا ؟ الحكي كله ما بوفي حبي الك ، نفسي اتطمن على هالبنات و ارتاح ، مفكرتيني مبسوط لما اشوف بنتي بهالحالة

مها ( بحزن ) : شو رح يصير فيها بس تعرف عن سفر احمد

زياد ( نهض حاله ) : شووو ؟

خبرت زياد بكل اشي حكولي اياه خواتي ، تاثر كتير ، و زعل ..

زياد : يا الله شو هالخبر السيء

مها : مو متخيلة البلد بلاه ، رح افتقده كتير

زياد : انا الحق عليي اللي سمحتلها ترفضه لما رجع خطبها ، تحجج بالشغل و الفلوس ؟ مفكرنا رح نصدقه

مها : الله يعين اهله ، و الله حالتهم بتصعب عالكافر متعلقين كتير فيه

زياد : لا حول و لا قوة الا بالله ، الله يسامحك يا احمد

_________________________________

حمزة : بتتذكر الدكتور اللي كان يحب رانيا و سافر ؟

حسين : اه شو ذكرك فيه لهال..

حمزة : اليوم قابلت شخص قصته مع حبيبته مثل قصة رانيا

حسين : كمان رح يتركها و يروح

حمزة : بس كان خاطبها و انفصلوا ، بتكون بنت خالته

حسين : يعني عالاقل ما اله حجة ما يعرف مكانها ، مع اني مو مصدق هالكذبة

حمزة : معقول دور على رانيا و ما لقاها ؟

حسين : الله اعلم ، ما بحب اتذكر هالقصة ، سميتلي بدني بهالليل

حمزة ( ضرب جبينه ) : وينها ؟

حسين : مين ؟ وين رايح

تركت حسين و ركضت ادور على رانيا بالبيت ، كانت منكمشة على حالها و قاعدة عالتخت بثوب الصلاة ..

حمزة : انتي منيحة ؟

حسين : خوفتني

رانيا : مالكم ؟

حسين : انا عارف عنه اخوكي فجاة بتيجيه حالات

حمزة ( بلهفة ) : رانيا بدي اسالك سؤال و جاوبيني بكل صراحة

رانيا : اكيد شو هو ؟

حمزة : انتي لسا بتستنيه لهداك الدكتور اللي كنتي تحبيه ؟

رانيا ( بدهشة ) : هيثم ؟! شو زكركم فيه ؟

حسين : اه اسمه هيثم تذكرت

حمزة : جاوبيني

رانيا ( بتوتر ) : ما بعرف ، يعني ما اجا نصيبي اصلا

حسين : بس انتي رفضي كتير فرص اجتك ، كانت بسببه ؟ صح !

حمزة : اوعي يا رانيا ، ما لازم تكوني هيك ، هيثم راح و تركك بعد حب كبير بينكم ، بدون ما يرفله جفن

رانيا ( بتبكي ) : بس انا لسا بحبه ، و كل يوم بستناه يوصلني خبر منه ، ما قدرت انساه

حسين / حمزة : ...

رانيا ( بتبكي ) : انا الحق عليي ، ما كان لازم اتعامل معه هيك ، هو قال رح ارجع بعد سنة اخطبك ، بس انا ما تحملت الفراق ، كنت مفكرة انه لو حكتله ما رح استناك رح يبطل يسافر

حمزة : و بعدين ؟ كيف انقطع تواصلكم ؟

رانيا ( منهارة ) : غيرت رقمي ، و طلعت من المستشفى ، و وصيت كل صحباتي ما يحكوله عني اي اشي

حسين : و صحباتك ما قصروا ، هبلة انتي ؟ مو كنتي تقولي مقهورات منك لانه حبك دكتور بدون ما اتطبقيه ، و همة ما صحلهم

رانيا : كنت غبية و صغيرة ما عندي خبرة ، مفكرة الصاحبات بضلوا صاحبات

حمزة : المهم يختي انتي لازم تنسيه ، خلص عيشي يومك ، ارجعي اشتغلي بتخصصك ، و ان شاءالله بيجيكي نصيب احسن منه ، اللي قدك اولادهم بالمدارس صاروا ، و يمكن هو تزوج و صار عنده اولاد ، الله يرضى عليكي انسيه

رانيا ( منزلة راسها ) : ان شاءالله

هديناها ، و تركتها ترتاح شوي ، بعد هالذكريات الاليمة اللي رجعتلها ..

