هذا النص عميق جدا وغير متوافق مع أفكار بعض الناس ، فإن لم تتعمق معي حتى الغرق ، لا أنصحك بالقراءة #لانو_أفكارك_حتجوط .طبعاً أي زول لو سألتو ما هو الحب ؟ حيعدد ليك حاجات كتيرة من ضمنها #الإهتمام وأنا شايف انو ده غلط ، أنا شايف انو الحب والإهتمام ما بتفقو والحب ما بحتاج الإهتمام .قبل ما نخش في الموضوع ح أقول تعريف الحب والإهتمام في نظري شنو ..- الحب : هو رقيق ومسكين جداً وغيور وطبعو طفولي جدا وما بتحمل أي ضغوطات خارجية وممكن نضحي بأي شي عشانو .- الإهتمام : هو رغبة مؤقته في أمورنا الحياتية الممكن نتخلى عنها عشان حاجة أهم وممكن نرجع لإهتماماتنا تاني بعد إستقرار أوضاع الحاجة الأهم دي .من هنا حاول تتعمق معاي ؛ أي علاقة جديدة بين اثنين بتبدا بالإعجاب ومرات بالحب من أول نظرة ، كلاً من الطرفين في البداية حيدي الطرف التاني أحسن ما عندو ويظهر في أحسن صورة وجرعة عالية جداً من الإهتمام زي الجرعة الزايدة في التخدير ممكن تخرب أي شي ويبقى صعب الزول يرجع طبيعي .عارفين ليه الإهتمام بخرب الحب ! لأنو مع الزمن ح ينتهي وح يسيطر الملل والضجر ويبدا كلاً من الطرفين بإتهام الطرف التاني انو بقى ما بحب وانو بقى بارد المشاعر وتبدأ المشاكل في الظهور ؛ انت ليه بقيت ما مهتم بي ؟ انت ليه ما جبت لي هدية في عيد الحب ؟ انت ليه الأيام دي فاتح لي وما بتضرب لي وطول اليوم بقيت مشغول ؟ انت لو مهتم كان عرفت الليلة أنا مالي ! .. إجابة الأسئلة دي كلها انو بكل بساطة أحد الطرفين رجع يمارس حياتو الطبيعية بمشاغلها ومشاكلها لكن #الحب موجود بس الإهتمام زال مفعول تخديرو المزيف .طيب .. الحاجات الحلوة البين الطرفين من هدايا او لو يوم وقفتو مع بعض في حاجة او وقت همكم تلقو زولكم أول زول واقف جمبك الحاجات دي شنو ؟! دي أسمها #واجبات_الحب ما اهتمام ، واجبات الحب قدام بعض هي البتنعش العلاقة بيناتكم وبتقويها ما الاهتمام ! النفس البشرية دي متغيرة ما دائماً بتفضل على حالها ، الإنسان عندو حاجات كتيرة في حياتو لازم يعملها عشان يعيش ما بقدر يهتم بحاجة واحدة طول الوقت لكن حياتو ح تبقى حلوة وجميلة لو فيها حبيب/ة ، بالرغم من مشاغل الحياة المنعت الإهتمام الحب بكون موجود ، ما تشغلو تفكيركم بالأهتمام وعدمو ، حبو بعض وخافو على بعض واحرصو على واجبات الحب بيناتكم ، اللي هي ؛ الإحترام ، التقدير ، الثقة ، الصبر ، وأهم حاجة الخوف من ربنا في بعضكم .
- أمثلة توضيحية عميقة(حلوة عميقة دي مش ) :الإهتمام بكون في الحاجات الممكن تتخلى عنها #عشان_الحب ، مثلاً ؛ انت مهتم بدراستك واثناء قرايتك أمك تعبت من واجبات الحب طوالي ح تخلي قرايتك وح تقوم تودي أمك المستشفى .. لو لاحظت انك ما بتضرب لأمك يومياً ولا بتقول ليها كلام حلو يومياً لكن بتحبها برغم عدم الإهتمام لأنو ببساطة الحب ما إهتمام الحب واجب ، نفس الشي مع حبيبتك ما لازم تكون مهتم لكن لازم تلتزم بواجب الحب اتجاها .مثال تاني ما عميق شديد :انت مهتم بالكورة وكان في مباراة مهمة ومسخنة ومتابعها ، حبيبتك حصل ليها حاجة أو مشكلة من واجبات الحب تتخلى عن الكورة وتشوف حبك وتقيف جمبها لحدي ما تتطمن عليها ..
- في النهاية يا جماعة بقول ليكم خليكم عميقين في حبكم خلو السطحية وما تتمسكو في سفاسف الأمور والحاجات البسيطة الما ليها داعي ، لأنو زي ما قلت الحب طبعو الرقة وأي ضغوطات خارجية بتنتهي منو ..
#الحب_واجب_ما_اهتمام
بقلم : محمد الزبير محمد
عن الكاتب
Mohamed El-Zubair
كاتب ومدون
مدون وكاتب حر ( خارج نطاق الدائرة )