سلسلة ياسمينة الروح-الموسم الرابع( مذكرات عاطفية ٢ )-الحلقة الثامنة عشرة
كاتبة قصصية
الحلقة الثامنة عشرة :
ثم ينزع الله من قلبك امراً .. كنت تظن نزعه مستحيلاً .. ثم تستيقظ كأن الله خلق لك قلباً آخر ..
____________
__________
مها : وين الباقيين ؟
ام ماهر : ماهر وبنته هيهم ورانا
رانيا : مو جاية ام عدي ؟
ام ماهر : مريضة بعيد عنك
مها : اه اعتزرت عالواتس
ابو امير : مين ومين جاي ؟
هيثم : عالاغلب ام احمد مو جاية
ابو امير : ...
هيثم ( متابع ) : ما حبت تحرج ياسمين، مو حلوة لا بحقها ولا بحق البنت
ابو امير ( بحسرة ) : هالمسكينة بنتي نسيت بس سمعت عن اللي صار ببنات خالاتها
هيثم : هسة ما اختلفنا انه اللي صار بياسمين اصعب بكثير، بس لانه طبيعة اختي ام احمد غير، ومحبتها لياسمين كفتها بترجح واكيد ياسمين بتبادلها هالمحبة من قبل ما تصير كنتها
ابو امير : هالمحبة لو استغلتها صح ما كان وصلنا لهون، معلش هيثم انا صعب انسى اللي حكتلها اياه لاخر يوم بحياتي حتى لو بنتي نسيت
هيثم : تمام، اكيد انت اب واي حد مكانك رح يكون مثل موقفك، الله يهدي بالك
ابو عدي : تاخرنا عليكم
مها : لا لسا ما حدا اجا الا اهلي وهيثم
ابو بيان : الحمدلله على سلامتك ياسمين، الله يهون عليكي يا خالي وتقومي بالسلامة
ياسمين ( بتسلم ) : الله يسلمك خالو، اشتقتلكم
بيان / غنى : واحنا اشتقنالك
ام بيان : نورتي عمان
ياسمين : تسلمي خالتو، اااخ على عمان شو اشتقتلها وبكيت على فراقها وفراق اللي فيها
ابو امير : يسعد قلبها الغالية، وعمان بكيتك كمان يا بابا
حنين : منيح اللي اجيتي ست بيان
غنى : شايفة بالله، الها زمان ما اجتمعت مع حدا ولا زارت حدا
رنين : يلا هلا بيجي الباشا وبنشوف شو رح يعمل فصول ناقصة اليوم
بيان : يعمل اللي بده اياه، بطل يفرق عندي
حنين : بنقول ان شاءالله
////
علاء : هي وصلنا احنا ودار حماها مع بعض
سهى : شكلها منى مو جاية
ريم ( باستغراب ) : ليه معقول تيجي فجاة ؟
قصي : خلص وطوا صوتكم
ابو احمد : السلام عليكم
الجميع : وعليكم السلام
امجد : برضو مع هالمسكين علاء، يا زلمة متزوج ريم ولا اهلها انت ؟
ريم : انا واهلي شو مدايقك مهي نسيبكم معكم كمان
عمر : استغفر الله، بلشنا حسد وديقة عين
آيات : ههههه
ابو قصي : خير ما عملت يا ابو احمد، جيتك قيمتها كبيرة عند ياسمين
ابو احمد ( تنهد ) : بندعي الله يهديها وبنتوكل عليه، اللي عليي رح اعمله وهية وخالتها على ربنا
سهى : يلا تفضلوا خلينا نلحق السهرة
علاء : دقيقة خلي عدي يصف السيارة
عمر : هسة بتفاجا بس يشوفني
امجد : ما حكتله انك جاي ؟
عمر : قلتله ما بعرف، بعدين غنى حكتلي امي مو جاي
سهى ( عيونها على آيات ) : ... لا حول ولا قوة الا بالله
آيات ( نزلت راسها ) : ...
عدي / ديمة : مسا الخير
الجميع : مسا النور
عدي : بتستنوا فينا ؟
علاء : هيك اشي، اوجه نفوت كلنا ههههه
عدي : هي سيارات الكل واصلين
سهى : بس دار ابو علاء بعدهم
ريم : معقول تيجي سيرين ؟
ديمة : لا مو جاية ضلت بالبيت
علاء ( بدهشة ) : لحالها ؟؟
ديمة : ... يمكن
ابو قصي : يلا يا جماعة خلونا نطلع
ابو احمد : توكلنا على الله
الشباب : ههههه
////
ام عدي : طمنيني اجا عمر ؟
ام بيان : لحد هلا لا
ام عدي : طمنيني عنه ازا شفتيه
ام بيان : ولا يهمك، بصورلك اياه كمان هههه
ام عدي : ياريت والله مشتقتله زمان ما شفته
////
احمد : لا تفصلي الخط، خليني معك بكل لحظة
ياسمين : مو معقول حبيبي بدي اعرف استقبل الناس
احمد : معلش استقبليهم وانا معك
ما كنت اعرف مين اللي جاي بهاللحظة، فتحت الباب وانا بتناقش مع احمد ..
ابو قصي : السلااام عليكم، الف الحمدلله على سلامتك عمي ياسمين
ياسمين ( مبتسمة ) : الله يسلمك
ابو امير : يا هلا تفضلوا
سهى : للللليييييييش ياسمينتنا اهلا اهلا نورتينا
ياسمين ( حضنتها ) : يا حبيبتي خالتو يسعدك ربي
ريم / ديمة / آيات ( هجموا عليي ) : ياسمييين الحمدلله عالسلامة
ياسمين : الله يسلمكم حبيباتي، اشتقتلكم
ابو احمد : الحمدلله على سلامتك يا عمي
كانت عيوني بتدور عليها، بس ما كانت موجودة ..
لحد ما صحيت على صوت من زمان كتير ما سمعته ولا شفت صاحبه ..
كانت ابتسامته بعيونه؛ اللي بتحكي كلام كتير وبتعبر عن اشياء صعب تنحكى ..
ياسمين ( برجفة ) : عَ عَ عممممو ابو احمد
احمد : ياسمين .. اهدي شو مالك بترجفي ؟ امي اجت كمان ؟
مد ايده يسلم عليي وكل اللي حوالينا بستنوا يشوفوا ازا اسلم او ما اسلم ..
سلمت ونزلت حالي ابوس ايده ، رفعني ..
ابو احمد ( ببوس بخدودي ) : الله يرضى عليكي، ما بدي الا تسامحينا وتسمحيلنا نشوفك ونحكي معك
ياسمين ( بهز براسي وبحاول امسك دموعي ) : ... اكيد عمو تفضل
ضمني لعنده وباس راسي بحنية كبيرة ما شفتها الا من بابا، كانت ايده بترجف كمان ..
آيات ( حضنتني بقوة ) : يا الله شو اشتقتلك، حبيبتي الله يقومك بالسلامة ونفرح فيكي وبابن اخونا الغالي
امجد / انس : الحمدلله على سلامتك ياسمين
ياسمين : الله يسلمكم
عمر / امجد / قصي ( بغنوا ) : الحمدلله عالسلامة يا جاي من السفر .. وحشاني الابتسامة وشك ولا القمر
احمد ( عالخط ) : اكيد القمر
ياسمين : ههههههه
عمر : الله يخلص هالدراما على خير بلكي بنقعد قبل ما يتكسروا رجلينا
الجميع : هههههه
ياسمين : والله اهلين بعرسان الموسم، منورين المحابس ها، مبارك يارب
عمر / آيات ( مسكوا ايدين بعض ) : الله يبارك فيكي
قصي : عقبال ما تشوفي يحيى عريس
ياسمين : امين اول اشي انت، ولك شو اخبارك مالك هيك متقلص وحالتك حالة ؟
قصي : خليها على الله
احمد : اهئ اهئ اهئ يا حبيبي يا قصي
كنت فاتحة سبيكر بهاللحظة، عشان يسمعوه ..
الجميع ( بدهشة ) : احمد !
