سلسلة ياسمينة الروح- الموسم الرابع( مذكرات عاطفية ٢)- الحلقات ١٢-١٣ ج٢

الحلقة الثانية عشرة :

وفي عتمة غيابك .. أخطّ سطور الذكريات لأرتشف من نورها سبيلاً اهتدي به .. ليقيني من لعنة الحب وموت الفراق

وعد السعيد

_______________

____________

المكان مزدحم بأشخاص غريبين، والاحزمة مربوطة تأهباً للاقلاع ..

عيوني بتراقب ادق التفاصيل، وانفاسي متسارعة، وقلبي بنبض بهستيريا ..

افكار متزاحمة ومشتتة، وتفاصيل الوداع كانت مأساوية ..

بين دموع فراق، واحلام باللقاء، وامنيات بالسعادة ..

بس من بين كل هالتفاصيل، كان في اشي واحد بهمني ، اني اجتمع معه وما ابعد عنه مهما كلفني الثمن ..

سندت راسي على الشباك اراقب الاقلاع، واودع ارض وطني اللي انولدت وكبرت وتربيت وحتى اني عشقت ودقت كل حلاوة ومراة الحب على ترابه ..

______________

____________

قبل شهر ونصف <<

ليلة عصيبة ما اتوقع تمرق عليي ويطلع الضو واشوفه من جديد؛ بعد الكلام اللي طلع مني قبل ما احبس حالي بغرفة نومي ..

كنت بأقوى حالاتي قدامه، وتجرأت وطلبت طلب ما تخيلت يطلع مني بيوم من الايام ..

بس لما تركته ورجعت على غرفتي، الضعف اجتاحني والنحيب ما فارقني لساعات ..

زواجي واستقراري تهدد، وقرار مصيري اتخذته ولازم اكون مستعدة لنتيجته، رغم ايماني باني اضعف من انه اتحمله ..

علاء ( مخنوق ) : ريم

ريم ( مسحت دموعي بسرعة ) : ...

لحظة ما فتح باب الغرفة، ومشي تجاه التخت ..

كان قلبي بدق باقصى سرعة، والف فكرة دمرتني، لحد ما نطق اسمي ..

علاء ( قرب مني ) : قدرتي تنامي ؟

ريم ( بجمود ) : مو مهم

علاء ( بحاول يمسك ايدي ) : بدي احكي كل اشي عندي

ريم : ياريت تفكر بطلبي احسن ما اتضيع وقت بالحكي

استجمعت قواي، وكنت اجاوبه وبدون ما اتطلع فيه، وقاومت ايديه اللي كانت تلمسني ومصرة انها ترجعني لسجنه اسيرة ..

علاء ( برجاء ) : ارجوكي اسمعيني حتى لو مو طايقتيني بهاللحظة، بس انا حابب احكي اللي بقلبي

ريم ( بغرور ) : ... يلا بسرعة بس

علاء ( بهدوء ) : كنتي اكبر حلم الي، وتمنيت بكل مرة بشوفك فيها انه تكوني نصيبي واكمل عمري معك لانك الافضل بنظري بين كل البنات اللي حواليي واللي قابلتهم، والحمدلله انه تحقق هالحلم وتزوجنا فعلا

ريم : هالكلام كله حافظته، هات اشي جديد ؟

علاء : ...

ريم : حلو، معناها انا بكمل عنك، هاد يا سيدي بعد ما تحقق حلمك وتزوجتني وصرت ملكك والله اكرمني وحملت وولدت بخير وسلامة كنت متخيل اتضل حياتنا متل ما هية وما عليها اي تغيير، بس للاسف خابت توقعاتك لانه مفكرني رجل آلي مو انسانة وبدك اتضل بنفس المستوى من الاهتمام والدلال حتى لو بعدني ما كملت تلات شهور، وعند اول فرصة اجتك قدرت انه تعوض هالنقص مع وحدة بتدور بس على مظاهر وما بتعرف اللي مستنيها لما تتزوج واحد متلك ما عنده اي ذرة احساس بمشاعر زوجته وام طفلته

علاء ( بلع ريقه ) : ... حابة تحكي عالمكشوف يعني ؟

ريم ( بقرف ) : ليه ضل فيها اشي مخبى يعني ؟

علاء : ...

ريم : مع اني كتيييير اتدايقت من رانيا انها خبرت خالو بالموضوع وانقهرت اكتر على موقفه معك، بس بعد عمايلك وكلامك اليوم عند اهلك

علاء (قاطعني ) : غيرتي رايك وتشمتي فيي وحكيتي بستاهل

ريم ( مقهورة ) : ما بتتغير، شوف كيف قاطعتني وحكيت كلام من عندك، متل مرة لما حكيتلي اني ندمانة عاليوم اللي تزوجتك فيه

علاء : لانه هاي الحقيقة بس انتي مو قادرة تحكي

ريم : لا يا سيدي قادرة ونص احكي اي حقيقة ومو خايفة من حدا، لانه الشمس ما بتتغطى بغربال، اي نعم بحبك ومبسوطة بزواجي منك بس انت شخصية كتير صعبة والتعامل معها بعفوية بعمل مشاكل ما الها اول ولا آخر للاسف

علاء ( بهز راسه ) : كلامك صحيح، انا بلاحظ اني بعقد بعض الامور، وصدقيني ما بعرف ليه هيك بصير معي ( اتطلع بعيوني ) بس بوعدك كل اشي يتغير اذا رجعتي ايدي بايدك وتخليتي عن طلبك اللي طلبتي قبل كم ساعة

ريم ( ضحكت بقلبي ) : ... ما فهمت ؟

علاء ( بحب ) : انا بعتذر منك لاني تجرات واذيتك، لانه انتي شخص لا يستحق الا الدلال والمعاملة الطيبة، انا بحبك ريم وقلبي صعب يحب او يسكنه انثى غيرك، بحب كل اشي فيكي، لا تفكري انه اذا اصريتي على موقفك رح اتنازل عنك بسهولة، اصلا ما بتخيل حالي اتزوج غيرك، صدقيني اني كل ما اتطلع بسلمى بتأملها كأني بتأملك لانها نسخة عنك

ريم ( نزلوا دموعي ) : ...

حديثنا خفف من توتري، وكلماته الاخير صابتني بضعف ما قدرت اخبيه ..

علاء ( مسحلي دموعي ومرر اصابعه على وجهي برومنسية ) : خليكي قوية وما تضعفي، قوتك هي قوتي وقوة بنتنا ( بصوت ضعيف ) ما بقدر اوصفلك شعوري لما نطقتي هديك الكلمة، يا ريتك حرقتيني قبل ما تحكيها لانه وجع الحرق اهون بكثيييييير

ريم ( مبتسمة ) : بعيد الشر عنك، صدقني ما بهون عليي حدا يلمس شعرة منك ويأذيك

علاء ( ثبت راسي بايديه ولزق جبينه بجبيني ) : اذاً من هاللحظة صفحة جديدة بينا والماضي عالمحرقة، وقلوبنا رح تترمم وجروحنا رح تلتئم وحياتنا بتتجدد مع كل نبضة حب من قلوبنا

ريم ( بخجل ) : كلامك حلو كتير، اشتقتلك

علاء : انتي عمري، وغزالتي الوحيدة اللي ما الها بديل، انسيلي كلمة طلاق من قاموسك بس

ريم : ههههه

علاء : وضلي اضحكي

ريم ( برومنسية ) : بحبك

علاء : بعشششششقك

////

طلت شمس نهار جديد علينا، هالشمس اللي عكست اشعتها على بشرة غزالتي اللي نايمة بين ايدي مثل الطفلة ..

بس الطفلة الحقيقة مفتحة عيونها وبتتأمل بامها وابوها اللي التم شملهم من جديد، واهم هدف هو استمرار الاسرة المستقرة اللي بحلم فيها كل انسان على وجه الارض ..

الحياة مليانة مشاكل صغيرة وعيوب بتعمل ثغرات وبتكبر كل ما تأخرنا باصلاحها، وهالثغرات بتتحول لفجوات بكون المرور من فوقها بغاية الصعوبة ويمكن يوصلنا للهلاك اذا وقعنا فيها ..

علاء ( بلمس شعرها وببوس خدودها وايديها ) : حبيبة قلبي يا بابا، سامحيني عن كل لحظة كنت بعيد فيها عنك، لو تعرفي كم ندمان، بس بوعدك بحياة حلوة كثير ورح تكوني احلى اخت لاخوة وخوات بالمستقبل لانه انتي مثل امك الحلوة اللي قلبها كبير وبتحب بصدق، بس بدي توعديني لما تكبري تكوني مثلها

___________________________

ما صدقت متى يجي الصبح حتى يطلع على شغله، وابدا بالتحضيرات ..

انه كيف تحملت من مبارح لليوم بدون ما اخبر حدا، كان تحدي بحد ذاته ..

بس كان لازم اعمل هيك حتى احقق اللي ببالي، واعمل مفاجاة ..

___________________________

سهى : يا ربي كل هاد صاير معها واحنا ما بنعرف ؟

نهى : شفتي مسكينة، ربك بس اللي سترها وحماها من اشي اعظم

سهى : خبرتي امي ؟ ومها

نهى : بنخبر بعدين، انا بدي اروح عندها هيني بالطريق ازا بتحبي الحقيني

سهى : يلا جاية فورا

////

هيثم : لا حول ولا قوة الا بالله، ليه هيك يا خالي بتعملوا ؟

آيات ( بتبكي ) : انا تعبانة كتير خالو، نفسي اموت وارتاح، مو مبسوطة بحياتي ابدا

هيثم : له له هاد كلام بطلع من بنت مثقفة ومتدينة متلك ؟ المفروض تستقوي بالصبر والاحتساب وبتعرفي انه ربك معك بكل وقت ورح يعوض كل هالاحزان بافراح باذن الله

آيات : معك حق، بس كمان كل انسان بتيجيه حالات بضعف فيها وطاقة تحمله بتصير تحت الصفر

هيثم ( تنهد ) : يلا ان شاء الله بكرا بوصل وبشوفكم، خبرتوا احمد ؟

آيات ( باستنكار ) : لااا مستحيل، مو بكفي اللي لسى رح تحكيله اياه مرته، يا ريت توصيها انها  ما تخبره كمان

هيثم : اكيد اكيد ولا يهمكم، هي رانيا بتسلم عليكي

آيات : الله يسلمك ويسلمها، ترجعوا بالسلامة

////

عمر ( مصدوم ) : وحد الله ! شو صارلها يعني حتى مرة وحدة يرتفعوا عندها ؟

امجد ( بحزن ) : خليها على الله، هي الدنيا مو ناوية تريحنا، الحمدلله على كل حال

قصي : يا حبيبتي يا خالتي، الله يكون بعونها ويشفيها، ويهدي بالكم

امجد : امين، هي هاي هداة البال مو ناوية تندل على عنوان بيتنا

عمر : اللي حكالك انها مندلة على كل البيوت بكون ستين كذاب، صدقني اللي بشوف مصيبة غيره بتهون عليه مصيبته

قصي ( تنهد ) : اه والله ما حدا مرتاح، الحياة كل يوم بتصير اصعب من اللي قبله

امجد : ... الحمدلله دائما وابدا

////

ديمة : يا حبيبتي يا خالتو صدمتيني بهالخبر

غنى : شفتي مسكينة، بس صراحة متوقع هالاشي

ديمة : يا ويلي عليهم، مرة وحدة حياتهم انقلبت

غنى : ربك بهونها، المهم دمدومة انتي واخوي وينكم ؟ فكرناكم رح تيجوا مبارح

ديمة : ييييي والله كان صعب كتير يا غنى الوقت راح بين شغل بيت وغدا بتعرفي يوم الجمعة عجقته عند الكل

غنى : ليكون عشان قصة الحمل ؟ انتي زعلانة

ديمة : اعوذ بالله شو ازعل ما ازعل، لا عادي حبيبتي هاد من ربنا نصيب انتوا بس ادعولنا وان شاءالله ربنا بستجيب

غنى : دايما بندعيلكم، وانتي ادعيلي يخلص هالفصل على خير كتير متوترة مواد جديدة عليي

ديمة : حبيبتي موفقة

___________________________

هيثم : اهلا بحمادة السكر زيادة، شو اخبارك ؟

احمد : اهلين فيك، رجعت من اجازتك ؟

هيثم : اه والله اليوم وصلت، بس مال صوتك ؟ في اشي

احمد ( بحاول امسك اعصابي ) : انت لحالك هسة ؟ حابب احكي معك شوي على انفراد

هيثم ( مستغرب ) : اه لحالي، خير ؟

احمد ( نبرة عتب ) : شو اللي عامله مع علاء ؟

هيثم ( مو عاجبه ) : نعم ؟ ما فهمت عفوا ممكن تشرح

احمد ( رفعت صوتي ) : هيثم لا تستغبي عليي، انا بعرف كل اشي عن علاء، واللي عمله مع ريم وحلينا القصة والزلمة ندم ورجع معها مثل اول واحسن، بس لما مرتك المحروسة تروح تنقل كلام فوق ما اختها عاملة عمايل وخاربة بيت بتمسك حالك وبتبهدله وبتقل قيمته بنص بيته عاساس انت ملاك مثلا ما بتغلط ؟ ولا ليكون بنت اختك اللي عداها العيب

هيثم ( بهز راسه ) : والله ؟! خلصت

احمد ( بعصبية وصوت عالي ) : هيثم لا تستفزني، اللي عملته مع علاء ما حبيته منك احنا مو اولاد صغار عندك، كبرنا وتجوزنا وصار عنا عيلة يعني مثلنا مثلك واللي بتقبله على حالك بدك تقبله علينا

هيثم ( بنبرة حادة ) : كل اللي حكيته ما بهمني وانت وصاحبك كمان تصطفلوا، بس مرتي ما تجيب اسمها على لسانك ولا بسمحلك تتعدى حدودك، مفهووووم ؟ وهالحكي بتوصله للافندي اللي بعثك وبالمرة وصله ما يفرجيني وجهه ولا بدي اشوف وجهك انت كمان

ياسمين : ليه ما بترد ؟

احمد : مشغول

ياسمين : طيب بس تفضى احكي معي

احمد : ما رح افضى اليوم، خلص ارتاحي مني

ياسمين : شو هالحكي حبيبي، معقول ما تحكي معي ؟ شو صاير معك مبين انك متدايق

احمد : ياسميييين، حلي عني مو ناقصك، حكتلك مشغول استوعبي ظروفي مثل ما بدك استوعوب واتحمل ظروفك ومزاجاتك

ياسمين : ... خلص اسفة متل ما بدك، سلام بس دير بالك على حالك وما اتضل اتدخن

احمد : ...

ما بعرف شو اللي صاير معه، بس متاكدة انه حاسس بامه ويمكن شك انه نكون مخبيين اشي عليه خصوصا من موضوع زيارتي لعندهم، وانه همة اللي لغوها ..

انقهرت كتير على خالتي، وما تمنيت يصيبها اي مكروه، ونفسي اكون جنبها واسال عليها ..

يا الله يا خالتو شو بحبك، ومشتقتلك، وغيابي عنك اشي فوق طاقتي ..

انتي ربيتيني وبعرف محبتك الي، بس اللي عملتيه يوم الصور مو قادرة انساه، مو قاااادرة ..

////

ابو بيان : يا جماعة احنا لازم نروح نزور ام احمد كلنا، ونتطمن عليها

ام ماهر : يا حبيبتي شو انكهرت عليها، الله يكون بعونها الدنيا ضاقت عليها مرة وحدة

ابو عدي : الحمدلله على الضراء قبل السراء، ما ضاقت الا لتفرج

ابو ماهر : الله يرضى عليكم، يلا اتفقوا مع خواتكم وخلونا نقعد معها ونشد على ايدها، ما النا الا بعضنا، وبس الله ياخذ امانته بوصيكم اتضلوا هيك

الجميع : بعد عمر طويل يا حج

ام ماهر : الله يحنن قلب مها وبنتها ويهديهم

ابو بيان : احكي معها يا ماهر

ابو عدي : بحاول

////

ام عدي : قال ابوكي بده يقنع عمتك، هي وجهي اذا قبلت تروح

غنى : يا ستي الله يصفي القلوب، ليه زعلانة انتي ؟

ام عدي : مو زعلانة، قصدي متاكدة انها ما رح تروح

غنى ( تنهدت ) : هينا بنشوف شو رح يصير

////

ام بيان : انتي طبعا ما تروحي

بيان : بس بتضل عمتي، ليه ما اروح يعني ؟

ام بيان ( بنبرة حادة ) : بحكيلك ما في روحة يعني ما في روحة

بيان : ... طيب

////

علاء : لا حول ولا قوة الا بالله، مو خبرية والله، سميتوا بدني

نهى : الله يهونها

ريم : يا حرام خالتو، طاقة التحمل عندها نفدت خلص

قصي : حاسس انه في مشكلة كبيرة صايرة زادت الامر سوء

علاء : انت شفت امجد ؟

قصي : اه انا وعمر، كان وجهه ما بتفسر وكلام كثير بلسانه ما طلع

سهى : يا رب تسترها معهم، يا حسرتي عليهم وعلى دار مها عين وطرقتهم

ريم : يا عليي ياسمين شافت بهالعمر اشي اكبر من عمرها، والله لو وحدة غيرها ابصر شو عملت بحالها

علاء ( مسك ايدها ) : الله بعطي القوة لكل انسان على قدر ابتلاؤه

نهى ( مو عاجبها ) : مها مو قابلة تروح عندها، قال ما بتقدر تخسر بنتها

سهى : حرة، بالنهاية منى غلطت وما كلفت حالها تعتزر او اتطيب خاطرهم

نهى ( عصبت ) : مهي كاينة مسمعتها كلام بالمغفر

سهى : وانا شو دخلني تعصبي عليي

علاء : ايوا ؟ مالنا انتوا كمان

قصي : يا حبيبي، شكلها العين يمة طارقة العيلة كلها ولا شو رايك ؟

ريم : وحدوا الله، كل واحد يعمل اللي بشوفه مناسب، احنا بنحب الجهتين وما بنستغني عنهم وبدنا نحافظ على علاقتنا معهم جميعا

علاء : يا عيني عليكي، يسلملي الفهمان

ريم ( كاتمة ضحكتها ) : خلص انت التاني

نهى ( قالبة وجهها ): ... حافظي يختي

ريم ( عيونها على علاء ) : ...

علاء ( بعض على شفايفه عشان اتطنش ) : ...

قصي ( بغير الموضوع ) : وين ديمة مختفية ؟ خليني ارن عليها بلكي حششت بعد هالقصص

سهى : لا تجيبلي سيرتها التانية

الجميع : هههههههه

علاء : ههههههه مو طبيعين اقسم بالله

ريم : ضحكت علينا وقعدت ببيتها، عاساس هي المظلومة

نهى : صاحبة ياسمين، شو رح يطلع منها يعني

الجميع ( مصدومين ) : ...

علاء : يمة، كانك قلبتي فجاة على خالتي مها وبنتها ؟

نهى : ما قلبت، بس المسامحة حلوة، واحنا بنضل خوات، لو شو ما صار ما بصير هيك تحكي، اختها الكبيرة وفضلها كبير عليها، ليه ندخل بين اولادنا ؟

سهى : انا معك مليووون بالمية، بس مو بهالاسلوب اللي انتي فيه هلا، عم تغلطي بحق اختك كمان وتخيلي لو عرفت عن كلامك، رح تروحي تعتزري منها ؟

نهى : ما حكيت اشي عنها، ولو صار سوء تفاهم طبعا لازم افهمها وجهة نظري وشو اللي حكيته

سهى : يا عيني عليكي، شو رايك تروحي تفهمي منى وجهة نظرك ونظرنا كلنا وبدل ما مها تروح عندها خلي اختها الكبيرة تكسر عينها وتروح تستسمح منها ومن بنتها ووقتها ما حدا بلومها بحرف

نهى ( بحسرة ) : والله حكتلها يا جماعة، انتوا شايفيني معصبة بس ما شفتوا شو حكيت معها وشو حاولت، برضو مو صغيرة لحتى ينكسر بخاطرها لو رفضت تسامحها ياسمين

علاء : لا حول ولا قوة الا بالله، من وين اجانا هالبلا حسبي الله في اللي كان السبب

////

كانت قاعدة وايديها شبه مربطين، سرحانة ومو بهالدنيا ..

بعرف وجعها كبير، ومو طالع بايدي اشي يغير هالحال ..

اصراري على موقفي، ووقفة اهلي جنبي، زادت من قوتي ..

