بداية القصة:
قبل فترة قريت قصة عن شخص مركبه إتدمر على البحر، وما كان بيعرف يعوم، فظل يدعي ربنا إن ينقذه من البحر.أثناء ماهو موجود على البحر ومتمسك بلوح خشبي جات مارة بجنبه سفينة ووقفوا علشان ينقذوه بس رفض إنقاذهم ليه وقال ليهم ربنا هو اللي حاينقذني.بعد فترة جات مركب شراعية مارة بجنبه وسيد المركب وقفها علشان ينقذه برضو رفض وقال ليه ربنا حاينقذني.وإستمر نفس الحال لمدة 3 مرات، وبعد المرة التالت مافيش شخص جاء لإنقاذه لغاية ما إتوفى.
المغذى من القصة السابقة :
إنها قريبة لموضوع العلاقات، لمن شخص علاقته تنتهي مع شخص تاني بيفضل قاعد في مكانه منتظر حصول معجزة تغير حياته وتخليه ينسى الشخص داك في لحظة (مافيش معجزة أنقذت الشخص اللي مركبه إتدمر على البحر، ومافيش معجزة حاتخليك تتناسى المشاعر الأليمة بين يوم وليلة!)
• الموف أون في العلاقات ما بيتم عن طريق المعجزات، بيتم عن طريق سلسلة كبيرة من الخطوات والطرق الوعرة.السلسلة قد تستمر لشهور، أو لسنين، أو لبضع أسابيع، الأمر بيعتمد في النهاية على مكانة الشخص عندك، وعلى قوة العلاقة اللي كانت بينكم، وعلى نوع شخصيتك، وعلى دعم البيئة المحيطة بيك." مش من المنطق إنك تنسى شخص علاقتك بيه كانت قوية في فترة بسيطة!"
• (الهدف الأساسي من الموف أون مش النسيان بل مواصلة الحياة وإنتبه للنقطة دي بالذات)، فعلشان كده بدل توجه تركيزك إلى التناسي وجه تركيزك إلى التقدم في الحياة والتقدم كفيل بإن يساعدك على التناسي/التقليل من تأثير العلاقة السابقة.
• زي ما صاحب المركب ماحصلت ليه معجزة وأنقذته من البحر كتعلم السباحة مثلا، مافيش معجزة حاتحصل وتخليك تنسى شخص كنت معاه في علاقة عاطفية "بس مع مواصلة حياتك ومع الزمن حايخف تأثيره عليك لكن مش حاتنساه".
• تركيز الشخص المرمي على البحر، على المعجزة منعه من التركيز على حكمة ربنا (بإرسال المراكب ليه في عرض البحر)،
كذلك تركيزك على النسيان حايعميك من مواصلة حياتك.( لأن المنطق بيقول: لو عاوز تنسى حاجة ماتفكر فيها، بس إنت بتركيزك على النسيان بتساعد دماغك على التذكر وعدم النسيان وبالتالي مخالفة المنطق)
شوية خطوات بتساعدك على التخطي:
• الإعتراف بفشل العلاقة وعدم السعي لرمي اللوم سواء عليك أو على الطرف الثاني.( بغض النظر عن مين كان السبب في نهاية العلاقة دي، فالعلاقة إنتهت والبحث عن مذنب لرمي اللوم عليه مش حايغير شيء من حقيقة اللي حصل).
• التقبل:
تقبل نهاية العلاقة، تقبل الحاجات الكويسة اللي حصلت فيها، تقبل الحاجات السيئة اللي حصلت فيها، تقبل إنها إنتهت وم عاد ينفع الرجوع ليها من جديد.( التقبل مكمل للإعتراف وبيساعدك على تجاوز العلاقة من غير حدوث مقاومة كبيرة.والتقبل بيغنيك عن السعي للحصول على إجابات من الطرف الثاني لتفسير نهاية العلاقة).