ابو احمد : كيف حالك يابا، مثل ما ودعت تلاقي
احمد : بخير الحمدلله، ديروا بالكم على امانتي صارت عندكم
هيثم : طيب يلا روح نام خلينا نعرف ندير بالنا عليها
احمد : انت بالذات ما تحكي
الشباب : ابو حميد القعدة بلاك ما بتسوى
امجد ( بتباكي ) : اخوياااا
قصي ( بتباكي ) : يا حوينتك
عمر ( بغني بحزن ) : وين مساااافر .. اوعى تساااافر آخر مرة بقلك هييييك
ياسمين : بدات السهرة احمد، بتحب اتضل اون لاين ولا تريح راسك وتنام حبيبي ؟
احمد : اون لاين طبعا
////
ابو علاء : حاولي ما تجمعيني مع اخته اذا كانت جاية
نهى : اكيد جاية
ابو علاء : معناها باسلوبك احكي لام امير تفصل القعدة
نهى : مو بس عشانها، عشان احنا كمان نرتاح والحوامل ياخدوا راحتهم مش حلوة قعدتهم معكم
ابو علاء ( بحسرة ) : يا قلبي على هالبنت شو كان صار لو فرحت شوي بهالولد وضلت حامل
نهى : الحمدلله ربنا اختار الافضل، وان شاءالله بتعوضه
ابو علاء ( تنهد ) : الحمدلله على كل شي
////
كان لقاء حلو كثير جمعنا معها من جديد، بعد ما غابت عنا فترة طويلة ..
رغم انه بغيابها صارت تطورات واحداث بعلاقتنا مع اهلها، بس مع ذلك لسا في شوية تحفظات ..
انس : يا اسيل جيبيلي كاسة مي لو سمحتي
اسيل : يلا ثواني، بدك اياها باردة ولا عادي ؟
امجد : هو ضل حدا بشرب بارد بهالجو، طيري جيبيلي انا كمان
اسيل ( مو عاجبها ) : طيب
////
افت ما ازنخه، كنت طايرة من فرحتي لانه انس طلب مني اجيبله مي ..
فقلت فرصة اقدمله اياها واقرب منه قد ما بقدر، خصوصا انه امي وخواتي مشغولات عالاخر ..
رنين : لمين المي ؟
اسيل : شو لمين ؟ للناس اللي طلبوا
رنين : طيب عبي شاف كبير وحطيه عالطاولة مع كاسات واللي بده بصب
اسيل ( بلا مبالاة ) : عبيه انتي، عبن ما اودي هالكاسة المستعجلة
حطيت باحسن كاسة عنا متل اللي كانت ياسمين تحط فيهم لاحمد، وزبطت حالي عالمراية اخر مرة ومشيت للغرفة وانا حاملة صينية صغيرة ..
اسيل ( بسبل بعيوني ومقربة كتير منه ) : تفضل هي المي
انس ( بخجل ) : يسلو ايديكي
اسيل ( لسا واقفة قباله وبستناه يتطلع عليي ويتاملني ) : صحتين وهنا يارب
امجد ( فجاة ) : وانا وين كاستي ؟ شو هالخدمات الضعيفة هاي ؟
اسيل ( بحقد ) : هلا رنين بتعبي شاف وبتجيبلك ضلك اشرب لحد ما تشبع
قصي : ههههههههه
امجد : ولي اسيل بموتك ترا، انتي بتعرفي قديه بيني وبينك فرق عمر ؟
اسيل ( بجكر ) : لا والله ما بعرف ولا بدي اعرف ما بهمني صراحة
انس : له له له شو مالك يا بنت احكي بادب شوي، بضل ابن خالتك الاكبر منك
اسيل : والله ؟ تشرفنا
مها ( اجت فجاة ) : مال صوتك طالع ولي ؟
كان ناقصني امي تيجي تشرشحني قدام الملأ، قبل ما حدا يجاوبها كنت مختفية متل السحر ..
امجد : هربتي اه ؟ اخرتني اطوله لسانك يا نص نصيص
انس : والله انك انت اللي لسانك سليط، يا اخي طلعت كاسة المي على جلدي يا ريتني ما طلبتها
قصي : عشان تحس بشوي من اللي بعانيه
امجد ( لطشه طيارة على رقبته ) : نقطني سكوتك انت
////
يا فرحتك يا مها، حتى نفس الكاسة اللي بتحط فيها اختها ..
بس غفلت عنها شوي بنتي المحروسة اخدت راحتها، وفوق كل هاد بتعمل طوش وبتطول لسانها ..
ياسمين : بسم الله نقزتيني
مها ( بين سناني ) : اسمعيني منيح، عينك على اسيل احسن ما اطلع عينك وعينها فاهمة ؟
ياسمين ( كاتمة ضحكتها ) : ليه شو عملت ؟
مها : انتي راقبيها لحالك بتعرفي
ياسمين : طيب يختي انتي بس هدي اعصابك وارتاحي واتركي الباقي عليي
مها ( تنهدت ) : مجبورة اوثق فيكي لاني ما بدي الفت انتباه ابوكي
ياسمين : ههههه اوك
////
امي كلفتني بمهمة صعبة اليوم، بس كان عقلي عند شخص تاني لانه بوضع اصعب ..
ما قدرت تخفي ملامح وجهها اللي انقلبت لما شافتهم سوا، وايديهم مشبوكين ..
والظاهر انه في حدا غيري انا وحنين بنعرف بهالسر اللي مخبيته، وعلى طول لاحظت عليها متلنا ..
غنى : كيف دراستك ؟
رنين : مو كتير، لسا باخد حصص بالمركز وملانة وعايفة حالي
غنى : لا ما بصير، اخلصي من هالتوجيهي وارتاحي
رنين : ان شاءالله خير .. ( بتململ ) شو اخبار اخوكي العريس مبسوط الهيئة ؟
غنى ( مستغربة ) : اكيد مبسوط، مو هوة اختار وعمل المستحيل لاخدها
رنين ( مو عاجبها ) : لابقلها للست آيات
غنى : ستي، كل واحد باخد نصيبه .. ( بحزن ) معلش حبيبتي رنين ان شاءالله بتلتقي باللي بحبك وتحبيه حب حقيقي
رنين ( بغصة ) : بس انا كنت ...
غنى ( قاطعتها ) : انسي، ولا تتزكري اشي احسن، شوفي بيان الحب كيف عامل فيها خلينا نستنى نصيبنا احسن من هالحكي الفاضي كله
رنين ( هزت راسها ) : ...
////
رغم كل اجواء الفرح الغامرة العيلة بلقائها، الا انه غصة بقلبي مسيطرة عليي لما شفتها مو معطية لوجودي قيمة ..
تغيرت كتير عليي، والايام الحلوة اللي بينا نسيتهم يمكن او متجاهلتهم ما بعرف ..
بس اللي بعرفه بهالوقت، انه انا وياسمين صار في تماس بينا ..
هيثم ( بهمس ) : مالك متدايقة ؟
رانيا ( بغصة ) : لا عادي، بس عشان مو مرتاحة بالقعدة بسبب الحمل
هيثم : طيب هسة بحكي لمها تفصل القعدة، لانه شكله ياسمين متدايقة وكل شوي تقوم وتحرك حالها ويمكن ديمة كمان
رانيا : لا تحكي، ازا همة ما بادروا ما تطلب مشاني .. انسى
بهاللحظة، تغيرت الاجواء لما اندق الجرس وفتحوا الباب لآخر الواصلين ..
////
ابو امير : يا اهلا وسهلا تاخرتوا يا جماعة
ابو علاء : لا تاخذونا، بس صار معنا ظرف فجاة
مها : بسيطة، تفضلو
ابو امير : عمي سيرين، شو هالمفاجاة نورتينا
البنات ( متفاجئين ) : سيريييين
سيرين : تسلم عمو، كيفكم ؟
ابو ماهر : اهلين اهلين بالحلوين، تعالي يا سيدي اشوفك
سيرين ( بخجل ) : اهلين فيك
ام ماهر : وينك يا ستي ما بتيجي ولا بنشوفك، اشتكنالك يا حبيبتي ( حضنتها ) الله يهدي بالك وبال اهلك عليكي
سلمت عالكل ولما وصلت لعند رانيا، غيرت طريقها ..
هيثم ( بنبرة حادة ) : ما سلمتي على رانيا
رانيا ( بغصة ) : خلص هيثم
هيثم : لا مو خلص، شو دخلك انتي باخوكي ؟
سيرين : ...
نهى : سلمي ماما
رجعت سلمت عليها ببرود، واعطت هيثم نظرة انه مشانك هالسلام ..
ناديتها وقعدتها جنبي، وضميتها تحت ايدي وبست راسها ..
علاء : منيح اللي اجيتي، كنت قلقان عليكي اتضلي بالبيت لحالك
سيرين ( بتهز راسها ) : بابا ما خلاني، عشان هيك تاخرنا
ريم : شو اخبارك ؟
سيرين : تمام، ماشي حالي
مو متخيل انه هاي نفسها سيرين؛ اللي كانت حديث كل من شاف جمالها وحضورها ..