رانيا اختي اللي بيني وبينها ثلاث سنوات ، تخصصت علاج طبيعي ..

بعد ما تخرجت صحلها شغل بمستشفى خاص ، و من خلال دوامها ، تعرف عليها الدكتور هيثم ..

حبوا بعض اكثر من سنتين ، كان ايامها لسا بتخصص ، و ما عرفنا عنهم انا و حسين الا لما تركوا .._________________________________

حنين : ما احلا باقة الورد

رنين : طبعا هاد احمد مو حيا الله ، بس ليه مو جايبها احمر ؟

ياسمين : شو ما كانت ، بتجنن منه

حنين : ياااي ، ما تفرحي كتير ، لساتكم كل واحد بجهة

ياسمين : مو فرحانة اتطمني ، ليه انا بعرف افرح اصلا

رنين : ان شاءالله بترجعوا لبعض و بنفرح فيكم و بنخلص من هالديباجة خلوني اعرف ادرس هالتوجيهي السنة

اسيل : حاسة انس رح يجيب اعلى منك

رنين : حبيبتي انس نيرد ، بده يدرس طب ، انا منيح ازا بجيب بالتمنينات

حنين : يعطيكي العافية

ياسمين : اسيل خانوم بتشجعي انس كتير كانك

اسيل ( بلعت ريقها ) : انا ؟ لا عادي

حنين : يا حبيبي ، بلشنا مراهقة

اسيل : افت ، انا رايحة

تركت خواتي و لحقتها ..

ياسمين : تعي لهون ، شو القصة ؟

اسيل : ما في اشي انتي التانية ، ازا حكيت كلمة بصير مراهقة

ياسمين : هههه ما انتي هلا بفترة مراهقة مو شايفة حالك كيف حساسة كتير

اسيل : لا مو حساسة عادي ، بعدين انا ما بطيقه لانس ، بضل يعلق عليي

ياسمين : اي عادي قليل ما بعلق عليي احمد ، بس بحبه و هو بحبني كمان

اسيل : اتطمني انا ما بحب حدا ، تصبحي على خير

ياسمين : بالله جد ؟ اتطمنت و الله

_________________________________

آيات : خييي ، ما احلى هاليوم

امجد : اه و الله ، اهم اشي احمد شاف الحب

آيات : و ريم حامل

امجد : احلفي ؟ و ليه ما حكالنا هال... علاء كان باركناله

احمد : عشان مرته ما بدها الخبر ينتشر

آيات : عاملين مفاجاة لدار خالتو نهى

انس : عقبال عنا حدا يعمللنا مفاجآت ، غير خبر سفر احمد

امجد : احنا حظنا من الاخر

احمد : احلى مفاجاة انك تجيب المعدل اللي نفسك فيه بالتوجيهي و نفرح فيك

انس : يارب ، صحيح كيف رنين ما اعطتك الدوسية اللي اخدتها مني هداك اليوم ؟

آيات : لا و الله ، بحسها ما بتدرس كتير عادي ماخدة الامور مزح لسا

انس : اسيل اشطر منها ، بحس الها مستقبل هالبنت

امجد : اسيل قلتلي ؟ اي صف هي اصلا ؟

احمد ( عيونه على امجد و بضحك ) : هههههه خلصت ثامن كانه

انس : اه شو يعني الشاطر شاطر من يومه

امجد : طب انقشع من خلقتي احسن ما احطملك هالواجهة ، رووووح ، هاد اللي كان ناقص و الله بنخلص من الكبير بيجينا الصغير

احمد : هههههه انت مالك غيران ؟ عشان بالوسط ما حدا شايفك مثلا ؟ هههههه

امجد : هيهيهيهي هاد اللي شاطر فيه انت ، بكرا بتسافر و بتصير تحلم فيي

آيات : احمد ازا حلمت فيه صور الحلم فيديو امانة حابة اشوف كيف رح يطلع بالحلم

امجد : روحي من وجهي انتي الثانية

احمد : هههههه زعرة

امجد : اه مزهزه عالاخر اليوم انت

احمد : اااخ من كثر الوجع حاس حالي متخدر ، ديمة وافقت على عدي و رح يخطبوا قريب يمكن