ياسمين ( قعدت جنبها ) : ماما ؟ وين سرحانة

مها : ... هيني بهالدنيا

ياسمين : متى رح نروح عالدكتورة ؟ يلا خلينا نعرف شو جايينا

مها : ما بدي اعرف، خليها مفاجأة

ياسمين : متل ما بدك .. وينه بابا لهلأ، كانه تأخر ؟

مها ( نظرة جانبية ) : وصيته على اغراض، بعدين شو دخلك ؟ انا مرته مو انتي ست باسمين

ياسمين ( كاتمة ضحكتي ) : اسفة، بتعرفي بدي اتعلم شوي قبل ما اروح لعند جووووزي حبيبي

مها : روحي ادرسي اشي ينفعك بلا قلة عقل

ياسمين : قصدك اقوم من خلقتك، طيب قايمة شكرا على حسن الاستقبال

تقلت دمي عليها وهية مو ناقصها، بس كمان انا مو قادرة اتحمل اشوفها بهالحالة، وحاولت اشغلها باكتر من موضوع بس للاسف مزاجها مقلوب عالآخر ..

سيرين : بست

ياسمين : اهلا

سيرين : شو الاخبار ؟

ياسمين : مو منيحة، امي حاقدة عليي يا سيرين الله يستر

سيرين : ولك انتي شو دخلك بين الخوات، خليها تروح تشوف اختها

ياسمين : والله ؟

سيرين : ياسمين يا حبيبتي يا عمري، كلنااا سمعتي شو ؟ كلناااا موقفين معك وعارفين انه خالتو غلطت بحقك، بس كمان ظهرت الحقيقة وانتهى الموضوع، وآيات عرفت خطأها وانتي اصلا مو زعلانة منها، ف ليه تكبري القصة وتعملي شرخ بين الخوات، خلي المي ترجع لمجاريها وانتي منك لحماتك لزوجك تفتصلوا

ياسمين : ... شكرا على وقفتكم جنبي، يلا بدك اشي عشان عندي دراسة

سيرين : حلفتك بالله ياسمين لا تزعلي مني، انا صاحبتك وبحكي معك بعفوية مو قصدي اجبرك، انتي حرة بالنهاية بس عشان امك متعلقة كتير بخالتو وخايفة عليها تضغط على حالها مو ناقصها حرام، فكري فيها شوي

ياسمين : بصير خير، يلا باي

___________________________

رجعت من شغلي وكلي هموم من الاخبار اللي تناقلتها العيلة اليوم، الحزن مغطي قلوبنا والحياة عم تصير صعبة كل يوم اكثر من اللي قبله ..

مشتاقين لخبر حلو يزيح الهموم عنا، ويرجع الضحكة لحياتنا ..

عدي : السلام عليكم

ديمة ( بدلع ) : وعليكم السلام حبيبي، يعطيك العافية

عدي ( بنظرة تاملية ) : يعافيكي يارب، شو هالحلاوة، والروائح اللي بتاخد العقل

ديمة : امممم يلا بلكي طعمها يكون زاكي كمان

عدي ( رفعت ايدها ابوسها ) : كل شي من تحت هالانامل زاكي، يلا هسة بدوق وبحكم على كل حال

ديمة : اوك

اختفت وسكرت على حالها باب المطبخ، وانا رحت اغسل واغير بسرعة لانه صابني فضول ..

ديمة : تفضل حبيبي

عدي ( فتحت عيوني على السفرة وقربت من الكرسي الثالث ورفعت اللي عليه بدهشة ) : شو هاد ؟

ديمة ( علقت ايديها برقبتي ) : ...

عدي : ديمة ؟ انتي شو قصتك بالضبط فهميني قبل ما افقد عقلي

ديمة ( بدلال ) : سلامة عقلك ابن خالي، بس حبيت افاجأك لانه انت احق تعرف قبل اي حدا بهيك خبر

عدي : وتحليل مبارح اللي كان سلبي فجاة اليوم صار ايجابي ؟

ديمة : تؤ، بس انا فرجيتك التحليل الخطأ، اما الصحيح اللي عملته اول اشي خبيته، وطلعت من الحمام وفرجيتك واحد ما عملت فيه اصلا

عدي ( نص ضحكة ) : يا لطيف على الكيد، يلا مبارك، وليه هيك طيب تعبتي حالك ؟ وفجاة قدرتي تقربي مني هيك

ديمة ( قلبت وجهها ) : حبست انفاسي، خلص هلا ببعد اتطمن

عدي ( سحبتها بقوة لعندي وضميتها ) : ولك خليكي حابسة نفسك شوي والله ميت من شوقي حرام عليكي

ديمة ( قلبت معدتها ) : الحقني بكاسة مي

كالعادة ركضت عالحمام وركضت وراها اتطمن عليها، وبرد الاكل قبل ما اتهنى عليه ..

عدي : من وين جبتي هاد البوت ؟ حبيته

ديمة : كان لامير ابن خالتو مها، اخدته عشان افاجاك فيه

عدي : عقبال ما يلبسه اخوه يارب

ديمة : امين حبيبي، اسفة لاني ما هنيتك عالاكل

عدي : لا عادي هينا بناكل، وبشهي صراحة بتقدم لملوك

ديمة : يا عمري انت ريته صحتيييين وهنا يااارب

___________________________

ابو احمد : يا مرحبا بالجميع، نورتونا والله

ابو ماهر : منورة بوجودك انت وام احمد، الله يديم هالبيت عامر

منى : يطول بعمرك يابا، وما يحرمني من فوتتكم عليي، اشتقنالكم

لمة مجروحة، وناقصة كثييير ..

ليه هيك صار بعيلتنا ؟، كيف قدرت زينة تخربها ؟، معقول كل الحق على زينة وبس ؟، لمتى رح تبقى هالغيمة مظللة فوقنا وتمطر علينا هموم ومصايب ؟ ..

ابو بيان : كيف حالك يا امجد ؟ كيف دراستك ؟

امجد : كل شي تمام الحمدلله

عمر : يلا هانت خلصت من اول سنة

ابو عدي : عقبالك يا ابو لسان انت

عمر : انا بدي عروووووس، جوزني وبعدين بعمل اللي بدك اياه

الجميع : ههههههه

ام عدي : مستجوز، ابصر مين ماخدة عقله ومو مخليته يفكر باشي غيرها

ام بيان : الله يستر ههههه بس مين رح يخبزلنا كعكات العيد يا عمورة ؟

آيات : يعني ازا تزوج ببطل من العيلة ؟

غنى : هههه لا قصدها بصير عنده بيت وبنشغل

آيات : ...

عدي : مستعجل يجيب اولاد عم لاولاد اخوه

الجميع ( عيونهم على ديمة ) : مين ؟

ديمة : ...

ابو عدي : فهمونا بالله

سهى : الها عين تحكي ام الافلام والمقالب

عدي : لا عمتي الحمدلله مو مقلب طلع، وديمة حامل

سيرين / ريم : مبااااارك، واخيرا

ديمة ( بخجل ) : الله يبارك فيكم

هيثم : دمدومة رح تصير ماما، الله يستر ههههه

رانيا : مالها ؟ زينة البنات ماشاءالله عليها

ديمة : احكيله رنوش احكيله، قالب عليي مع العيلة

عدي : استغفر الله العظيم

هيثم : هههههه

منى : مبارك حبيبتي تقومي بالسلامة

ديمة : الله يسلمك خالتو حبيبتي، عقبال عند ياس...

ريم ( قاطعتها ) : كيف دراستك انس ؟

حتى لو قاطعتها اختها، ما في مجال للتطنيش والنسيان ..

علاء : مين ناوي يروح عمرة السنة برمضان ؟

ابو علاء : انا وامك حابين نسجل، تروحوا معنا ؟

ريم : يا الله شو نفسي

نهى : لا خالتو حرام بنتك صغيرة، بس تفطميها عالاقل بتقدري تخليها عند حدا

هيثم : هي حماتك خبرة بالاطفال نصحتك

الجميع : ههههه

نهى : اه خبرة، مالك متدايق ؟

سيرين : مو قصده ماما شو مالك ؟

هيثم : خليها خالو بطلعلها

ابو ماهر : الله يسعدكم وما يحرمكم من بعض، احلى لحظات عمري لما اشوفكم ملتمين حواليي

كانت في نظرات غريبة بين هيثم وعلاء، حتى انهم متجنبين الحديث مع بعضهم ..

////

مها : اهلا، يسعدلي هالصوت

احمد : ويسعدك خالتي حبيبتي، كيف حالك طمنيني عنك ؟

مها ( تنهدت ) : الحمدلله عكل حال

احمد : اي شهر صرتي ؟ متشوقين نعرف شو جايينا

مها : ههههه اكيد ياسمين بعتتك، عرفت بس ما بدي احكي لحدا

احمد : لا والله ما بعثتني ولا حكيت معها اليوم

مها : معقول ؟ خير

احمد : صراحة يا خالتي متدايق كثيييير، وما الي غيرك احكيله

مها : له له، سلامة قلبك يا حبيبي مالك ؟

احمد ( سحبت نفس ) : انا وهيثم صارت بينا مشادة كلامية وعصبت عليه ورفعت صوتي وزعل مني

مها : معقول ؟ يا لطيف شو صاير

احمد : قصة ما الي دخل فيها، وبالاخر طلعت براسي، وانتي عارفة هيثم غالي عليي وما بقدر على زعله

مها : لا اكيد ما بكون زعلان، بس عشان بنفس اللحظة بكون اتدايق

احمد : لو حكتلك تحكيله بس يرد عليي واعتذر منه، عادي ؟

مها : اكيد بحكيله، هو يعني عاملك بلوك ؟

احمد: لا البلوكات هاي تخصص بنتك

مها : هههههه يا حبيبتي، بوس ايدك اللي قبلت ترجعلك

احمد : شكرا، بما انك صرتي حماتي فلازم مو بس ابوس ايدي، هاي بدها كل يوم ركعتين شكر لله

مها : الله يرضى عليك ويسعدكم ويجمعكم سوا عاجلا غير آجل يارب، كمان شوي بحكي معه ولا يهمك

احمد : يسعدهاااا الحنونة وما يحرمني منها، وبالمرة راضي بنتك بكلمتين بما انه ما قدرت احكي معها اليوم وطنشتها

مها : بحاول معها ام راس يابس

احمد : ههههه، يلا تصبحي على خير وسلمي على عمي والجميع

بعد ما سكر الخط بوجهي، تسكرت الدنيا بوجهي وما ضل قدامي الا خالتي وصديقتي اللي بحكيلها بدون اي تردد، رنيت عليها وطلبت منها واسطة ..

اما ياسمين قلبي ما عم يهدي ومشتاقلها ومشتاق لصوتها وصورتها، وكل شوي بفتح على اسمها بدي احكي معها وبرجع اسكر لانه ما بدي احكيلها اشي واطلع خصوصيات ريم وعلاء وتكبر القصة اكثر ..

////

ياسمين : خوفتيني

مها : فكرتك نمتي

ياسمين : لا بدرس، في اشي ؟

مها : بسلم عليكي احمد، وبعتزر عشان مو قادر يحكي

ياسمين ( فتحت عيوني ) : شو عرفك ؟

مها : حكى معي، بده اتواسطله عند هيثم

ياسمين : ماله ؟

مها : ما بعرف، بس زعلان من احمد وما برد عليه

ياسمين : عشنا وشفنا حمادة وخاله حبيبه متزاعلين، هاي لحالها بدها سكوت حنصور

مها : بتتشمتي ولي ؟

ياسمين : هههههه لا طبعا، المهم اوعي تحكيله انه معي خبر، حافظي على سره بينك وبينه

مها : انا اللي لازم انبهك مو انتي تنبهيني

ياسمين : انا واياكي واحد معلش ماما حبيبتي

مها : يمة ما اقواكي، ادرسي ادرسي

ياسمين : ههههههع

آخر خبر توقعت اسمعه يكون زعل بين احمد وخالو، جلدي بحكني صار ونفسي اعرف شو القصة ..

وبما انه وصل كلام مع ماما الي اني اسامحه، فحكيت ببعتله عاساس انه قلبي عليه واشتقتله ..

ياسمين : احموووودتي، يسعد قلبه الغايب اللي مطنش حبيبته، يلا يا عمري بس طمني انك منيح، ابعتلي صوت او صورة الك اشوفك، يا ربي شو اشتقتلك بدي انام بسرعة بسرعة لازم تبعت لياسمينتك الدلوعة اللي ما بتقدر على غيابك

شاف رسائلي وبعد ربع ساعة رد ..

احمد : ههههههههه ولك الله لا يعطيه العافية شيطانك، صحيتيني من النوم على هبلك

ياسمين ( زعلانة ) : والله ؟ شكرا الك احمد بيك اسفين عالازعاج

احمد : انتي ومين ؟

ياسمين : شو انا ومين ؟

احمد : مو انتي بتحكي اسفين

كان نفسي احكيله انا وابنك؛ اللي ما حدا بعرف عنه، ومخبيته حتى افرحك فيه انت وبس ..

ياسمين : يعني هيك مجازا، المهم تعشيت حبيبي قبل ما تنام ؟

احمد : ... اه

ياسمين : كم بكيت دخان خلصت اليوم ؟

احمد : ... ما عديتهم، انتي شو عملتي اليوم ؟ طلعتي مكان ولا بالبيت بتدرسي

ياسمين : بالبيت، ومو ملحقة، بعدين شو هاي ما عديتهم ! مو اتفقنا نخفف ونحاول نترك ولا نسيت ؟

احمد : مو شرط ما عديتهم يعني كثير، انتي التهي بدراستك حاليا والله يفتحها عليكي ويهديكي

ياسمين : يارب، ويهديك

نعس ونام وما اخدت منه لا حق ولا باطل، يلا بعدين بعرف المهم انه حكيت معه ..

////

قاومت كثير ما ارد، بس ما تحملت زيادة عن ربع ساعة ..

حتى لو رسائل واتس اب المهم محادثة، وريحت قلبي شوي وهديت اعصابي بكلامها الحلو وسؤالها عني وخوفها عليي ..

علاء : نايم ؟

احمد : بحاول

علاء : حبيت اتطمن عليك

احمد : متدايق صراحة

علاء : خير ؟ صاير اشي

احمد : بخبرك بعدين، نعسان كثير

علاء : براحتك، يلا نوم العوافي

ما عرفت شو احكي لعلاء، يمكن يتحول حديثنا لعتاب وحساسيات مفرطة وكمان اعلق معه، لاني مو غشيم عن عقله وتفكيره ..

غمضت عيوني واستسلمت للنوم ..

////

هيثم : مهمومتي، يا هلا

مها : هلا فيكي، الحمدلله عسلامتك كيفكم شو اخباركم ؟

هيثم : مشتاقين، الله يسلمك طمنيني عنكم انتوا كل شي تمام ؟

مها : الحمدلله

ما عرفت من وين ابدا وكيف افتح معه الموضوع، لقيت الكلام طلع مني بدون اي ترتيب ..

هيثم ( تنهد ) : شو حكالك بالضبط ما فهمت ؟

مها : حكالي اعطيه مجال يحكي معك عشان يعتزر منك، وانه هو ما اله علاقة بالموضوع وبالاخر طلعت براسه

هيثم : طلعت براسه لانه بحكي بدون تفكير، انا لسا مو ناسيله موضوع زينة كيف خبى عليي وخلاني مثل الهبيلة

مها ( مستغربة ) : لا تخلط الامور ببعض شو دخل هاي بهاي ؟؟

هيثم : ما بعرف، انا كمان ملخبط كثير والله يا مها، لو شفتي آدم قبل شوي كيف مشتاقلي، واختك ما قامت عيونها عنا بتراقب فينا كأنه

مها : ههههه مسكينة تعلقت فيه عشان اجا عندها وهو بيبي، طول بالك كل شي اله نهاية، المهم بدي عهد منك انه تحكي مع احمد صدقني كتير مخنوق ومتدايق حتى ياسمين ما حكى معها وطنشها وما حكالها السبب

هيثم : بشوف شو بصير معي، وشكرا على الواسطة اللي مو غريبة عنك ست مها

ما استغربت من لهجة هيثم، طول عمرهم بتنافسوا مين احبه اكتر، هو واحمد غلاوتهم غير شكل عندي ..

مها : هههههه غرت ؟

هيثم : لا ليه اغار ؟ مو اخوكي انا يعني

مها : هههههه ضحكتني، كل واحد غلاوته لحال وانت بتعرف، بعدين كانه زمان ما اجيت تغديت عندي ؟

هيثم : اه يلا اضحكي عليي بغدا عشان نسيبك يرضى

مها : يوووه، لا انت نهى معصبتك عالاخر، خلص بحكي معك بس تروق وبنرتب يوم تيجوا تتغدوا عندي او عشا

هيثم : ههههه تسلمي ما بتقصري، يلا تصبحي على خير

زياد : هههههههه اما نهفة

مها : علقت بلسانه، مو ناويين يكبروا هدول

زياد : بس تكبري انتي اول

مها : بالله ؟ هلا صرت بدك اياني اكبر، مو عاساس بتحب طفولتي

زياد : ههههههه حبيبتي انتي احلى طفلة وزوجة بالدنيا كلها، والله نيالنا فيكي

مها : ونيالي فيك يا روحي انت

___________________________

آيات : بشوف بيان قاطعتنا كمان

امجد : اريح، بالناقص من شوفتها

انس : ليه كل شي بتفهموه مقاطعة انتوا ؟ يعني مو شايفها مناسبة انها تيجي، واكيد اهلها ما بخلوها بما انه الموضوع لسا جديد صار

امجد : طول عمرك فهمان دكتورنا الصغير

آيات : ومرت خالي خايفة على ابنها يحب وحدة ويتزوجها يعني ؟ حاطة ايدها على قلبها

انس : عمورتها بدها تجوزه على مزاجها اكيد، بكفي عدي اخد اللي بده اياها

امجد ( رفع حواجبه ) : وانتي شو علاقتك ؟

آيات ( متلبكة ) : لا بس كتير لهجتها قاسية كانت، حتى سلفتها بتشد على ايدها

انس : ليكون بدها تزبطه لبيان ؟ او امه حاطة عينها على بيان مثلا

امجد : الله يوفق لنصفق، ابن عمها واولى من الغريب

آيات : جد ؟ عادي عندك يعني

امجد : ليه مو عادي، كم مرة بدي افهمكم انها طلعت من حياتي للابد، وما بدي حدا يجيب سيرتها قدامي من يوم وطالع

انس : عين العقل، الله ببعتلك بنت حلال تهنيك وتستاهلك وتعرف قيمتك

امجد : يارب، بس كل شي بوقته حلو خليني هسة اكمل دراستي وارتب اموري

آيات : ...

كانت نار وبتاكل فيي، ما قدرت اغمض عيوني ولا لحظة من كتر ما تخيلت عمر متزوج بيان او حتى غيرها ..

انا قلبي ما ضل فيه اي طاقة لوجع جديد، حبي لعمر عم يتملكني يوم بعد يوم وما بعرف شو النهاية ..

ياسمين : آيات

آيات ( مصدومة ) : ياسمين !

ياسمين : كيفك ؟ طمنيني عنك، سلامتها خالتو

آيات ( نزلت دموعي ) : معقول عم تسألي عنها ؟

ياسمين : ... ما حكيتوا لاحمد صح ؟

آيات : لا، وانتي كمان لا تحكي

ياسمين : اليوم كان كتير متاديق، كانه قلبه حاسه، حتى ما قدر يحكي معي فيديو او مكالمة عادية

آيات ( ببكي ) : يا حبيبي

ياسمين : اسفة ازعجتك بكلامي

آيات : ابدا، احكي معي دايما وقت ما بدك، كيف دراستك ؟ متى بتخلصي ؟

ياسمين : الحمدلله كله تمام، باخر الشهر ان شاءالله

آيات : حبيبتي الله يوفقك ويجمعك مع احمد قريبا

يا الله شو انبسطت باتصال ياسمين، كنت متوقعة انها تسال عن ماما بس مو اتصال ..

سامحيني ياسمين لاني اذيتك، وسمحت لاشخاص متل منار وزينة وفارس انه يخربوا حياتنا وحياتك ..

وكله بسبب غبائي، وقلة خبرتي بالناس ..