قصي ( بهمس ) : يا حرام يا سيرين شو اللي صار فيكي ؟
عمر ( بهمس ) : جد متغيرة كثييييير، ما عرفتها صراحة
امجد : انت الك زمان ما شفتها
عمر : من وين اشوفها وهي حابسة حالها بهالبيت
قصي : اهلها خايفين عليها كثير، منيح اللي مخلينها اتداوم بشغلها
عمر : لحد هسة نفسي افهم شو المشكلة ؟ عشنها نزلت البيبي يعني ؟
امجد : الله اعلم، بس شكله ما نزلته من قليل
قصي : بقولوا حماتها الها دخل وكانت تعمل مشاكل
عمر : سيدي الله يصلح الاحوال ويهدي بالها
////
هيثم ( بهمس ) : وين كنتي ؟
رانيا ( بهمس ) : رحت اتمشى شوي احرك حالي، تعبت من القعدة
نهى ( انتبهتلهم ) : شكلهم الحوامل متاديقات من القعدة، تعالوا نقعد بالصالة التانية اريح
ابو امير : خدوا راحتكم البيت بيتكم
ياسمين : خالتو انا جاية من السعودية لهون عشان اقعد لحالي، اي ما صدقت واقعد هيك قعدة
سيرين : اه والله وانا كمان، خلص ماما اللي تعبان يروح يقعد لحاله
ديمة : هي خالتو مها بتفوت ترضع ريان فوتوا سلوها ههههه
البنات: صح هههههه
نهى ( اتدايقت منهم ) : والله ؟ خفيفات دم صراحة
علاء : هههههه هسة لعرفتيهم ؟
ريم : ...
كانوا متفقات ضد رانيا، وعم يتغامزوا مشان تقوم من الجلسة كلها وما يحكوا معها ..
لو في حدا لازم يكره هالعيلة او يحقد عليها، فهي انا ..
ما بنسى كيف مسكت اعصابي وما واجهتها وقلبت الدنيا على راسها، على تجرأها بالحكي مع زوجي ..
مع ذلك بضل احكي ( ولا تزروا وازرة وزر اخرى )، وكل مين لازم يتحاسب على غلطه لوحده ..
////
كنت منسجمة مع البنات على مجاكرة رانيا، لحد ما اجت عيني على الطاولة ولقيت اشي ثمين جدا، استنكرت وجوده وما قاومت فضولي ..
ياسمين ( بنبرة حادة ) : هاي الكاسة مين طلعها ؟
انس ( مستغرب ) : انا شربت فيها مي
امجد ( برقص بحواجبه لانس ) : اسيل جابتله اياها
ياسمين ( عصبت ) : اسيل وينك ؟
اسيل ( اجت على صوتي ) : نعم ؟
ياسمين : شو اسوي فيكي انتي اه ؟
اسيل ( بخوف ) : ليه شو عملت ؟
ياسمين : ولك بتعرفي انه حق طقم الكاسات هاد عشرين دولار، وانا شريته خصوصا عشان اضيف فيه احمد لما يجي عنا ؟
الشباب : هههههههههه
مها ( بتحكي من الصالة اللي قاعدين فيها النسوان اللي انفصلوا ) : يخرب بيت اليهود ولك وحاسبتيهم بالدولار كمان
ياسمين : وحرمت حالي من الاكل والشرب عشان احوش حقهم
ابو امير : حسبنا الله ونعم الوكيل
الجميع : ههههههع خليها تكمل
اسيل : تكمل شو ؟ انا شو بعرفني بهالحكي كله طلب مني كاسة مي لقيتها بوجهي وصبيتله فيها
ياسمين : شوو ؟ كيف بوجهك ولك انا ضاببتهم قبل ما اسافر بالمكان السري اللي ماما بتحط فيه الاشياء الثمينة
امجد : الحمدلله ما جابتلي كاسة، فعلا يا جماعة لا تكرهوا شيئا عسى ان يكون خيرا لكم، كنت زعلان منها ومتحلفلها خلص عفوت عنك يا اسولة العسولة
انس : هيهيهيهي ما ابردك
ياسمين : فورا بتلمعيها تلمييييع وبترجعيها لمكانها، شه غاب القط العب يافار
هيثم : العفو عند المقدرة، تحلي باخلاق سلفك الراقية وشوفي كيف كان كريم باخلاقه معها
الجميع : ههههههه
ابو امير : والله نيالك يا احمد باشا، طيب كنتي شربيني فيهم اشي بغيابها
مها : ييي ما بسترجي، بتيجيني من جدة ركاض
عمر : شكلها حاطة كاميرا مراقبة بالمكان السري، بس ما عرفنا وينه هالمكان ؟
الشباب : ههههههه بنقلك سري يا حبيبي
عمر : انتوا عندكم مكان سري كمان يا امجد ؟
امجد : يا حسرة علينا لما يكون عنا اشياء ثمينة يصل ثمنها لعشرين دولار واكثر
ابو احمد : هههههههه ضحكتوني
ابو قصي : هسة بستلمونا بالمكان السري، كل واحد برجع على بيته يفتش عليه
سهى ( دخلت عالخط ) : انا بناتي مكانهم السري بغرفتهم، كانت كل وحدة تجيب لخطيبها شغلة تخبيها فيه عشان قصي ما يعرفه
ريم : ابدعتي ماما
ديمة : ههههههههه لازم نغيره ريم
ياسمين / سيرين / آيات : هالمرة خلوه سري بدون امكم كمان
قصي : بصير خير يا خواتي
ياسمين ( رجع احمد رن عليي ورديت بعصبية ) : الو
احمد : يمة، مالك معصبة ؟
ياسمين ( بتباكي ) : الست اسيل طلب منها انس كاسة مي راحت صبتله بكاسة من كاساتك حبيبي، بهون عليك ؟
احمد : اي كاسات ما فهمت ؟
ياسمين : شو اي كاسات، نسيت اللي كنت اشربك فيهم المي والعصير واحنا خاطبين
احمد : المرة الاولى ولا الثانية ؟
الجميع : ههههههه
ياسمين ( عصبت ) : بتتخوت ؟
احمد ( بحزم ) : ياااااسمين، روقي الله يرضى عليكي بلا قلة عقل، بعدين انا واخي واحد وانتي بتعزي انس كثيير صح ؟
ياسمين : هو من جهة بعزه كتير اه والله، بس انا مش عشان هو بالذات انا قصدي عالمبدا انه ما بحب حدا يمسكهم غيرك
احمد : طيب بسيطة حصل خير، لا تشدي على حالك بلا ما تولدي فجاة لساتك ما دخلتي التاسع
مها : ههههههه عمك غار يا احمد بده يشرب منهم، تسمحله ؟
احمد ( بضحك ) : له له، اكيد بسمحله الله يهديها بنتك ويكبر عقلها
هيثم : لابقلك الدلال، خلص ياسمين لا تعيطي خالو هو هيك طبعه مستحيل يتغير
ياسمين ( بحزن ) : اه والله بعرف، بس بضل انسى
احمد : هيثم شو رايك تكون محضر خير ؟
علاء : انا مع هيثم صراحة، ايه رايكم يا رجالة ؟
الشباب : اكيييد، حدا صحله يشرب بكاسات بعشرين دولار وبحكي لا ؟
احمد ( بدهشة ) : شو عشرين دولار ؟
ابو امير : حقهم هيك، المسكينة كاينة تحرم حالها من الاكل والشرب عشان تحوشهم عاساس انا حارمها من اشي بنت الذين
الجميع : ههههههه
ابو احمد : واحنا بنقول مال هالبنت هيكل عظمي، اتاريها بتحوش عشانك وياريت عاجبك
احمد : لا اذا هيك خلص ممنوع حدا يشرب فيهم، جيبيهم معك على بيتنا حبيبتي عشان تضمني عدم الاستخدام
ياسمين : ما بدي، زعلت
البنات : لازم تاخد موقف احسن ما يتكرر هالاشي مرة تانية
الشباب : ههههههه تورطت يا ابو حميييييد
احمد : ياريتني ما رجعت ارن، خليني انام اشرفلي
ياسمين ( مو عاجبني ) : نوم العوافي، مع اني متاكدة ما رح تنام، يلا هلا بتحضر مباريات قد ما بدك وبتشجع برشلونة براحتك
احمد : اه طبعا مهو حضرتك وصلتي عند اهلك وتخليتي عني وعن كل اشي بخصني
ابو امير ( بمزح ) : احمد برشلوني ! له له يا حيف بس
مها : ههههه اخص يا احمد
عمر ( بغني ) : وبرشا برشا يا مدلل
هيثم / احمد / امجد / عمر : برشا برشا
عمر ( متابع ) : حبك على قلبي تسلل
ابو بيان : هالشباب هاملين حتى فريق كرة مو عارفين يشجعوا مثل العالم والناس
