متي يبدا تسنين الاطفال؟
كل أم أكيد عاشت مرحلة معينة فى أوائل حياة طفلها تخص أسنانه قبل ظهورها وهيا مرحلة التسنين عند الطفل ومعاد بداية المرحلة دى بيختلف من طفل لاخر ودى حاجة طبيعية وغير مقلقة لو الطفل بدأ تسنين بدرى من عمر 4 شهور او اتاخر فى التسنين لعمر عام مثلا ومش محتاجة حد يفتى ويقول ده نقص كالسيوم طالما مافيش تحليل يثبت !!
فالافضل بلاش نقارن أطفالنا ببعض كل طفل له طبيعته الخاصة زى مافيه أطفال بتمشى او تحبى بدرى قبل معادها او تتأخر شوية الموضوع مش مقلق كل شئ بأوانه طالما مافيش مشكلة حقيقية ظاهرة!
فيه أمهات مرت عليها مرحلة التسنين دى بسلام وأمان وفيه أمهات تانية كتير عانت منها جدا وأتمنت وقتها ان الطفل يفضل بدون أسنان أرحم ويبقى ريح وإستريح وبقى عندها فوبيا من حاجة اسمها تسنين !طيب ياترى ايه السبب الرئيسى وراء المعاناة دى ؟؟ وهل ياترى الأم ليها دخل ولو بسيط فيها ؟؟ والحل إيه؟؟
وعشان نعرف السبب الرئيسي والحقيقي لازم نتكلم أولاً عن اعراض تسنين الاطفال:
مبدئيا كده أعراض تسنين الاطفال بتكون مؤقتة يعنى بتفضل بس لغاية ما سيادة السنة اللى عليها العين تشرفنا وتطلع طيب ياترى ايه الاعراض اللى ممكن يحس بيها الطفل وقتها ؟؟
١-سيلان اللعاب :
أول حاجة بتلاحظها الأم سيلان اللعاب اللى معروفة عندنا بالريالة الأم بتيجى تقول ده طول الوقت بيريل مش عارفة ليه !
٢-عدم الرغبة في الاكل او الشرب:
فيه اطفال تانية مابتبقاش عايزة لا تاكل ولا تشرب ودايما حاطة صباعها فى بقها وممكن إيديها كلها تحطها فيه،
٣-ظهور ورم مكان السن او الضرس:
كمان من الأعراض لو الأم عندها حب الاستكشاف كده تروح تشوف بيحط صباعه فين فى بقه هتلاقى ورم مكان السنة اللى بتطلع،اهو المكان ده بقى بيكون فيه ألم عند الطفل وبيبقى مضايقه جامد وبيخليه عايز يحط اى حاجة فى بقة يلاقيها قدامه عشان يتخلص من احساس الحرقان او الأكلان ده بانه يعض عليها وبالتالى وارد جدا ان الحاجة اللى يحطها فى بقه ماتكونش نضيفة.٤-الرغبة في وضع الاشياء في الفم:أغلب الأمهات أظن بتلاحظ ميل الطفل اوى فى الفترة دى انه يحط أى حاجة ملفتة وغريبة عليه من الأرض لان هيا دى وسيلة التعرف على الأشياء له فناخد بالنا بقة ليحط حاجات فى بوقه مش حابة اذكرها او أبسطها المناديل المستعملة مثلا !
ويجي السؤال المعتاد هل تسنين الاطفال يسبب حرارة؟ هل تسنين الاطفال يسبب اسهال؟
الإجابة ببساطة لا مش التسنين هو اللي بيسبب حرارة او اسهال السبب ان الطفل كده بالوضع اللي اتكلمنا عنه ممكن يبقى عرضة للتلوث فى فمه بسبب الحاجات الملوثة اللى ممكن يلاقيها فى سكته طول ماهو فى طريقه الاستكشافى فى البيت او فى اى مكان وده ممكن يزود الاعراض اللى عند الطفل لو حصل تلوث بالشكل ده ويبدأ يظهر عنده سخونة فى الجسم وزيادة فى تعب الطفل وترجع الأم تشتكى وماتبقاش عارفة السبب ايه وتفتكر ان ده طبيعى من التسنين !
فواجب الأم هنا انها تشيل أى أشياء غير نظيفة من أمام الطفل وكمان لازم تتأكد ان لعب الطفل اللى ماسكها نظيفة برده عن طريق غسلها او تعقيمها باستمرار وممكن الأم تساعد طفلها انه يتخلص من الإحساس المؤلم ده عن طريق عضاضة نظيفه تدلك بيها لثة الطفل ويفضل تكون العضاضة باردة نوعا ما عن طريق حفظها نظيفة فى الثلاجة للمساعدة فى تخفيف الألم او ممكن بقطعة شاش مبللة بماء بارد ايضا تلفها الأم حول صباعها وتدلك بيها اللثة.
طيب يا تري ايه حكاية جل تسنين الاطفال هل هو مهم فعلا؟
بالنسبة لوضع المخدر الموضعى اللي هو جل تسنين الاطفال للرضيع فاختلفت الأقاويل عليه بين مؤيد ومعارض لكن عموما يستحسن تجنب وضعه لتفادى بلعه طالما لسه مش قادر يتحكم فى البلع لإن ممكن بلعه كمان يتسبب فى تنميل زور الطفل وبالتالى وقتها مش هيكون قادر يبلع الأكل كويس بعد وضع المخدر،غير ضرر المواد اللى فى الجل المخدر لو بلعها الطفل باستمرار .
عن الكاتب
DrMai Salah
طبيبة أسنان وكاتبة محتوي طبي
أنا طبيبة أسنان وأم لثلاثة أطفال عملت بمجال التدريس بالجامعات المصرية وبعدها قمت بالعمل في العيادات الخاصة إكتسبت خبرة وشهرة واسعة بمجالي وبعدها وجدت أن أولادي أولي بوقتي فتفرغت لتربيتهم واتجهت لمجال كتابة المحتوي الطبي ومجالات أخري في مجال العمل الحر، سعيدة بالتواجد هنا بالمنصة وأتمني أن أكون إضافة قوية لها.