ما منى : ما نمتي ؟

آيات : ... حكت معي ياسمين، سالت عنك

منى ( بسمة مليانة وجع ) : ما بتقصر، الله يرضى عليها

آيات ( بهز راسي ) : وصيتها ما تخبر احمد، هي سالتني ازا خبرناه او لا

منى : منيح، خلص ماما نامي عندك شغل بكرا

آيات : اوك، تصبحي على خير

جبرت بخاطر امي رغم الكسور اللي داقتهم بسببها، لمتى رح اتضل هيك علاقتنا ؟ ومعقول اللي انكسر بتصلح بيوم من الايام ؟ ..

___________________________

عمر ( معصب ) : بس فهميني شو قصتك ؟ شو بدك اعمل لحتى تصدقي اني ما بحكي مع بنت

ام عدي : وطي صوتك بوجهي، انا ما منعتك تحكي مع بنت، انا بدي تعرف انه مو اي بنت رح ازوجك

عمر ( كتف ايديه ) : والله ؟ طيب ممكن اعرف شو مواصفات البنت اللي بدك اياها من باب الفضول يعني ؟

ابو عدي : ههههههه

ام عدي ( زورته ) : شو اللي بضحك ؟ بدك يجيبلك حيا الله كنة ؟

ابو عدي : اقلبي عليي كمان

عمر ( شبك شعره بايده ) : استغفر الله، انا بدي انام عندي شغل بكرا اكتبيلي المواصفات على ورقة وعلقيلي اياها على مراية غرفتي عشان كل ما اوقف اقراها

غنى / ابو عدي : هههههههه

ام عدي : همة كلمتين ما في غيرهم، ازا حاطط عينك على آيات وبتفكر لو مجرد تفكير فيها اعرف اني مو موافقة وبغضب عليك ليوم الدين

عمر ( مصدوم وجسمه برجف ) : ...

ابو عدي : شووو ؟ معقول يطلع منك هيك ؟ كيف بتغضبي على ابنك ؟ بعدين مالها آيات

ام عدي : ما بدي اياها، اي بنت تانية انا موافقة عليها وبكامل رضاي بس آيات لا

غنى : مو معقولة ماما شو جاب سيرة آيات ؟ بعدين هية وعمر اصحاب مو اكتر وبينهم بس سنة ويمكن اقل يعني بالمرة مو زابطة

عمر : شو دخل العمر بالنص انتي الثانية ؟ خلص تصبحوا على خير

تركنا وضرب باب غرفته ضربة قوية، هزت العمارة وهزتنا احنا كمان ..

واضح انها ماما فاهمته منيح، وكلامها ما اجا من فراغ ..

بس ليه ما بدها آيات ؟، معقول بس من ورا قصتهم مع ياسمين ؟ ..

////

قصي : بسم الله الرحمن الرحيم

عمر : بلا سقاعتك انت الثاني مو ناقصك

قصي : ولك لمستني، حدا برن على حدا بهالوقت الا لمصيبة ؟

عمر : مهو في مصيبة

قصي : يا لطيف خير ؟

عمر : ما بعرف امي من وين جابت هالحكي، المهم انها نبهت عليي ممنوع اتزوج آيات ورح تغضب عليي

قصي : شو هالحكي ؟ ليه شو ناقصها مثلا ؟

عمر ( مخنوق ) : اذا ما تزوجتها صدقني ما رح اتزوج غيرها، انا بحبها بجنون يا قصي، قلبي ملكها وبس

قصي : لا حول ولا قوة الا بالله، شو هالحظ اللي الك انت وامجد

عمر : ااااخ اااخ من هالحظ، شو اعمل ؟

قصي : اتركها للايام، لسا بكير عالزواج اصلا

عمر : مين قلك ؟ كنت ناوي اخطبها اخر السنة

قصي : بالله عليك ؟ من وين جبت التكاليف اسم الله عليك ؟

عمر : يعني اكيد مو كل اشي على ابوي، بس عالاقل وقفته معي رح تسندني، بس بعد اللي صار اليوم، مستحيل اعتمد على حدا، ورح اتزوجها من تعبي وبس

قصي : ما فهمت ؟ كمان خالي ما بده آيات ؟

عمر : لا تخاف اليوم موافق عليها بكرا بعارض، امي تأثيرها قوي عليه

قصي : طيب طيب، الحكي سابق لاوانه عكل حال

عمر : بس بدي افهم كيف حست عليي ؟

قصي : قلب الام، خليك هادي واعمل حالك مو فارقة عندك واثبتلها انه فعلا ما بتفكر فيها

عمر : قولتك ؟ بحاول

قصي : لازم تحاول

عمر : حبيبي يا قصي سامحني ازعجتك

قصي : ازعاجك راحة، بكرا بشوفك ان شاءالله

عمر : تصبح على خير

___________________________

صعب كثير اني اتخيل صاحبي متزوج البنت اللي بحبها، وكانت خطيبتي بيوم من الايام ..

بس لو فعلا صار هالحكي حقيقة، كيف رح تكون علاقتي معه ؟ ..

معقول لو اهله ضغطوا عليه يتزوجها ؟، او هو نفسه يطلبها ؟ ..

انا لمتى بدي اضل افكر فيها هيك ؟، بكذب على حالي واللي حواليي باني نسيتها وما بتهمني، بس للاسف العكس صحيح ..

انس : يا خسارة القعدة مو حلوة بدون خالتي وبناتها

امجد ( نبرة حادة ) : نام

انس : ...

___________________________

غنى : زمان ما بين صح ؟

تالا : مبارح شفته كان مع اصحابه بدرس بالمكتبة

دعاء : هو خريج ؟

غنى : حكولك اني بعرف كل اشي عنه ؟ اما حضرته جاب اسمي ما بعرف من وين

تالا : بكون سائل شب من شباب دفعتنا

غنى : بتعرفوا ؟

تالا / دعاء : شو ؟

غنى : صراحة انا حاسة حالي متغيرة، يعني مشاعر زمان ولهفتي كتير متغيرة

دعاء : صدقي اني لاحظت عليكي

غنى : شكلي كاينة اتوهم بالحب متأثرة بجو عيلتنا ههههه

تالا : انا كنت بدي احكيلك من الاول بس خفت تفكريني غيرانة

غنى : يييي يا عليكي، من شو بدك تغاري ؟

 اسم الله الف شب بتمناكي شو ناقصك ؟

تالا : تسلمي

دعاء ( بهمس ) : بس اوعي تعترفي انك حاطة عينك على اخوها

تالا ( بهمس ) : يا ويلي انا شو نفسي التقي فيه

غنى : عشو بتتهامسوا ؟

دعاء : احم، صحيح شو اخباره اخوكي العريس ؟

غنى : هيو رح يصير اب هههه

تالا / دعاء : مبااارك، يعني رح تصيري عمة

غنى : يس يس

تالا : واخوكي التاني خطب ؟

غنى : عمورة لا تزكريني، مسكين نفسه يخطب بس صعب هالفترة لسا ما لحقنا نتنفس من عرس عدي

////

ديمة : يعني مستغربة مثلا ؟

آيات : ابدا ليه استغرب، بس بحكيلكم

سيرين : الله يهدي النفوس، شو حكت خالتو ؟

آيات : مسكينة انبسطت وما عرفت شو تحكي

ديمة : ...

آيات : بنات، انا رنيت عليكم لانه بدي احكيلكم سر مو قادرة اخبيه اكتر من هيك

سيرين / ديمة : احكي

آيات ( بتوتر ) : انا .. بحب

سيرين / ديمة : عمر ؟!

آيات ( مستغربة ) : كيف عرفتوا ؟ من ياسمين

سيرين : لا مو من حدا حبيبتي، من نظراتكم مبارح

ديمة : ومن غيرتك عليه ومن كل شي آيات

آيات : بس انا حاسة انه طريقنا صعب

سيرين : ... ما بعرف

ديمة : اللي بحب بده يتحمل، بس انا كتير مصدومة فيكي، ما تخيلت تحبيه

آيات : شو اعمل ؟ مو بايدي

سيرين : فكري منيح قبل اي خطوة، الموضوع مو سهل وانتي بنفسك اعترفتي

ديمة : الله يختارلك الافضل

////

ياسمين : هههههه يعني اعترفت بالاخر

سيرين : كله منك، ليه تحكيلها انه بحبها ؟

ياسمين ( ببرود ) : لانه بحبها

ديمة : انا شايفة هالحب رماد قدامي، اما همة او حبهم رح يتحولوا لرماد

سيرين : مجانين اقسم بالله

ياسمين : من وين بتجيبوا التشاؤم انتوا ؟ نسيتي حالك انتي واياها لما حبيتوا ؟ سيرين خانوم بتحبي ازكرك عن جنانك لما حبيتي واحد ما بتعرفي مين هو او كيف رح توصليله ؟

سيرين : ...

ياسمين : وانتي ست ديمة ؟ قليل اللي عانيتيه لحد ما شفناكي اليوم بتتوحمي ومو طايقة حبيب القلب

ديمة : ... طيب ما اختلفنا

ياسمين ( معصبة ) : هشششش، متل ما دعينالكم بدكم تدعولها، عمر ما في منه وانا متاكدة انه رجال وعند كلمته

سيرين : ما حكينا انه مو رجال

ديمة : خلص سيرين الحق طلع علينا بالاخر، اوك يلا ندعيلها ونعمل اللي علينا ونرد الواجب

ياسمين : افففففت، انا بدي اروح باي

______________

____________

فتحت عيوني على صوت الكابتن وهو بسردلنا معلومات عن البلد اللي وصلنالها، القيت نظرة من الشباك كانت الطيارة عم تهبط والركاب بستعدوا وكل واحد فينا عنده حدا بستناه بالمطار يستقبله ..

احمد ( ضمني بقوة ) : الحمدلله على سلامتك يا روحي

ياسمين ( نزلوا دموعي ) : انت احمد صح ؟ انا واياك سوا من جديد

احمد ( بمسح دموعي ) : ياسمينة روحي

اعطاني باقة ورد كانت معه، كانت كلها ورد احمر ..

شميتها كانه عمري مو شايفة ورد، مسك ايدي ومشينا مع عرباية الشناتي لحد ما وصلنا سيارته ..

ياسمين : كيف عايش بهالجو ؟ انا هيك بدي اعيش كمان

احمد : هههههه بلشنا، اركبي هسة مع المكيفات ما بتحسي باشي

ياسمين : الله يسامحك بس على هيك قرار، اااخ عمان شو اشتقتلها

احمد : ههههههه طيب ياسمين بفرجيكي

كاني بحكيله نكتة، المهم انه مبسوط وما بده اشي ينكد عليه، وسايرني لابعد الحدود ..

تفتلنا بالشوارع، صراحة كانت مدينة حلوة وشفت اشياء جديدة ..

بس من التعب ما قدرت الا اطلب منه اروح عالبيت، لانه الي ايام مو نايمة منيح ..

______________

____________

حنين : جهزي حالك للتعزيل، اكيد بكون البيت خرابة

ياسمين : اه طبعا بدك احمد يعزل مثلا ؟ منيح ازا بعمل اكل لحاله

رنين : يا الله خلص ؟ هيك رح تسافري متل ما هو سافر

الجميع ( دمعوا عيونهم ) : ...

مها ( بتمسح دموعها ) : الحمدلله، بكفي انهم مستقرين وما شاءالله عليهم، سواء هون او هناك المهم يكون قلبنا متطمن

ابو امير : ... ما بدي اوصيكي بابا، هناك ما في بيت اهل تروحيلهم وقت ما بدك وتشكي اسرارك الزوجية، بيتك هو بيت اسرارك، حتى الحيطان ما تحكيلها، حافظي على حياتك وزواجك  قد ما بتقدري، حاربي بكل قوتك عن حبكم اللي تعبتوا كثير لتعيشيوه بالحلال وبعيد عن العيون حواليكم

ياسمين ( هزيت راسي ) : حاضر بابا، بوعدكم اكون متل ما بدكم واحسن

مها : يا رب، ونفرح بشوفة اولادكم

ياسمين ( بلعت ريقي ) : حبيبتي ماما ادعيلي وانتي تولدي

مها ( بتبكي ) : بدي توصاية انا ( ضمتني ) يا عمري انتي كيف بدي اتعود على غيابك

______________

____________

انفتح باب البيت وكان عندي فضول اشوف مملكتي، والمكان اللي رح يجمعني مع احمد طول الوقت وبدون اي مشاركة من حدا ..

ياسمين ( متفاجاة ) : ما احلاااه

احمد ( مبتسم ) : تعالي افرجيكي، ان شاءالله يعجبك

هو كان قصده عن الاثاث والبيت بشكل عام، وانا لسا مصدومة من هول النظافة والترتيب والزينة اللي معلقلي اياها ..

وفوق كل هاد المطبخ كان بجنن، متل الطفلة صرت افتح بالخزاين والدروج واتفحص كل الاشياء ..

احمد : في نواقص كثير بس حكيت المطبخ اختصاصك اكثر بتشتري على زوقك احسن

ياسمين : بس كتير حلوين الاشياء، والبيت كله بجنن، بكفي انت اللي فيه

احمد ( قربني من الحيط وثبت ايدي بايديه ) : المهم انك وصلتي عندي وهسة ما حدا بقدر يبعدك

ياسمين ( بخجل ) : الحمدلله

احمد : طيب يلا نروح ناكل، بس خلينا نقطع الجاتو اول هههه

ياسمين : اي جاتو ؟

احمد ( فتح الثلاجة ) : حبيت احتفل فيكي على طريقتي، صحيح اشي بسيط، بس صراحة مقصر والامور داخلة ببعضها من جهة تخرجك ومن جهة جيتك لعندي بالسلامة

ياسمين ( عيوني على احمد كيف بفتح بكرتونة الجاتو وبراقب بالقالب ) : يا الله منظره بششششهي، بعدين مين قلك انك مقصر ؟ بس ازا اكلت منه هلا بشبع وما بتغدى

احمد : لا ما رح ناكل، بس تقطيع .. اوووباااا .. والف مبارك التخرج مرة تانية يا احلى دكتورة صيدلانية

ياسمين : ما يحرمني منك احمودتي

////

هيثم : الحمدلله على سلامتها

مها : الله يسلمك

هيثم : بكفي مها شو هالدموع هاي، ما صدقنا ونجوزهم عصافير الحب

مها : ... المشكلة مو فيي، المشكلة بابوها

هيثم : ماله ؟ لا تقوليلي بعيط كمان

مها : من لما رجعنا عالبيت وهو بغرفته وما بحكي مع حدا، وماسك صورها

هيثم : هههههه يا الله دخيلك، هسة هيك كل الآباء ولا انتوا حساسين زيادة ؟

مها : ...

هيثم : صراحة معكم حق، اذا احنا عازة علينا ياسمينتنا كيف انتوا ؟ صدقي لحد هسة مو مستوعب انه العيلة ما فيها ياسمين واحمد باي مكان بجتمعوا فيه

مها : الله يرجعلنا اياهم بالسلامة

////

حمزة : خلص حبيبتي والله قطعتي قلبي

سيرين ( بتبكي ) : صعب يا حمزة صعب اتخيل البلد بدون ياسمين، قلبي راح معها والله

حمزة ( ضمني بقوة ) : معك حق والله ياسمين من خيرة البنات، ما يحرمكم من بعض

سفرها كان فاجعة النا متل ما كان سفر احمد فاجعة الها، غيابها ما في اشي بعوضه لانه وجودها ماله مثيل ..

////

عدي : يا عمري والله ما بصير تعملي هيك، نسيتي انك حامل ؟ ولا بتحبي المغامرات بطبيعتك !

ديمة ( بتبكي ) : عدي مشان الله ارحمني مو ناقصني كلامك، بدل ما تخفف عني ؟

عدي : اخفف عن شو ؟ وحدة سافرت لعند زوجها يعني مو عايشة لحالها، ومن غير شر من غير شر مو رايحة بلا رجعة، شفتي كيف احمد بيجي اكيد هية رح تيجي بين كل فترة وفترة، المهم هسة امسحيلي هالدموع وتعالي نطلع مشوار نغير جو

ديمة ( هزيت راسي ) : متل ما بدك

كل الكلام وقف قدام ياسمين، كيف رح نتعود على غيابها ؟ ومتى رح نرجع نجتمع من جديد معها ؟ ..

الله يهنيكي مع احمد، وما يفرقكم عن بعض لاخر العمر يا احلى وردة بالدنيا ..

////

احمد : هيها وصلت

منى : الحمدلله على سلامتها ماما، الله يهنيكم

احمد : امين، يلا خليني اساعدها، برجعلكم

منى : خدوا راحتكم حبيبي، سلم عليها وديروا بالكم على بعض

ابو احمد : الله يهنيهم، واخيرا

منى : ... ابصر متى تحكيله عاد

ابو احمد : لا اتضلي تفكري بالموضوع، ابنك رجال وسيد الرجال كلها ومتاكد انه تربايتنا فيه ما رح تروح خسارة

منى : الله يرضى عليه، انا متطمنة من هالناحية، بس كمان الحق كله مع مرته، الله يعينه على هيك اخبار رح يسمعها

////

احمد : عجبك الاكل ؟

ياسمين : اه كتير، مطعم فاخر يسلمو ايديك حياتي

احمد : يلا بس تخلصي اكل عشان تحكي مع اهل الاردن

ياسمين : بعتت لاهلي وطمنتهم حبيبي

احمد : واهلي بدهم يحكوا معك، كانت امي عالتلفون لحظة ما وصلتي عشان تسال عنك

ياسمين ( متلبكة ) : ... ان شاءالله

كنت اتعمد اجيب سيرة اهلي قدامها لانه قلبي مو متطمن من زمان، وما صدقت توصل ياسمين عشان تواجهني وما يكون عندها وسيلة للهروب ..

ياسمين : يا دوب اضب الشناتي

احمد : ملحقة، بداوم طول النهار، بتضبي براحتك

ياسمين : بس اشياء المطبخ، واللي بده تلاجة

احمد : ماشي، يلا وينهم خليني اساعدك

كنت انا واياها خطوة بخطوة، ومستمتع كثير بوجودها بالبيت ..

من لما سكنته وانا اتخيلها معي، واخترته من اولها يكون مناسب لعيلة حتى ما اغيره ..

ياسمين : مين الناس اللي بالعمارة بكونوا ؟

احمد : هههه ما بعرفهم للاسف

ياسمين : يعني ما في حدا متلنا من الاردن مثلا او فلسطين ؟ سوريا او لبنان ؟

احمد : ههههه في الهند وباكستان والسودان والفلبين واندونيسيا مثلا

ياسمين : جد ؟ عادي نسكن كلنا بنفس العمارة

احمد : هههههه بلشنا هبل، ولك هي عمارة اللي خلفني ؟ شو دخلني مثلي مثلهم سكنت

ياسمين : يا ربي، يعني اقعد هيك بالدار لحالي ؟

احمد ( قعدتها جنبي ) : هسة انسي الجيران وركزي معي

ياسمين : نعم ؟ ركزت

احمد ( عيوني بعيونها ) : في اشي بينك وبين اهلي مخبيته عني ؟

رجفت رجفة واضحة، وتغير لون وجهها ..

نزلت راسها وما قدرت اتضل تطلع في عيوني، وسحبت حالها وراحت عند شنتة ..

احمد ( بنبرة حادة ) : وين رايحة ؟ حكتلك مو وقت الشناتي هسة

ياسمين ( ماسكة ظرف ) : ...

قعدت جنبي وكانت متوترة بشكل فظيع، وانا قلبي صار برجليي من منظرها قد ما كان بخوف ومثير للقلق ..

////

ما كنت ناوية اخبره من اول لحظات وصولي، بس هو ما كان ناويلي على خير وواضح انه ما صدق واوصل عنده حتى يستفرد فيي وياخد راحته بالتحقيق ..

فكرت بالموضوع، ولقيت انه مو لصالحي اخبي اكتر من هيك، لانه شبح خالتي رح يضل ملاحقني ويضغط عليي احكي معها ..

ياسمين : تمام احمد، رح احكيلك كل شي بس ممنوع تقاطعني

احمد ( بهز راسه ) : احكي خلصيني، نشفتي دمي

قعدت جنبه، نزلت راسي وبدات بسرد الاحداث بالترتيب متل ما صار معنا بالضبط ..

واحمد كان عم بشد اكتر واكتر على قبضة ايده، وبدخن بدون اي صوت او حركة ..

بعد ٣ ساعات <<

منكمشة على حالي بزاوية غرفة النوم، ومنهارة وما بعرف شو المصير اللي بستناني بعد ما شفت ردة فعله قدامي ..

كيف قطع الصور لمليون شقفة وشقفة، نثرهم بكل مكان وطلع جنونه وهستيريته ..