هيثم : المشكلة كل واحد فينا بشجع فريق ياريت عارفين نتفق ههههه
ياسمين : انت مدريدي خالو ؟
احمد : يسترجي
الشباب : ههههههه منتى سامعتيه بغني معهم
هيثم : خايف منك مثلا ؟
علاء : خالتي احنا كل واحد بشجع فريق اما كباريتنا الله يحفظهم مشجعين مدريد مثل اخوالي وابوي وعمي ابو قصي وابو امير، اما عمي ابو احمد مسكين واقع بين اولاده وبين عدايله ونسايبه
ابو احمد : ههههه
امجد : دخيل قلبه المفلسف، عاساس انت متفق مع ابوك
ريم : ههههه فعلا، ما انت بتشجع مانشستر
ديمة : وعدي يوفينتس، وقصي ليفربول
سهى : يخزي العين، هالاشي المهم يعني ؟
انس : انا ما دخلني فيهم الحمدلله
سهى : شو فريقك انت ؟
امجد : يا حبيبتي يا سوسو، هاد بشجع فريق تنس ارضي
عمر ( بغمز لامجد ) : الله وكيلك يا عمتي كل ما اجي عندهم بلاقيه صافن بالتلفزيون، وشرطك بس مباريات بين البنات
امجد : قال حظ اعطيني وحكم بملعب تنس ارضي ارميني
عمر ( بغني ) : اجري عليه وابووووسه لو يعمل ايه ابوووسه .. ابوووسه
امجد / قصي : امممموااااه اممممموااااه ابوووسه
البنات : يمة شو نسونجيين طلعتوا
احمد : احلى انوووس، امجد وعمر ممنوع تحكوا معه
انس : اتركهم احمد، هدول عقلهم محدود ما بفكروا ابعد من مسافة ملعب كرة
ياسمين ( مصدومة ) : دقيقة، ولك انس انت شو بتدرس بالجامعة ؟
امجد : هيهيهيهي
هيثم : مودينك تدرس طب ولا طولة لسان ؟
احمد : صحيح كلامه والله طلعت انت اللي بتفهم بالاخر خلص بطلت اشجع كرة انا بدي احوّل مثل اخوي
ياسمين : نعم !
الشباب : ههههههه
عدي : فرصة تاخد راحتك هالايام
احمد : والله اجت بوقتها، صرت ازهق بيني وبينك من هالهبايل اللي بركضوا ورا طابة
ديمة : ياسمين ارجعي بسرعة
ياسمين ( بثقة ) : لا حبيبتي انا عند اهلي، واللي عند اهله على مهله، بكرا بتشوفيه كيف رح يترجااااني ارجع
احمد : اااه ؟
ابو امير : احنا بنستقبلك على حسب المدة اللي بحددها زوجك
ابو احمد : احنا بنستقبلها قد ما بدها، ولا يضيمك هال... اللي بده ياخذ راحته بغيابك
ياسمين ( بسبل عيوني ) : الله يخليلنا اياك عمو
احمد ( بمسخرة ) : ياااي
الجميع : هههههه
احمد : ماشي ياسمين، خدي راحتك حبيبتي يلا سلام
هيثم : شباب عيطوا عني انا ما بتزبط معي مثلكم
الشباب ( بتباكي ) : اهئ اهئ اهئ لا يا احمد مشان الله يا احمد لا تزعل، ياسمين دخيلك لا تزعليه
احمد : لا ما اقتنعت
ياسمين : بالنسبة الي ريلاكس، اللي باعك بيعه
احمد : مين باعك بالضبط ما فهمت ست ياسمين ؟
ابو احمد : ايوا رجعنا
ابو عدي : شو يا احمد هيك مرتك ما صدقت وتسافر من عندك ؟ طول بالك عليها شوي
ياسمين ( بمكر ) : شايفين، هي قدامكم هيك، تخيلوا كيف لما اكون لحالي معه
مها ( بمسخرة ) : يا حرااام حزنتينا والله
الشباب : هههههه
ياسمين ( بتباكي ) : الله يسامحك ماما، اصلا انتي دايما ضدي الحمدلله تعودت عليكي
ابو امير ( بنبرة حادة ) : اختصري ياسمين
بيان : يا الله دخيلك
حنين : هههههه معتوه سيبك منه، ابووووسه هههههههه
رنين : والله مو قادر ينساكي، شفتي كيف كان يتطلع عليها
غنى : ولا هية نسيته، الاتنين بكابروا
حنين : ارتحتي منه، بكرا بيجيكي احسن منه بالف مرة
بيان : برايي ما في احسن منه، انتوا ما بتعرفوه متلي
غنى : خلص بيان شو طالع بالايد اكتر من اللي عملتيه، خليه يصطفل بكرا بجرب غيرك وبعرف خيرك
بيان ( بقهر ) : استوعبي غنى انا اللي تركته مو هوة، يعني انا اللي رح اندم
////
وجودها كان احلى اشي بسهرة اليوم، قد ما انا مشتاقلها ونفسي اشوفها بعفوية من زمان ..
حاولت اتجنب نظراتها الي، بس ما قدرت الا ابادلها كم نظرة ، غير عن تاملي الها لما ما تكون منتبهة ..
عمر ( بهمس ) : يلا خد راحتك اليوم
قصي ( بهمس ) : راحة شو ؟ شو بده فيها اصلا
امجد ( بهمس ) : سد نيعك انت واياه ما تتدخلوا فيي
عمر / قصي ( رفعوا حواجبهم ) : ماشي يا امجد، تصطفل
////
ياسمين : ريم شو عاملة مع علاء بالمباريات ؟
ريم : ييييي انا من اول ما تزوجنا اعطاني جدوله ههههه بس مبسوطة خصوصا بس يقرر يسهر مع عدي او العكس، فانا وديمة بنكسبها
ديمة : بس احلى اشي لما تكون في مباراة مناسبة لبابا بنتجمع كلنا هناك والله وكيلك قصي بزهقنا تلفونات مع اصحابه اخر اشي باكل قتلة من عدي وعلاء وبنروح هههههه
قصي : هيهيهي
علاء / عدي : هههههه
ياسمين : ضلكم تشاطروا عليه هالمسكين، قصي لو محلك انا ما بحضر مع هالاشكال
قصي : شو بدي اعمل، المشكلة البيت بيت ابونا واجوا يطحونا
نهى / سهى / مها : ههههههه
ياسمين : مو متل حالاتي يا حسرة انا بصفق والحيطان بتصفر
آيات : يعني هيك رح نصير معكم بالمستقبل
ياسمين : عقبال عندي يجيني سلفة ابوها مدريدي ونعمل حزب انا واياها
ابو بيان : مهو كانت عندك بس طفشته للعريس
بيان ( منحرجة ) : باباااا
امجد : لا يا خالي كل واحد باخد نصيبه، الله يستر عليها ويبعثلها اللي احسن مني وبستاهلها اكثر مني
ياسمين : خالو نصيب وانقطع لو سمحت ما بدنا نضل نجيب سيرة الماضي
عمر ( بغني ) : ما بلاش نتكلم بالماااضي .. دا الماضي كان كله جراااح
آيات ( زورت عمر ) : طيب كيف بتجتمعوا وكل واحد بشجع فريق ؟
الشباب : استغفر الله العظيم
ياسمين : يييي هلا باكلونا لو سالناهم سؤال، قال صعب يشرحوا
ديمة : احسن واحد جوزي من اول المباراة بجيبلي اشياء زاكية ووجبة عشا بتخلص المباراة وانا لسا ما خلصت اكل
الجميع : ههههع
ابو عدي : والله وطلعت فاهم للنسوان اكثر واحد فينا يابا
عدي : هههههه لا مو لهالدرجة
امجد : اي يلا عاد، يكفيك تواضعا
عمر : ضروري اخذ كم درس عندك قبل العرس
ابو عدي : ئي، يا خالي كيف عمر معك ؟ جننك ولا بعده
آيات : بالعكس ما في منه الله يخليلي اياه، بس اكيد نهفاته ما بغيرها
البنات : ههههههه
عمر : ماشي يا خطيبتي
آيات : مو بدك تاخد دروس عند اخوك، خليني اخد راحتي بالحكي
////
ام عدي : طمنيني كيف الوضع ؟
ام بيان ( صورت كم صورة بالخفية ) : تفرجي
ام عدي : ييييي اسم الله عليها وقاعدة وماسكة بايده، خليها تربطه بحبل احسن يهرب منها
ام بيان : ههههههه لا تخافي شكله مفعولها قوي ما بهرب
ام عدي : لنشوف ازا رح تقدر تكمل ولا لا
ام بيان : ... ستي هينا بنتفرج
////
كنت مبسوط كثير بجية ابوي على ياسمين، وسلامها اله وموقفها قدام الكل خلاني انبسط، وهالاشي مو جديد عليها ..
