مساحة صغيرة نقدر نتكلم ونعبر فيها عن الكتكوت الجميل اللي نور كل حياتنا ونقلنا لكوكب تانى معاه ليه لغته وأسراره وليله ونهاره الخاص بيه.
تعرف علي كوكب بيبي ومغامراته
تخيلي أن البيبي الصغير الرضيع أول ما بيجي ل الدنيا مش بيكون عارف اي حد غيرك وبيشوف الدنيا من مرايتك أنتي .. أنتي كوكب البيبي وهو الكوكب الخاص بيكي، انتى بتشديه للعالم وتوريه الحياة وهو بيدخلك في تفاصيله الصغيرة اللى ممكن تنسيكي الدنيا بضحكه صغيرة منه وتسهرك الليل مع شوية زن بسيط مش مفهوم.
كوكب البيبي مليان مشاعر صادقة وبسيطة مليان دفء ومليان جنان ولعب ودوشة مليان شقاوة، كوكب البيبي هو حياة نقية ورحلة جميلة بتعيش فيها الام وبتغير شخصيتها للأحلي و الأقوى.
متطلبات دخول كوكب البيبي السعيد
لازم الأم وهي داخلة تتعلم الهدوء والصبر، وإن النوم مش شرط أساسي في الكوكب ده خالص، ولازم يكون قلبك كبير جرعة حنان كبيرة تدلعي بيها البيبي الصغنن وتهديه، ولازم تعرفي إن الكوكب ده ليه لغته الخاصة عشان يكون التفاهم موجود والود موصول.
خطوات عبور أول أيام داخل كوكب البيبي بسلام
- أهم حاجة التقبل .. لازم تقبلى ان حياتك اتغيرت وبتتغير.. بيتك مش هيفضل مرتب طول الوقت، روتينك الصباحي ممكن يتأخر شوية لو البيبي صحي وبدأت فقرة الزن، ف هنا التقبل بيكون ليه دور كبير أن تعرفي تعبري الفترة دي بسلام.
- أغتنام الفرص البسيطة.. أى فرصة تجيلك تنامي متسيبهاش تعدي حتى لو دقيقة ريحي لأنك هتحتاجيها.
- المساعدة.. لو محتاجة اى مساعدة أطلبيها بدون حرج.
- الصور والفيديو .. أعملى ذكريات كتير مع البيبي تفتكروها أما يكبر وتضحكوا.
- التغذية السليمة.. الام بتكون محتاجة تأكل أكل صحي أهتمي بنوعية الأكل أكتر من كمية الاكل وركزى بتأكل أيه ممكن يفيد البيبي.
أدوات هتساعدك على كوكب البيبي
- المشروبات الدافئة وتقليل القهوة عشان البيبي ميسهرش.
- شنطة البيبي تكون فيها تقسيمات تأخد كل أغراضه وأحتياجاته ونصيحة بلاش خروج كتير أول سنتين بيكون صعب أوى ومرهق للأم.
- تطبيقات الهاتف وخاصة تطبيقات التذكرة عشان تسجلي فيها لأننا بننسي كتير في الفترة دي.
- سليبر مريح أو سنيكرز مريحة عشان تعرفي تجري كويس.
- هزاز البيبي بيكون حلو اوي اول ٦ شهور بيساعد البيبي على النوم.
- مناديل مبللة هتنقذك في مواقف كتير وتكون من غير كحول.
- مخدة الرضاعة مفيدة جدا وعملية في الرضاعة الطبيعية بتريح الظهر وبتريح البيبي.
أكلات البيبي بعد ٦ شهور
في الفترة دي بيكون سلاحك هو المعلقة السيلكون الناعمة الرقيقة عشان متضايقش اللثة الخاصة بالبيبي وقت التسنين.. كل نوع خضار بندخله بيتم اختباره مدة ٣ ايام وندخل نوع تاني غيره.
الاكل بيكون مهروس ناعم في الأول ومع الوقت وظهور الاسنان بنبدأ ندخل أكل خشن اكتر .. البداية بتكون مع الكوسة والبطاطس والبطاطا والتفاح.
كل نوع خضار بيتم سلقه وهرسه وتقديمه للبيبي لمدة ٣ ايام.
ختاما، دي بداية الرحلة داخل كوكب بيبي، عالم كامل بيغيّر الأم ويصنع معاها قصة جديدة كل يوم، مواقف مختلفة بتقوي شخصيتها ويخليها تكتشف جوانب جديدة فيها.
عالم بيبي هو مزيج بين كل حاجة وعكسها، تعب وضحك، دموع وحنية، بين فوضي وروتين حياة جديد.
كلمة "ما"، "با"، "امباه" على هذا الكوكب هي أحلى كلمات هتسمعيها في حياتك حاولى تسجليها عشان هتحتاجي تسمعيها كتير، تفاصيل صغيرة زي ابتسامة البيبي بتساوي كنوز.
رحلة كل أم بتكتشف نفسها من جديد، وتعرف إن الأمومة أجمل كوكب في الحياة ويستاهل منها الصبر والتغيير.