احمد ( بغضب ) : وين رحتي ؟ اطلعي بكفيكي تخباية

ياسمين ( برجف ) : ...

احمد ( بنبرة حادة ) : قومي من مكانك، دور البريئة مو لابقلك

ياسمين ( ببكي ) : ...

احمد : على شو بتعيطي فهميني ؟ عشان خبيتي عني انك حاكية مع واحد دابقك ومو عارفة تتخلصي منه غير لما شرحتيله قصتنا ؟ ولا على ال... اللي مصاحبتيها انتي واختي ؟ ولا على شوووو ؟ ( رفع صوته ) فهمووووني ؟

ياسمين ( رميت حالي على التخت وغمرت وجهي بالمخدة وميتة من البكى ) : ...

قرب مني وشد على ذراعي، ونيمني على ظهري ونام فوقي حتى نفسنا صار واحد ..

احمد ( بصوت ضعيف ودموع معبية عيونه ) : غسلتي ايديكي منيح بالديتول ؟ عقمتيهم همة وشعرك ؟ جاوبي ياسمين، نظفتي محل ما لمسك هداك النذل ؟

ياسمين ( بهز راسي ودموعي حرقت وجهي ) : ... غسلت حبيبي غسلت والله

شد على ايديي، قرب راسه على مستوى راسي ورفعني من دقني بدقنه ..

وقرب من تمي وباسني بقوة كبيرة، كان عم بثبتلي اني اله وبس وممنوع حدا يقرب مني غيره ..

شعوره كان قاتل، وانا فاهمته؛ لاني انا ما بتحمل حدا يقرب مني غيره ..

________ممنوع من العرض ________

ياسمين ( معلقة ايدي برقبته وحاضنته ) : سامحني احمد، سامحني وبوعدك ما اخبي عنك اشي بعد اليوم

احمد ( بتاملني ) : الذنب مو كله عليكي ياسمين، انتي وانا ضحايا، وانا الحق عليي لاني سترت على وحدة مثل زينة

ياسمين : رح تتعفن بالسجن وتاخد جزاها حبيبي، وانا واياك هلا مع بعض غصبن عنها وعن كل اللي بده يفرقنا

احمد : صحيح، بس كنا بغنى عن كل اللي صار

نهض حاله، وتناول سيجارة، ولعها ونفخ بهدوء ..

هاي الحركة لما اشوفها، بعرف انه عم بفكر بعمق، وباله مشغول ..

قعد وسند ظهره على راسية التخت، ولفني من خصري وشدني لعنده وحط ايده بشعري ..

احمد : بالنسبة لأمي انتي ما رح تكوني الا راضية، بس اتركي الموضوع عليي

ياسمين : انا ما بدي اشي، وما رضيت اتخذ اي قرار الا معك، واللي بتؤمر فيه انا جاهزة

احمد : مبسوط كثير منك، بالرغم من عمايلك بس بتزبطيها بالاخر وبتظهري حكمتك

انبسطت من قلبي على كلامه، حبيت اهتمامه فيي، وحبه الكبير وتصرفاته ما كانت غريبة عليي لما عصب ومعه حق ..

الحلقة الثالثة عشرة :

ج١

من النضج

أن تعامل الناس بما يليق بك

وليس بما يستحقون ..

_______________

____________

الاوقات المميزة بنحتاج فيها اشخاص مميزين يكونوا معنا فيها، واحاديثهم بتزيح عن قلوبنا الهموم مهما تراكمت ..

ومتل هالايام بشعر بضيق كبير، لانه غياب ياسمين عني عمل فراغ ببيتنا كله، مو بس عليي ..

مها : مال ياسمين ببعتلها وما بترد ؟

حنين : بتكون ملتهية بالبيت

رنين ( بحزن ) : الله يعينها، بس اشتقنالها

مها : امير نام وهو بحكي اسمها، وابوكي شافه هيك حضنه ونيمه جنبه

حنين : يلا هلا بنرن عليها نشوفها شوي

رنين : معقول يخليها تطبخ اليوم ؟

مها : تعمل اللي بتشوفه مناسب الها ولزوجها، احنا ما بصير نتدخل بحياتهم

حنين : فعلا هاد الصح، كل وحدة ادرى بظروفها

اختي الكبيرة وسندي، ومصدر قوتي ..

يمكن كانت سبب لبعض المشاكل او القلق اللي كان يصيب بيتنا، لكن كان كله في سبيل الدفاع عن حب حياتها والحصول عليه مهما كلفها الثمن ..

////

يوم جديد، ومن بدايته انا معه ..

اه معه، واخيرا انا واياه وبس ..

لا في كمان روح تالتة عايشة بينا، وبعد الوجع اللي دقناه من حقنا نفرح، ونملي قلوبنا زغاريد ..

ياسمين ( مبتسمة وعيوني دموع ) : اهلين ماما كيفك ؟

مها ( مبسوطة وبتخفي دموعها ) : يا حبيبتي، الحمدلله اجا هاليوم اللي شفتك فيه ببيتك

ياسمين : يييي خليني افرجيكي اياه صح، شوفي هاي غرفة النوم

مها : ماشاءالله، تتهني ماما ديري بالك خليها غرفة سعادة وحب واتركي كل النكد برا بابها، ريحتها شموع وورد، وغلفيها بالمودة والاحترام

ياسمين : ان شاءالله، مع انه مبارح كان اول نكد بس الحمدلله بغرفة النوم راح على طول

مها ( بلهفة ) : حكتيله ؟

ياسمين ( بهز راسي ) : اه والله انجبرت احكي لانه ضغط عليي، وقلبه حاسه، منيح اللي صبر اصلا

مها : ايوا ؟

حكيت لماما كل شي صار، وكيف احمد وقف معي ووعدني انه يرضيني وما يكسر كرامتي ..

مها : طيب وانتي لازم تكآفئيه بالمقابل

ياسمين : ما فهمت

مها : تكوني قد الثقة وخالتك يا امي ساعة غضب وندمت عليها، وانا متأكدة انها بدها رضاكي

ياسمين : اسمعيني ماما، حاليا بفكر باشي واحد، بعديها ما بعرف شو القدر كاتبلنا

مها : شو ؟

ياسمين ( بخجل ) : بحضر مفاجأة لأحمد، حتى اخبره اني .. اني

مها ( بلهفة ) : انك شو ؟

ياسمين : ... حامل

مها ( بصدمة ) : حامل ! بتتخوتي صح ؟ شو حامل ( عصبت ) ياسمييييين ؟!

ياسمين : هههههه طولي بالك عليي، بعرف رح تلوميني اني خبيت بس كنت حابة انه احمد يعرف اول واحد

مها : ولك يا مجنونة، ما بتبطلي ولدنات ؟ بدل ما ندير بالنا عليكي بتخبي علينا ؟ وصينا ما نحكيله وخلص

ياسمين : حتى لو وصيت رح تحكوا، المهم هلا ساعديني كيف اخبره ؟

مها ( قلبت وجهها ) : ما بعرف شوفي من النت، انا بدي اروح خلص اتطمنت عليكي

ياسمين : طيب احكيلي مبروك، تقومي بالسلامة، التمام على خير

مها : ببارك لاحمد لانه اكيد رح يركض يخبرني، مو متلك

ياسمين : هههههه بتموني مامي، عكل حال خبري خواتي انه احمد كان معزل البيت ومرتبلي اياه، وشوفي الزينة وهلا ببعتلكم صور قالب الجاتو والورد

مها : تتهنوا

خلص الحكي قدام موقف ماما، باختصار يا ريتني ما حكيتلها، وخليت احمد هو اللي يحكي بدالي ..

////

حنين : شو شو شووو ؟

رنين : حاااامل ؟ ياااي رح اصير خالة يعني

اسيل / فرح : هيييييي هييييي

حنين : طيب كيف ما حسينا عليها كل هالوقت ؟ عاد كانت تحكيلي ما عليي صلاة مرات

مها : اكبر كزابة، غشيمة عن افلامها

رنين : امانة الله ماما لازم تفرحيلها مو هيك تزعلي، برضو معها حق تخبي يعني هي شوفي ديمة كيف خبت كمان

مها : ..

كلنا بعتنا لياسمين نباركلها وانبسطنا كتير بالخبر، واكتشفنا انها مو زعلانة من ماما بالعكس حاسة فيها ..

لانه موقف ماما ما كان غريب، اكيد مشاعرها داخلة ببعض ..

من جهة فرحتها بحملها، ومن جهة خوفها عليها وشعور انه تفرح وتهتم فيها كونها اول فرحة ببيتنا، واهم من كل هاد يمكن لو خبرت خالتي كانت رح ترحمها شوي ..

بس معقول خالتي كانت رح تشك بالولد انه مو ابن ابنها بما انها اجت وحكت عن ياسمين واتهمتها باشياء صعب تخيلها حتى ؟؟ ..

سيرين : حنوو

حنين : اهلا

سيرين : رانيا وآدم عندي، جيبوا امير وتعالوا، احكي لخالتي كمان لاني ببعتلها وما بترد

حنين : يلا هلا بخبرها

______________

____________

في رمضان <<

ابو علاء : العمرة بعد اسبوع يا نهى، شو رح تعملي بالولد ؟

نهى ( حزينة ) : ... بخليه عند ريم او سهى

ابو علاء : صلي عالنبي، معقول تتركيه هون وهون وابوه ومرته كل لحظة بتمنوا يرجع لحضنهم

نهى : معقول هيثم تحسنت نفسيته وقادر يعيش معه ؟

نهى : يا بنت الحلال زودتيها، الزلمة ذاب قلبه على رجوع ابنه وانتي بتقولي معقول ؟

نهى : خايفة يفهمني غلط هلا، واني بدي اروح عمرة عشان ارتاح من ابنه

ابو علاء : ههههه لا حول ولا قوة الا بالله، معقول انتي نهى اللي بعرفها ؟ الله يهديكي كبري عقلك هيثم عمره ما بحكي ولا بفكر بتاتاً بهيك كلام عنك، بالعكس هو خجلان لانه متعبك معه من البداية وشوفي كيف انتي مو ببالك انك تعبانة وبكل صدر رحب حاطة ابنه جوا عيونك

نهى ( نزلوا دموعها ) : وخلص آدم رح يتركنا ونرجع انا واياك وحدانيين ؟

ابو علاء ( بهز راسه ) : انا فاهم عليكي، وبعرف انك بتتحججي عشان يضل معك ويونسك، بس مو منطق تحرمي طفل من اهله، بكفي امه انحرم منها

نهى ( بغضب ) : لا تجيب سيرتها، استغفر الله العظيم، ما بصوم وبصلي عشان اعطيها حسناتي

ابو علاء : بتؤمري، يلا قومي ضبي اغراضه وانا هيني بساعدك كمان، وبخبر هيثم

نهى : ... متل ما بدك، انت دايما هيك بتعمل فيي

ابو علاء : ههههههه والله ما بدي الا راحتك وراحة بالك

////

هيثم ( بفرح ) : الله يبشرك بالخير، ويريح قلبكم مثل ما ريحتوني

ابو علاء : له يا ابو آدم انت عزيز وغالي علينا كلنا، ما عملنا الا واجبنا معك، وهي الازعر اللي ما بعرف شو بدنا نعمل بلاه رح يرجعلكم

هيثم : انا تحت امرها باي وقت بتحب تشوفه او بجيبلها اياه انت عارف هالحكي منيح، بس والله اني تعبت وهو بعيد عني

ابو علاء : ما يفرق اهل عن اولادهم يارب، المهم انت شو نويت ؟ بدك تعمل فحص ؟

هيثم : لا والله، صراحة آدم بشبهني والكل بشهد على هالاشي، وانا مو حابب بيوم من الايام بس يكبر لو عرف بالصدفة اني عملت هالاشي معه يحز بنفسه، خلص توكلت على ربنا وربك ما بخيب عباده

ابو علاء : عين العقل، الله يعطيك على قد نيتك ويعوض عليك

هيثم : تسلم، حبيبي يا ابو علاء

////

ريم : يا ويلي عليها خالتو قد ما عيطت، مو قادرة اشوفها هيك

علاء : اه والله نزلت دموعي، كنت رح اعيط معها مسكينة، شو اللي عاملته بحالها امي ؟

ريم ( بتبكي ) : انا خايفة عليها علاء، والله خايفة افكار سودا بعقلي ومتعبيتني

علاء : لا توكلي على الله، من غير شر عنها، وانتي كمان لا تعملي هيك بحالك نسيتي انك لسا بترضعي ؟ شوفي سلمى كيف بتطلع عليكي وبدها تعيط معك

ريم ( مسحت دموعها ) : ... بدي اروح اشوف خالتو لازم نضل معها

علاء : هاتي سلمى اهديها وانتي لهي امي باي اشي، وغيري الموضوع عالاخر

////

مها : مين حكالك ؟

ياسمين : ريم وسيرين، واختك حالتها حالة

حنين : ناقصنا هلا يصير فيها اشي مسخمة

مها : لا من غير شر، يعني اخرته يرجع لابوه مالها عاملة بحالها هيك ؟

ياسمين : لانه عوضها عن الوحدة اللي تركتها سيرين بعد ما تزوجت، لقت حالها تونست فيه غير عن هيك هية متعلقة فيه من البداية

مها : سبحانك ياربي، فعلا الام هي اللي بتربي مو بس بتولد

حنين : الله يهونها عليهم، منيح اللي رح تطلع عمرة تغير نفسيتها شوي وتدعي لحتى تشبع

ياسمين : هي كمان بعد ما عرفت عن عمايل زينة بعمو ابو علاء حسيتها انقهرت ومتل صدمة، بس ما اظهرت هالاشي

مها : هي قليلة يعني ؟ ما انتي شفتيني كيف انجنيت وحردت وكنت رح اخرب بيتي

حنين : حسبي الله ونعم الوكيل فيها وفي اشكالها

ياسمين : ... الحمدلله عكل حال، نصيبنا بهالدنيا ننبلي فيها، الله يعين خالو اللي شافه مو قليل

مها : شوف العين بهد الحيل، شاب شعره من منظرها

حنين : فعلا لاحظت انه شيبه كتران بعد ما صارت القصة

////

رانيا ( حاملة آدم وبتلعبه ) : يا عمري انت، رجعتلي واخيرا ( حضنته بقوة ) ااااخ شو اشتقتلك

هيثم : مبسوط حبيبي ؟ شوف ماما رانيا شو جابتلك العاب

رانيا : قرب عيد ميلاده، رح اعمله حفلة كبيرة

هيثم : اه صحيح، بعد العيد بكون، لازم ارتب برنامجي واخد اجازة كمان انتي ما لازم تتعبي كثير، نسيتي حالك ؟

رانيا ( ماسكة لعبة وبتلعبه ) : عادي، كل التعب بروح قدام هالحلو، دخيله انا اللي بحب الالعاب

______________

____________

مها : يسعده ادومة اشتقلتك يا عمتو

رانيا : تسلمي، وهو اشتاقلك

سيرين : شو خالتو قربتي، اسم الله بطنك حاسك مو قادرة تتحركي

حنين : الشهر الجاي التاسع، الله يعديه على خير

رنين : انتي بدا الحمل يبين عليكي كمان

رانيا : لا نصحانة ههههه

سيرين : شايفة خالي كيف بدللك

رانيا : عقبال ما حمزة يدللك

مها ( عيونها عليي ) : وياسمين خلصت شهرين

سيرين ( بدهشة ) : ياسمين حااامل ؟

رانيا ( ضحكت ) : حكتلكم ؟

الجميع ( بصوت واحد ) : بتعرفي ؟

رانيا : ههههه انا اللي خبرتها، يوم ما سافر احمد ودخلت المستشفى لما عملولها فحوصات طلعت حامل وهيثم حكالي عشان اخبرها

مها ( بقهر ) : وانا متل الهبلة

سيرين / حنين : هههههه بلشنا

سيرين : يا جماعة لازم ننبسط شو مالكم ؟

مها : على كل حال احمد لسا ما عرف، بدها تعمل مفاجاة ست الحسن، وهيثم حسابه عندي

رنين : ههههه طلعت براسه المسكين

سيرين : صحيح شو دخله ؟

مها : خبى عليي

رانيا : وانتي كمان خبيتي عليه موضوع زينة واللي عملته بابو امير

مها : على السيرة، احمد عرف مبارح وجن جنونه بس بعدين عدت على خير

سيرين ( تنهدت ) : الحمدلله، وشو بالنسبة لخالتي ؟

حنين : لسا مو مبين

ما حبيت امي تخوض بسيرة خالتي، لانه بعرف موقف اختي كتير منيح، وكمان بعرف موقف امي ومحبتها لاختها ..

وبما انه ياسمين سلمت امرها لزوجها، فاحنا ما دخلنا باي اشي، وهية صاحبة القرار مع زوجها ..

_______________________________

سهى : كيفك اليوم ؟

ديمة : الحمدلله، شو اخباركم انتوا ؟ وين ما بتبينوا ؟

سهى : من الشوب مو قادرة اطلع من البيت، وقصي معطل ومقضيها يتشهون طبخات مني ومن ريم

ديمة : ههههه بطلعله، وينه هلا ؟

سهى : طاشش، بس وصيته على اغراض عشان ارجعه عالبيت

ديمة : حلال عليكي هههههه

سهى : حكيتي مع ياسمين ؟

ديمة : من اول يوم نحكي معها ؟ عشان احمد يطلعلنا من التلفون

سهى : قلبي بغلي نفسي اعرف ازا حكتله ولا لا ؟

ديمة : كله ولا يقلبك يغلي، اخرتها تحكيله

سهى : قولتك، بس عشان خالتك منى

قصي ( اجا فجاة ) : هيهي علينا بعدين مع هالسيرة اللي ما بتخلص ؟ وين ما اروح بسمعها

سهى / ديمة : بسم الله

ديمة : تعال سلم عليي اول بعدين تفلسف

قصي : بخاف تقرفي مني هههههه

سهى : هههههه

ديمة : وين كاين لحتى تزهق من هالسيرة ؟

قصي : شو هاد تحقيق بس من تحت الطاولة ؟ روح يا عدي الله يكون بعونك

ديمة : بلا برادة اعترف

قصي : مرقت اشوف دار سيدي شوي، لقيت الكل قاعد بحكي بنفس الموال، وخالتك منى بشحمها ولحمها هناك وايدها على قلبها

سهى : يعني ياسمين حكتله، اللي فيه مسلة بتنغزه على كل حال

قصي : بالضبط، مع انه كانت حاطة ايديها ورجليها بمي باردة من ابنها حبيبها، بس بعد اخر مكالمة مبارح بطل يرد على حدا

ديمة : هي حكت ؟

قصي : لا امجد حكالي بيني وبينه، وكيف امه وابوه متطمنين انه احمد على طول يصلح الامور بينهم وبين ياسمين، بس الظاهر ( رفع حواجبه ) تجري الرياح بما لا تشتهي السفن

سهى : يا سلام، ايوا ؟

قصي : وبس

ديمة : الله يستر من اللي جاي

سهى ( تنهدت ) : لا حول ولا قوة الا بالله، يا ربي اللي هديت نهى وحننت قلبها على هيثم، تحنن قلب احمد على اهله، وتحل هالمشكلة وما تفرجينا اعظم منها

ديمة : اه والله، امين

قصي : يمة اعزمي ريم كمان

سهى : مين قلك اني عازمة ديمة ؟ هي لحالها اجت طب

ديمة ( مصدومة ) : بالله ؟ مين اللي مبارح نامت وهي تحكيلي تعالي عنا طابخة سمك

قصي : هيهيهيهي، اقصفيها ماما اوعي تسكتي

سهى : ولا بقصف ولا عبالي، منا حكتلها عشان بعرفها بتحب السمك، قلت بتيجي تساعدني

ديمة ( عيوني على قصي ) : كل هاد وما بتقصف ؟

قصي : يمة يا حبيبتي هههههه

////

انس : يا رب تيجي خالتي مها بالصدفة

امجد : عشان تعلق بينها وبين امك، اسكت خلينا نعرف نقعد ما صدقنا وتتسكر هالسيرة

انس : انت ليه اجيت صحيح ؟ مو قلت انك مشغول

امجد : خلصت شغلي، وقصي كان بده يشوفني حكتله بنلتقي هون

انس : وآيات بدها تيجي كمان بس تخلص شغل ؟

امجد : لا بدنا نروح

انس : اسال امي اول

غنى ( اجت فجاة ) : سلام

الجميع : وعليكم السلام

غنى : كيفك عمتي ؟

منى : الحمدلله بخير، كيفك انتي خلصتي الصيفي ؟

غنى : لا لسا باوله احنا، كيفك انس شو شعورك بعد التوجيهي ؟

انس : احلى شعور، بس لسا النتائج الله اعلم

غنى : يلا على خير، آيات وين ؟

منى : بالصيدلية، كمان شوي بتلحقنا بس يخلص دوامها

امجد : وحدي الله بدي اروح عالبيت خلصيني، مو قلتي تعال خدنا

ام ماهر : ما بتطلعوا بدون غدا يا ستي

امجد : والله يا ستي صعب عندي دراسة وشغل، يمة انا بروح وخلي ابوي يرجعكم

كنت راجعة من الجامعة و لقيت عمتي واولادها، وحبيت افرح بيان بشوفة امجد لانه دايما بتحكيلي انها اشتاقتله بس مو مسترجية تروح تشوفه بالجامعة ..