بس لسا قلبي مكسور وغصة كبيرة منكدة عيشتي؛ بسبب كلام امي لياسمين وعدم مقدرتي على نسيانه وبنفس الوقت مو متعود على هيك علاقة بين امي ومرتي ..
احمد : كيف حالك يمة ؟ كيف صحتك
منى : الحمدلله كله تمام، انت مبين عليك تعبان، ليكون مريض ؟
احمد ( بتهرب ) : لا لا عادي، بس كنت بضحك على الشلة ونهفاتهم
منى : ههههه بكونوا مهيصين، زمان ما التموا من بعد قصة سي...
احمد : سيرين صح ؟
منى ( متفاجاة ) : بتعرف ؟
احمد : اه والله بعرف بس خبيت عن ياسمين؛ بس من مبارح حكتلها سيرين كل اشي
منى : احنا ما بنعرف اشي غير انها نزلت البيبي ورجعت مع اهلها
////
بس اللي ما كان عالبال، انها تفاجاني ..
بيان ( بصوت ناعم ) : قصي، كيف دوامك بكرا ؟
قصي ( متفاجأ ) : عادي، قصدي طول اليوم .. ليه ؟
بيان ( بتسبل عيونها ) : بكرا جاية انا وصحباتي عندكم عالجامعة نشوف مشاريع التخرج القديمة عشان ناخد فكرة، فقلت بخبرك بلكي تساعدنا ازا كنت فاضي
قصي : اهلا وسهلا، اكي..
امجد ( قاطعته ) : لو تاجليها لغير يوم، لانه سبحان الله انا كمان رايح بكرا معه
قصي ( مصدوم ) : ...
بيان ( بفضول ) : ليه رايح ؟
امجد ( بثقة ) : ما دخلك
الشباب ( كاتمين ضحكتهم ) : ...
ابو احمد ( بنبرة حادة ) : امممجد !
ابو بيان : فعلا ما دخلها، ما في داعي للسؤال
ما كان هاممني بهاللحظة غير خدودها الحلوين اللي صاروا بلون الكرز، ياااه شو بتذكرهم لما كنت اغازلها وتصير تحكيلي خجلتني ..
تذكرت امي لما تحكي عنها الاميرة ديانا، بس اليوم هية احلى من كل الاميرات ..
امجد ( بلا مبالاة ) : لا مو قصدي اشي لاسمح الله، بس عشان يفضالها قصي
قصي ( من بين اسنانه ) : يعدمني اياك
امجد ( بهمس ) : انت بس راقب بصمت
ياسمين : والله زمان عن ايام الجامعات
قصي : انا كمان جاي عالجامعة عندكم عشان الفصل الجاي مشروعي
بيان ( بخبث ) : امجد احكي لساندرا تساعده
الجميع ( بصدمة ) : مين ساندرا ؟
امجد ( بجكر ) : على سلامتك، انتي بنت خاله اولى بالمساعدة
ياسمين : برضو ما عرفنا مين ساندرا ؟
بيان : بنت تخصص هندسة مدنية ( رمقتني نظرة غيرة ) بعرفها سلفك
ياسمين ( عينها عليي وكاتمة ضحكتها ) : اااه، طيب قصي خدني معك بس تروح خليني اتعرف عليها كمان
آيات : وانا
ديمة : خدوني بنتسلى سوا
قصي ( بلطم ) : حسبي الله ونعم الوكيل
البنات : هههههه
امجد : بتعرف، بدل ما اطلع الصبح من بيتنا واجي عندك خليني انام عندكم اليوم
عمر : هههههههاي
قصي : لا بنلتقي بالجامعة، انا باخد بيان بطريقي
امجد ( زورته ) : نعم ؟!
ام بيان : ههههههه ضحكتوني
امجد / قصي : دوووم الضحكة
بيان : لا تغلب حالك انا طالعة مع صاحباتي لانه مو من الصبح جايين
امجد : خليني ارن على امي اطمنها انه رح ترتاح مني الليلة
ابو ماهر : والله ما انتوا ملاقيين اشي تعملوه، شو هالجيل هاد ؟
ابو علاء : هههههه ما شفت اشي، يا محلاهم قدام الجيل اللي بعدهم
ابو قصي : اه والله، لو تشوفوا طلاب هالمدارس اللي بندرسهم، نفسي افهم اهاليهم وين عنهم ؟
ابو امير : انتوا مواليد اي سنة يا شباب ؟
عمر : انا و...
ياسمين ( قاطعته ) : بابا امجد وعمر اكبر مني بسنة، يعني ١٩٩٢، وقصي اصغر منهم بسنتين، واحمد وعلاء ١٩٨٨، وعدي ١٩٨٩ صح ؟
مها : هو قصده عن امجد وعمر وقصي الباقي بعرفهم
علاء : مهي مو عارفة كيف بدها تجيب سيرة احمد هههههه
عدي : ما حدا مهم قده عندها، لازم تجيب سيرته طبعا
ديمة : اكيد ما احلاها وحدة متزوجة وتجيب سيرة حدا غير زوجها
آيات : وتخيلي يوصل الخبر لزوجها مع شوية بهارات، بتطلع ناكرة العشرة والمعروف والله اعلم شو كمان
هيثم : لا حول ولا قوة الا بالله، شايف البهارات كلها عندكم والله يا خالي
البنات : هههههههههه
حنين : الله وكيلك ما في اشطر منهم بالبهارات في الحكي، اما تعال دوق اكلهم ما بيتاكل
قصي : يسلملي المعدل انا
عمر : ما يبلى وما يتخ
امجد : عقبال ما ننعزم على خروف محشي حلوان خطبتك
حنين : كنافة كتيرة عليكم، ناقصني اخسر خروف عشانكم
الجميع : هههههههه
عدي : له يا حنين، واحنا اللي بدنا نفرح فيكي ونرقصلك
ياسمين : طولوا بالكم من هون ليجي العريس اول
امجد : استعيني باختك شغلها قوي عالرجال وتاثيرها لا يزول، اعترفي وين حاطيتله السحر لاخوي ؟
ياسمين ( بجكر وبتبخر حالها باصابعها ) : تحت المخدة ههههه، قل اعوذ برب الفلق، فضايل قل هو الله احد
سيرين : الله يستر هالتاثير من الزولان خصوصا انك بعيدة حاليا
ديمة : اه والله
ريم : استغفر الله العظيم، ولكم خلص
امجد ( بسخرية ) : اتطلعوا العاقلة ست البنات كلها، نياااااله ونيال اهله اللي راضيين عليه
سهى : ههههههه يا بي منك ما اقواك انت
علاء ( بزناخة ) : قل اعوذ برب الفلق، يارب تمضى الليلة على خير بيني وبينك بعد ما تم النق علينا
البنات : هههههههاي
امجد : ماشي يا علاء
منى : الو
امجد ( فاتح سبيكر ) : يسعدلي هالمسا، نمتي ؟
منى : لا صاحية، روحتوا ؟
امجد : على وشك، بس حبيت اخبرك بالتطورات هاظ ياستي ابن اختك سوسو الله يطول عمرها حلف مية يمين وعظيم الا اتغدى عندهم بكرا، قال مشتاقلي يا حبيبي وبتعرفيني قلبي ضعيف انا
منى : اه انا اللي بعرفك، اختصر هات من الاخر يعني
امجد ( كاتم ضحكتي ) : فعشان بدي اروح معه عالجامعة بكرا عرضت عليه انام عنده سواد هالليل وباخذه بسيارتي ردا للجميل
منى ( قاطعتني ) : مو بكرا الاحد ؟
امجد : اه
منى : عاساس عندك امتحان وزهقتنا فيه، وادعولي وما حدا يطلب مني اشي مو فاضي
الجميع : هههههههههههههههه
امجد ( ضربت راسي بايدي باستهبال ) : يا الله وانا بقول شو عندي بكرا متذكر اني مشغول بس شو الاشي كنت ناسيه، يا جماعة مو من قليل الجنة عند اقدام الامهات قلبي حسني انه رح استفيد من اخبارك
منى ( بتضحك ) : طيب اسكت بلا هبل وفاتح سبيكر ومغلب حالك، احمد فرط من الضحك عليك
امجد ( باستغراب وعيني على ياسمين ) : وينه احمد ؟
منى : هيو بحكي معي وسامعك بس انت مو سامعه، قطعت حبل افكارنا
امجد : اه اه طيب سلميلنا عليه، يلا ازعجناكم، عاد قلت بريحك مني
منى : وانا تفائلت شوي بس تزكرت امتحانك قلت بلا ما اوقع بخطيتك
الجميع : ههههههههههه له له
////
منى : هههههه الله يهديه هالولد ما ببطل عادته
احمد : ما بحب يظهر جوهره الكويس قدام حدا، بلا ما ينصاب بالعين
منى : انداري عنه، المهم مال سيرين حكيتلي ؟؟
احمد ( تنهدت ) : احسن ما تعرفوا، مو ناقصكم نكد
منى : شكلها مشكلة كبيرة، قلبي عليها هالمسكينة ما تهنت بعدها عروس يا حبيبتي
احمد : اه والله انظلمت، ادعيلها يمة
منى ( بغصة ) : بدعيلها وبدعي لكل هالبنات، وبدعي لياسمين الله يسهل ولادتها يارب وما تحتاج عملية
احمد : يخليلنا اياكي ويديمك فوق راسنا
منى ( بتردد ) : ما بتسالك عني ؟
احمد : بتعرف اخبارك اكثر مني ههههه لا تخافي عليها
منى ( دمعوا عيونها ) : والله اشتقتلها، اشتقت لكل اشي فيها، نفسي اشوفها كيف وهية حامل حكيت لايات تصوروا
احمد ( ماسك دموعي ) : ... الله يسامح اللي كان السبب
منى ( بتبكي بحرقة ) : انت كمان سامحني، الله يسامحني ويغفرلي، ما بدي اشي الا انه ربنا يحن عليي بتوبته
احمد : مشان الله لا تعيطي يمة والله دموعك غالية، ارحميني شوي انا بعيد عنك وما بقدر امسحلك اياهم بايدي مثل دايما
منى ( مسحت دموعها واخدت نفس ) : الله يرضى علي...