امجد : يا حبيبي صفينا انا و اياك عزابية يعني ، يلا الثاني تعذب كثير الله يهنيه

احمد : امين ، انت يلا ما تتاخر سجل ماستر او دور على شغل

امجد : اه بدي اسجل ان شاءالله بعد العيد بروح

احمد : الله يوفقك

_________________________________

ام عدي : الحمدلله ، الله يتمم على خير

ابو عدي : احلى خبر ، من زمان ما فرحنا

عمر : اه و الله قلبنا لوى ، يلا مبارك

غنى : مبارك عدي ، الله يهنيك حبيبي

عدي : الله يبارك فيكم ، متى رح نطلبها ؟

ام عدي : هلا مشغولين بالعيد

ابو عدي : شو مشغولين بالعيد ، بكرا بنروح

ام عدي : بكرا ليلة ٢٧

عدي : عادي بنزورهم بعد التراويح و بنطلبها ، ما باخد اكتر من ساعة زمن الموضوع

عمر : الله عليكي يا ديمة ، خطبتك بليلة القدر

عدي : الحمدلله

غنى : ستي بتنادي ، نعم ستي ؟

ام ماهر : اذا عندكم كاسة شاي لعمك هيثم اعطيني يا ستي

عدي : هيثم هون ؟ هاتي انا بعطيه اياها

ام عدي : بكون قرف منها و من عمايلها

ابو عدي : لا تستغيبي خلص ما النا بحدا ، اعطيني صحن الفواكه قبل ما ياذن

عمر : بدي اروح اشوفه

_________________________________

هيثم : الله يبارك فيكم

عدي : فرجينا صور معك ؟

عمر : قال بشبه احمد ؟ ههههه

هيثم : لا تذكرني ، الوحدة بتحكي بشبه ابوه ، ولا اخوانها

عمر : يعني صراحة الكل شاكك انها معجبة باحمد او اشي متل هيك

عدي ( بزور عمر ) : لااا شو هالحكي هاد

هيثم : عادي عادي مو زعلان ، بس اتطمنوا هاي ما بتحب الا حالها ، حتى حالها ما بتحبها ، لانها دايرة على خراب بيتها بشكل فظيع

عدي : طيب انت شو حاسس تجاهها ؟ الكم سنة سوا

هيثم : ما بعرف ، لما شفتها كنت متقبلها ، بس لما عاشرتها كرهتها و كل يوم كنت افكر بالانفصال ، و مع الحمل حكيت بتتغير و بتعقل ، بس عالفاضي اللي فيه عادة ما بغيرها

عمر : المهم اسمع هالخبر الطازة ، ديمة وافقت على عدي وبكرا رايحين نطلبها

هيثم ( بفرح ) : مباارك ، ايوا هيك فرحونا ، الله يهنيك عمي بتستاهل كل خير

عدي : حبيبي هيثم ، و الله مو مصدق بس حكالي علاء ، كنت رح اصرخ من الفرحة بنص الشركة

عمر : ههههه هبيلة من يومك ، يصحلها اصلا انا كنت متاكد انها بس بتثقل

هيثم : لا ديمة ما بتفكر هيك ، بس كان لازم تاخد استراحة

عدي : المهم و اخيرا انحلت قصتنا و عقبال عند احمد و ياسمين

هيثم : با بي و الله ما الي عين اتطلع في مها و بنتها ، اليوم بس اجت كانت عيونها كلها عتب و لوم ، حردت و بنتها مرضت و ما سالت عنها

عمر : كمان انت اللي فيك مكفيك ، و الله عمتي وردة الله يسعدها انبسطنا بجيتها هون كثير ، و غيرتلنا المود

هيثم / عدي : ههههههه يقطع شرك

عمر : جد بحكي ، و ياسمين الشقية هاي ما في احلى من قلبها بتعمل العمايل و بعدين بتنسى و بتقلك ئي ولو احنا اجدع صحاب

عدي : فعلا بهاي معك حق ، و الله اللي عملته معي ما بنساه ، رغم اني اتفقت مع احمد عليها و كنت اعلق مع احمد و الشباب عليها ، بس نسيت كل اشي