• السماح للمشاعر السلبية بالتعبير عن نفسها:
( المتعارف عليه إن بعد كل فشل بتوجد مشاعر سلبية، فالسماح للمشاعر دي بالخروج والتعبير عن نفسها في فترة الحزن/الألم بيساعد على التقليل من حدة/تأثير الفشل وبالتالي بيساعد على التخطي.أما كبت المشاعر السلبية بيؤجل المواجهة لفترة تانية وبالتالي م بيساعد على التخطي بل بيزيد من كثرة التفكير واللوم)
• المواصلة:
( من النصائح اللي بتقدم لمرضى الإكتئاب، ممارسة الرياضة والقيام بالأنشطة التحفيزية/الممتعة حتى لو كانت ماعندهم الرغبة/النية لذلك، والسبب في الحاجة دي إعادة تحفيز مناطق السعادة من أجل إفراز هرمونات السعادة لأجل تحقيقها.فبالتالي علشان يتحقق التخطي لابد من إنك تسعى ليه، عن طريق الرياضة/ ممارسة الأنشطة الممتعة الخاصة بيك.بس وإنت بتعمل كده -في التخطي-، حاول ما تربط ممارسة الأنشطة دي بالنسيان لأنك بالطريقة دي (حاتربط مابين النشاط والشخص صاحب التأثير السلبي عليك)"فعلشان كده من البداية ركزت على مفهوم المواصلة (الموف أون) بدلاً من تركيزي على مفهوم النسيان؛ لأن النسيان مش حايحصل بس التخطي حايحصل.""فعلشان كده خلي الربط مرتكز على مفهوم التخطي/المواصلة وبين القيام بالنشاطات الممتعة").
• إعادة ملء الفراغ:
( في طرق عديدة لملء الفراغ منها: "إقامة علاقات عاطفية جديدة-مابنصح بيه لأن مؤذي للطرفين-، التركيز على تطوير نفسك، إشغال نفسك بالعديد من المهام، تعويض اللي حصل.أفضل إسلوب ممكن تستخدمه لملء الفراغ هو تعويض النقص اللي حصل " خسرت كرامتك يبقى تسعى لتعويضها، خسرت إحترامك إذا تسعى لإعادته، خسرتي شرفك تسعي للتوبة النصوحة وبدأ بداية جديدة .. الخ."الهدف من الإسلوب السابق إعادة تعويض اللي خسرته بالطريقة المناسبة، وتركيزك على تعويض اللي خسرته كفيل بإن يساعدك على التحسن والمواصلة")
• التسامح (إختياري وليس ٱجباري):
( إذا قادر تسامح اللي أذاك فالأفضل تسامح على طول من غير م تتأخر، لأن التسامح بيساعدك على التركيز على نفسك، وبيخفض من حدة التفكير في الشخص المؤذي، وبيساعد على خروج المشاعر السلبية والتعبير عنها وبالتالي بيساعدك على التخطي.العوائد اللي بترجع ليك من التسامح أكتر من العوائد اللي ممكن ترجع ليك عند عدم القيام بيه.التسامح معناه الغفران " أنا بغفر لنفسي أولاً ، وبغفر لنفسي أخطاء التجربة السابقة ثانياً، وبنظر لنفسي كإنسان طبيعي ممكن يخطئ ويصيب ثالثاً".التسامح معناه التجاوز " بعاين للعِبر الطلعت بيها من التجربة السابقة، وبحاول أستفيد منها في قادم حياتي، ومابسعى للإنتقام ولا بشغل روحي بيه" "طبعا ده كله مش معناه إن اللي أذاك مش حايتأذي، لا حايتأذي لأن كل شخص حايتجرع من السم اللي أذاقه للآخرين، بس متين وكيف دي عند ربنا مش عندك ثاني")
• التركيز على هدف جديد.
( بعد نهاية كل علاقة/تجربة فاشلة، بيحصل نوع من الإنتكاسة اللي بيصيب الواحد باليأس وبعدم القيمة في هذه الحياة، واللي بسبب فيما بعد فراغ كبير بيصحبه تفكير زائد ولوم زائد للنفس مع التنقيص من قيمتها وعدم أحقيتها بالسعادة مثل غيرها-تشوهات معرفية-.