وقع الموبايل من ايدها، وناديت عليها اكثر من مرة ما ردت ..
فصلت الخط فورا ورنيت على امجد ..
////
انس : والله امي مخلفة عاهة
الشباب : هههههههه
امجد : الله يسامحكم، بس ابصر مين حسدني
قصي : ابصر
امجد : او دعا عليي
عمر : الله اعلم
ياسمين : بقول ماله احمد سكر فجاة
ابو احمد : بتكون امه رنت عليه، بتتسلى معه
ديمة ( بهمس ) : اتدايقتي ؟
ياسمين ( بهمس ) : لا عادي ليه اتدايق
سيرين ( بهمس ) : بحكي معها قدامك صح ؟
ياسمين ( بهمس ) : ... اه عادي دايما بحكي
امجد : الو احمد، يا زلمة مالك بتتنقل فين...
احمد ( مقاطعه ) : الحقوا امي بسرعة، فجاة وقع التلفون من ايدها وبطلت ترد عليي
امجد( وقف وبحكي بخوف ) : شوووو ؟ زمان ولا هسة ؟
احمد : لا هسة، يلا واحد فيكم يروح عالبيت ولك اركض لسا بتحكي
امجد ( بلع ريقه ) : يلا يلا
الجميع : خييير ؟
امجد : امي ما بعرف شو مالها بحكي احمد وقع التلفون من ايدها
آيات ( بتبكي ) : ماما .. يمكن نزل عندها السكري
ابو احمد ( بخوف ) : يلا يلا نلحقها، يا رب سترك
هيثم : انا جاي معكم، خليكي هون
رانيا : ماشي
الجميع : طمنونا عليها
ام ماهر : بدي اروح معهم يلا كوم يا حج
ابو ماهر : والله وانا قلبي مثل النار، بس خليهم يوصلوا اول وبنلحقهم
ابو عدي : ان شاءالله ما بكون صاير اشي
الجميع : يا رب
ياسمين ( بقلق ) : شو القصة ؟ مال خالتو
احمد ( ببكي ) : ياسمين انا خايف كثير عليها، كنا نحكي بالموضوع وكانت .. كانت
ياسمين ( بتوتر ) : شووو ؟
احمد : كانت تحكيلي انها بتطلب من ربنا المغفرة
قشعر بدني من كلام خالتي، وغص الحكي بحلقي وما قدرت اكمل ..
يا خسارة يا خالتو اللي كنتي بحياتي كل اشي بعد اهلي، بتقذفيني بدون تفكير ..
ياااه شو انه احنا البشر بنتهاون باشياء، بس للاسف هية كبيرة عند ربنا ( وتحسبونه هينا وهو عند الله عظيم ) ..
////
نهى : خلينا نروح احنا كمان، بكفي سهر
مها : اقعدوا مالكم ؟ ما حدا روح
نهى : والله قلبي على منى تنكدت بيني وبينك
مها : هلا بطمنونا ان شاءالله ما فيها اشي
سهى : شوفوا ياسمين مخطوف لونها، كانت تحكي مع احمد ؟
مها : اه والله، ابصر مالها ؟
نهى : اساليها
مها : ياسمين ؟ تعالي ماما اشوفك
ياسمين ( بحزن ) : نعم ؟
سهى : شو مالك خالتو ليه هيك مصفرنة ؟
نهى : تعبناكي معنا
ياسمين ( بتهز راسها ) : ابدا، بس كان احمد فاتح الموضوع مع خالتو مشان هيك تعبت
مها ( عيوني على خواتي ) : شو حاكيين يعني ؟
ياسمين : ما بعرف
سيرين ( اجت فجاة ) : وين رحتي ؟
ياسمين : هيني
ديمة : احنا بدنا نروح، عدي مستعجل نعسان ههههه
ياسمين : اوك، يسلمو عالسهرة الحلوة
ريم : يلا دورك هلا تزورينا، بلشي من عندي تعي تغدي عندي بكرا
ياسمين : يييي حبيبتي والله ما بدي اغلبكم، انا باجي فجاة بتعرفيني متل العيد ههههه
سيرين : ييييي عاد قلت بنعزم معك، خلص انا برتب جدول وببعتلك اياه
ديمة : انا برضو هيك بحكي
ياسمين : بشوف ازا احمد سمحلي، لانه جنني بهالموضوع قال خايف عليي
حنين : ما معه حق يخاف عليكي صراحة، عيب عليه
البنات : هههههه
سهى : متى رح يجي احمودتك ؟
ياسمين : والله ما بين معه لسا
نهى : يعني ما رح يحضر ولادتك ؟
ياسمين : حكالي بعملك مفاجاة، عاد ابصر مين يفاجا التاني، هاي ولادة ما عليها حزر
ام بيان : يلا تقومي بالسلامة وكل شي بهون
ياسمين : امين يارب، فعلا كل تفكيري حاليا بس الله يسهل ولادتي واشوف ابني باحسن صحة وعافية
مها : ان شاءالله بنفرح فيكم كلكم
عدي : وين مرتي ناوية تروحي اليوم ولا لا ؟
ديمة : صراحة لا، بس ازا بدك اياني بروح
ابو قصي / قصي : استغفر الله
علاء : شو ريم بدك نروح احنا كمان ؟
ريم : متل ما بدك
ياسمين : هههههه
سيرين : بتحسيه بالعامد بحكي هيك عشان يغيظ عديله
علاء : حسيتوا انتوا كمان متل احساسها ؟
عدي : انا مبلد تقريبا، المهم يلا تصبحوا على خير
ديمة : طيب دقيقة، بكرا ياسمين معزومة عند ريم عالغدا وانا بدي اروح طبعا
علاء : احنا عزمناها ؟ متى ؟
الجميع : هههههههه
ياسمين : شو سيد علاء مو عاجبك شكله ؟
علاء : لا اعوذ بالله، بس مستغرب من سرعة الاحداث
سيرين : سلامتك من الاستغراب
عدي : تعالي نروح بعدين بصير خير
ديمة : لا هلا احكي عشان ازا ما بدك اضل عند اهلي بروح من عندهم اقرب
عدي ( زورها ) : نعم ؟
سيرين : وانا كمان بنام عندهم
علاء : والله اهلا وسهلا بالست ياسمين، رجعنا للمواويل
عدي : راجعة بقوة
ريم : انا لسا ما اكدت اصلا بس همة ما صدقوا
ديمة / سيرين / ياسمين ( شهقوا ) : رييييم !!