وبالعيلة ما عم يلتقوا؛ لانه لماتنا صارت محدودة ..

بيان : قولتك ؟

غنى : ولك مو نفسك تشوفيه ؟ بقلك هيو تحت انزلي تحججي باي اشي

بيان : خايفة يا غنى، خلص ما بدي

غنى : افففت ما اهبلك، من شو بدك تخافي ؟

بيان : من المواجهة، من كل شي

غنى : متل ما بدك، انا حبيت احكيلك

امجد : يلا مع السلامة، برجع مرة ثانية يا ستي

ام ماهر : الله معك، مع اني حابة اتضل بس بكيفك

بيان ( اجت فجاة ) : ستي اعطين...

امجد ( بحاول يتجاهلها وبعد عن الباب ) : ...

بيان ( عيونها عليه بس راحت تسلم ) : كيفك عمتي ؟

منى ( بلا مبالاة ) : اهلين حبيبتي منيحة

امجد ( استغل الموقف وطلع ) : ...

غنى : بفكرك بالجامعة

بيان : لا روحت قبل ساعة، انتي هاي جيتك ؟

غنى : اه والله، خلص بدي اطلع عالبيت

بيان : بدي اخد لماما شوية طحين، خالص من عنا

ام ماهر : خدي ياستي، هيو بخزانة المونة بتعرفيها

موقف امجد كان قاسي، حتى نظرة بالغلط ما اتطلع عليها ..

معقول هاد اللي كان دابح حاله على ما يمسك ايدها ولا يرتبط فيها ؟، لهالدرجة الحب سهل ينتسى ؟ ..

غنى : سامحيني، يا ريتني ما حكتلك

بيان ( بتبكي ) : انتي ما دخلك، انا اللي بستاهل كل شي بصير معي

غنى : بس ما حبيت موقفه، يا خسارة

بيان : اااخ يا غنى، لو تعرفيه اديه كنا نحب بعض، كانت نظراته لحالها بتوصلني للسما من كتر الحب اللي فيها

غنى : ...

بيان : اوعي يا غنى، اوعي تحبي حدا قبل الزواج، خبي مشاعرك كلها لخطيبك وزوجك

غنى ( بهز براسي ) : معك حق، انا صحيت على حالي وقررت ابعد عن طريق هداك الشب اللي قلتلك عنه

بيان : بكون احسن، لانه رح تدخلي بمتاهات وغير عن موقف اهلك بما انه شب غريب تخيلي لو عرفوا ؟ احنا من العيلة ويا دوب

////

كيف عملت هيك ؟، اي برود صابني حتى قدرت اتجاهلها وما اقدر اخذ نظرة منها ؟ ..

مع اني كنت ميت اني المحها، واشبع عيوني منها بعد ما انحرمت ..

آيات : تعال خدني امجد مو جاي عبالي اروح مواصلات

امجد : روحي عالبيت انا روحت لاني

آيات : بالله ؟ لا حابة اروح زمان ما رحت

امجد : معناها دبري حالك

آيات (  بجكر ) : ما الي الا عمر يجيبني، هلا برن عليه

امجد ( عصبت ) : والله يا آيات اذا بتحكي معه ولا بسمع انك طلعتي معه لحالك الا احكي لابوي، فهمتي ؟

آيات : ... سلام

امجد ( بصوت عالي ) : لا تسكري الخط، بحكي معك بعدني

آيات : احكي منيح طيب ؟، شو شايفني عندك امجد ناوي تعمل كمان علة بابوك متل ما عملت بامك

امجد : انا جاي هسة عالصيدلية لا تطلعي

آيات : طلعت لا اتعب حالك، هيني بدي اوقف تكسي لا تخاف لا بدي احكي معه ولا بدي اشوفه كمان

امجد : بكون احسن، طيري من خلقتي حرقتي دمي عالفاضي

______________

____________

قبل شهرين <<

ابو احمد ( بهمس ) : اذا بتحس على آيات انها تواصلت مع عمر، احكيلي عشان اعرف اتصرف معها

امجد : انا نبهت عليها كثير ومع ذلك بشوفلك اياها

ابو احمد : مو ناقصنا فضايح وكلام طالع نازل من الناس، بكفينا اللي فينا

امجد : بصير خير انت بس دير بالك على امي وانا بتولى آيات

ابو احمد : كلنا لازم ندير بالنا على امك

آيات : ليه ماسك تلفوني ؟

امجد : فيه اشي غلط ؟ تخافي اشوفه مثلا

آيات : مو ضروري يكون فيه اشي غلط، افرض صور لبنات بلا حجاب ؟ بصير تشوفهم ؟

امجد ( رفعت جواجبي ) : والله ؟ ليه حضرتك بتبعثي صورك بلا حجاب لحدا ؟

آيات : استغفر الله العظيم، امجد اعطيني موبايلي لو سمحت

امجد : مع اني ما كنت فاتحه ولا بفكر بهيك اشي، يعني بس مسكته بتفرج عالخلفية، مع ذلك بدي انبهك على شغلة

آيات : تفضل ؟ خير

امجد : اي حدا من شباب العيلة بتواصل معك حتى لو حكي عادي، حاولي تختصريه، مين ما كان يكون

آيات : مين شباب العيلة ؟ عزابية ما ضل الا عمر وقصي وانت، الا ازا قصدك عن عمر !

امجد : انا حكيت بشكل عام، عاد انتي وفهمك ست آيات، واذا شفت او حسيت انه بتعملي اشي من وراي ما تلومي الا حالك

آيات : والله ؟! خوفتني صراحة

امجد : اكيد لازم تخافي

آيات ( مقهورة ) : طيب امجد بنشوف

ما كان اسلوبي عاجبني ولا عاجبها، بس كان لازم انبهها حتى ما توقع بين ايدين ابوي، لانه ما رح يرحمها ..

مو لانه ابوي ظالم، بس خوفه عليها وعلى سمعتها وبعد كل الظروف اللي مرقنا فيها، زرعت جواته بذرة الخوف ..

______________

____________

عمر : يعني انت عند دار سيدي هسة ؟

امجد : لا روحت

عمر : يا زلمة كان ضليت شوي اشوفك، ما انت عارف شغلي بروح عال٦

امجد : تعبان والله يا عمر، امرق عندي انت

عمر : مو اليوم، المهم طمني كيف ياسمين ؟ واحمد

امجد : لا تذكرني ما صدقت وانا اروح من ورا هالقصة

عمر : حكتله ؟

امجد : الظاهر، لانه بطل يرد علينا ولا يحكي مع حدا

عمر : لا ؟ وليه ما يرد يعني ؟ عالاقل عالاقل يعاتب

امجد : لما تهدى اعصابه اكيد رح يبين لا تخاف عليه

عمر : الله يجيب العواقب سليمة، يلا انا وصلت خليني اسكر اصف السيارة

امجد : اوك، بشوفك

////

ما احلاني ورايح عندك، والقمر طلع قدام عيوني ..

تحججت بصفة السيارة مع انه زمان واصل وصفيتها، بس لما لمحتها نزلت من التكسي، وطبعا مو شايفتني جوا السيارة، نزلت على طول ولحقتها قبل ما تدخل ..

آيات : اهلا، كيفك ؟

عمر ( بتأملها ) : جد ؟ عاساس بهمك مثلا

آيات ( غمضت عيونها ونزلت راسها ) : عمر، لا تبدا اللي فيي مكفيني

عمر : طيب، انا منيح انتي شكلك مو منيحة صح ؟

آيات : ليه انا متى كنت منيحة ؟ الحمدلله على كل حال،  يلا نفوت احسن

عمر : اوك، تفضلي

كانت الهموم راكبتها ووجها رغم جماله، الا انها صارت تعطي عمر اكبر من عمرها ..

مسكينة هالبنت والله ما بتستاهل، يا ريتني بقدر احمل عنها اشي ..

شوفتها بهالحالة بتموتني عالبطيء، نفسي افرحها باشي لو بسيط، بس ما بعرف شو اعمل ..

////

يا ريت بقدر اوصفلك شو بصير فيي لما اتقابل معك ؟، يا ريت تعرف شو الصراع اللي عايشته ؟، وشو رح يصير فيي لو حدا يلمحني بحكي معك ؟ ..

مكتوب عليي اتحمل وزر كل حدا اناذى بسبب حدا من عيلتي، حتى لو انا مو المذنبة، فكيف لو كان الي طرف من هالذنب ؟ ..

منى : يعطيكي العافية

آيات : الله يعافيكي

انس : مالك ؟ كتير وجهك تعبان

آيات : عادي، كل يوم هيك

انس : الله يريح بالك

عمر : ستي شو طابخة ؟ ( عمل حاله متفاجأ ) يا سلام هي ام احمد هون اكيد ستي متفننة

منى : ههههه يسعد قلبك، تعال اشوفك وين هالغيبة

انس : ام احمد حاف بعدين ههههه

عمر ( بسلم عليها ) : وقلبك يا قلبي انتي، ايوا هيك ضلي طلطلي علينا خلينا نشبع عيونا بشوفتك

منى : ههههه طيب تعال زورنا انت، مبطل متل زمان تيجي شو قصتك ؟

عمر ( بتباكي ) : اهئ اهئ اهئ مهو ابنك المجتهد مو فاضي يا عمتي، بالعربي الفصيح حكالي ما بدي اشوف وجهك

انس / آيات : ههههههه يا حرام

منى : شو دخل ابني ؟ انت جاي تشوف عمتك وتوصل الرحم، مو ضروري تحكي معه

انس : عاساس ؟ صدقتي عاد انه امجد حكاله هيك

عمر : انت هش، قبل النتائج لا تسمعنا حسك

آيات : لا تعلق معه انس، مو ناقصك توتر

عمر ( غمزني ) : ههههه بتموني

_______________________________

ديمة ( بصوت عالي ) : يمممممة عالخبر الساحق

سيرين : ههههه شفتي، كله كوم وهالسهيانة بنت حماي طلعت بتعرف ومخبية

ديمة : مهو زوجها سهيان معها، المهم خبرت احمد ؟

سيرين : ما بعرف، لسا ما وصلتنا اخبار من جارتي

ديمة : ههههههه قوية قوية

سيرين : شفتي بالله، حلو الواحد يجاور الصحافة

ديمة : هي لحالها خالتو مها جيرتها حلوة، فما بالك مع مواهبها الصحفية علي راي ياسمين

سيرين : يا عليي والله تعبانة كتير، وهيها هكلت هم بنتها من هلا وبتفكر فيها، كل القعدة عنها كنا نحكي

ديمة : يا حبيبتي، الله يقومهم ويقومني بالسلامة وعقبال ما نفرح فيكي سيسو يا قلبي

سيرين : امين، يخليلي اياكم، امانة ضلوا ادعولي

ديمة : ولو، بدنا توصاية كانه، معناها يلا بكرا بنصبح على تطقيس لياسمينة

سيرين : يا حرام آيات، شعور العمة رح تنبسط عليه، بس الله اعلم ازا رح تتهنى او لا ؟

ديمة : بتتهنى ان شاءالله، وبلكي نفرح فيها وتخطب بكفيها دلال، لسا بدها تستنى عمر لمتى ؟

سيرين : يييي لا تزكريني، مع تشديد اهلها عليها متغيرة كتير مسكينة

ديمة : الله يفرجها علينا وعليها يارب، معناها لازم نتكتم عالخبر لحد ما تنشره الصحافة المعنيّة

سيرين : اه ياريت اتضبي لسانك من هون لينزل الموجز

ديمة / سيرين : ههههههه

عدي : ضحكينا معك مرتي

ديمة ( بترفع جواجبها ) : نو نو مستحيل احكي هلا، بس رح تعرفوا قريبا

سهى : الله يستر، مع مين كنتي تحكي اصلا ؟

ديمة : برضو سر

قصي : اتركوها بتعترف لحالها، المهم قومي اعملي قهوة، خلينا نعرف ندخن سيجارة بعد هالوليمة

ديمة : والله ما بقدر، برضو نفسي بتلعي بس اشمها

عدي ( باستياء ) : انت مو عارف اي شي بخصني نفسها بتلعي منه

سهى : ههههههه يا حبيبي

قصي : طيب كيف بتركبوا بالسيارة مع بعض ؟

عدي : بتضل حاطة الشالة على انفها الله وكيلك وممنوع الف وجهي عليها ولا اقرب

ابو قصي : لا حول ولا قوة الا بالله، ولمتى هالحالة يا ام قصي ؟

سهى : هانت يلا

ديمة : مو شرط، في نسوان بضلوا كل الحمل يتوحموا

عدي / قصي : نعم ؟!

ديمة : هههههههه بدكم اولاد ببلاش، حسوا بجزء من التعب اللي بصيبنا، مفكرني مبسوطة يعني ؟ لو تعرف اديه اشتقتله

عدي ( خجلان ) : والله ؟

قصي : احم احم، خبيلنا اعترافاتك لبيتك يختي مو هون

سهى : شو حكت ؟ طبيعي تشتاق لزوجها الوحدة كيف لو كانوا عرسان بعدهم

ابو قصي ( بمزح ) : يعني بتشتاقيلي انتي كمان

عدي / قصي / ديمة : هههههههه

سهى : ما يحرمني منك، هو انا بقدر ابعد عنك اصلا

قصي : الله اكبر، معقول هاي امي ؟ صايرة رومنسية عالملأ

ديمة : عقبال ما نجوزك عشان يرجعوا عرسان عالمزبوط اهلك

عدي : اه والله، هيك الدنيا سبحان الله

ابو قصي : الله يبسطكم ويبسطنا جميعا، وما يحرم حدا من فرحة الاولاد

////

هيثم : كيف بدي انام الليلة ؟ رح اضل افكر ببهدلة مها الي

رانيا : ههههه تورطنا معها

هيثم : بس قلتيلي احمد عرف عن المشكلة، يلا منيح خليني اعرف اتفاهم معه عالمكشوف

رانيا : انت مستشر من زمان، خلص هيثم بالله عليك ما بدي اتضل تعمل مشاكل، بتكبر ولا بتصغر انت ؟

هيثم ( نظرة بطرف عينه ) : بتحكي عني ؟

رانيا ( تلبكت ) : قصدي .. يعني اللي صار صار لا اتضل تنكش بالماضي

هيثم ( مطنشني ) : ...

رانيا ( قعدت جنبه ) : لا تفهمني غلط حبيبي، انا قلبي عليك، بدي اتضل مرتاح بكفيك تعب شغلك

هيثم : ...

ياااه، ما اصعب زعله، مع اني متعودة عليه بس الموضوع هالمرة بخصوص ناس غيرنا ..

وما بحب يعاملني بالاسلوب هاد، بتوتر كتير وما بعرف احكي ولا اساير ..

قمت من عنده وانشغلت بالمطبخ، حتى ما اضل قاعدة ويستفزني بزيادة ..

الحلقة الثالثة عشرة ٢ : 

ابو امير ( بفرح ) : حامل ؟ يالله ما احلى هالخبر، يا حبيبتي ياسمين بدك تصيري ام

مها ( مو عاجبها ) : اه تخيل ؟!

البنات : هههههه

ابو امير : يعني شو رح تستفيدي من النكد هسة ؟ افرحي لبنتك وفرحينا معك، حسستيني كانه هالتصرفات جديدة عليها

حنين : منا حكتلك هي حرة متلها متل باقي هالبنات حابة تعمل اجواء بينها وبين زوجها

مها : يا ربي، ليه ما حدا عم يفهم عليي ؟ انا ما بدي غير اني اهتم فيها متلي متل اي ام، مو بكفي اللي عاشته، كان جبرنا خاطرها ودللناها، مو شفتيها كيف صحتها كانت ؟

ابو امير : امكم معها حق يا بنات، بس اللي صار صار ونحمدالله انه كان هالامل هو اللي معيشها واعطاها القوة لتواجه كل الظروف الصعبة

مها ( بحزن ) : الله سترها ما صاب هالجنين اشي

رنين : شكلها مو طالعة الك لا بالوحام ولا باشي تاني

اسيل ( مبسوطة كتير ) : المهم رح اصير خالة، هييييي

فرح ( بحضن ابوها ) : وانت كبرت وصرت سيدو تخيل ؟

ابو امير : هههههه يا زعرة

مها : لنشوف احمد شو رح يعمل ؟

_______________________________

احساس موصلني لسابع سما اني ارجع لبيتي اللي كان متل المهجور، والاقي فيه ياسمينة روحي مرجعة الحياة اله ..

وقفت ورا الباب واستغربت من الهدوء، معقول تكون تعبت من كثر الشغل ونامت قبل ما اوصل ؟، هزيت راسي وضحكت ضحكة سخرية بيني وبين حالي على افكاري؛ طلعت المفتاح وفتحت الباب ..

ياسمين ( ركضت عليي و على وجهها ابتسامة عريضة ) : يعطيك العافية حبي، بس ليه ما خليتني انا افتحلك ؟

احمد ( حضنتها ) : الله يعافيكي يا روحي، سامحيني لسا جديد هههههه

كانت مثل القمر، وبنفس الوقت طفلة بتصرفاتها معي ..

اكيد شعور الوحدة لازمها من اول يوم، ووجودها لحالها بالبيت طول اليوم وببلد جديد عليها وكل اللي حواليها غرباء، زاد من هالشعور ..

احمد ( رفعت وجهها بطرف اصابعي ) : يسلملي القمر انا، اشتقتلك

ياسمين ( بتسبل عيونها ) : وانا اكتر، جد ما صدقت متى توصل احمووودتي

كل اشي بالبيت كان متغير، الاثاث والترتيب والاجواء، كانه بيت جديد عليي ..

بس كانت في ابواب مسكرة، وياسمين ماشية وراي ومو مخليتني اتحرك براحتي ..

احمد : يلا اجهزي خلينا نطلع نتغدى اكيد جوعانة مثلي

ياسمين ( باستغراب ) : امممم معقول هيك مزبطة حالي وتخليني اطلع ؟

احمد : اكيد ما رح اسمحلك، بس شو الحل ؟

ياسمين : بناكل بالبيت

احمد : عاملة اكل يعني ؟ معقول غلبتي حالك من اول يوم حبيبتي

طنشتني وفتحت باب المطبخ ونقلت الصحون اللي محضرتهم، وانا واقف بس بتفرج من وين اخترعت هالاصناف ..

ياسمين : الاكل جاهز، تفضل

احمد ( مبتسم ) : يسلمو

////

كل اللي عملته كان في سبيل اني ما اخرب المفاجاة، لانه ازا طلعنا بكون لازم افوت غرفة النوم حتى اتجهز والمفاجاة كلها بغرفة النوم بالاضافة للغرفتين التانيات بالبيت ..

ياسمين : عجبك الاكل ؟

احمد ( بتأملني ) : مو طبيعي صراحة، ازكى من المطاعم، بس معقول ما احتجتي اي اشي من الماركت ؟

ياسمين : ابدا، ماشاءالله عليك مو مخلي اشي الا جايبه

احمد : اه من ايام ما اجو اهلي، كانت امي تطلب اشياء واجيبها وحكيت يلا كله بضل للمستقبل

ياسمين : اه اكيد، في شغلات ما بنحتاجها اكتر من مرة او تنتين بالسنة

كان مستمتع بوجودي كتير، وحسيت كم وجودي مهم في حياته اللي شعرت برتابتها لما كنت لحالي بالبيت طول اليوم ..

بس عالاقل هو بقدر يطلع ويسوق السيارة ويروح لاي مكان، اما انا ممنوع اسوق واصلا بخاف اطلع مواصلات من اولها لاني لسا جديدة عالبلد ..

_______________________________

اني اضل هيك زعلان وماخد على خاطري من سبب تافه وكلام خارج عن حياتنا الخاصة، ما بقدر استمر ..