هيثم : الله يحميكم جميعا كلكم كويسين

_________________________________

ديمة : بدي احكيلكم شغلة

قصي : الله يستر

سهى : اسمع وله ، احكي ماما

ديمة : انا فكرت بموضوعي انا و عدي ، و طلع معي انه

ابو قصي : احكي يابا مالك ؟ صاير اشي معك ؟

ديمة : وافقت عليه ، و بعتله خبر مع علاء

قصي : قبل ما تخبرينا خبرتي علاء و بعتيله خبر ؟ صحيح انبسطنا بس عملتك بايخة معلش

سهى : ... يلا ان شاءالله بكون قرارك بمحله

ابو قصي : ما تهتمي لكلامهم ، القرار الك اولا و اخيرا ، الله يوفقك يا حبيبتي و يفرحني فيكم دايما

قصي : مبروك دمدوم بدي اخلص منك اخيرا

ديمة : الله يبارك فيكم ، بس ما بعرف شو رح يصير ، يعني ما رد خبر لسا

سهى : خلص انتي عملتي اللي عليكي ، هلا التخطيط على اهل العريس

ابو قصي : صحيح ، يلا صلوا الفجر و ناموا ، تصبحوا على خير

قصي / ديمة : و انت بخير بابا

_________________________________

علاء : انبسطت انك اقترحتي عليهم يناموا عنا الليلة

ريم : حبيبي شو هالحكي ، هاد بيت ابنهم و متل بيتهم

علاء : ما يحرمني منك يا قلبي ، في خبر بدي احكيلك اياه

ريم : شو هو ؟

علاء : ديمة وافقت على عدي و بعتتله خبر معي

ريم ( متفاجاة ) : ما اقواااهااا و لا قالت ، فرحتني يلا الحمدلله فرجت

علاء : عقبال ما تفرج على سيرين

ريم : يا رب الله يجمعها مع..( حطت ايدها على تمها )

علاء ( نهض حاله ) : مع مين ؟

ريم ( بتوتر ) : لا و لا حدا

علاء : احكي ريم ، مين اللي الله يجمعها معه ؟

ريم : لا تحرجني سر مامنتني عليه ما بقدر احكيلك

بس اي سر هاد اللي زلق لساني و حكاه ، و قدام علاء اللي صعب ينضحك عليه بكلمتين ..

انجبرت احكيله كل اشي حكتلي اياه سيرين ..

علاء ( مستغرب ) : معناها معه حق احمد كان ، ايواا

ريم : شو دخل احمد ؟ علاء امانة اعمل حالك ما بتعرف حرام و الله ما بتعرف اشي عنه

علاء ( بعالم اخر و بهز براسه ) : ...

عن الكاتب

وعد السعيد

كاتبة قصصية

بدات رحلتي منذ عام ٢٠١٧ حيث وجدت نفسي مطالعة جيدة للكتب والقصص، استهليت مسيرتي بقصتين قصيرتين بطابع اجتماعي، ثم رواية رومنسية درامية، بعدها انتقلت للطابع الكوميدي ونشرت اول موسم لقصة ( نهفات عيلتنا ) في نهاية عام ٢٠١٧ وبعد ان لاقت نجاحا واسعا واصرارا على اكمالها تابعت كتابتها حتى اصبحت مسلسلا اجتماعيا عاطفيا محافظا بطابع كوميدي تم انهاءه في ٢٠٢١ .. ***********^^^^^^^************ لكل اللي كان يقول الحلم ما بصير حقيقة والمستحيل صعب إنجازه، بحب اقلكم اسمعوا قصتنا وتاكدوا انه ما ضل اشي بالدنيا الا صار معنا .. هاي العيلة جزء صغير بمدينة صغيرة بهالعالم الكبير، عيلتنا عاشت لحظات من كتر الضحك كان يوقف قلبهم، ومن كتر الحزن كانت تنحرق روحهم .. عيلتنا #سلسلة_ياسمينة_الروح مستحيل تقراوها وتملوا .. بكل حلقة فيها اشي مختلف واشي بشدكم واشي بخليكم تحسوا حالكم شخصية من الشخصيات بتنزل دموعكم بمشاهد الحزن وبتعلى ضحكاتكم بمشاهد الكوميديا مسلسل بعبر عن كل شي جواتي وبحلم فيه .. كل واحد فيهم بمثلني .. كل اللي بقلبي وقناعاتي ومبادئي وصفتها بكلمات خفيفة لطيفة على قلوب اللي بقراوه ... اتمنى لكم قراءة شيقة ومفيدة وان اترك لكم اثرا طيبا