ابو علاء : الشباب بدات تفقد السيطرة على نسوانهم
ابو بيان : يوم الك ويوم عليك يا شباب
سهى : ههههه الحق على احمد اللي ما اجا معها
نهى : مو شايفة اشي غلط انا مالكم عالبنات ؟
مها : كلها اضغاث احلام، بتشوفي ولا رح يعملوا اشي مسكينات
سيرين : مهو تم النق علينا
ديمة : بعين الله، هاي ضريبة الزواج
ريم : هههههههه
علاء : اه اضحكي، بتعزمي من وراي ؟ امشي حسابك عالطريق، وخلصيني هاتي هالبنت مبطلة تنمسك مع شلتها
مها : المشكلة هاجمين على ريان جننوه يا حبيبي
ابو امير : طيب خبيه عنهم
مها : وين احطه انت التاني
علاء : تفضلي هي الجماعة علقوا من ورا اطفالينا
نهى : هههههه اطفاليكم، لسا ما شفنا منكم الا هالبريئة
سهى : شفتي بالله ؟ هي نعست يا حبيبتي بكفيها سهر
ريم : يييي هاي ام السهر مجننيتنا
قصي : يا جماعة حدا بعرف شو صار مع خالتي منى ؟ برن عالشباب ما حدا برد
ام ماهر : اه يا ستي خبرنا شو صار معها ؟
قصي : هيني برن على عمر اخر محاولة ما ردوا بروح عندهم .. هي رد .. الو .. وين ؟ .. شو ؟ ليه مستشفى ؟ .. تمام بس ردوا لما ارن عليكم جننتوني .. سلام
الجميع ( بلهفة ) : شو حكالك ؟
قصي ( تنهد ) : لقوها فعلا غايبة عن الوعي واخدوها عالمستشفى
////
المشكلة بامي انها حست بتانيب الضمير بوقت متاخر، او بالاحرى بعد فوات الاوان ..
ياسمين هسة بس ربنا بقدر يهديها انها تسامحها، لانه عندها بكون خلص الكلام والحق كله معها ..
ولنفرض انها سامحتها بشكل عام، ما بنضمن انه ترجع علاقتها فيها ..
احمد وصل لمرحلة فوق التحمل، واحنا بس بدنا نحافظ على صحتها والباقي كله بهون ..
منى ( بتبكي ) : ما بدي اموت وربنا مو تايب عليي، وياسمين مو مسامحتني، ودوني عندها اترجاها تسامحني
ابو احمد : ... بعد عمر طويل، شو هالحكي ؟ ربنا غفور رحيم اذا تاب العبد اكيد الله بقبل توبته ( قل يا عبادي الذين اسرفوا على انفسهم لا تقنطوا من رحمة الله )
هيثم : ... انا تعبت من هالموال يا منى، بينك وبين ربنا ما في حجاب، وياسمين بتقدري تستسمحيها باي وقت وهي حرة عاد، المهم انتي ما تتاخري اكثر من هيك
منى : ما حدا فاهم عليي، انا مو قادرة اواجه يا جماعة
هيثم ( مسك اعصابه ) : ما تخافي، لا تكوني جبانة والشيطان يغلبك
آيات : والله انها بتسال عنك، وقلبها عندك، شوفي رسائل الواتس عندي من لما اجيناكي لحد هلا ما وقفت وهي تسال
ابو احمد : انتي ربيتيها مثل بنتك وعارفتيها اكثر وحدة، كلامنا كله ما اله داعي
منى ( بتهز راسها بالايجاب ) : ...
عمر : عمتي، خلي هالحاجز ينكسر واحنا كلنا بنواجه معك وبنساعدك، وياسمين اتركيها عليي
منى ( مبستمة ) : مو بعيدة تمون عليها اكتر من زوجها
آيات : زوجها اللي فيه مكفيه، بكفي انه ما بعرف عن مرضك وقلبه متل النار عليكي
هيثم : يلا هي خلص الدوا، خليني اشوف الدكتور وارجعلكم مشان نطلعها
ابو احمد : ما يحرمنا منك دكتورنا
عمر : جاي معك عمي
امجد ( بهمس ) : ما في داعي امي تعرف عن عمايلك مع عمر
آيات ( بعصبية ) : عفكرة انا اللي لازم انبهكم، وعمر انا بعرف كيف اتفاهم معه بعدين
امجد ( بكز على اسناني ) : بتعرفي .. اللي بعبرك واللي ما بعبرك واحد، روحي من وجهي احسن ما احط قهري فيكي واجمع المستشفى علينا
آيات : ...
هيثم : منيح اللي اجيت معي، خلينا نتفاهم شوي
عمر : خير عمي في اشي ؟
هيثم : اكيد في اشي، شو هاد اللي عملته انت وخطيبتك قدام العيلة وبتعرف في ناس مو رايدنلكم الخير
عمر ( بهز راسه ) : والله عارف انه غلط بس طلعتني عن اعصابي الله يسامحها، وما اختصرت عشان اسيطر على حالي ضلت تناقش وتبرم
هيثم : المفروض انت اختصرت، لازم تتعلم كيف تتعامل مع شريكة حياتك بين الناس، مو كل اسراركم تنكشف وخططكم تكون للملأ
عمر : ولا يهمك عمي، ان شاءالله كل اشي بتغير من يوم وطالع
_______________________________
بعد السهرة الممتعة اللي عشناها، الا انه القدر دايما بكون مخبيلنا مفاجاة ..
نفس القصة الها شهور حايمة حوالين رقبتنا، كأنها حبل مشنقة بشد على انفاسنا كل ما انفتحت سيرتها ..
عدي : انا تعبت كثير من هالموضوع، ياسمين من جهة وعمتي من جهة
ديمة : مسكينة مو قادرة تتحمل اكتر
عدي : طيب شو العمل ؟ بدنا نضل نتفرج هيك عليهم
ديمة : شو نعمل ؟ خالتو منى ما تركت لحدا مجال يدافع عنها
عدي : ... هاي اكبر مشكلة
ديمة : يعني حتى ابنها بذات نفسه مختصر وما بتدخل
عدي : ااااخ على احمد، الله يكون بعونه ويهون عليه ويهون على اخوي عمر
ديمة : امين يارب، بس شفت شفت مرت خالو محمود مو طبيعية قال سد ديونك، وليه ما بدك اياها تشتغل ؟
عدي : استغفر الله العظيم، كانه رح ياكلهم
ديمة : بس برافو عليه اللي سد دينه لخالو اول واحد، حافظها منيح
عدي : متاكد انه امي بتحرضها تحكي هالكلام، الله يسامحها بدها تنكد عليهم باي شكل
ديمة : وآيات التانية علقت بلسانه قدام الناس الله سترهم من طوشة
عدي : مهو كمان مو منطقي اللي بحكيه، اكيد رح يتفاهمو بين بعض .. بعدين ماشاءالله عنك يا عاقلة جاي تتفلسفي على سلفتك عاساس انتي احسن ؟
ديمة ( كاتمة ضحكتها ) : ...
عدي : الله يهديكم لو بصير وراكم مية ولد ما بتتغيروا
ديمة : شو دخل عدد الاولاد بالموضوع ؟
عدي : بس مو هيك يا ديمة، معقول اللي عملتيه فيي اليوم ؟ لا وما ضل الا تنامي عند اهلك !
ديمة : شو فيها لو نمت عند اهلي مثلا ؟
عدي : ...
ديمة : رد مالك سكتت ؟!
عدي ( بعصبية ) : اختصري، لما تشوفيني سكتت لا ترجعي تسالي
ديمة ( عقدت حواجبها ) : ...