بالرغم انها طنشتني بعد ما حاولت معي عدة محاولات، بس لساتها بتتامل فيي وبكل نظرة بتعاتبني وبتظهرلي تعجبها اني قادر ازعل منها بهالشكل ..

بعرف انها بتكره سيرة زينة، وما بدها تذكرني فيها مهما كلفها الثمن، بس الماضي ملاحقني بشكل فظيع، ومهما حاولت الفرار، للاسف بفشل ..

هيثم ( دخلت المطبخ وبفتش عن اكل ) : انا جعت

رانيا : ...

كانت بتتفرج عالتلفزيون بالصالة اللي عند المطبخ، بس سمعتني قامت فورا وبدات بتحضير الصحون وتسخين الاكل اللي ما وعيت عليها متى طبخته ..

هيثم ( قربت عليها من الجنب وايدي على خصرها وهمستلها ) : بطلت زعلان خلص

رانيا ( بطرف عينها ) : متل ما بدك، بس شيل ايدك خليني اعرف اتحرك

فتلتها باتجاهي وشديتها اكثر عليي ..

هيثم ( بدلال وبمسح على وجهها بلحيتي ) : مرقيلي اياها هالمرة بس، بوعدك اخر مرة افتح هالموضوع

رانيا ( بدلع وبتتجاوب معي بنفس الحركة ) : اكيد آخر مرة ؟

هيثم ( ضميتها اكثر ) : اكيد، بس حطيلي اكل قبل ما اكلك

رانيا ( علقت ايديها برقبتي ) : بما انك لسا معاقب، معناها رح احطلك اكل

هيثم : ههههه كل هاد ومعاقب، لا تخليني اطلع جنوني عليكي هسة

رانيا ( غمزتني ) : مو لصالحك، أدومة صاحي وما رح يخليك تتهنى

هيثم ( حكيت شعري ) : بعدنا بواحد وهيك، الله يعينا من اللي جاي

رانيا : لنشوف ازا رح تاكل كف متل ابن اختك ولا لا بعد ما يصير عندك تنين وتلاتة

هيثم ( بنبرة حادة ) : رانياااا ؟!

رانيا : ههههه بمزح، يلا احمل معي الاغراض عالطاولة

انصدمت من كلمتها، معقول تفكر فيي بهالاسلوب ؟، او الثقة انعدمت من عندها مثلها مثل باقي النسوان ؟ ..

الله يسامحك يا علاء انت بتخبص، واحنا بنتحاسب معك ..

////

ياسمين : لسا ما خبرته

رانيا : طيب يلا خلصينا، هيثم بده يباركله

ياسمين : اكيد امي صارت موصلة الاخبار

رانيا : اه ومتحلفة لخالك

ياسمين : ههههه يا خسارة بس سافرت كتر الاكشن

رانيا : ما ابردك، كل الاكشن اللي عشناه ولسا ما شبعتي ؟

ياسمين : اكشن عن اكشن مختلف حبيبتي، خليني اتركك تشوفي مهموهة شو بتعمل بهيثومة واستمتعي

رانيا : والله لاموتك ام لسان

ياسمين : هههههه

احمد : مع مين بتضحكي ؟

ياسمين : مع رنوش

احمد : نيالها

ياسمين ( رفعت حواجبي ) : والله ؟

احمد ( كاتم ضحكته ) : ... صحيح شو اخبار ريم ؟ رح ترجع عالمدرسة ولا بدها تبطل

ياسمين : اكيد رح ترجع، مع انه مسكينة اخدت باقي الاجازة على حسابها بس صعب تترك، بتعرف الاردن ووضعها

احمد : الله يفرجها ويرزق الجميع، وين ما كان نفس المعاناة واللي برضى بعيش

ياسمين : بس سوسو يا حبيبتي ما احلاها كل ما عم تكبر بتتغير ملامحها

احمد : اه اخر صورة بعثلي اياها علاء حسيتها نسخة سيرين

ياسمين : على خالتو نهى اكتر

احمد ( تنهد ) : عقبالنا يارب يكون عنا بنوتة بتشبه امها

ياسمين : بنوتة ؟

احمد : مالك استغربتي

ياسمين : فكرتك بتحب يجيك ولد اول

احمد : ياسمين بلا حكي فاضي، عارفة منيح اني ما بفكر بهالطريقة، صح ؟

ياسمين : امممم، عكل حال اللي من ربنا يا محلاه المهم الخلقة التامة

احمد : يا عيني عليكي، يلا شدي حيلك خلينا نستعجل بكفينا كل هالشهور راحت عالفاضي

ياسمين ( كاتمة ضحكتي ) : يا عليي انا، معك حق

احمد : ليه بتضحكي ؟

ياسمين : لاا ما ضحكت حبيبي بس انه هيك تزكرت كيف تزوجنا وهالقصص

احمد : اه والله عرس تاريخي، وكل التفاصيل تاريخية

استغليت كلامنا وذكرياتنا، وقلت بفرجيه المفاجأة ..

وهيك بضرب الف عصفور بحجر، بما انه السهرة بلشت وخلينا نبداها عالبدري، لانه احمودتي مشتاقلي بعد هالغياب واكيد مبارح مو محسوب من عمرنا ..

ياسمين : حياتي موبايلك رح يخلص شحنه، وخالو هيثم بتقلي رانيا بده يحكي معك، يا دوب تشحنه

احمد : طب نطي جيبي الشاحن، كله ولا خالك يرن

ياسمين ( بتعب ) : يييي والله تعبانة كتير، معلش حبي بس اليوم انت جيبه

احمد : انه عادي ما بدها كل هالقد، بجيبه منا الي سنة عايش لحالي، اتدللي يا عروس

من انت ؟

ياسمين : يييي يا قلبي انت

وما شاءالله عليه احمودتي بكل روح رياضية قام على غرفة النوم، وفتح الباب وشعل الضو ..

////

ياسمينتي بتستاهل كل الدلال، ومو خسارة فيها اعاملها مثل ملكة مو بس اميرة ..

هي كل حياتي، وحاربت الدنيا مشاني بكل ما الله اعطاها من قوة ..

احمد ( بتأمل في الغرفة ) : ...

لما فتحت باب غرفة النوم، اللي من اول ما وصلت ما خلتني افوتها ولا حتى مشان اغير اواعيي ..

تفاجأت من الاشياء الموجودة فيها، وكذبت عيوني ..

احمد : ياسمين ؟

ياسمين ( بتستهبل ) : نعم احمودتي ؟

احمد : تعالي يا عيون احمودتك

ياسمين : امرك حبيبي

يقطع شرك ما بتتغيري ..

احمد : شو هدول ؟

ياسمين ( بتسبل بعيونها ) : شو هدول يعني ؟ خطوات للبيبي

احمد ( حملتها وعلقت ايديها برقبتي ) : ويا ترى هالخطوات لوين بتوصلنا ؟

ياسمين ( عيونها بعيوني ) : ما بعرف، خلينا نشوف

مشيت انا واياها فوق الخطوات، لحد ما وصلت للمكان اللي كانت مجهزته بطريقة بسيطة بس اخدتلي عقلي ..

مكان نوم للبيبي جنب تختنا، وحاطة كم لعبة خصوصي  اله، واكيد قطع من ملابس البيبي بس لون ابيض يعني محايد ..

احمد ( دمعوا عيوني ) : هاد مو كذب صح ؟

ياسمين : لا مو كذب حبيبي، وسامحني لاني تاخرت عليك لليوم

احمد ( ايدي في شعرها ) : مو معقولة انتي، ولك بموت فيكي، بتعرفي قديه انا فرحان هسة ؟

ياسمين ( هزت راسها ونزلته بخجل ) : بعرف، مشان هيك حبيت تعرف مني انا وافاجأك

احمد : كم الك يعني ؟

ياسمين : اخر ايام الك بعمان، كان المفروض انه ...

احمد : اه بتذكر حكتيلي بس نسيت الموضوع ( غمزتها ) لانه كنا منشغلين ببعض

ياسمين : ويوم ما سافرت كنت رح احكيلك، بس ما كنت فاحصة ومتاكدة وفكرتها تاخرت عليي، بس لما دخلت المستشفى

احمد ( حطيت اصابعي على تمها ) : هشششش ما بدي اتذكر

ياسمين : خليني اكملك بس، انه لما عملولي فحوصات، بين معهم الحمل وخبر الدكتور خالو هيثم وخبروني هو ورانيا ووصيتهم ما يخبروا حدا

احمد : اهااا، يعني هيثم بعرف ومخبي عليي

ياسمين : احمد ؟ لا تنسى انه هو كان يهتم فيي وياخدني افحص عند الدكتورة ووقف جنبي بكل شي

احمد : نيالك والله، يا هيك الاخوال يا بلاش

______________

____________

هيثم ( بجدية ) : ايوا احمد بيك ؟ تفضل

احمد : الله يسامحك بس، معقول انت هيك تعمل فيي ؟ وعارف اني ما بعيش بدونك لحظة من لما وعيت على هالدنيا

هيثم : ... عشان هيك احترمتني وحكيت معي بكل ذوق

احمد : حقك على راااااسي من فوق فوق والله يا خال، يشهد الله عليي قديه بحبك وبحترمك، مرقلي اياها وبوعدك ما تتكرر

هيثم : استغفر الله العظيم بس، اخر اشي بفكر فيه اني اعمل مشاكل وازعل من حدا، وانت عارف غلاوتك وحتى علاء لولا محبتي ومعزته عندي ما بحكي معه ولا بسال عليه حتى

احمد : بعرف والله بعرف، كمان القلوب عند بعضها وصدقني انت قدوة النا بمحبة الناس، واهتمامك بخواتك وبنات خواتك واخونك وياريت نكون مثلك بيوم من الايام

هيثم : انت حط مرتك بعيونك، ولما تصير اب على خير وعندك بنات وتخاف عليهم وما تسمح لحدا يأذيهم، وبعدين تلقائي بتصير تحب الباقي

////

هيثم : وهي صالحنا نسيبك الغالي

مها : ههههه الله يرضى عليكم وما يحرمني منكم

هيثم : يا حبيبتي انتي، المهم شو اخبار العزومة لسا بدك تعزميني ولا اروح اتبلى على سهى ؟

مها : يييي طبعا بدي

هيثم : معناها الجمعة معطل بنيجي اوك ؟

مها : هههه اوك

ابو امير : ما حدا قده الدلوع هيثم

مها : قال هي صالحت نسيبك الغالي

ابو امير : معه حق صراحة

مها : يمة الغيرة انت واياه مالكم ؟

ابو امير : انا ؟ الله يسامحك عارفة عقلي كبير وما الي عالقصص هاي

مها : اه كتيييير، يلا معناها هي قائمة الاغراض بتجيبلي اياهم بكرا

ابو امير : هاتي لنشوف، الله يستر

مها : اقرا على مهلك خليني اخبر البنات

ياسمين : هههههه يؤبر ألبي احمودتي

مها : اوعي تجيبي سيرة ولي

حنين : فهموني

ياسمين : لما افهم انا اول، المهم الجمعة عنا عزومة، شو ناوية تعملي ؟

مها : كل شي بحبه هيثم بدي اعمله

حنين : واحرثوا يا بناتي جلي وشغل

ياسمين : معلش فداه، والله بستاهل وقليل عليه، عقبال ما اعزمه ببيتي انا واحمد

مها : يارب

______________

____________

احمد : والله يا مية هلا بالخال الحنون

هيثم : هههههه ليه حاسك غيران ؟

احمد : له الله يسامحك، واحد بدير باله على مرتي وابني او بنتي، قليل عليك الشكر يا كبيرنا

هيثم : ريته الف مبارك يارب، وعقبال ما نباركلك بسلامتها

احمد : حبيب قلبي الله يسلمك وعقبال سلامة مرتك كمان، بس هيك يعني بتخلي مفاجاة تمرق عليي ؟ يعني عالاقل عشان اجيبلها هدية

هيثم : هي ما شاءالله عليك مو مقصر معها، بتجيبلها بالايام الجاي، المهم عرفت اكيد باللي صار

احمد ( تنهد ) : عرفت عرفت، كثر الله خيركم وقفتكم مع ياسمين دين برقبتي ليوم الدين

هيثم ( بجدية ) : احمد ! ترا ما صدقت وياسمين تحكيلك خليني افش غلي فيك عاللي مخبيه عني

احمد : ...

هيثم : ليه يا احمد لييييه ؟ معقول انا يتخبى عني هيك اشي ؟ انت عارف انه وصلت فيي افكر اعمل لابني تحليل نسب ! ما بدي احكيلك لو كنت مكاني، بس بدي ادعيلك الله لا يحطك لا انت ولا حدا من الغوالي مكاني

احمد ( برجف ) : حسبي الله ونعم الوكيل، والله اكلت اصابعي ندم اني سترت عليها وما كملت مراقبتها، بس ما تخيلت توصل معها تنتقم مني ومن ياسمين بهالشكل

هيثم : حكيت مع اهلك ؟

احمد ( غمضت عيوني ) : لا، بس رح احكي كمان شوي اخبرهم عن حمل ياسمين

هيثم : وبس ؟!

احمد ( بلعت ريقي ) : بتتخيل اني احكي اشي لامي ؟ طيب احكيلي شو احكي ؟

هيثم : ... انربط لساني

احمد : بصير خير، انا رح اعمل اللي بمليه عليي ربي وتربايتي، وما في اشي عند ربك بضيع، وانت بلسانك حكيتلي لما اصير اب المحبة رح يكون الها طعم ثاني بحياتي

هيثم : ربي يرضى عليك يا احمد وينولك كل احلامك، ولك والله قلبي بصفى بس اسمع صوتك، الله يرزقك ويرزقنا الذرية الصالحة

////

ابو احمد : مو هاد احمد ؟

منى : اه

ابو احمد : طيب ردي مالك ؟

منى : خايفة منه والله

ابو احمد : ئي، هاتي اشوف، الو سلام عليكم

احمد : وعليكم السلام، كيف حالك يابا وينكم ما بتردوا ؟

ابو احمد : هينا قاعدين، كيفكم انتوا ؟ كيف ياسمين مبسوطة ؟

احمد : اه الحمدلله، بتسلم عليكم، كيف امي واخواني ؟

ابو احمد ( وجه الكميرا على امي ) : هي امك

منى : اهلين ماما، كيفك ؟

احمد : مبسوووط قد الدنيا، ورنيت عشان ابسطكم معي

ابو احمد / منى ( بتطلعوا ببعض ) : خير ؟ الله يبسطك دايما

احمد : رح اصير اب، باركولي

منى ( نزلوا دموعها ) : حامل ؟ معقول كل هالوقت طلعت حامل

ابو احمد : مبارك الف مبارك يابا، رح تكون اعظم اب  ونيال اولادك فيك يا حبيبي

احمد : من بعدك يابا، الله يقدرنا عالترباية الصالحة

منى : مبارك ماما، ان شاءالله بتقوم بالسلامة

ابو احمد : وين انت هات نباركلها

احمد : طلعت اجيب حلوان، ما صحلي احكي معكم التهيت بالبيت واغراضها وطول اليوم بالدوام ورجعت عالمفاجاة الحلوة

منى : تتهنوا يا حبيبي، دير بالك عليها وما تخليها تحمل اشياء تقيلة وتشتغل

احمد : اسكتي رجعت عالبيت لقيتها مغيرة الترتيب، خف عقلي بس عرفت عن الحمل تخيلي ؟

ابو احمد : ههههه سلامة عقلك، عيش شعور حماك بمغامرات بنته مثل امها شكلها

منى : هههههه

احمد : شكلي هيك، الله يسترني من مغامراتها، ذكرتني خليني احكي معهم

امجد ( اجا فجاة ) : هاد صوت احمد ؟

ابو احمد : تعال بارك لاخوك، واخيرا يحيى عالطريق

امجد : وحدوا الله، شو ابو حميد صحيح هالخبر ؟

احمد : ههههه صحيح، عقبالك

امجد : الف الف مبروووك، واخيرا بدي اصير عم يا ناس، واخيرا خبر حلو يبل ريقنا

احمد : ... الله يبارك فيك ويسعدك، حبيبي امجد

كانت عيونه مليانة دموع، وعارف انه بلسانه الف سؤال سؤال ..

بس ما قدرت احكي منيح معه قدام اهلي، ولا حتى قادر اشوف نظراتهم لبعض ..

معه حق، بعد كل هالحزن اجا خبر حلو يفرح قلبهم، بس للاسف القلوب مو صافية والله اعلم متى تصفى ؟ ..

_______________________________

حمزة : عقبال عنا يارب

سيرين : امين حبيبي، نفسي افرح قلبك بولد متلك حموزتي

حمزة ( حضنتها ) : او بنوتة مثلك

سيرين : اااخ، الله اعلم متى ربنا كاتبلنا، هي النا اربع شهور واللي تزوجوا معنا صاروا حوامل

حمزة : الله اعلم، المهم ما نوقف عن الدعاء

ودعت سيرين ونزلت من البيت على دوامي الليلي، وقبل ما اوصل الطابق الاول لمحت وحدة واقفة على باب ابو امير ..

كانت ايديها مثل المربوطين، وشوي ترفع اصبعها تضرب الجرس وشوي تنزله ..

لما تأكدت مين بتكون، تجرات اسلم عليها ..

حمزة : اهلا خالتي، كيفك ؟

منى ( تفاجأت ) : اهلين اهلين، منيحة انا، يلا عن ازنك

نزلت بسرعة، وكانه في حدا بلحقها او خايفة من اشي ..

استخطيت حالي اني اظهرت نفسي، كان لازم ما اتدخل ..

////

امجد : شو صار ؟

منى ( بترجف ) : حكتلك ما رح اقدر ما سمعت كلامي، خلص امشي بسرعة قبل ما يشوفنا حدا

امجد ( تنهدت ) : لا اله الا الله، يا ريتك خليتيني انزل معك، صدقيني كان كل القصة انتهت بحلظتها

منى : خدني عند نهى

بعد ما حكى معنا احمد، قعدت مع امي واقنعتها تروح تبارك لخالتي مها ومنه بتكسر هالحاجز اللي اله شهور ..

دايما بشوف بعيون خالتي الشوق لامي، وبتسالني عنها بشكل غير مباشر ..

واخذتها وطلعنا من البيت، بس للاسف ما صار اللي كنت اتمناه ..

نهى : منى ؟ اهلا وسهلا شو هالمفاجاة اهلين حبيبي امجد

منى : لا تآخذيني ازعجتك واجيت فجاة

نهى : يا عيب الشوم، احلى ما على قلبي يجيني حدا انتي عارفة، كيف حالكم ؟ انتي منيحة

امجد : منيحة يا خالتي وباركيلها

نهى : مبارك، على شو ؟ آيات خطبت ؟

امجد : لا

منى ( بتبكي ) : ياسمين حامل

نهى ( متفاجاة ) : شوو ؟ متى ؟

امجد : من لما تزوجت، وامي راحت تبارك لخالتي مها وما قدرت اتدق عليهم

نهى ( ايدها على وجهها ) : ليه ؟ الله يسامحك مها بتحبك وما بتهوني عليها

منى ( بتبكي بحرقة ) : كيف الي عين افوت بيتها بعد ما رحت عليه وحكيت اللي حكيته عن بنتها ؟ بدل ما اوقف معها واسندها، وبالاخر طلعت حامل ؟ تخيلي لو صار بالبيبي اشي شو كان عمل فيي احمد ؟

نهى ( عيونها عليي ) : برجع احكيلك انك بتبالغي، بعدين شو صار معهم خبرته ؟

امجد : حكى معنا عادي، ما عرفنا اشي الا عن الحمل

منى : انا بستاهل كل شي بصير فيي، العذاب اللي انا فيه هلا كانت ياسمين عارفة اني رح اتعذبه، دايما هية الكسبانة

امجد : لانها بتتعامل بصدق مع حالها ومع اللي حواليها، معقول في اصعب من موضوع المستشفى ؟ وموضوع سفره، مع ذلك كل شي مرق ورجعت لاحمد

نهى : وامك كمان بتحبها، واللي حكته كان خارج عن ارادتها، اي وحدة غيرها بتحكي متلها واكتر كمان، حتى انا ما بحلف عن حالي

منى : ... يا رب ما تحرمني من حفيدي، كل شي ممكن اتخيله الا انه ياسمين تستغله لتعذيبي

امجد : يمة ؟! شو هالحكي، شو ابنها لحالها يعني ؟

نهى : طولي بالك، من هون ليجي ان شاءالله بتكون انحلت هالقصة وارتاح بالكم

منى : وجعنالك راسك، وين ابو علاء ؟

نهى : بمكتبه والله، التهيت بالحكي ونسيت اناديه

امجد : بسلم عليه وبنروح ما بدنا نتاخر عن البيت

_______________________________

ياسمين : الله يبارك فيكم

آيات : ما خبرتيه عن مرض ماما صح ؟

ياسمين : لا والله، ليه ؟

آيات : غريبة كان كتير طبيعي وبس جاب سيرة الحمل، فكرناكي ما حكتيله عن المشكلة

ياسمين : حكتله كل شي، بس عن مرضها لا ما جبت سيرة

آيات : شو حكالك ؟ زعل لانه خبيتي عنه ؟

ياسمين : اكيد انقهر كتييير خصوصا اني حكيت مع فارس، بس بعدين تفهمني وسامحني

آيات : يلا منيح، بس بلاها سيرة المرض مو ناقصه المسكين، اكيد بضغط على حاله عشان ما يزعل اهلي، هيك احمد طبعه دايما

ياسمين : انا متاكدة من هالاشي، احمد ما في منه حبيبي الله يبعتلي اولاد متله

آيات : الله يقومك بالسلامة، فرحنا كتير بهالخبر الله اعلم قديه كنا محتاجين نسمع هيك اشي حلو

ياسمين : تسلموا، وعقبال ما نفرح فيكي ونشوفلك احلى عيلة

بعد ما خبرت احمد بالحمل، طلع من البيت بحجة الحلوان، مع اني كنت متاكدة انه رح يتغير مع اهله بعد اللي سمعه بس ما تخيلت يكون التغيير من هالناحية ..