فعلشان نتعامل مع الإنتكاسة دي لابد من إن نطبق الخطوات السابقة بدأً بالإعتراف وصولاً إلى التسامح، ثم التركيز على أهداف سريعة التحقق لأجل الحصول على لذة الإنجاز وملأ الفراغ، وإستشعار قيمة النفس وأحقيتها من جديد.
الأهداف دي ممكن تكون: " قراءة كتاب، تعلم حرفة خفيفة، بدء مشروع صغير، القيام برحلات .. إلخ")
• قوم أمشي أتحرك بعد فترة الحزن.
( ناس قوم أمشي إقرأ لخصوا ليك تخطي الحزن بعنوان مبادرتهم قوم أمشي أقرأ اللي معناه حتى لو ماليك نفس قوم إقرأ ، حتى لو مش حابب أمشي أقرأ، حتى لو مش طايق القراءة قوم أمشي إقرأ وده علشان مصلحتك في النهاية صح!
وعلى نفس النسق، قوم أمشي أتحرك، أبني روابط عاطفية جديدة - ماعلاقات حب طبعا، والأفضل تنتظر 6 شهور على الأقل أو لمن تحس إنك إتجاوزت العلاقة السابقة-، أخرج مع أصحابك، إرجع لممارسة إهتماماتك ونشاطاتك زي م ذكرنا مسبقا.
طبيعي جدا ما تحس في البداية بالمتعة أو بأثر التحرك وده بماثل في تأثيره لحظة بدايتك المذاكرة بتحس بكسل وعدم رغبة بس مع المواصلة بتحس بدخولك لمود القراءة.)
• الصبر.
( أفضل معالج لتجارب الفشل/العلاقات الفاشلة، هو الزمن، والزمن مش حايقدر يعالجك مالم تطبق الخطوات السابقة أو حتى جزء منها وتصبر عليها.
كونك عاوز تعدي المشاعر السيئة اللي بتعتريك حاليا بسرعة بماثل لرغبتك في إن زراعتك تقوم بعد تزرع البذور في لحظتها هل حاتقوم أكيد لا صح؟ إذا برضو مش حاتقدر تتخلص من المشاعر السيئة اللي بتعتريك حاليا بسهولة وسرعة.
إذا لابد من الصبر والإهتمام بتنفيذ الخطوات السابق ذكرها ،زي ماحتهتهم بالعناية بزراعتك من تنظيف للأرض الزراعية، وتسميد الأرض، وسقاية الماء، وحمايتها من الآفات كالحشرات والطيور).
• المواجدة العاطفية:
( أكثر شيء بنحتاجه بعد الخروج من تجربة فاشلة، هو إن نحس بقيمتنا وبإننا مرغوبين ومش لوحدنا، والحاجة دي مش حاتتحقق من غير وجود دعم معنوي من الناس اللي حولينا." والخطوة دي بالذات بتوضح ليك ليه العلاقات اللي من غير رابط شرعي حرام، لأن لو علاقتك ما كانت برابط شرعي مش حاتقدر تحصل على الدعم المعنوي من الناس المحيطين بيك-أسرتك على سبيل المثال لأنها الداعم الأول-، لأن وبكل بساطة علاقتك الفاشلة نشأت من وراهم."
بس عموما لابد من إنك تسعى لإنك تفضفض وتعبر عن مشاعر الألم للناس القريبة ليك وتحاول تخليهم قريبين ليك في اللحظة دي، وإذا م لقيت شخص قريب ليك ممكن يفهمك أو يقدم ليك الدعم اللي إنت محتاجه ممكن تحجز عند مختص، أو تدخل الفيس بصفحة وهمية وتبدي تحكي لأول زول يقبل طلب صداقتك ويوافق يتكلم معاك.
أيضا في الكتابة، كخيار إضافي في حالة عدم القدرة على البوح باللي حصل ليك للناس القريبة ليك لبعض الأسباب، الكتابة حاتساعدك على التفريغ العاطفي، وحاتساعدك على ترتيب ذهنك وإستعادة إتزانك بالتدريج).
وبس كده يا مؤمن 💛
✍️ محمد عمر