_______________________________
علاء : يعني سهرة من الاخر صراحة
ابو قصي : الله يعدي هالايام على خير
سهى : الواحد من وين ولا من وين يتحمل ؟
ريم : ختامها مسك مع بنتك وزوجها
قصي : لا تذكرينا، راسي بوجعني بالله تسكتوا
علاء ( عينه على قصي بالمراية ) : سلامته لراسك حبيبنا
سهى : ما عملت اشي بس ابن اخوي متدايق عشان اخوه
ابو قصي : وجعني قلبي على هالزلمة، ليه هيك بحكوا معه ؟
علاء : يعني غريب تفكيره برضو، واحد بمثل وضعه يحمد ربه انه مرته وظيفتها ممتازة
قصي : هي هاي المشكلة، ما بده يبين قدام الناس انه طمعان فيها
ريم : طمعان بشو ؟ لا تجلطني انت وتفكيرك
قصي ( عصب ) : ولك انا شو دخلني ؟ بحكيلك عنه هوة
ابو قصي : لا حول ولا قوة الا بالله
سهى : خلص يدبروا حالهم، كل واحد عقله براسه وبعرف خلاصه
علاء : هسة اهم اشي خالتي يستقر وضعها وكل اشي بهون، الثانية ياسمين ما عجبتني حالتها كانها تعبانة
سهى : ايييييه الله يشفيها ويعافيها، ياسمين كان احمد يحكي معها وحاكيلها انه كاينين فاتحين الموضوع هو وامه
الجميع : ااااه ؟
سهى : والله العليم انه هاد سبب اللي صار معها
علاء ( تنهد ) : وبعدييييين مع هالشغلة، المشكلة انا والله قلبي بطل يتحمل من جهة اختي واللي صار معها ومن جهة العيلة ومشاكلها
ابو قصي : سيرين متغيرة كثير ما عرفتها
ريم : اه يا عليي مسكينة هالبنت
قصي : نفسي اعرف شو مالهم ؟ عين وطرقتهم يعني
علاء : ...
////
كان عم يترجاني يشوفها، ما قدرت اخون اخوي وبذلت كل جهدي حتى اساعده ..
انا بعرف وجع الحب ودقته، واليوم اخي عم يمرق بنفس حالتي ويمكن اصعب ..
مرته وحلاله وكل حياته بعيدة عنه خطوات، وما بقدر يشوفها او يحكي معها ..
حمزة : بس ينزلوا رني وافصلي
رانيا : تمام، جهز حالك هيهم عالباب
حمزة : وانا بالسيارة، هيني نزلت
////
كهرباء مشيت بكل خلية في جسمي لما وصلت على بيت خالتي، شريط بدا بذكريات حلوة كتيييير بس نهايته مرة او اشد مرارة من العلقم انتهى فيه هالشريط ..
ابو علاء ( في المصعد ) : دخنا من النعس
نهى : ومن الهموم والتفكير، الله يشفيكي يا منى
سيرين : امين
فتح باب المصعد بعد اقل من دقيقتين، وكملنا طريقنا لباب العمارة، اللي انفتح فجاة قدامنا ..
كان ظله الطويل مغطي المكان، ولمعة عيونه الخضراء مختفية ليحل مكانها دمعة مجروحة ..
سيرين ( بصوت خافت ) : حمزة
ابو علاء ( بنبرة حادة ) : هاد اللي كان ناقصنا حتى يخلص هاليوم
حمزة ( عيونه عليي ) : ... سامحنا عمي، لو كنت بعرف ما ازعجتك
نهى ( مصدومة ) : ...
مشيوا اهلي وانا جنبهم، كان بابا محاوطني وخايف عليي ..
ما بعرف هالمرة ليه ما انزعجت منه، وعملت جهدي اتهرب من مراقبة بابا الي ..
////
واخيرا شفتها .. تأملتها .. وقربت منها .. سرقت نظرة شوق من عيونها .. وقدرت المس اصابعها ..
ياااه شو كنت متعطش لهاللمسة من ايديها؛ اللي ما كنت امِل من مسكتهم ..
رانيا : طمني شو صار ؟
حمزة : كل خير لا تخافي على اخوكي
رانيا : الله يسامحك ويسامح اللي كان السبب
حمزة : لا تعكريلي مزاجي خليني مبسوط شوي، الي زمان ما انبسطت هالقد
رانيا : يا سيدي، الله يهنيك بس فهمني عشان انبسط معك
حمزة : بكل جدارة قدرت امسك ايدها، كانت ماشية جنب ابوها ومرقت ومديت ايدي بسرعة شبكنا اصابعنا لمدة ثواني بعد غياب شهر يا رانيا، متخيلة !
رانيا ( بدهشة ) : ابوها ما شافكم ؟ وهية عادي استجابتلك ؟
حمزة : صدقيني ما بهمني ابوها، بس اللي قهرني هية بعدت حالها بسرعة وكاني حدا غريب عنها
رانيا : بعد كل اشي عملته فيها ومستغرب ؟ وحدة غيرها بتستغل وجود اهلها وبتشرشحك
حمزة : ههههه ضحكتيني، انتي ما بتعرفيها قدي، لو تعرفي كمية الحب اللي جواها تجاهي ما بتحكي هالحكي
رانيا ( بعصبية ) : ومدامك عارف كمية الحب كيف قدرت تعمل فيها اللي عملته ؟ ااااه ؟ جاوبني
حمزة : ..
رانيا ( بحقد ) : يا خسارة الحب فيك، انت واهلك كتيرة عليكم وحدة متلها احنا لو بنفهم ما بنوصل لهون معها بس شو فايدة الحكي
حمزة : ... شكرا، يلا ضل اشي تحكيلي اياه قبل ما انقبر انام
رانيا : ... لا
////
رانيا ( بلبكة ) : اه حبيبي اجيت ؟ كيف صارت ام احمد ؟
هيثم : اه اجيت الحمدلله صارت احسن .. يلا بدنا نروح، اجهزي
رانيا : جاهزة، يلا ادومة تعال البس جكيتك ماما
امير ( ببكي ) : بدي آدم
ابو امير : سيمفونية كل لقاء هههه
ياسمين : جد ؟ وصلنا لهالمرحلة يعني ؟
هيثم : وهسة آدم طول الطريق بقضيها يعيط، وهاتي عاد سكتيه
مها : خليه عنا بالله، امانة
رانيا : يييي انتي التانية بكفيكي اللي عندك، وهي بنتك بدك اتدلليها بدل اللي راح ههههه
هيثم : صحيح، ياسمين اجت وكفى
ابو امير : ياسمين مدللة حالها من حالها ما بنخاف عليها
ياسمين : ماشاءالله، صدقني ما كنت عارفة هههه نيالي فعلا
حنين : ياسمين بكفيها اللي فيها بس مشان الله اعتقوها خلوها تاخد نفس
هيثم ( بهز راسي ) : فعلا معك حق، الله يقويها ويعينها .. يلا تصبحوا على خير
ما كان عاحبني منظر رانيا، ومبين انها مزعوجة من اشي ..
هيثم ( مسكت ايدها ) : رنوش ؟ انتي منيحة حبيبتي
رانيا ( متدايقة ) : اه منيحة ما تقلق عليي
هيثم : مو متطمن لمنظر وجهك، باين صاير اشي معك احكيلي
رانيا ( تنهدت ) : انا كرهانة كل اشي حوالي حتى .. حتى كرهانة حالي، بعمري ما حسيت بهالشعور البشع هاد
هيثم : زودتيها، مو شايف اشي مستاهل هالمبالغة هاي ؟ يمكن بنات خواتي زودوها شوي عليكي اليوم وواضح انهم متغيرات ( سكتت شوي ) .. خصوصا ياسمين
رانيا : كل هاد ما بهمني، قد ما سيرين متغيرة ( بتبكي ) حرام حرام يا هيثم والله كنت اشوفها واشوف حالي فيها انها مرت اخوي، ليه هيك ليييييه ؟
هيثم ( مسكتها ) : اهدي حبيبتي مو منيح الك التوتر
رانيا : ... تمام، بس غصب عني بصير هيك يا هيثم .. غصب
هيثم : بتفرج ان شاءالله، انا متاكد كل اشي رح ينتهي ونرجع لحياتنا زمان، كل كابوس اكيد في وراه حلم حلو
////
نهى ( بتبكي ) : يا رب يغير هالحال، وين كنا ووين صرنا، حمزة كنت اعتبره متل علاء عندي ليه هيك يعمل ؟ لييييه
سيرين ( مركزة نظري على اصابعي وحابسة دموعي ) : ...
ابو علاء ( معصب ) : سكري على هالسيرة خلص، لسا حمزة حمزة .. ما بدي اسمع باسمه ابدا، سقا الله وموعد المحكمة جاي خلينا نرتاح منهم
سيرين ( بتردد ) : بابا
ابو علاء ( اتطلع بالمراية ) : نعم بابا
سيرين : أ .. أ .. أنا ما بدي اتطلق
ابو علاء ( شحط بريك ) : شووو ؟
يتبع ..
عن الكاتب
وعد السعيد
كاتبة قصصية