خطته انا فهمتها بعد اللي وصلتلي اياه آيات، وقدرت استوعب انه عم يفصل بيني وبينهم بدون ما يزعج حدا فينا ..

////

رجعت عالبيت بعد ما ريحت ضميري تجاه اهلي، وبشرتهم بخبر كانوا يحلموا فيه من زمان ..

انا متاكد انه ياسمين من ذات نفسها رح تصلح بينها وبين امي بدون ادنى تدخل من اي حدا، بس هي لسا بحاجة وقت ..

ياسمين : تاخرت حبيبي وينك ؟

احمد : اسف، عشان ازمة شوي، المرة الجاي بتطلعي معي كل الطلعات بس عشان اليوم ما حبيت ازعجك

ياسمين : بسيطة، بس قلقت عليك

احمد : بكرا بجيبلك خط

كانت عيونها بتسال عن كثير اشياء، بس تجاهلتها وشغلتها بالحلو وصار وقت النوم ..

_______________________________

علاء : اوف ؟ كل هاد صاير اليوم، وياسمين كيف قدرت تخبي هيك خبر عن العيلة

ريم : شايف شايف، بس اكتر شي دايقني موقف خالتو يا حرام، تخيل شكلها قدام باب بيت اختها ومو قادرة تفوت

علاء ( بحزن ) : مسكينة، الواحد تربط لسانه وما ضل حكي يحكيه

ريم : يا رب تحل هالعقدة وتريح قلوبنا

علاء : امين، بس هسة فهمت ليه كان هيثم قلقان على ياسمين وبده يعرف مين اللي عمل فيها هيك ؟

ريم : يعني الحمل احد الاسباب، بس كمان اهتمامه مو غريب علينا، الله يخليلنا اياه

علاء ( بهز براسي ) : ... صحيح، خليني ابارك لحمادة واتطمن عليه

ريم : خد راحتك، انا بدي انيم سوسو بكفيها سهر

قلقت كثير على احمد بعد كل اشي سمعته، الموضوع مو سهل ..

فجاة عرف اشياء ما كانت لا عالبال ولا عالخاطر وصعب يستوعب انها صارت مع ياسمين، وبعدها اكتشف انها حامل، والحرب اللي بينها وبين امه لحالها بتوجع القلب ..

احمد : هلا والله، مسا الورد

علاء : حبيبي ابو يحيى، ريته الف مبارك ما قدرت انام بدون ما اباركلك

احمد ( بلع ريقه ) : يبارك بعمرك، علاء

علاء : شو مالك ؟ انت منيح

احمد ( بصوت مخنوق ) : لا ابداً، من مبارح بدي اتشكرك عاللي عملته مع ياسمين بس ما كنت بوعيي

علاء ( مصدوم ) : ... لا يا صاحبي هاي الرسميات مو بينا، بعدين الله يكون بعونك اللي سمعته جبال ما بتقدر تتحمل تسمعه

احمد ( بغصة ) : كيف قدرت امي تعمل هيك معها ؟ انا ما حكيت اشي معهم بس قلبي من جوا نااار يا علاء، رح اموت من قهري، ياسمين اللي اشرف من الشرف مرت احمد مين بسترجي يجيب سيرتها بالعاطل هيك ؟ حتى لو كانت امي يا علاء انا ما بسمح لمين ما كان يحكي عنها

علاء : والله صح كلامك، بس تصرفها طبيعي ويمكن انت هسة بتلومها بينما يمكن لو كنت موجود وشفتهم للوهلة الاولى معقول ما تصدق ؟ وخصوصا انها اعترفت قدامها بمعرفته مسبقا

احمد ( عصب ) : انت شو بتحكي ؟ معقول انا اصدق هيك مسخرة ؟ ولك هاي ياسمييييين بتعرف مين رباها ؟

علاء : اسف، فهمتني غلط انا قصدي انه لكل واحد ردة فعل مختلفة عن الثاني، وخالتي بشر وكل بني آدم خطّاء

احمد : انا مشان هيك سكتت وما حبيت ازعلها مني، بعرف انها هاكلة همي كانت وخايفة ازعل منها

علاء : لا يا احمد اوعى تخسر امك مشان اي انسان ثاني، كل شي بتعوض بالحياة الا الاهل الصالحين مثل اهلنا، صدقني غيمة وبتمرق خليك حكيم وتصرف برواق مثل ما الكل بتوقع منك، لا تخذلهم قدام اي حدا

احمد : ااااخ هالغيمة السودا اللي ما عم تتركنا نتهنى بنور الشمس، لمتى رح اتضل تحوم حوالينا ؟ والله تعبت ونفسي ارتاح

علاء : بترتاح، مثل ما انا ارتحت باذن الله

احمد : الله يريح بالك، كيف وضعكم هسة ؟

علاء : عال العال، نضل هيك وما بدي اكثر

احمد : وحمزة لسا بتجنبك ؟

علاء : بتصدق من العيد ما شفته، من وقت القصة ما شفته الا برمضان والعيد وساعات معدودة، وكلمات اقل من انهم ينعدوا

احمد : الثاني الله يعينه، اللي عملته اخته بسود الوجه

علاء : الله يسامحها ريم بس، ما حسبت حساب لكل هالاشي، وفكرت بحالها وبس

احمد : لا حول ولا قوة الا بالله

علاء،: بعين الله، يلا بلا ما اطول عليك بما انك رجعت عريس هههههه

احمد : ماشي ههههه يلا تصبح على خير

ما بعرف ليه كل ما اتذكر الماضي بنحرق قلبي، شفقان كثير على رزان لانها بوضع سيء عند اهلها وكله بسببي ..

لو من الاول سكرت عليها الطريق ما وصلت فينا الامور لهون، وحافظت على علاقتي بزوج اختي ومرتي وخالي وكل الناس اللي الهم علاقة فينا ..

معقول سيرين ما عرفت ؟، لو عرفت شو رح تحكي عن اخوها ؟ ..

ريم : خلصت ؟ .. علاء .. علااااء

كنت متسطح عالكنباية بعد ما انهيت المكالمة، ومعلق عيوني بالسقف ..

لما لمحت خيالها جنبي التمست، وكأني ما كنت بهالدنيا ..

علاء ( مفزوع ) : بسم الله

ريم ( مستغربة ) : اسم الله عليك، الي زمان بنادي عليك وين كنت سرحان ؟

تاملت نظراتها المليانة عتب وغيرة، كانها كانت قاعدة جوا عقلي لتعرف اني بفكر بالماضي ..

ما بعرف هالثقة اللي اختفت من حياتنا متى رح ترجع ؟، بس اللي بعرفه انه ريم بعد هديك القصة تغيرت وما عادت ريم القديمة ..

ريم ( بقهر ) : ما بدك تجاوب ؟

علاء ( مسكت ايدها ) : يعني بشو بدي افكر اكثر من اللي صاير بعيلتنا، شو قصتك حبيبتي ؟

ريم ( مو مصدقة ) : اه، طيب طمني شو حكالك ؟

علاء : زعلان من خالتي بس مو قادر يواجه، مخنوق والله يا ريم، كيف لو يعرف انها مريضة وكله لانه عيلتهم انقسمت وكل واحد شايل بقلبه عالثاني

ريم ( بتهز راسها ) : يلا بتهون، اخرته يعرف وبتعود، ما في حدا مرتاح

علاء : ... نامت سوسو ؟

ريم : اه الحمدلله

كانت بتحكي معي من برا منافسها، وكانها مغصوبة، وكل هاد لانه نادت عليي وقعدت جنبي وانا مو حاسس عليها ..

______________

____________

سيرين : بس فهمني شو قصتك مع علاء ؟ ليه بتتجنبه حمزة انت مو طبيعي من زمان انا ملاحظة هالاشي

حمزة ( بحاول يكون هادي ) : انتي بتبالغي، مو شرط اذا حكيتلك اني ما بدي اطلع مكان يعني بتجنب

سيرين : لا لا انت عمرك ما كنت هيك، احكيلي شو صاير ؟ متزاعلين او في سوء تفاهم بينكم ؟

حمزة : ما في اشي اتطمني، لا توجعي راسك باوهام

سيرين : هاد اللي طلع معك ؟ طيب اهلك كمان ليه بس تروح ما بتحكي معهم الا رسمي ؟ ورزان ما بتبين ؟

حمزة ( فقد اعصابه ) : سيريييين لو سمحتي بكفي تحقيق، حكتلك ما في اشي

سيرين : ... بكرا بدوب التلج وببان المرج

حمزة ( تنهد ) : طيب

////

رانيا : صدقيني ما عم افهم عليكي، يعني ما بحكولي اشي اهلي

سيرين : انتي فاهمة منيح عليي، بس اكيد حمزة موصيكي

رانيا : ... لا لا

سيرين : امانة رانيا علاء مزعله لحمزة ؟ احكيلي عادي اخوي وبعرف اطباعه وبوعدك ما يطلع الحكي من بيناتنا

رانيا ( متوترة ) : انا .. انا ما بعرف اشي خلص ارجوكي ما اتدخليني بينك وبين زوجك

سيرين : يااااا ربي ليه هيك عم بصير معي، شو هالحياة هاي ؟ اشتقت لاهلي اشتقت اقعد مع دار اخوي  وازورهم ويزوروني، انتي مو حاسة فيي

رانيا : الله يكون بعونك، بس لو بطلع بايدي اساعدك كان ساعدتك

سيرين : ... انسي

////

ريم : بشو احلفلك اني ما بعرف اشي

سيرين : ريم؟ مو عليي، شوفي كيف عم تتهربي مني

ريم ( متوترة ) : ما بتهرب، ليه اتهرب يعني

سيرين : ما رح اسامحك ازا مخبية عليي اشي، انا هلا بدي اعرف شو اللي بين حمزة وعلاء ؟ متاكدة متل ما انا شايفتك هلا انه في اشي غلط بينهم

ريم : يمكن اشي خاص فيهم، احنا ليه ندحش حالنا بالنص ؟ خلص انسي وخليكي طبيعية

سيرين ( عصبت ) : انسى ؟ ولك انا محرووومة منكم ، محرومة من اهلي ، من زيارات كنت احلم فيها قبل ما اتزوج، عم تفهمي عليي ولا افهمك اكتر

ريم ( بترجف ) : ما دخلني، انا ما دخلني صدقيني متلي متلك

سيرين : ... براحتك، بس اخرتني اعرف

////

ياسمين : معك حق، لاحظت انا كمان

سيرين : رح افقد عقلي ياسمين، الوضع زاد عن حده

ياسمين : طيب فتشي بموبايله، حاولي اسمعي مكالماته

سيرين : ييييي لو اعمل هيك، مفكرة ما خطر ببالي ؟ مرة مسكني وسمعني كلام وضل زعلان مني يومين قال بشك فيه

ياسمين : اوف، معقول حمزة هيك بفكر ؟ والله مو قليل طلع

سيرين ( بحزن ) : تعبت كتير، انا مو مبسوطة ياسمين، بضحك عالكل وبحكي اني اسعد بنت بس للاسف انا مو هيك ابدا

ياسمين : طولي بالك سيسو ما بدها هالقد انتي التانية فخار يكسر بعضه

سيرين ( نزلوا دموعي ) : لو تشوفي حماتي كيف بتعمل معي، كل شهر بتتصل فيي على موعدها تسال ازا اجت او لا

ياسمين : ...

سيرين : كانه الموضوع بايدي، مو عارفين اني مشتهية اكتر منهم

ياسمين : ...

سيرين ( مسحت دموعي بايدي ) : بس تسافري لمين اشكي همومي انا ؟ لوين اروح

ياسمين ( بتبكي ) : ... بكفي ( حضنتني بقوة ) انا كمان مو مرتاحة يا سيرين كلنا مهمومين، الله اعلم شو بستناني هناك

______________

____________

علاء : ريم ؟

ريم : نعم

علاء : شو اخبار سيرين ؟ ولك اشتقتلها هالبنت زمان ما بينت

ريم ( لفت وجهها عليي ) : جد ؟ اتوقع بتعرف عنوان بيتها

علاء : ... معك حق، والله مقصر معها

ريم : ...

غمضت عيوني وانا بفكر متى ازور اختي الوحيدة، اللي ما الها ذنب بكل اللي صار ..

////

سيرين : صباح الخير حبيبي، متى اجيت ؟ ما حسيت عليك

حمزة : ... صباح النور، ما حبيت ازعجك

سيرين ( حضنته ) : يا عليي كتير تعبان وجهك، بدك تنام ولا اعمل فطور ؟

حمزة ( غمض عيونه ) : شو اخبار خالتك ام احمد ؟ عرفت عن حمل ياسمين ؟

سيرين ( مستغربة ) : منيحة، ما بعرف والله، بس شو جاب سيرتها عند الصبح ؟

حمزة : مبارح شفتها .. على باب بيت ابو امير

سيرين ( نهضت حالي ) : معقول ؟

حمزة ( بهز راسه ) : بس ما فاتت، كانت مترددة اتدق عليهم، وبعدين نزلت بسرعة بس شافتني

سيرين : ياااااه

حمزة : الله يكون بعونها المسكينة، كلهم مشاكلهم انحلت الا هية، شفقت عليها من كل قلبي

سيرين : يا روحي، ان شاءالله بتنحل هالقصة وبنرتاح

حمزة : ليه ما تقنعي ياسمين ؟

سيرين : الله اعلم شو بنحكيلها وبنحاول نقنعها، بس بالاخر هي ادرى بمشاكلها، كمان مو قليل اللي سمعته وشافته منها

حمزة : ... ماشي، يلا انا غمضت بنام شوي وبصحى افطر معك، بس اذا جعتي افطري

سيرين : اوك

كان حمزة كتير متأثر بخالتي، يمكن لانه بعزها من معزته لاحمد، بس شو طالع بايدنا غير ندعي ..

علاء : سيسووو

سيرين : اهلا، صباح الخير

علاء : صباح الورد، صاحية ؟

سيرين : اه والله صحيت مع رجعة حمزة عالبيت وما عرفت ارجع انام

علاء : حابب افطر انا واياكي، عادي اجي هسة ؟

سيرين : هههه اكيد عادي اهلا وسهلا

علاء : طيب ركبي عالشاي بجيب فطور وباجي

تركت حمزة نايم وقمت استعد لاستقبال اخوي، اللي اخر مرة فات بيتي فيها كانت بالعيد مع بابا واعمامي ..

فتحتله الباب بدون ما يرن الجرس، وضمني بقوة ..

من زمان كتير ما حسيت بحنانه، وانا مشتاقتله كتير كنت ..

علاء ( بمسح دموعي ) : اشتقتلك، خلص ليه الدموع ؟

سيرين : ما بعرف، كل القهر اللي حاسة فيه طلع مرة وحدة

علاء ( مستغرب ) : قهر ؟ شو بصير معك يا بنت، ليكون حمزة مو منيح

سيرين ( هزيت راسي بالنفي ) : ابدا، كتير منيح ما في منه، بس الحياة صارت غريبة كتير وما عم الاقي تفسير

علاء ( بهز راسه مع ابتسامة غريبة ) : انسي، عيشي حياتك بدون ما تفكري بكل اشي بصير حوالينا، كثرة التفكير متعبة

فرحتي بزيارة اخوي كانت لا توصف، ما صدقت عيوني لما حكالي جاي عندك ..

ما قدرت امسك دموعي، وكاني كنت استنى هيك لحظة حتى اطلع كل اللي جواتي ..

سيرين : ان شاءالله، بس ليه جبت فطور غلبت حالك كنت انا عملت

علاء : غلبتك راحة، هيك اسرع ما حبيت اعجقك عشان اجيت فجاة

سيرين : طيب وين ريم ؟

علاء : ههههه راحت تفطر عند اختها، كل واحد راح عند اخته

سيرين ( مترددة ) : بتعرف، اجا حمزة يحكي انه شاف

علاء : مين ؟

سيرين : مبارح بالليل كانت خالتو منى واقفة على باب خالتو مها وما قدرت اتدق عليها

علاء ( تنهد ) : مسكينة، تقطع قلبي عليها بس امي حكتلي، واحمد الله يعينه همه بهد جبال

سيرين : ... حمزة كتير تاثر عليها، وبحكيلي اقنع ياسمين تصالح خالتو

علاء : معه حق، بكفينا اوجاع فوق همومنا حاملين هموم اللي حوالينا

////

ديمة : اهلا وسهلا بام سلمى، يسعد هالصباح شو حلو

ريم : وصباحك يا عسل، اشتقنالك قلنا بنتقل دمنا عليكي قبل ما تبدا الدوامات

ديمة ( حاملة سلمى وبتلعبها ) : يمة الحلاوة يمة شو هاد الفستان ؟ كيف ابوكي سامحلك تطلعي هيك

ريم : ههههه مهو بحكيلها خدي راحتك وانتي صغيرة

ديمة : عارف حاله علاء بيك، يلا خلينا نفطر عشمتيني وجوعتيني

ريم : ... راح عند سيرين

ديمة : الله يحنن، مسكينة شو بشفق عليها

ريم : مبارح بالليل خطرت على باله بحكيلي اشتقتلها لهالبنت، قلتله بيتها بتعرف عنوانه

ديمة : وبلكي يمرق عند خالتو مها خليها تنبسط

ريم : ما بده توصاية، ايوا كيفك انتي ؟ لسا بتتوحمي ؟

ديمة : لا الحمدلله اخف بكتييير، وموعد الفحص كمان يومين ان شاءالله

ريم : طيب الحمدلله، يعني عدوشة رجع عريس ههههه

ديمة : ههههه حبيبي مو مصدق حاله، اسكتي نازل فيي دلال غير شكل بس اطلبي وتمني

ريم : الله يهنيكم

______________

____________

ديمة ( بتبكي ) : اشتقتله يا ريم، ما حدا حاسس فيي مفكريني مبسوطة

ريم : شو هالحكي اكيد مو مبسوطة، طولي بالك فترة وبتعدي

ديمة : لو تشوفي كيف بكون بتطلع عليي ونفسه يقرب مني او اقرب منه وادلعه، ما لحقنا نتهنى على بعض

ريم : ههههه ضحكتيني، بكرا بتزهقوا بعض لا تخافي

ديمة : قولتك كل مرة بدي احمل رح يكون هيك وحامي ؟

ريم : الله اعلم، بدك تسالي بنات مجربات هاد النوع

ديمة : يا رب لا، صدقيني ببطل يخليني اخلف

ريم : ههههههه حشاشين، زودتوها

______________

____________

ديمة : تعي نبعت لقصي يجي هو وماما يشربوا معنا قهوة

ريم : ابعتي مو غلط، بتغير جو وبنتسلى مع قصي

ديمة : يلا هي حكالي ماشي، بعد مية كلمة تلطيش طبعا

ريم : ههههه عادته ما بغيرها، سعاد بعدها بتحكي معه ؟

ديمة : ما بجيب سيرتها وانا صراحة لما بطلت تبعتلي ما رجعت حكيت معها

ريم : غريبة علاقتهم، بتحسيها غامضة

ديمة : يلا هلا بيجي حققي معه قدام امك خليه يتغدى عليكي ههههه

////

حمزة ( بنادي من غرفة النوم ) : سيرين

علاء : كانه صحي

سيرين : اه، يلا دقيقة اشوفه

حمزة ( مستغرب ) : جد ؟ اهلا وسهلا يلا هيني قايم

سيرين : اوك، هي خبيتلك فطورك كمان

علاء : صباح الخير، هلا حمزة

حمزة ( بسلم ) : صباح النور، اهلا وسهلا شو هالمفاجاة الحلوة ؟

علاء : والله انتوا ما بتبينوا حكيت خليني اجي اكبس عليكم ههههه

حمزة : ههههه معك حق، بس ما بعرف كيف الوقت بمرق

علاء : لا بمزح، بالعكس واجبكم علينا

حاولت قد ما اقدر ابين طبيعي قدام سيرين، نظراتها كانت بتراقب بدقة كبيرة كل تصرفاتنا وكلامنا ..

قلبي حاسسني انها بتعرف اشي، الله يستر بس ما تكون خبرت امي ..

علاء : طيب خليني امرق عند خالتي مها اشوفها قبل ما اروح

سيرين : اوك

حمزة : روحي معه اذا بدك

علاء : اذا ما عندك مانع كمان خليني اخدها معي عند ديمة نجيب ام سلمى، الها زمان ما شافت حدا صح ؟

حمزة : اكيد ما عندي مانع، خدوا راحتكم، انا اذا قررت اطلع بخبرك

سيرين ( بفرح ) : تمام، يسلمو حبيبي حمزة وانت كمان علاء، بلبس بسرعة وبلحقك عند خالتو

علاء : لا هيني قاعد بستناكي

كيف حكمت على حالي بهيك قعدة مع حمزة لحالنا، ما تخيلت اتجرا ارفع عيني واحكي باي موضوع ..

حمزة ( مخنوق ) : كيف احمد ؟ مبسوط ولا فرحته ناقصة

علاء ( رفعت راسي بدهشة ) : الله يعينه، الف قصة وقصة داخلة ببعضها، مو عارف من وين يلقاها

حمزة : كانه ياسمين زودتها ؟ بتوقع انتهت القصة بكفيها دلال على خالتها

علاء ( رفعت حواجبي ) : انت هيك رايك ؟ لما تخلص اي قصة بتنطوى صفحتها بسهولة وما بضل اي اثر الها او لسا بدنا وقت لننسى ؟

حمزة : ... حسب القصة

علاء : لا، برأيي ما في استثناءات للمسامحة

حمزة : علاء، انا مصدوم منك مشان هيك بحاول اتجنبك، اما اختي ما انصدمت للاسف لاني شفت غيرتها من رانيا ومن بنات عيلتكم اكثر من مرة بعيونها، كانت دايما تلمح انه نفسها بواحد يغير حياتها ماديا، للاسف هي ما بتعرف الحب الحقيقي لحد هسة

علاء : ... انا خجلان منك كثير ومن حالي اكثر، بس صدقني اني ما توقعت تكون هيك بتفكر، وفعلا لو كانت بتحبني جد يمكن تزوجتها

حمزة : مستحييييل اسمح بهيك زواج، سكر عالقصة فورا واعتبرها ما صارت من هاللحظة

علاء ( تبسمت ) : تمام، يسلمو

سيرين : يلا جاهزة

حمزة : ماشاءالله عالسرعة

علاء : ههههههه امشي قدامي شو عاملة بالزلمة ؟

حمزة : كل خير، حبيبة قلبي سيرين، الله يعيني اليوم كيف بدي اقضيه بدونك

سيرين ( قلبت شفايفها ) : يا عمري انت خلص بضل ازا بدك

علاء : استغفر الله العظيم

حمزة / سيرين : هههههههه

////

قصي : ولك في حدا بطلع حدا بهالشووووب على فنجان قهوة ؟؟

سهى : ههههه جنني طول الطريق وهو يعلق، وكل شوي يوقف بده يشتري بوظة وعصير وانا اسكته

ريم / ديمة : هههههه يا ويلي عليكي ماما، هيك مقضية العطلة معه ؟

قصي : هيهيهي فوق ما انتوا خاينات وبتفطروا لحالكم، بدل ما تيجوا عند امكم واخوكم تفطروا معهم

ريم : والله انا مخططة لفطور خصوصي اعزم عليه ماما وبابا بس بستنى فيك اتداوم

ديمة : هههههههه

قصي : ماشي انتي واياها، المهم انا اعطوني حبيبتي القمر العاقلة اللي الحمدلله مو طالعة لا لامها ولا لخالتها

ديمة : خدلك كيف ببوسها، ولك شوكتها بلحيتك حرام عليك

ريم : صحيح ليه هيك مو حالق ؟ سلمى بتدايق ابوها بحلق خصوصي مشااانهاااا

سهى : بربي بلحيته عشان يبهج على بداية الدوام

ديمة : امممم لغاية في نفس يعقوب يعني ؟

قصي ( بمسخرة ) : اممممم

سهى / ريم : ههههههه

////

مها : والله زارتنا البركة، شو هاليوم الحلو هاد ؟

علاء : هههه حبيبتي مهمومة الله يسعد صباحك وكل ايامك يارب، مبارك الحفيد

سيرين : هههههع

مها : الله يبارك فيك، لا تحاول ما بكبر انا حتى لو صار عندي احفاد

سيرين : احلى تيتا، كيفكم يا صبايا وينكم ما بتبينوا ؟

حنين : مبارح كنا عندك على فكرة، ولا شوفة علاء طيرت عقلك

علاء : هههههه ام لسان رقم ٢، ما بدنا نفرح فيكي انتي الثانية طولتي

مها : يييي لما يطلع ابوها من صدمة فقدان الاولى

علاء : فقدان ؟! هههههع معك حق الحب بؤدي الى عالم الضياع والهلاك

الجميع : ههههههه

////

ريم : هي علاء عالطريق، خليني البس

سهى : بالله عليكي ؟ معقول ما يسلم علينا شو وراكم يختي ؟

ديمة : اه والله عيب صار واصل، وقصي موجود

قصي : الحمدلله شفتوني

سيرين : بتعرف اني جاية معك ؟

علاء : لا ما حكيت، عارفهم مشتاقينلك خليتك مفاجاة

سيرين : ههههه نيالي

قصي : والله نورت بسيرين عبد النور

الجميع : هههههه

ديمة : اشتقنالك، كيفك ؟

ريم : اه والله زمان عنك سيسو

سيرين : تسلمو وانا اكتر، هيني بهالدنيا

علاء : كيفك خالتي شو هالصدفة الحلوة ؟

سهى : الله يرضى عليك، ويجمعنا دايما عالمحبة

الجميع : يارب

سيرين : ويبعد عنا المشاكل، لانه قلبنا ما ضل فيه طاقة تحمل

ريم : حكيتي مع امك ؟

علاء : بدون ما تحكي، حمزة شايفها على باب البيت

سهى : عن مين بتحكوا ؟

علاء : عن خالتي منى

حكتلنا ريم كل اشي صار مبارح ..

سهى : حامل ؟ يا قلبي عليها هالبنت شو جبارة

قصي : لا حول ولا قوة الا بالله، الواحد احتار على مين ولا مين يزعل، اشي بقطع القلب

علاء : اه والله

سيرين : خالو هيثم ورانيا بس اللي بعرفوا، ولما حكت خالتو مها عن ياسمين رانيا كشفت الحقيقة

سهى : يا عليي عليها مها، مسكينة دوبها تقوم بصغارها وعيلتها كيف بدها تقوم ببنتها ؟

علاء : وهون بيجي دور الحماية، ولا يا خالتي ؟

سهى : اكيد

ريم : صراحة معك حق، يعني ماما ما عندها هديك المسؤولية وما قصرت معي، ومع ذلك وجود خالتو نهى كان مهم بالنسبة الي

ديمة : وما عم تحكي عن غربة، وبكرية وولادة وتوابعها

سيرين : معقول تولد هناك ؟

علاء : الله اعلم، المهم نحاول قد ما نقدر نوقف جنب الطرفين، حالة خالتي منى مو سهلة كمان

قصي : الله يهونها عالجميع

سيرين : كانه بطنك كبران انتي ؟

ديمة : يمكن نصحانة من كتر الاكل

علاء : بعد فك الحظر اكيد بدك تتدلي ههههه

سهى : رجعت للوضع الطبيعي اون لاين

سيرين : الله يحميهم لبعض، والله عدي ما في منه

ديمة : تسلمي، ويحميلك حمزة يارب

قصي : يا حسرة عليي انا صفيت عزابي

ريم : ليه من غير شر ؟

ديمة ( بتغمز لريم ) : معقول ما في مسكة ايد ولا بوسة من هون ولا من هون !!

سيرين ( بمسخرة ) : يسترجي، كنت قطعتهاااااله

الجميع : ههههههه

قصي ( منفعل ) : اعوووذ بالله، ناقصني عشان اكل كف مثل ام...

علاء ( فتح عيونه ) : مثل مين وله ؟

قصي ( استدرك حاله ) : اه ؟ قصدي انه .. انه

علاء : ربطولي اياه خليني اعرف احقق

ديمة / سيرين : يلاااا

قصي : يا بي منكم

سهى : مين اللي ماكل كف ؟

قصي : بس بتوعدوني هالكلام ما يطلع من هالبيت، وانتي ديمة اياكي يوصل لزوجك لانه بتصير مشاكل الله بعلم فيها

علاء : احكي وعليك الامان

قصي ( تنهد ) : للاسف كنت بحكي عن امجد

الجميع : شوووو

قصي ( حكى كل القصة ) : اه والله، كان هاد السبب

سهى ( بتضرب على راسها ) : يا حوينتك يا امجد، شو هاي ما في براسها عقل

علاء : مو لاني بدافع عنه، بس الله بعلم قديه بحبها

ريم : خلينا نكون واقعيين، ما حدا فينا برضى بهالاشي، بس انه مو لدرجة تتركه !

ديمة : بالزبط، ضربتيه كف، بهدليه وازعلي منه وخدي موقف حازم

علاء : الله يسامحها ناسية تاخد دروس بالزعل عند قراباتها

قصي : ههههه شفت، لسا المصيبة مو هون

سهى : هو لسا في مصيبة ؟

قصي ( بهز براسه ) : حالف ليحرق قلبها مثل ما حرقت قلبه

سيرين : مع اني بحسه رح يرجعلها

علاء : اكبر غبي اذا برجع، بس ياريته ردلها الكف

ريم : ههههه مالك انفعلت ؟ برضو بلا ما تنحسبله نقطة

علاء : قولتك صحيح، كان وصلت لحقوق المراة

سهى : صدمتني صراحة، مين بعرف غيرك ؟

قصي : بس انا

////

مها : كانوا عندي قبل شوي علاء وسيرين

ياسمين : جد ؟ جاي عندها يعني

مها : اه مفطرين سوا وبده ياخدها معه عند ديمة يجيبوا ريم

ياسمين : حمزة مداوم يعني ؟

مها : لا اجا من دوام ليلي، بس سمحلها تروح كانه الها زمان مو طالعة يا حبيبتي

ياسمين : ما حملت ؟

مها : لا جديد يا عليي، كل يوم بتوصيني ادعيلها لما اولد

ياسمين : مسكينة، هو عادي قبل السنة بس حماتها مجننيتها بيني وبينك

مها : لا حول ولا قوة الا بالله، هو ضل حدا بسال هالايام ؟

ياسمين : بفكروا الناس بتضل جاهلة، يعني ابنها ممرض ومو مركنة عليه تخيلي ؟ شو بدك اكتر من هيك

مها : ستي الوحدة بدها تساير خصوصا اهل زوجها، كرمال عين تكرم مرج عيون

ياسمين : والله ؟! متل ما انت جاملتي واخر اشي موتي ستي من قهرها ههههه

مها : الله يرحمها، كانت تقهر حالها من حالها انا ما عملتلها اشي

////

علاء ( عيوني على خالتي ) : وعمر متغير كثير، شو قصته ؟ حتى مبطل يجتمع معكم صح !

قصي : عادي، هو بشغله واحنا باشغالنا

ريم ( غمزتني ) : ليكون عشقان ؟ بحسه بلمح كتير بده يخطب

قصي : ... الله اعلم

ديمة : اجيبلك الحبل علاء ؟

سيرين : ههههههه

قصي : استغفر الله العظيم، بدي اروح انا احسن

علاء ( مسكه بقوة ) : حلفت ما بتقوم، احكي وعليكي الامان

قصي : يا جماعة مالكم ؟ دعوا الخلق للخالق

سهى : ليكون امه بدها تخطبله بيان ؟ جكر بمنى بما انها صايرة عدوتها من جديد

ديمة : لا تزكريني، يا بي شو متغيرة حماتي مو مرت خالي اللي بنعرفها يا ناس

قصي : موضوع خطبة بيان من عمر كان برمضان الماضي، بس من خالي الفكرة عشان بنت اخوه ما بصير تطلع لغريب وابن عمها موجود

علاء ( باهتمام ) : طيب ؟

قصي : واكيد هو بدوره رح يرفض مشان امجد واصلا ما بحب بيان، فاقنع امجد يطلبها من خالي محمود وهيك تمت خطبتهم

سهى : وهلا لسا بدهم يخطبوه لبيان ؟

قصي : الله يكون بعونه عايش صراع، ويله البنت اللي بحبها وويله انه امه رافضتها عالاخر

ديمة / سيرين : شووو ؟ ليه رافضتها يعني ؟

قصي : انتوا شو بتعرفوا ؟

ريم : انا ما بعرف اشي والله، بس شكلهم الصبايا عندهم اخبار كمان ؟

سيرين : قلبي حاسسني من الاول وحكيت لياسمين ما سمعتني

علاء : عن مين قصدكم ؟

قصي : عن آيات

سهى ( بتلطم ) : يا حسرتي يا حسرتي على حظها، ليه هيك بصير معها هالبنت ؟

قصي : وعمر حاطط الموضوع براسه وما رح يخطب غيرها

علاء : غريبة ؟ من وين اجا هالحب يعني

ديمة : اجا وخلص علاء، المهم النهاية هلا يا اما بنضل نتفرج يا اما بنعمل اشي

سيرين : شو رح نعمل ؟ نصحناها وما بترد بتقلك بحبه

سهى : حبكم برص، شو هالجيل هاد ؟

قصي : الاحلى انه ما في اشي بينهم، يعني انا مستغرب منكم من وين جايبين الحكي

ديمة : يا فالح، هو حكى لياسمين انه بحب آيات وياسمين طبعا راحت وصلتلها الحكي لانه لقتها برضو بتفكر فيه

قصي : بس عمر ما بعرف انها بتحبه، عفكرة

علاء : ياسمين فاعلة الخير مو بايدها

قصي : ههههههه

ريم / ديمة / سيرين ( كاتمين ضحكتهم ) : ...

علاء : هاي القيامة قايمة بالعيلة وما معنى خبر، اخر اشي توقعته امجد وعمر حالتهم بالويل وما حدا واقف جنبهم ولا بساعدهم

ريم : السؤال القوي يا صبايا اهل آيات شو رايهم ؟

ديمة : والله يا حبيبتي مشددين عليها الحراسة عالاخر، والنفس ما بتاخده بدون علم امجد

قصي : عشان هيك متغيرة مع عمر، وما بتواصلوا مثل زمان

علاء : ما في داعي للتواصل ووجع القلب، لما ينوي يخطبها كلنا معه واكيد اهلها ما بسكروا باب بيتهم للحلال

سهى : عين العقل، ما حدا برضى على بنته الغلط، كلنا عنا بنات ومجربين

قصي : اذا الهم نصيب ببعض ربنا وحده اعلم

////

منى : بدكم اتضلوا نايمين، زهقت لحالي

امجد : اااخ راسي صدااع

منى : من السهر، هاد اللي بيجيني من عطلتكم

انس : ترجيته ينام، ابى واستكبر

امجد ( ضربه بالمخدة ) : شايفني ابليس وله ؟ قوم اعمل قهوة خليني اصحى

منى : خالتك سهى جاية ومعها بناتها وعلاء وسيرين

امجد : اوف، كل هدول ؟

انس : هههههه

منى : يلا قوموا افطروا خليني اضب وراكم قبل ما يوصلوا

امجد : سيرين عبد النور زمان عنها، حاسها انقرضت بعد الزواج

منى : الله يهنيها، عقبالكم ما تنقرضوا

////

علاء،: شو مشربين قصي ؟

ديمة : ههههه قهوة

علاء : ممتاز، مع شوكولاته ولا بدون ؟

ريم : مع

علاء : مرق عليي سكرجية بس سكرجي قهوة ما شفت بحياتي

سهى : ههههههه

قصي : شكرا، الحق عليي بشارككم هموم العائلة

سيرين : احلى اشي بقصي انه بسمع من امجد وبسمع من عمر، وبعطينا السيناريو جاهز

ديمة : هههع فعلا

علاء : المهم كل ما بدنا نعرف اخبار بنشربك قهوة مع حبة شوكولاته هههههه

قصي : هيهيهي

علاء ( ضربه على كتفه ) : الله عليك يا ابو نسب، عقبال ما يجيني ولد مخول اشربه دلة قهوة يحكلي شو بعملوا امه واخته

ريم : هههههههههه

سيرين : اهدافه نبيلة اخوي

ديمة : مستقبلية زيادة عن اللزوم

سهى : يلا بلا ما نتاخر على منى

علاء : لو امي تيجي كمان نسينا نخبرها

سيرين : خلص مبارح شافتها، بلا ما خالتو منى تصير تخبي حكي بس تشوفها لانه بينهم اسرار اعمق

سهى : هههههههه طلعتي متل اخوكي

علاء : سيسو هاي، ما بقدرلها الا اللي خلقها

////

مها : ايوا كيف احمد بعد خبر الحمل ؟ توقعت يحكي معي ما حكى بس

ياسمين ( بحزن ) : طلع يحكي مع اهله مهو، ومع خالو هيثم يمكن

مها : وين طلع ؟

ياسمين : برا البيت، ماما احمد ما بقدر يزعلهم وهاد ما بعرف عن مرض امه كمان

مها : يعني ما بحكي بوجودك

ياسمين : بالزبط، بعتتلي ايات وامجد وانس يباركولي، بعدين سالتني ازا حكيتله اشي، حكتلها اني شرحت لاحمد بالتفصيل عن كل شي صار بس ما جبت سيرة مرض خالتو

مها : وانتي شو رح تعملي هلا ؟ بدكم تقسموا العرب عربين انتي وجوزك

ياسمين : لا وكل هاد ورجعلي عايف حاله، وبالليل ولا كاني جنبه

مها : لحقتوا ؟

ياسمين : اااخ يا امي، لما فرحت الحزينة سكرت المدينة

مها ( بتبكي ) : ...

ياسمين ( بتبكي ) : ... الحمدلله، حظي وبعرفه

_______________________________

علاء : شو الاخبار امجد بيك ؟

امجد : ما بعرف شو احكيلكم، احمد تحول لواحد ثاني

قصي : طبيعي جدا اللي بصير معه

امجد : طول مبارح وهو بلوم فيي كيف اخبي عنه، وكيف اخلي امي تروح عند خالتي وتحكي اللي حكته وكيف وكيف

علاء : لا حول ولا قوة الا بالله، ربنا يكون بعونه

امجد : بقلي ما بعرف كيف مبارح قدرت اقرب منها، اليوم مو قادر اتطلع فيها ومو حاسس ببهجة الحمل، مع انه ما كان هيك قبل ما يعرف عن الحمل

علاء : شو هالحكي ؟

قصي : يعني هسة خطر بباله يغار مثلا ؟

امجد : لا لا مو قصة غيرة، بس كل اشي دخل ببعضه، مو قادر يوازن بين امي وياسمين

قصي : انا برايي ما يعطي القصة اكبر من حجمها، يضل محايد لحد ما تروق ياسمين

امجد : حكى كل هالحكي ورجع غير رايه، بقلك مو بوعيه، احمد انجن يا جماعة الله يستره بس

علاء ( بضرب على راسه ) : الله ينتقم منك يا زينة، يفرجينا فيكي يوم

امجد : عالفاضي هالكلام، المشكلة صارت فينا احنا

قصي : اييييي القصة مو قصة رمانة القصة قلوب ملياااانة

يتبع ..